Deuteronomio 28 - Dios Iwene

Israel jojodö Dios wei̧ a̧ja̧kwö tjö̧jitjö̧ma, Dios otiwanö pjaatakwa̧ jawa Moises yöawina jawa

¹ Tupakwö yöawinobe Moisesma, israel jojodönö: —Chömöledö, jwaikwöda kwuluwo̧duwi Isabenö Jo̧ Dios wei̧ a̧ja̧kwö ja̧nö, teada̧lönö babe Dios wei̧ ökwödönö yötawi̧ jawa a̧ja̧kwö kwö̧jaduwitjö̧ma, isabenö otiwanö pjaatakwawö̧ja ökwödö israel jojodönö, ja̧danö ökwödönö kabebö ujunakobe, okobe deinö ju'wedö tjitebotenia jojodö tjuluwedö bakibaduwanö.

² Kwuluwo̧duwi Isabenö Jo̧ Dios wei̧ a̧ja̧kwö kwö̧jaduwitjö̧ma, baikwö yötawaduwakwö ökwödönö pjaatakwa̧ma chömöledö:

³ —Comunidadnö kwö̧jaduwenama, otiwanö pjaatakwawö̧ja, ja̧danö mejenö kwö̧jaduwenabi, otiwanö pjaatakwawö̧ja.

⁴ —Kwitji̧muduwi tjö̧ba̧jekwachinö pjaatakwawö̧ja, ja̧danö kwöbatjoduwi otiwanö wa̧ji̧nö pjaatakwawö̧ja, ja̧danö kwajwimuduwi tjö̧ba̧jekwachinö pjaatakwawö̧ja, kwajwimu pakayadöbi, obejadöbi tjö̧ba̧jekwachinö.

⁵ —Trigo jawa otiwanö kwujuna̧laduwobö pjaatakwawö̧ja, ba̧kwelöjatebö otiwanö pan otidö kwujuna̧laduwakobetjö̧.

⁶ —Jelobe kwi̧'yaduwenabi, kwȩwa̧jaduwenabi, ba̧kwelöjatebö okobe jwiinö kwotidaduwi̧tenia otiwanö pjaatakwawö̧ja.

⁷ —Kwöpöjojodöduwi ökwödönö tjujuluwobö tjölakwabikwawenama, jobadönö kwujuluwaduwobö, Isabenö Jo̧ pjaatakwawö̧ja, baikwö yötawa: Bakobe bakwama mananö kwö̧jaduwobekwö tjölakwabikwawobö jweinö tjichijayonö, jwiinö kwujuluwaduwaja̧wö̧ jelobetenia tjipjelekwachinö kwö̧ba a'oduwitjö̧ dö̧tjibakwedö.

⁸ —Okobe jwiinö kwotidaduwi̧tenia, Isabenö Jo̧ otiwanö pjaatakwawö̧ja, kwakwawa lö̧daweju kwejuduwibi su̧'be baibenanö, ja̧dano okobe jwiinö ju'wi kwotidaduwiteniabi otiwanö pjaatakwawö̧ja. Kwuluwo̧duwi Isabenö Jo̧ Diosma kwiteboduwi niji iyobe ökwödönö, ja̧danö iyina niji kwö̧jaduwonö otiwanö pjaatakwawö̧ja.

⁹ —Kwuluwo̧duwi Isabenö Jo̧ Dios wei̧ a̧ja̧kwö ja̧nö, wei̧danö ja̧bö kwö̧jaduwitjö̧ma, Isabenö Jo̧ma ökwödönö 'da̧batö ujunakobe, iteda ömöledö inesö otiwadö kwö̧jaduwinö. Jobekwö 'da̧batö ujunakwa̧ yöbawö ujuninobe chömöledö, ja̧danö wei̧ a̧ja̧kwö kwö̧jaduwiökwe, isabenö jejenö iteda ömöledö kwö̧jaduwinö pjaatakwo̧.

¹⁰ Ja̧danö, jejenö balediawö̧, okobe deinö bö̧jenö ju̧kwadöma ökwödönö edö tjöwaisachibakwedö, –Israel jojodöma Isabenö Jo̧ ömöledöta, –jö̧ba̧lö, ja̧danö waisachibö yetjaibakwedö ökwödönö.

