Deuteronomio 29 - Dios Iwene

¹ Jobekwö laebobe Isabenö Jo̧kwö israel jojodökwö bakobe yöbawö tjujunina jawama. Damötjö̧ Sinai mösa'otjö israel jojodö tjö̧jenama, Isabenö Jo̧ma israel jojodökwö isabenö ja̧tja̧kwa̧ wene bakobe yöbawö tjujunakwawinobe, ja̧danö Moab nijinö tjö̧jenama, Isabenö Jo̧ma Moisesnö weinobe, pjaatakwa̧ jawabi, lȩebakwa̧ jawabi jobadönö yöbawö ujunobö, a̧ja̧kwajadö, israel jojodöbi atadö yöbawö tjujunakobetjö̧, —A̧ja̧kwö dö̧jitjö̧ma, yökawaja̧danö pjakatobö ja̧kobe, ja̧danö a̧ja̧kwökönö dö̧jitjö̧ma, yökawaja̧danö lȩkebobö ja̧kobe, —jö̧ba̧lö.

Moises israel jojodönö yöawina jawa

² Moisesma okobe deinö israel jojodö tjichobö jwöinobe, ja̧danö ichö ko̧ko̧kwajadönö yöawinobe, baikwö: —Chömöledö, ökwödöma isabenö Dios ujulu edö waisadöja, Egipto nijinö i̧sȩbina kwedinaduwobetjö̧. Jau chömöledö, kwöba a'oduwitjö kweda̧laduwonö, Isabenö Jo̧ma Faraonnöbi, ömöayedönöbi, itebo nijibi lȩebinobe.

³ Ja̧danö jobadönö lȩebenama, iteda inesö ujulu i̧sȩbö, inesö labi̧ jawa baledobö weinobe, ja̧danö iteda ujulu i̧sȩbö, jojodö edajitjökö jawa i̧sȩbinobe, iteda inesö ujulu öwawinö.

⁴ Jo̧kwaijayonö, ujulu öwawinö kwedinaduwajayonö, babe möle baibanö Isabenö Jo̧ma ina pjaatinokobe, i̧sȩbina okwa jawa kwöwaisachibaduwobö,chömöledö.

⁵ Ja̧ i̧sȩbo jö̧a̧lina labebö lobö yötawaduwakwö chömöledö, baikwö laebobe Isabenö Jo̧ ökwödönö yöawi̧ma: –Chömöledö Israel jojodö, cuarenta o̧biya baledibanö jojodö deobe kwekachaduwonö, ökwödönö ötibajabe. Ja̧danö, jobe kwekachaduwonö, otiwanö ökwödönö chiteada̧lijatö, lekwe möle kwekachaduwijayonö, kwö̧ka̧mijido̧duwi damösa̧do̧ jwöachökönö wetijatö, ja̧danö sapatubiyabi damösatu jwöachökönö wetijatö.

⁶ Ja̧danö, jobe kwekachaduwonö, pan kwukwaduwobö jwiijayonö, ja̧danö ubasobubi, nio ojwiyobi kwowaduwobö jwiinajayonö, ju'wida iyö chiteada̧lijatö, jö̧tö? Jobekwö ökwödönö chiteada̧lijatö chömöledö, edö kwöwaisachibaduwobö, -Ökwödö israel jojodö duluwo̧ Diosma, Isabenö Jo̧ Diosda, -jö̧ba̧lö kwöwaisachibaduwobö, –jö̧ba̧lö Dios ökwödönö labebö lobö yöawi̧ yötawaduwakwö chömöledö.

⁷ —Ja̧danö, bemi nijibe dichibenabi, Diosma otiwanö iteada̧linobe chömöledö. Bemi niji luwedöbinadö Hesbon comunidad la'aka luwo̧ Sijonbi, Basan niji la'aka luwo̧ Ogbi ökwödönö tjölakwabikwawinobe, jö̧tö? Jo̧kwaijayonö, Dios pjaati̧tjö̧, jobadönö dujuluwijatö,

⁸ ja̧danö juluwajadö, tjiteboinemi 'döbebö demijatö, ja̧danö emajadö, Rubensaso jojodönöbi, Gadsaso jojodönöbi, Manasessaso ja'ö jojodönöbi diyijatö, tjitebo niji baibanö, jö̧tö?

⁹ Jau chömöledö, isabenö yötawaja̧danö otiwanö pjaatinobe Diosma, jo̧kwajabetjö̧ teada̧lönö kwö̧jaduwo, babe Dios wei̧ yötawaja̧danö ja̧bö kwö̧jaduwakobetjö̧. Ja̧danö, isabenö yötawaduwakwö chömöledö, wei̧ a̧ja̧kwö kwö̧jaduwitjö̧ma, isabenö okobe jwiinö kwotidaduwi̧tenia otiwanö laebakobe chömöledö.

