Deuteronomio 26 - Dios Iwene

Diosnö iyawa jawa Moises yöawina

¹ Tupakwö yöawinobe Moisesma: —Chömöledö, kwuluwo̧duwi Isabenö Jo̧ Dios ökwödönö iyakwa̧ nijibe ichibajadö, kwiteboduwi baibanö jobe kwö̧jaduwakwedöja, ja̧danö jobe ja̧nö kwö̧batjijuduwi kwotidaduwakwedöja.

² Ja̧danö, jobe kwuluwo̧duwi Isabenö Jo̧ Dios iyakwa̧ nijinö ja̧nö kwöbatjoduwi waji̧ ajayi jawa kwemaduwenama, baikwö ja̧köbaduwo: Bakwo̧nökwena kwöbatjoduwikwena ajayi waji̧ jawatjö wi̧lȩyu okwa kwanaduwo, ja̧danö anajadö, kwuluwo̧duwi Isabenö Jo̧ Dios iteda eju comunidad omudawö ujunakwemibe e'ewö kwi̧'yaduwo.

³ Ja̧danö ja̧ möle Diostjö jojodötjö tjö̧'da̧de pjabatö otido̧ ö̧jobekwö 'ya̧nö, yökawaduwonö: –Isabenö Jo̧ma da'dödönö yöbawö ujuninobe, bemi niji ökwödönö iyakwa̧ wenema, ja̧danö bi̧ya bemi niji pokwaja̧ iyö, babe möle duluwo̧ Isabenö Jo̧ Dios öba a'o i̧sȩbö yötawobe, yöbawö ujunina badekwachinö iyinobe, ja̧danö isabenö yöbawö ujuninadanö iyaja̧ nijinö chitebo baibanö chö̧jobe, –jö̧ba̧lö.

⁴ Ikenama, jejenö yöbawajo̧, wi̧lȩyu kwichejebaja̧yu̧ tjö̧'da̧de pjabato̧nö kwiyaduwo, ja̧danö kwiyaduwiökwe, kwuluwo̧duwi Isabenö Jo̧ Diosnö iyawöte öba a'o ujunakobe.

⁵ —Jemi ikenama, jobe kwuluwo̧duwi Isabenö Jo̧ Dios öba a'o janö, baikwö yökawaduwonö: –Ötjö cha'döminema, arameo jojo eju jwibo̧ jelobetenia kwebachö ji̧na. Jo̧bama ömöledö ina o̧bukwedöda tjö̧jayi, Egipto nijibe i̧'yinobe, jobe ju'wedö tjitebonö ö̧jobö. Ja̧danö, jobe ichibena ömöledöma o̧bukwedöda tjö̧jinajayonö, jobe ja̧nö jwiinö ba̧jȩkwiyaso batjibanö tjö̧ba̧jekwachinobe, ba̧jȩkwadöbi, juluwadöbi batjibanö.

⁶ Ja̧danö, jobe dö̧jonö, Egipto jojodöma sulabenö ja̧tji̧nobe ökwödönö, usula emawö dö̧jobö ja̧tjinobe, ja̧danö labinö dotidobö wetja̧linobe.

⁷ Ikenama, jejenö ja̧tjiawö̧, Isabenö Jo̧, da'dödö tjuluwo̧ Diosnö dubudekwijatö, ja̧danö dubudekwiökwe dubudekwi̧ a̧ja̧kwinobe, ja̧danö usula demawi̧bi, labinö otidö dö̧ji̧bi, ju'wi Egipto jojodö sulabenö ökwödönö ja̧tji̧bi edinobe Isabenö Jo̧ma.

⁸ —Jemi ikenama Isabenö Jo̧ma jobe Egiptotjö ladebinö öibijatö. Iteda inesö ujulu i̧sȩbö, dö̧jibobö ölakwabikwawijatö. Jojodö jwiinö yetjaibinö iteda ujulu i̧sȩbijatö, jojodö edajitjökö jawa i̧sȩbö Egipto nijitjö ladebinö öibijatö.

⁹ Jemi ikenama, jobetjö öbibajo̧, baikwö dichibanö öibijatö, ja̧danö öbibajo̧, bemi niji, batjo otiwanö pokwemi, ja̧danö ajikwakwawedönö otiwanö tjajikwemi nijima ökwödönö iyijatö, ditebo baibanö, –jö̧ba̧lö yökawaduwo.