¹¹ —Isabenö Jo̧ otiwanö pjaatakwawö̧ja isabenö nöinö juna̧ladö bakibaduwanö. Kwitji̧muduwibi tjö̧ba̧jekwachobö pjaatakwawö̧ja, ja̧danö kwajwimuduwi pakayadö tjö̧ba̧jekwachobö pjaatakwawö̧ja, ja̧danö kwöbatjoduwi wa̧ji̧ nöinö wa̧jö̧ ba̧jekwachobö pjaatakwawö̧ja. Jau chömöledö, damötjö̧ Isabenö Jo̧ma kwa'dödönö yöbawö ujuninobe, kwiteboduwi niji ökwödönö iyobö, ja̧danö wei̧ a̧ja̧kwö kwö̧jaduwitjö̧ma, ja̧ nijinö otiwanö kwö̧jaduwobö pjaatakwo̧.

¹² Wanedö yötawa chömöledö, Isabenö Jo̧ma iteda itea lödaweju mölejebe juna̧lo̧, ja̧danö wei̧ a̧ja̧kwö kwö̧jaduwiökwe, ja̧ lödaweju po̧bebö, ökwödönö iyakobe, baikwö yötawa: Kwiteboduwitjö ojwiyo o̧bobö baibenama, lödaweju po̧bebö, ojwiyo o̧bobö weakobe, ja̧danö okobe jwiinö otidö kwö̧jaduwitenia, otiwanö iteatjö ökwödönö iyö pjaatakobe. Ja̧danö, jejenö pjabatö ökwödönö iyobetjö̧, ba̧jȩkwachinö kwujuna̧laduwakwedöja, ju'wedö tjitebokwena jojodönö kwiteaduwi kwöbalewaduwenanö baibanö. Jo̧kwaijayonö, jobadö ökwödönö tjöbalewakwa̧ akebaduwobö jwiakobe, ida̧ökö otiwanö kwujuna̧laduwakobetjö̧.

¹³ —Kwuluwo̧duwi Isabenö Jo̧ Dios wei̧ a̧ja̧kwö kwö̧jaduwitjö̧ma, isabenö ju'wedö tjitebokwena luwedö kwö̧jaduwobö pjaatakwo̧ Isabenö Jo̧ma, baikwö wanedö yötawa: Ökwödöma tjöwali'bodanö la'akatjöda kwichejekwaduwökakwedöja, ökwödöma tjuudanöbedö kwichejekwaduwakwedöja. Ja̧danö ökwödöma ju'wedö tjiteebe la'akatjöda kwö̧jaduwökakwedöja, ba̧kwelöjatebö ju'wedö tjöwameda kwö̧jaduwakwedöja. —Jobekwö yötawaduwakwö chömöledö, kwuluwo̧duwi Isabenö Jo̧ Dios wei̧ a̧ja̧kwö kwö̧jaduwiökwe pjaatakwa̧ma. Babe ja̧ Dios wei̧ ökwödönö yöbawö wetaduwakwö chömöledö, ja̧danö teada̧lönö a̧ja̧kwö ja̧nö,

¹⁴ jweinö ökwödönö yötawi̧danö ja̧bö kwö̧jaduwitjö̧ma, isabenö otiwanö pjaatakwawö̧ja. Jau chömöledö, wanedö yötawa, jweinö yöbawö chi̧sȩbama mananö kwi̧'yaduwobo jo̧be, jalachibö ju'wedö tjösödawö̧ o̧'wo jawanö ösödökönö, ja̧danö jobadönö bȩbachibö ösödökönö. Ja̧danö, jweinö yötawi̧danö kwö̧jaduwiökwe, Diosma isabenö otiwanö pjaatakwawö̧ja, —jö̧ba̧lö yöawinobe Moisesma, israel jojodönö.

Israel jojodö Dios wei̧ a̧ja̧kwökönö tjö̧jitjö̧ma, Dios lȩebakwa̧ jawa Moises yöawina jawa

¹⁵ Tupakwö yöawinobe Moisesma, israel jojodönö: —Kwuluwo̧duwi Isabenö Jo̧ Dios wei̧, ja̧bö kwö̧jaduwobö wei̧bi, ju'wi wei̧ jawabi a̧ja̧kwö kwö̧jaduwitjö̧ma, yötawaja̧danö pjaatakobe chömöledö, jo̧kwaijayonö teada̧lönö a̧ja̧kwö jö̧könö, wei̧ öpöjödö kwö̧jaduwitjö̧ma, ökwödönö lȩebakwo̧ chömöledö ökwödönö söbebö loenanö baibanö. Baikwö yötawaduwakwö ökwödönö lȩebakwa̧ma chömöledö:

¹⁶ —Comunidadnö kwö̧jaduwenabi, mejenö kwö̧jaduwenabi, ökwödönö suli̧ öwaedakobe.

¹⁷ —Trigo jawa kwujuna̧laduwapji jö̧ba̧lö suli̧ öwaedakobe, pan jwiköbaduwenanö baibanö.

