Deuteronomio 27 - Dios Iwene

Tjitebo nijibe ichibajadö, Dios pjaatakwa̧ jawabi, lȩebakwa̧ jawabi yötjawakwa̧ Moises yöawina jawa

¹ Israel jojodötjö luwedö pjatjatonö, Moisesma israel jojodönö weinobe, baikwö: —Chömöledö, isabenö okobe jwiinö babe ökwödönö webö yötawi̧ a̧ja̧kwö kwö̧jaduwobö jo̧be.

^2-4 Ja̧danö, yötawi̧ jawa kwiteboduwibe ichibajadö kwomukwatibaduwoböma baikwö wetaduwakwö: Kwa'dödömine tjösödinökwe Isabenö Jo̧ Diosma yöbawö ujuninobe, inesö otiwemi niji ökwödönö iyobö, batjobi otiwanö wa̧jemi, ja̧danö ajikwakwawedönöbi otiwanö tjajikwemi nijima, ja̧danö babe ja'yubenö lekwajabetjö Jordan ojwe pekibaduwobö öibakobe kwuluwo̧duwi Isabenö Jo̧ Diosma chömöledö, kwiteboduwi baibanö jobe kwö̧jaduwakobetjö̧. Ja̧danö, Jordan ojwe pebibajadö, Ebal mösa'obe kwi̧'yaduwo chömöledö, ja̧danö jobe ichibajadö, inawiya nöawa öwiyawi̧ jobe kwödaduwo, ja̧danö lödajadö, dewinö kwidiwaduwo. Ikenama okobe jwiinö bi̧ya̧ ökwödönö weti̧ jawa ja̧ inawiyanö kwi̧wȩyudaduwo, jobe Ebal mösa'onö.

⁵ Ja̧danö ju'wibi jobe kwuluwo̧duwi Isabenö Jo̧ Diosnö iyawemi kwotidaduwo, inawiyatjö, jo̧kwaijayonö ja̧ inawiya ja'yubebi 'dii jawakwö 'wibökönö kwotidaduwo.

⁶ Jau chömöledö, ja̧ kwuluwo̧duwi Isabenö Jo̧ Diosnö iyawemi kwotidaduwakwemima, sule jojodö la'akatjöda tjotidinököwiyanöda kwotidaduwobö ja̧kobe, ja̧danö otidajadö, ja̧ iyawemi wame jwiinö ubinö iyawa kwabö juwö kwiyaduwobö ja̧kobe.

⁷ Ja̧danö ju'wibi Dioskwö ösökwö ja̧kwawa iyawabi jobetjö kwiyaduwobö ja̧kobe, ja̧danö jobetjö ja̧ iyawa kwanö, kwuluwo̧duwi Isabenö Jo̧ Dios öba a'otjö kwo̧'woduwi ösöwachibanö ba'ali kwujunaduwobö ja̧kobe.

⁸ Ja̧danö chömöledö, jobetjö inawiya öwiyawi̧ wamenö bi̧ya ökwödönö weti̧ jawa kwi̧wȩyudaduwenama, otiwanö öwawinö kwi̧wȩyudaduwo, jojodö otiwanö edö yötja̧lobö, —jö̧ba̧lö weinobe Moisesma, israel jojodönö.

⁹ Jemi ikenama, Moisesbi, Levisaso jojodö Diostjö jojodötjö tjö̧'da̧de pjabatadöbi okobe deinö israel jojodönö wetjinobe: —'Wiinö ja̧nö kwa̧ja̧kwaduwo ökwödö israel jojodöma. Babe möle ökwödöma kwuluwo̧duwi Isabenö Jo̧ Dios yöne ömöledö babibajadöja,

¹⁰ jo̧kwajabetjö̧ kwuluwo̧duwi Isabenö Jo̧ Dios wei̧ kwa̧ja̧kwaduwobö jo̧be. Jau dömöledö, Dios ömöledököbaduwobetjö̧, babe möle ökwödönö wedi̧, Dios ja̧bö kwö̧jaduwobö wei̧bi, ju'wi wei̧bi a̧ja̧kwö kwö̧jaduwobö jo̧be, —jö̧ba̧lö.