¹⁰ —Babe möle okobe deinö bai kwuluwo̧duwi Isabenö Jo̧ Dios öba a'o ko̧ko̧kwö ja̧döja chömöledö, bakwasokwena la'aka luwedöbi, ju'wedö kwuluwedöduwibi, lȩekwa luwedöbi, ökwödö israel jojodötjö ömadöbi,

¹¹ kwitji̧muduwibi, ya̧döbi, kwö̧'da̧deduwi ju̧kwadö jelobetjö ichajadö kwömöayedöduwi imi pabö otidadöbi, ojwiyo wabö otidadöbi. Okobe deinö bakobe Dios öba a'o ko̧ko̧kwö ja̧döja,

¹² kwuluwo̧duwi Isabenö Jo̧ Dios yöbawö ujunaja̧ jawa a̧ja̧kwibö, –Jau, a̧ja̧kwö dö̧jakwedösa, –jö̧ba̧lö kwösödaduwobö. Jau chömöledö, kwuluwo̧duwi Isabenö Jo̧ Diosma bi̧ya yötawaja̧ wene yöbawö ujunajabe, –Isabenö bejenö ja̧takwo̧sa, –jö̧ba̧lö,

¹³ ja̧danö ökwödöma, –Jau, wei̧ a̧ja̧kwö dö̧jobö jo̧be, –jö̧ba̧lö atadö kwösödaduwobö jo̧be, jo̧ba ömöledö bakibaduwanö ökwödönö 'da̧batö ujunakobetjö̧, ja̧danö jo̧bama ökwödö kwösödaduwökwe Dios ö̧jakobetjö̧. Jobekwö ökwödönö iteda ömöledö bakibaduwanö 'da̧batö ujunakwa̧ jawa yöbawö ujuninobe damötjö chömöledö, ökwödönöbi, kwa'dödö Abrahamnöbi, Isaacnöbi, Jacobnöbi.

¹⁴ Ja̧danö, ja̧ yöbawö ujunina badekwachinö, babe ökwödökwö duluwo̧ Isabenö Jo̧ Dioskwö bakobe yöbawö dujunakwawobö yötawobe, yöbawö ujunina badekwachinö isabenö Dios ömöledö kwö̧jaduwakobetjö̧. Ja̧danö, babe yöbawö dujunakwawi̧ma, sule ökwödö bai duluwo̧ Isabenö Jo̧ Dios öba a'o ju̧kwadö jawadamaökö chömöledö,

¹⁵ ökwödö jawabi, kwitjumuduwi tupadanö jojojö ina tjemököwö̧ jawabi, jobadöbi Dios ömöledö tjö̧jakobetjö̧.

¹⁶ —Kwöwaisaduwa chömöledö, damötjö̧ Egipto nijinö dö̧jinama, ja̧danö kwöwaisaduwa, ju'wedö tjitebokwena jojodö tjitebo ö'wejenö döbaledinama, baikwö dichenama, jö̧tö?

¹⁷ Jau chömöledö, jobadö inesö sulabenö ja̧bö tjö̧ji̧ kwedinaduwobe, inesö sulabenö towisa'otjöbi, inawatjöbi, platatjöbi, orotjöbi otikwawö̧ o̧'wo jawanö ösödö tjö̧ji̧ma, jö̧tö?

¹⁸ Teada̧lönö kwö̧jaduwo chömöledö, ökwödötjö ju'wedöma jobadö sulabenö tjösödi̧danö tjösödapji jö̧ba̧lö, baikwö yötawa: Ökwödötjö bakwo̧ö̧kö̧, bakwujuö̧kö̧, bakwejunö ju̧kwadöö̧kö̧, jelesoö̧kö̧ ida̧ökö duluwo̧ Isabenö Jo̧ Diosnö kabatibö, ju'wedö tjösödawö̧nö̧ tjösödobö tjomukwatena. Jobadöjayedö kwö̧'da̧deduwitjö tjö̧jitjö̧ma, wanedö yötawa, tjö̧ji̧ma niekwa bö'diyadanö ichejekwena, niekwa waji̧danö kwö̧'da̧deduwinö wa̧jö, ökwödönö suli̧ tjöwaedakobetjö̧, jo̧kwajabetjö̧ teada̧lönö kwö̧jaduwo chömöledö.

¹⁹ —Jau chömöledö, ökwödötjö ju'wedöma Dios pjaatakwa̧ jawabi, lȩebakwa̧ jawabi yöbawö ujunaja̧ a̧ja̧kwö, tjomajadenö tjomukwatena, –Chuu 'dibo̧ ja̧nö, Dios wei̧ a̧ja̧kwökönö, ötjöda chösödi̧danö ja̧bö chö̧jijayonö, wene jwiinö chö̧jakwo̧sa̧, –jö̧ba̧lö. Jejenö omukwatö, Dios wei̧ a̧ja̧kwökönö idöda tjösödi̧danö ja̧bö tjö̧jitjö̧ma, wene jwötjebena chömöledö, jobadönöbi, ju'wedö sulabenö omukwatöködönöbi suli̧ tjöwaedi̧nö, jo̧kwajabetjö̧ teada̧lönö kwö̧jaduwo chömöledö.