¹⁸ —Ökwödönö suli̧ öwaedakobe, o̧bukwedönö kwi̧tji̧muduwinö kwemaduwenanö baibanö, ja̧danö kwöbatjoduwi ja'yubenö wa̧jenanö baibanö, ja̧danö kwa̧jwi̧mu pakayadöbi, obejadöbi o̧bukwedönöda tji̧tji̧munö tjemenanö baibanö.

¹⁹ —Jelobe kwi̧'yaduwena ökwödönö suli̧ öwaedakobe, ja̧danö kwȩwa̧jaduwenabi ökwödönö suli̧ öwaedakobe.

²⁰ —Ökwödönö suli̧ waedö, okobe jwiinö sulabenö baledi̧ jawa ökwödönö baledobö weakobe, –Taji ja̧dakwajö? Taji baledajö? –jö̧ba̧lö omukwatö kwö̧jaduwenanö baibanö, ja̧danö ökwödönö suli̧ waedö, ökwödönö söbebö lobö debö kwi̧'yaduwobö weakobe, –Sulabenö ötjö kwuluwo̧duwi Isabenö Jo̧nö kabatibö, sulabenö ja̧badöja, –jö̧ba̧lö.

²¹ —Ökwödönö suli̧ waedö, Isabenö Jo̧ma inesö suli̧ tjö'wöchi̧ jawa kwö'wöchaduwobö weakobe, babe juluwanö kwitebo baibanö tekachaduwakwa̧ nijitjö̧ debö kwi̧'yaduwenanö baibanö.

²² Tjödalökachibanö ö'wöchakwawabi, nia'obi, ye'yeachakwawa jawa ö'wöchakwawabi kwö'wöchaduwobö weakobe, ja̧danö jwiinö tubinö weakobe, ja̧danö ojwiyo o̧bökönö kököachibobö weakobe, ja̧danö kwöbatjiju waji̧ 'doluobö weakobe, ja̧danö ja̧jaye baledi̧ma ökwödönö baledobö suli̧ öwaedakobe, debö kwi̧'yaduwenanö baibanö.

²³ Wanedö yötawa, bronce jawanö möleje ipje'datakobe, ojwiyo o̧bökenanö baibanö, ja̧danö niji kwö̧jaduwemi nijima, 'dii jawadanö 'diinö baibenanö kabatö.

²⁴ Ja̧danö ojwiyo o̧bo̧bö jö̧a̧lajemi, i̧so̧pjada jwa̧lȩ'ewobö weakobe, ja̧danö nijiso̧pjada mölejebetjö tjoduwakobe, ökwödönö söbebö loenanö kabatö.

²⁵ —Ja̧danö, kwöpöjojodöduwinö kwölakwabikwawaduwobö lakebaduwenama, ökwödönö suli̧ waedö, kwöpöjojodö ökwödönö tjujuluwobö weakobe, baikwö yötawa, bakobe bakwamabenö kwölakwabikwawaduwobö kwi̧'yaduwijayonö, jwiinö kwipjelekwachaduwinö jelobetenia dökibaduwakwedöja. Ja̧danö, Dios ökwödönö suli̧ öwaedaja̧ edinö, bö̧je ba̧kwemeachibanö jojodö edö yetjaibakobe, –Ayö, bidö israel jojodönö taji waekwinajö? –jö̧ba̧lö.

²⁶ Debö kwi̧'yaduwenama, kwiteba'oduwima, pji̧yu̧ tju̧kwa baibakwa'o, ja̧danö tebonö ju̧kwadö tju̧kwa baibakwa'o, ja̧danö kwiteba'oduwi wainö tjukwakwedö, bakwo̧bi a'dewö loakwo̧ deakobetjö̧.

²⁷ —Ju'wibi, ökwödönö suli̧ waedö, kwi̧sȩdoduwinö tutiyubiya saduwaibobö weakobe Isabenö Jo̧ma, damötjö Egipto jojodönö saduwaibobö weinadanö, ja̧danö ju'wi tutiyubiyabi, wale'debiyabi, kö'öwi̧bi usula kwemawaduwobö weakobe, ja̧danö ja̧tjö bi̧bajökönö kwö̧jaduwakwedöja.

²⁸ Ja̧danö, ju'wibi tjo̧'wo jwibadö tjö̧ji̧danö bakibaduwobö weakobe Isabenö Jo̧ma, ja̧danö kwöbajaleduwi tjewawadö bakibaduwobö weakobe, ja̧danö wajwibö kwö̧jaduwobö weakobe, –Tajijö, dakwö ja̧takwajö? –jö̧ba̧lö kwö̧jaduwenanö kabatö.