Dios wei̧ a̧ja̧kwökönö tjö̧jitjö̧ma, Dios lȩebakwa̧ jawa Moises yöawina jawa

¹¹ Ja̧danö, ja̧ möle Ebal mösa'o jawa weenama, ju'wibi weinobe Moisesma, baikwö:

¹² —Chömöledö, Jordan ojwe pebibajadö, yötawaja̧danö Ebal mösa'obe kwi̧'yaduwenama, baikwö ja̧köbaduwakwa̧ wetaduwakwö: Ökwödö israel jojodötjö Simeonsaso jojodöbi, Levisaso jojodöbi, Judasaso jojodöbi, Isacarsaso jojodöbi, Josesaso jojodöbi, Benjaminsaso jojodöbi Ebal badeibösa'o Guerizin mösa'onö tjöjamatobö ja̧kobe, otiwanö Dios wei̧ kwa̧ja̧kwaduwiökwe pjaatakwa̧ jawa yötjawobö.

¹³ Ja̧danö, Rubensaso jojodöbi, Gadsaso jojodöbi, Asersaso jojodöbi, Zabulonsaso jojodöbi, Dansaso jojodöbi, Neftalisaso jojodöbi Ebal mösa'onö tjöjamatobö ja̧kobe, Dios wei̧ a̧ja̧kwökönö kwö̧jaduwiökwe lȩebakwa̧ wene yötjawobö.

¹⁴ Ja̧danö, jejenö wainökwena jamatajadö, jobe kwö̧jaduwenama, Levisaso jojodö labinö ju'wedö tjömöledö jelesokwena jojodönö yötjawobö ja̧kobe, baikwö:

¹⁵ –Isabenö Jo̧ma jwiinö öpöjödo̧, o̧'wo jawa tjösödobö, jo̧kwajabetjö bakwo̧ 'dii jawatjöbi, ju'wi jawatjöbi o̧'wo jawa otidö, ju'wedö wajwitjonö ja̧ o̧'wo jawa ösödobö ujunitjö̧ma, isabenö Dios lȩebakwo̧ jo̧banöma, –jö̧ba̧lö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

¹⁶ Ja̧danö, –Bakwo̧ iteda abe'donöbi, ojo'donöbi otiwanö omukwatökönö, sulabenö ja̧itjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö jo̧be.

¹⁷ Ja̧danö, –Bakwo̧ ömöledöso̧ itea niji önaukwotö jö̧ba̧lö niji ö'öbö i̧sȩkwi̧ jawa opjolatitjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

¹⁸ Ja̧danö, –Bakwo̧ öbajale tjewawo̧ mananö kweachenama, jelo̧ jo̧banö suli̧ waedö, ile'dewobö öibitjö̧ma, sulabenö öbibo̧nö lȩebakwo̧ Diosma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

¹⁹ Ja̧danö, –Diosma weobe, jelobetjö ichajadönöbi, löyödönöbi, tjilekwamu wobekwinadönöbi pjadatobö, jo̧kwajabetjö̧ Dios wei̧ a̧ja̧kwökönö jobadönö suli̧ waedadönö lȩebakwo̧ Diosma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

²⁰ Ja̧danö, –Bakwo̧ iteda abe'do ilekwokwö sulabenö bakobe baibitjö̧ma, sulabenö iteda abe'do a̧do̧ jwii̧ i̧sȩbobedanö jo̧be, ja̧danö Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

²¹ Ja̧danö, –Bakwo̧ tebonö jo̧kwö bakobe babibö 'da̧itjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

²² Ja̧danö, –Bakwo̧ iteda öjawuju, abe'do itjijukwöbi, ojo'do jitjijukwöbi bakobe babibö 'da̧'da̧itjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

²³ Ja̧danö, –Bakwo̧ iteda ilekwo jojo'dokwö bakobe babibö 'da̧itjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

²⁴ Ja̧danö, –Bakwo̧ ju̧kwawinö ömöledöso̧nö kwabö loitjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

²⁵ Ja̧danö, –Ju'wedö midö wetjökwe, bakwo̧ jelo̧ sulabenö ja̧binö̧kö̧nö kwabö loitjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.

²⁶ Ja̧danö, –Bi̧ya Dios wei̧ ösödö, laebi̧danö ja̧bö dö̧jobö jo̧be, bakwo̧ Dios wei̧ öpöjödö, wainö ja̧itjö̧ma, Dios lȩebakwo̧ jo̧banöma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe, —jö̧ba̧lö yöawinobe Moisesma, israel jojodönö.