¹⁰ Ja̧danö, yöbawajadö, kwichejebaduwaja̧ wi̧lȩyu i̧sȩbö yökawaduwo Diosnö: –Chuluwo̧ Isabenö Jo̧, otiwanö niji kwiyinobe, chitebo baibanö, ja̧danö kwiyina nijisayu chöbatjo waji̧ ajayi jawatjö bi̧ya ökwönö chiyobö chichejebajabe, –jö̧ba̧lö kwichejebaja̧ wi̧lȩyu kwuluwo̧duwi Isabenö Jo̧ Dios öba a'o kwujunaduwo, ja̧danö junajadö, bȩbachibö kwuluwo̧duwi Isabenö Jo̧ Diosnö kwösödaduwo.

¹¹ Ja̧danö jobe ja̧nö, Dios öba a'o kwo̧'woduwi ösöwachibanö ba'ali kwujunaduwo, ökwödöbi, kwömöledöbi, Levisaso jojodöbi, jelobetjö ichajadö kwö̧'da̧deduwinö ju̧kwadöbi. Jau chömöledö, kwuluwo̧duwi Isabenö Jo̧ Dios jwiinö otiwanö ökwödönö pjaatobetjö̧, pjaataja̧ omukwatö öba a'otjö kwo̧'woduwi ösöwachibanö ba'ali kwujunaduwo, —jö̧ba̧lö yöawinobe Moisesma.

Domulataja jawatjö bakwöta jawa tjiyobö weawa Moises yöawina jawa

¹² Tupakwö yöawinobe Moisesma, israel jojodönö: —Chömöledö, o̧ba wapöbakwa o̧bama, okobe jwiinö kwöbatjoduwi wa̧ji̧tjö 'da̧batö kwujunaduwobö ja̧kobe, kwiteboduwi comunidadnö ju̧kwadö Levisaso jojodöbi, jelobetjö ichadöbi, löyödöbi, tjilekwamu wobekwinadöbi tjukobö. Ja̧ o̧ba, okobe jwiinö kwöbatjoduwi wa̧ji̧ jawa domulataja jawatjö, bakwöta jawa 'da̧batö kwujunaduwobö ja̧kobe, jobadö tju̧kwa baibanö, jobadöbi kwiteboduwi comunidadtenianö ja̧nö, tjomeawinö tjukwakobetjö̧. Ja̧danö, ja̧ jawa 'da̧batö junajadö, okobe jwiinö kwiyaduwaja̧ ikenama,

¹³ kwuluwo̧duwi Isabenö Jo̧ Dios öba a'o yökawaduwo, baikwö: –Chuluwo̧ Dios, ökwö kwu̧kwa baibanö chu̧kwatjö 'da̧batö chujunina jawama, okobe jwiinö chejutjö latebajabe, ja̧danö labebajo̧, Levisaso jojodönöbi, jelobetjö ichajadönöbi, löyödönöbi, tji̧lȩkwamu wobekwinadönöbi chiyajabe. 'Da̧batö chiyobö weköbinadanö, badekwachinö jobadönö chiyajabe chuluwo̧ Dios. Okobe jwiinö ja̧ iyawa jawa weköbi̧ma a̧ja̧kwö chö̧jajabe chuluwo̧, cho̧'wo jwibibökönö jwaikwöda weköbi̧ a̧ja̧kwö chö̧jajabe.

¹⁴ Isabenö yötawakwö chuluwo̧, chömöledö wobinadönö budekwö chö̧jonö, la'akatjöda ja̧ 'da̧batö chujunina jawatjö chukwijökötö. Ja̧danö ju'wibi yötawakwö chuluwo̧, yȩbekwo̧ ja̧nö, la'akatjöda ja̧ 'da̧batö chujunina jawatjö chemijökötö. Ja̧danö ju'wibi yötawakwö, la'akatjöda ja̧ jawatjö chemijökötö, ö'wö babibinadö tjo̧'wo luwo̧nö iyawa baibanöma chuluwo̧. Isabenö ökwö chuluwo̧ Isabenö Jo̧ Dios kwiwene a̧ja̧kwö chö̧jajabe, jwaikwöda ja̧bö chö̧jobö weköbi̧danö ja̧bö chö̧jajabe chuluwo̧.