²⁹ Jejenö suli̧ öwaedajawö̧, yȩa'wo okwa ju̧kwadö mamabö kwetjachi̧danö, ökwödöma möle ja'ö mamabö kwi̧'yaduwakwa̧ isakwö kwekachaduwakwedöja, jo̧kwaijayonö kwi̧'yaduwakwa̧ kwöbadekwaduwökakwedöja. Ja̧danö ju'wedö jojodöma kabatökönö ökwödönö sulabenö ja̧tja̧kobe, ja̧danö kabatökönö ökwödötjö tjönaukwakobe, jo̧kwaijayionö bakwo̧bi ökwödönö pjaatakwo̧ma deakobe.

³⁰ —Ju'wibi Dios ökwödönö suli̧ öwaedobetjö̧, baikwö baledakobe: Ökwödötjö bakwo̧ tupakwö emakwujunö yöbawö ujunakobe, –Bisunö chilekwo bajibanö chemakwuju, –jö̧ba̧lö, jo̧kwaijayonö emakwa̧ abönö öpöjojoma emakwujunö do̧batö, 'da̧'da̧akobe. Ja̧danö ju'wibi kwejuduwi kwotidaduwijayonö, kwotidaja̧duwejunö kwö̧jaduwökakwedöda. Ja̧danö ju'wibi, uba batjo kwotidaduwijayonö, uba waji̧ 'dököbaduwökakwedöja.

³¹ Ja̧danö ju'wibi kweda̧laduwonö, kwajwimuduwi pa̧ka̧yadönö kwabajadö 'da'dabö 'wi'witjakobe, jo̧kwaijayonö itebiatjö kwukwaduwökakwedöja. Ja̧danö kwajwimuduwi bu̧lu̧dönö kwöba a'oduwitjö kweda̧laduwonö tjönaukwakobe, ja̧danö tjönaukwajawö̧nö tjetjatökakwedö. Ja̧danö ju'wibi kwajwimuduwi obejadönö 'döbebö, kwöpöjojodöduwinö tjiyakobe, ja̧danö bakwo̧bi ökwödönö pjaatakwo̧ma deakobe.

³² Ja̧danö ju'wibi kweda̧laduwonö kwi̧tji̧mu ömadönöbi, ya̧dönöbi do̧batibö, ju'wedö tjömöayedö batjibanö iyö lotjakobe, ja̧danö jobadönö eda̧lö, –Chitji̧muwe, dakwö tjȩwa̧jobö pjatatakwajö? –kwo̧'woduwi tjo̧achö kwö̧jaduwakwedöja, jo̧kwaijayonö ja'yubebi kwujuluwadöwökakwedöja, kwitji̧muduwinö tjö̧jibinö pjakataduwoböma.

³³ Ja̧danö ju'wibi, jelobetjö ichajadö wajwiköbaduwawö̧ma ichö, kwöbatjoduwi waji̧ jawa 'döbebö tjukwakwedö, ja̧danö okobe jwiinö ju'wi kwotidaduwaja̧ jawabi tjemakwedö, ja̧danö kabatökönö ökwödönö sulabenö ja̧tja̧kwedö, jwiinö usula kwemawaduwinö.

³⁴ Okobe jwiinö ja̧jaye inesö sulabenö baledakwa̧ kwedaduwakwedöja, ja̧ kwedaduwaja̧tjö kwo̧'woduwi jwibadö bakibaduwenanö baibanö.

³⁵ —Ja̧danö ju'wibi, ökwödönö suli̧ waedö, Isabenö Jo̧ma tutiyubiya ökwödönö saduwaibobö weakobe, kwu̧yu̧kijunöbi, kwi̧bȩjwaduwinöbi, okobe jwiinö kwiteba'oduwinöbi inesö nii̧ tutiyubiya ökwödönö saduwaibobö weakobe, ja̧danö ja̧tjö kwö̧bibajaduwobö jwiköbaduwakwedöja.

³⁶ Ja̧danö ju'wibi Isabenö Jo̧ma ökwödönöbi, kwuluwo̧duwi inesö la'aka kwuluwo̧duwi baibanö 'da̧batö kwujunaduwinökwenöbi öbibö e'ewakobe, ökwödöbi kwa'dödöbi edajitjokobe ju'wedö tjitebobe kwö̧jaduwobö, ja̧danö jobe ja̧nö tjösödawö̧ o̧'wo jawanö ösödö kwö̧jaduwakwedöja, towisa'otjöbi, inawatjöbi otikwawö̧nöma.

³⁷ Jwiinö ökwödönö suli̧ öwaedakobe Diosma, ökwödönö edö, –Ayö, israel jojodönö taji waekwinawö̧jö, –jö̧ba̧lö ökwödönö tjedenanö kabatö. Ja̧danö, ökwödönö obö, inesö suli̧ waekwinawö̧nö yötja̧lenama, ökwödö israel jojodönöda wanedö yötja̧lakwedö, Diosma jwiinö ökwödönö suli̧ öwaedakobetjö̧.