²⁰ Baikwö yötawaduwakwö chömöledö, jobadöjayedönö lȩlöjinö edoböma öpöjödakwo̧ Isabenö Jo̧ma, isabenö jwiinö ödeameakwakwo̧ jobadönö, ja̧danö jobadönö lȩbebö, okobe jwiinö bi'yenö laebi̧ lȩebakwawa jawa jobadönö baledobö lȩebakobe Isabenö Jo̧ma, ja̧danö jobadöbi tjömöledöbi bakobe debö tji̧'yakobe, ji̧bo̧ deinö.

²¹ Jau chömöledö, jo̧bajayo̧ sulabenö ja̧bo̧nö Isabenö Jo̧ma ju'wedö bakwasokwena jojodö israel jojodötjö 'da̧batö ujunakobe, ja̧danö okobe jwiinö bi'ye Dios wei̧ wȩyukwa'yenö laebi̧ lȩebakwawa jawa jo̧banö baledobö weakobe, jo̧banö lȩbebö.

^22-23 —Jwiinö jo̧bajayedönö lȩebakwo̧ Isabenö Jo̧ma, tjitebo niji bakobenö suli̧ waekwi̧nö, Sodoma comunidadbi, Gomorra comunidadbi, Adma comunidadbi, Zeboyin comunidadbi dameakwö söbebö loinadanö, bakwainö jo̧bajayedö tjitebo suli̧ öwaedakobe. Jwiinö tjitebo niji suli̧ öwaedakobe chömöledö, sayunöbi, ubi̧ azufre jawanöbi. Ja̧danö tjiteboinemi nijitjö ju'wi jayebi pokwökakobe, isa'yebi pokwökakobe, jwiinö suli̧ öwaedakobetjö̧. Ja̧danö, suli̧ öwaediawö̧, kwitji̧mu tupadanö jojodöbi, jelobetjö ichajadöbi tjiteboinemi niji edö yetaibakobe, –Ayö, isabenö jobadönö ödameakwinobe Isabenö Jo̧ma, –jö̧ba̧lö.

²⁴ Jau chömöledö, jobadöbi, ju'wedö tjitebotenia jojodöbi ja̧ niji edö abebö tja̧ja̧kwakwedö, –Ayö, tajawedö i̧ya̧ niji suli̧ öwaedinada Isabenö Jo̧ma? Tajawedö inesö ödameakwi̧ i̧sȩbö, jejenö lȩebinada? –jö̧ba̧lö abebö tja̧ja̧kwakwedö.

²⁵ Ja̧danö, jejenö abebö tja̧ja̧kwawö̧, tjatadena, –Tja'dödö tjösödinökwe Isabenö Jo̧ Diosma, Egipto nijitjö öbibö ichejebenama, wei̧ jobadönö yöbawö ujuninobe, -Isabenö weti̧ kwa̧ja̧kwaduwobö jo̧be, -jö̧ba̧lö. Jo̧kwaijayonö wei̧ öpöjödö, Diosnö katjatibinobe,

²⁶ ja̧danö Diosnö ösödökönö, ju'wedö tjösödawö̧nö ösödö tjö̧jinobe, ajayinö wajwitjinawö̧ tjösödawö̧nöma. Jobadönö tjösödoböma weinokobe,

²⁷ jo̧kwajabetjö̧ jejenö sulabenö tjösödiökwe, Isabenö Jo̧ma jwiinö ödameakwinobe jobadönö, ja̧danö okobe jwiinö wei̧ wȩyukwa'yenö laebi̧ lȩebakwa̧ jawa tjitebo niji baledobö lȩebinobe.

²⁸ Jwiinö jobadönö ödameakwobetjö̧, Isabenö Jo̧ma jobadönö tjitebo nijitjö 'yebö loinobe, ja̧danö ju'wedö tjitebonö tjö̧jobö ikwö loinobe, ja̧danö jejenö ikwö loinobetjö̧, bemi nijitjö deinö, jelobetenia tju̧ju̧kwobe babema, –jö̧ba̧lö labebö lobö tjatadakobe.

²⁹ —Jau chömöledö, isabenö Dios wei̧ a̧ja̧kwö dö̧jobö jo̧be, ökwödöbi, ditji̧mu tupadanö jojodöbi. Duluwo̧ Isabenö Jo̧ Diosma, ju'wedö wajwitji̧ jawa waiso̧ chömöledö, ja̧danö ja̧ öwaisi̧ jawatjö, ju'wijayema tojö ujunajabe, –Ötjöda chöwaisobö jo̧be, –jö̧ba̧lö. Jo̧kwaijayonö, iteda wei̧ jawa, ökwödönö i̧sȩbina jawama, ökwödö jawa, ba̧kwelöjatebö a̧ja̧kwö dö̧jobö. Jo̧kwajabetjö̧ ökwödöbi di̧tji̧mu tupadanö jojodöbi bi'ye Dios wei̧ wȩyukwa'yenö laebi̧ jawa a̧ja̧kwö dö̧jobö jo̧be chömöledö, —jö̧ba̧lö yöawinobe Moisesma, israel jojodönö.