¹⁵ Ja̧danö chuluwo̧, jejenö weköbi̧ a̧ja̧kwö chö̧jiökwe, mölejȩbe inesö otiwemi kwö̧jelö, nijakwö ökwödönö kwedobö atebakwö, ja̧danö ökwödö kwömöledö israel jojodönö pjabatö, ditebo niji otiwanö pokwobö weköbobö ateba. Jau chuluwo̧ Dios, da'dödönö yöbawö kwujunina badekwachinö, inesö otiwemi, batjo otiwanö wa̧jemi, ja̧danö ajikwakwawedönö otiwanö tjajikwemi niji kwiyinobe, ja̧danö jemi tupwakwö ökwödönö pjabatö, kwiyina niji otiwanö pokwinö pjakatobö atebakwö, –jö̧ba̧lö akebaduwonö, —jö̧ba̧lö yöawinobe Moisesma.

Isabenö Jo̧ ömöledö kwö̧jaduwobetjö̧, wei̧ a̧ja̧kwö kwö̧jaduwo, jö̧ba̧lö Moises yöawina jawa

¹⁶ Tupakwö yöawinobe Moisesma: —Chömöledö israel jojodö, babe möle kwuluwo̧duwi Isabenö Jo̧ Diosma ökwödönö weobe, bi̧ya ja̧bö kwö̧jaduwobö wei̧bi, ju'wi wei̧bi aja̧kwö kwö̧jaduwobö. Jo̧kwajabetjö̧ isabenö teada̧lönö wei̧ jawa a̧ja̧kwö kwö̧jaduwo chömöledö, okobe jwiinö kwo'woduwinöbi, kwomajadeduwinöbi jwaikwöda wei̧ a̧ja̧kwö kwö̧jaduwo.

¹⁷ Babe möle ökwödöma yökawaduwajabe, –Ökwödö israel jojodö dösödökwema, duluwo̧ Isabenö Jo̧ Diosda, ja̧danö okobe jwiinö jo̧ba wei̧ a̧ja̧kwö dö̧jakwedösa, ja̧bö dö̧jobö wei̧bi, ju'wi wei̧bi. Isabenö duluwo̧ Dios ökwödönö weenama, wei̧ a̧ja̧kwö, wei̧danö ja̧bö dö̧jakwedösa, –jö̧ba̧lö yökawaduwajabe.

¹⁸ Ja̧danö Isabenö Jo̧ma ökwödönö yöawajabe, –Israel jojodönö yöbawö chujuninadanö, ötjöda chömöledö ile nitebawö̧ tjö̧jobe, –jö̧ba̧lö ökwödönö yöawajabe. Ja̧danö, ju'wibi ökwödönö yöawajabe, –Okobe jwiinö weti̧tenia a̧ja̧kwö tjö̧jobö jo̧be, –jö̧ba̧lö.

¹⁹ Ja̧danö chömöledö, jejenö iteda wei̧ a̧ja̧kwö kwö̧jaduwitjö̧ma, isabenö otiwanö pjaatakwawö̧ja ökwödö israel jojodönö, baikwö yötawa: Diosda okobe deinö bö̧jȩ jojodönö 'da̧batö juninama, tjitebokwena jojodö batjibanö, jö̧tö? Ja̧danö isabenö Dios wei̧ a̧ja̧kwö kwö̧jaduwiökwe, okobe deinö jobadö tjitebokwena jojodötjö bajalekwönönöbedö bakibaduwanö kabebö ujunakobe, ökwödönö yöbawö ujunaja̧danö. Jau chömöledö, ökwödönö yöbawö ujunajabe Diosma, baikwö: –Israel jojodö weti̧ a̧ja̧kwö tjö̧jitjö̧ma, okobe deinö tjitebokwena jojodötjö bajalekwönönö, israel jojodönöda otiwanö ösödö yötja̧lobö pjatatocha, ja̧danö okobe deinö jobadönö tja̧ja̧kwobö pjatatocha, ja̧danö okobe deinö jobadönö otiwanö tjomukwatobö pjatatocha. Ja̧danö, ötjöda chömöledö inesö otiwadö tjö̧jobö chujunocha, –jö̧ba̧lö ökwödönö yöbawö ujunajabe kwuluwo̧duwi Isabenö Jo̧ Diosma, —jö̧ba̧lö yöawinobe Moisesma, israel jojodönö.