³⁸ —Ju'wibi yötawaduwakwö, wei̧ a̧ja̧kwökönö kwö̧jaduwiökwe Dios ökwödönö suli̧ öwaedakwa̧ma: Batjo kwotidaduwenama, nöinö ödebiya e'ewö kwödaduwakwedöja, jo̧kwaijayonö nöinö kwödaduwijayonö, waji̧ma ja'yubeda kwe'daduwakwedöja, kwe'daduwakwa̧ abönö ma̧la̧ka̧yö̧ tjukwakobetjö̧.

³⁹ Ja̧danö ju'wibi uba batjo kwotidaduwakwedöja, ja̧danö otiwanö isa'ba kwiteada̧laduwakwedöja, jo̧kwaijayonö ubasobu kwowökaduwökakwedöja, ja̧danö waji̧ 'dököbaduwökakwedöja, 'dököbaduwakwa̧ abönö sa̧döda tjukwakobetjö̧.

⁴⁰ Ja̧danö ju'wibi kwiteboduwi ba̧kwemeachibanö olivo towibiya kwujuna̧laduwakwedöja, jo̧kwaijayonö olivo o̧te kwi̧sȩdonö 'do̧kebaduwobö jwiakobe, kwe'daduwakwa̧ abönö olivo waji̧ tjoduwö suli̧ waekwakobetjö̧.

⁴¹ Ja̧danö kwi̧tji̧mu ömadönöbi, ya̧dönöbi 'yakebaduwakwedöja, jo̧kwaijayonö kwitji̧muduwi deinö kwö̧jaduwakwedöja, kwöpöjojodöduwi juluwö, kwi̧tji̧muduwi tjömöayedö batjibanö öbibö tjemakobetjö̧.

⁴² Ja̧danö ju'wibi, ba̧jekwadö ma̧la̧kayu ichö, kwiteboduwi ba̧kwemeachibanö, okobe jwiinö kwakwawa waji̧ towibiya tjukwakwedö, ja̧danö ju'wi batjo pokwi̧bi jwiinö tjukwakwedö.

⁴³ Ja̧danö ju'wibi jelobetjö ichajadö kwö̧'da̧deduwinö ju̧kwadöma, ökwödötjö bajalekwönönö tjujuluwachibakwedö, ja̧danö jobadö tjujuluwachibonö, ökwödö israel jojodöma nijakwönönö kwujuluduwi jwibadö bakibaduwanö kwime'dawachibaduwakwedöja.

⁴⁴ Ja̧danö jobadö jelobetjö ichajadöda tjitea tjujuna̧lakwedö, ökwödö israel jojodönö tjöbalewobö, jo̧kwaijayonö jwiköbaduwakwedöja, jobadönö kwöbalewaduwoböma. Wanedö yötawa, jobadö jelobetjö ichajadöma tjudanö tjichejekwakwedö, ja̧danö ökwödö israel jojodöma tjöwali'bodanö kwichejekwaduwakwedöja.

⁴⁵ —Chömöledö, kwuluwo̧duwi Isabenö Jo̧ Dios wei̧ a̧ja̧kwökönö, ja̧bö kwö̧jaduwobö wei̧bi, ju'wi wei̧bi a̧ja̧kwökönö wainö ja̧bö kwö̧jaduwitjö̧ma, okobe jwiinö ja̧jaye suli̧ waedakwawama ökwödönö baledakobe, ja̧danö wanedö yötawa, ja̧jaye suli̧ waedakwawama ökwödönö luibakobe, ökwödönö söbebö loenanö baibanö.

⁴⁶ Ja̧jaye baledakwa̧ma i̧sȩkwa baibanö ja̧kobe chömöledö, ökwödönöbi, kwitji̧mu tupadanö jojodönöbi, ja̧ baledi̧ edö, –Aaa, jejenö baledobe Dios wei̧ a̧ja̧kwödökönö, ökwödöbi tja̧ja̧kwinöködanö a̧ja̧kwökönö dö̧jitjö̧ma, jobadönö lȩebinadanö ökwödönöbi lȩebena, –jö̧ba̧lö edö kwo̧mukwataduwobö.

⁴⁷ —Chömöledö, kwuluwo̧duwi Isabenö Jo̧ Diosma isabenö jwiinö otiwanö pjabato̧ ökwödönö, okobe jwiinö kwujuna̧laduwo jö̧ka̧laduwi̧ma kwujuna̧laduwinö. Ja̧danö, jejenö pjaatiawö̧, kwo̧'woduwibi, kwomajadeduwibi ösöwachibanö jo̧banö kwösödaduwo jö̧ba̧ladöja. Jo̧kwaijayonö jo̧banö ösödökönö, 'da̧bachibö kwi̧'yaduwitjö̧ma,

⁴⁸ kwöpöjojodöduwi tjömöayedö bakibaduwanö otidö kwö̧jaduwakwedöja. Jau chömöledö, jo̧banö ösödökönö kwö̧jaduwiökwe, Isabenö Jo̧ma kwöpöjojodöduwinö ökwödönö tjujuluwobö weakobe, ja̧danö tjömöayedö ja̧nö, a̧wi̧chi̧ tjöbö, ojwiyo o̧ti̧ tjöbö, kamiji̧do̧ jwibö, okobe jwiinö ju'wi kwiteaduwibi jwibö usula kwemawaduwakedöja. Ju'wedö tjömöayedö ja̧nö, jwiinö 'diinö otidö kwö̧jaduwobö weakobe Diosma, jwiinö ökwödönö söbebö loenanö kabatö.

⁴⁹ —Jo̧banö öpöjödö kwö̧jaduwiökwe, Isabenö Jo̧ma ödö ju̧kwadö ju'wedö tjitebo ju̧kwadönö jwiinö ödöobetjö öibakobe, ökwödönö metji̧bobö. Ja̧danö, jobadö tjiwene wainö yöba̧ladöma, wiyuli mötjö juluwanö nijakwö jwibachö meibi̧danö, jobadöma ödötjö ichajadö juluwanö ökwödönö metjibakobe.

⁵⁰ Jobadö ökwödönö metji̧bakwedöma isabenö jwiinö labidö, ja'yubebi dösölöji̧nöma tjedökakwedö ökwödönö. Jau chömöledö, damönöbi lȩlöjinöma tjedökakwedö, ja̧danö tjemunöbi lȩlöjinöma tjedökakwedö, bakobe okobe deinö ökwödönö labidö tjö̧jakwedö.

⁵¹ Jobadöma kwajwimuduwi ajikwakwawedönö kwabö tjukwakobe, ja̧danö kwöbatjijuduwi waji̧ jawa tjukwakobe, trigojayebi, ubasobubi, olivo o̧tebi, jwienanö baibanö, ja̧danö kwa̧jwi̧muduwi pakayadöbi, obejadöbi deenanö baibanö, ja̧danö a̧wi̧chi̧tjö debö kwi̧'yaduwakwedöja.

⁵² Kwuluwo̧duwi Isabenö Jo̧ Dios kwiteboduwi niji baibanö ökwödönö iyinemi nijinö ja̧nö, 'diinö tjöekwobe comunidadnö kwö̧jaduwakwedöja, ja̧danö ja̧jaye comunidadnö ja̧nö, –Möakwö 'diinö tjöekwobe comunidadnö dö̧jobetjö̧, döpöjojodö tjujuluwökönö otiwanö dö̧jakwedösa, –jö̧ba̧lö kwomukwataduwena, jo̧kwaijayonö waekwakobe. Jobadö jelobetjö ichajadöma kwiteboduwi comunidadtenia tjötjösawö tjölakwabikwawakobe, tjöekwemitenia nijakwö pjolö lotjenanö baibanö, –Otiwanö 'diinö tjöekwobe ja̧dösa, –jö̧ba̧lö kwo̧'wo kwöwana̧laduwijayonö, tjötjösawibö tjö̧jakobe, pjolö lotjenanö baibanö.

⁵³ —Lekwe möle ökwödönö tjujuluwobö tjötjösawakobe kwöpöjojodöduwima, comunidad okwa ja̧nö, kwu̧kwaduwi jwiköbaduwenanö kabatö, ja̧danö jwiinö a̧wi̧chi̧ lö̧jawö̧ kwö̧jaduwobetjö̧, ökwödöda kwi̧tji̧muduwinöbi kwukwaduwakwedöja, kwuluwo̧duwi Isabenö Jo̧ Dios 'yakebaduwobö iyinawö̧nö.

^54-57 Jau chömöledö, kwöpöjojodöduwi tjötjösawobetjö̧, jwiinö usula emawö a̧wi̧chi̧ lö̧jawö̧ kwö̧jaduwakwedöja, ökwödötjö ömadö dösölö̧jinö ja̧danö lȩlöjinö edadöbi a̧'deladö, ja̧danö idöda tji̧tji̧munö kwadö batjibenanö kabatö. Ja̧danö, tji̧tji̧mu tjitebia kwanö, yöne tjömöledönöbi tjiyökakwedö, tjö̧jawo̧dönöbi, tjösödawö̧ tjilekwamunöbi, ju'wedö tji̧tji̧munöbi, a̧'dȩlanö, –Ötjöda chu̧kwa, –jö̧ba̧lö omukwatö. Ökwödötjö ya̧döbi ja̧danö chömöledö, ju'wedötjö bajalekwönönö dösölö̧jinö ja̧danö lȩlöjinö edadöbi, tji̧tji̧munö kwadö batjibanö tjö̧jakwedö, kwöpöjojodöduwi tjötjösawiawö̧ a̧wi̧chi̧ löjawö̧ ja̧nö. Jau chömöledö, ju'wedö ya̧dönö edö yöka̧laduwena, idöma jwiinö yȩekwi̧ jawabi öpöjödadö, sapatu jwiinö nijinö kwetjachoböbi öpöjödadö, tjömasapabiya yȩtjekwapji jö̧ba̧lö, jobadöjayedöma la'akatjöda tjitji̧munö tjukwökena, jö̧ba̧lö. Jo̧kwaijayonö baikwö yötawaduwakwö, jobadöbi jwiinö a̧wi̧chi̧ lö̧jawö̧ ja̧nö, tjitji̧munö tjemenama, jemajökwenöbi, tjölawo isujuda jukwobö ja̧'dȩlakobe. Jösödökwe jilekwenöbi, jitji̧munöbi iyökönö, jitji̧nöbi, tjölawobi isuda jukwobö a̧'dȩlakwuju, kwöpöjojodöduwi tjötjösawioko jwiinö a̧wi̧chi̧ lö̧joko jö̧jobetjö̧.

⁵⁸ —Isabenö okobe jwiinö Dios wei̧, bi'ye kwiyalu'yenö laebi̧ Dios wei̧ teada̧lönö a̧ja̧kwö̧ kwö̧jaduwobö jo̧be chömöledö, –Duluwo̧ Isabenö Jo̧ Diosma inesö dejatinö juluwo̧obetjö̧, wei̧ a̧ja̧kwö dö̧jo, –jö̧ba̧lö. Jejenö omukwatökönö, weöködanö ja̧köbaduwitjö̧ma,

⁵⁹ Isabenö Jo̧ma ökwödönö lȩebakobe, ökwödönöbi, kwitji̧mu tupadanö jojodönöbi. Wei̧ kwa̧ja̧kwaduwiökökwe, isabenö jwiinö lȩebakwo̧ ökwödönö kwime'dawaduwenanö baibanö chömöledö, baikwö yötawa: Jwiinö usula kwemawaduwinö lȩebakobe, ja̧danö inesö nii̧ lekwe mölȩ tjö'wöchi̧ jawa kwö'wöchaduwobö weakobe.

⁶⁰ Kwöwaisaduwa chömöledö, Egipto niji ju̧kwadö tjö'wöchinama, jwiinö ja̧ tjö'wöchina jawa yekabinaduwobe, jö̧tö? Wei̧ a̧ja̧kwökönö kwö̧jaduwitjö̧ma, ja̧jaye tjö'wöchi̧ kwö'wöchaduwobö weakobe Diosma, ja̧danö la'akatjöda ja̧ kwö'wöchaduwi̧tjö kwö̧bibajaduwobö jwiköbaduwakwedöja chömöledö.

⁶¹ Jau chömöledö, bi'ye Dios wei̧ wȩyukwa'yenö laebi̧ tjö'wöchi̧tenia kwö'wöchaduwobö weakobe, jo̧kwaijayonö ja̧damaökö, okobe jwiinö ju'wi tjö'wöchi̧tenia, bi'yenö laebökö ji̧ tjö'wöchi̧teniabi kwö'wöchaduwobö weakobe Isabenö Jo̧ma chömöledö, ja̧danö usula emawö kwö'wöchaduwakwedöja, ja̧tjö okobe deinö debö kwi̧'yaduwenanö baibanö.

^62-63 Jejenö baleditjö̧ma, ökwödö israel jojodötjö sule o̧bukwedöda kwö̧jibaduwena chömöledö, baikwö yötawa: Isabenö Jo̧ma ökwödönö pjaatobö ösödinobe, nöinö kwujuna̧laduwobö iyinobe, ja̧danö kwö̧ba̧jekwachaduwinö pjaatinobe, si̧li̧'idö tjö̧ba̧jekwi̧danö kwö̧ba̧jekwachaduwobö, jö̧tö? Jo̧kwaijayonö, kwuluwo̧duwi Isabenö Jo̧ Dios wei̧ a̧ja̧kwökönö kwö̧jaduwitjö̧ma, ökwödönö lȩebobö ösödakobe, baikwö yötawa: Jo̧ba wei̧ kwa̧ja̧kwaduwobö kwöpöjödaduwitjö̧ma, ökwödönö pjaatobö ösödinadanö, bakweminö ökwödönö suli̧ öwaedobö ösödakwo̧, ja̧danö ökwödönö suli̧ öwaedakobe, ökwödönö söbebö loenanö kabatö. Jau chömöledö, babe Dios iyakwemi niji juluwanö tekachaduwakwedöja, jobe kwö̧jaduwobö, jo̧kwaijayonö wei̧ a̧ja̧kwökönö kwö̧jaduwitjö̧ma, ja̧ nijinö deköbaduwakobe, jobetjö lakebaduwinö Isabenö Jo̧ma ökwödönö 'döebakobetjö̧.

⁶⁴ —Ja̧danö, kwiteboduwi nijitjö 'döbebajo̧, ju'wedö tjitebokwena jojodö tjö̧'da̧de kwipjelekwachaduwinö kwö̧jaduwobö weakwo̧ Isabenö Jo̧ma chömöledö, ja̧danö jobe ju'wedö tjitebonö ja̧nö, ju'wedö tjösödawö̧ ökwödöbi kwa'dödöbi wajwitjinawö̧nö kwösödaduwakwedöja, towisa'otjöbi, inawiyatjöbi otikwawö̧ o̧'wo jawanö.

⁶⁵ Ja̧danö, ju'wedö tjitebonö ja̧nö, la'akatjöda otiwanö wene jwiinö kwöjaduwökakwedöja chömöledö, ja̧danö jobe ja̧nö, la'akatjöda –Bemi nijima otiwanö ditebo, –jö̧ba̧lö jobe kwö̧jaduwobö kwösödaduwökakwedöja chömöledö. Ökwödönö lȩbebö, ba̧kwelöjatebö jobe ja̧nö yekabiduwobö weakobe Isabenö Jo̧ma chömöledö, ja̧danö, –Dakwö ja̧dakwajö? –jö̧ba̧lö, kwime'dawachibaduwakwedöja.

⁶⁶ Jobe ja̧nö ba̧kwelöjatebö yebabinö kwö̧jaduwakwedöja chömöledö, –Ökwödönö kwabö lotjena, –jö̧ba̧lö. Yö̧tebi, mölebi ba̧kwelöjatebö yebabinö kwö̧jaduwakwedöja chömöledö, –Dianö debö di̧'yakwajö, juluwanö debö di̧'yena, –jö̧ba̧lö.

⁶⁷ Jwiinö kwo̧'woduwi tjo̧achö, yȩayikwena, –Ida̧ökö yö̧te yi̧ibowe, –jö̧ba̧lö yebabinö yöka̧laduwakwedöja, ja̧danö yö̧tekwena, –Ida̧ökö möle dewachowe, –jö̧ba̧lö yöka̧laduwakwedöja. Jau chömöledö, yebabinö ja̧nö yöka̧laduwakwedöja, jobe ja̧nö inesö labi̧ jawa baledobe kwedaduwobetjö̧, ja̧danö baledi̧ edö jwiinö kwo̧'woduwi tjo̧achö yekabiduwobetjö̧.

⁶⁸ —Ja̧danö ju'wibi wei̧ kwöpöjödaduwiökwe Isabenö Jo̧ ökwödönö lȩebakwa̧ yötawaduwakwö chömöledö, baikwö: Isabenö Jo̧ma ökwödönö yöbawö ujuninobe, –La'akatjöda Egipto nijibe tjekachaduwobö jwiakobe, –jö̧ba̧lö, jö̧tö? Jo̧kwaijayonö, wei̧ a̧ja̧kwökönö kwö̧jaduwitjö̧ma, jobe Egiptobe isowi nöowinö kwi̧'yaduwobö weakobe, ja̧danö jwiinö usula emawö, ju'wedö tjömöayedö bakibaduwotö jö̧ba̧lö kwiyawaduwobö kwisakwaduwakwedöja, –Ju'wedö tjömöayedö dö̧jitjö̧ma, babe dö̧ji̧tjö bajalekwönönö otiwo jö̧a̧lena, –jö̧ba̧lö. Jo̧kwaijayonö kwiyawaduwobö kwisakwaduwijayonö, ökwödönö midö emakwo̧ma deakobe, bakobe usula emawö kwö̧jaduwakwedöja, sulabenö kwuluwo̧duwi Dios wei̧ kwa̧ja̧kwaduwobö kwöpöjödaduwobetjö̧, —jö̧ba̧lö yöawinobe Moisesma, israel jojodönö.