Deuteronomio 25 - Dios Iwene

¹ Tupakwö yöawinobe Moisesma: —Ju'wibi yötawaduwakwö chömöledö, ökwödötjö du̧ju̧taja wene juna̧lö jwöjwötjakwawitjö̧ma, lȩekwa luwedö tjöba a'o tjöjamatobö tji̧'yena, lȩekwa luwedö wene tjujuna̧li̧ jwetjebobö. Ja̧danö, lȩekwa luwedöma a̧ja̧kwö, wene jwibo̧nö yötjawena, –Bitema wene jwibo̧, –jö̧ba̧lö, ja̧danö wene juna̧lo̧nö yötjawena, –Bitema sulabenö ja̧bajo̧, –jö̧ba̧lö.

² Ja̧danö, jejenö yötjawena, sulabenö ja̧bo̧nö lȩbebö, jo̧banö kwakwatjobö ji̧tjö̧ma, jobe tjöba a'o öbamatobö wetjobö ja̧kobe, ja̧danö jobe tjöba a'otjö jo̧banö kwakwatjobö ja̧kobe. Jo̧banö kwakwatjakwama, sulabenö ja̧aja̧ badekwachinö kwakwatjobö ja̧kobe, baikwö yötawa: Ja'yubeda sulabenö ja̧atjö̧ma, ja'yubeda kwakwatjena, ja̧danö nöinö sulabenö ja̧atjö̧ma, nöinö kwakwatjena.

³ Jo̧kwaijayonö cuarentanö tupakwönönö kwakwatjobö jwiobe, baikwö yötawa: Cuarentatjö tupakwönönö israel jojo kwömöledöduwiso̧nö kwakwaköbaduwitjö̧ma, kwömöledöduwiso̧nö kwi̧sȩbaduwena, –Dedemi bitema mikwawö̧kö̧, –jö̧ba̧lö. Jo̧kwajabetjö̧ jejenö kwi̧sȩbaduwapji jö̧ba̧lö, sule cuarentanöda kwakwatjobö ja̧kobe.

⁴ —Ja̧danö ju'wibi yötawaduwakwö, pakayakwö trigo sula'wotjö chabö kwotidaduwenama, kwajwi pakaya aa di̧kataduwoko, jejenö otidonö, wainö kwo̧, —jö̧ba̧lö yöawinobe Moisesma.

tjilekwamu wobekwinadö ina tjitjimu debadönö emawa jawa, Moises yöawina jawa

⁵ Tupakwö yöawinobe Moisesma: —Chömöledö, bakwo̧ iteda yöne öjawo̧kwö bakwobe ö̧jena, ja̧danö ilekwonö ujuna̧lijayonö, ina itji̧ deayi ö'wö baibena. Jejenö baleditjö̧ma, jo̧ba wobekwö ujunibinoko ilekwoma, ömöledöso̧bö̧kö̧nö jemobö jwiakobe. Jo̧ba yö̧ne ömöledöso̧da wobekwö ujunibinokonö emobö ja̧kobe. Ilekwo baibanö jobujukwö ö̧jobö ja̧kobe, jo̧bada ö'wö babibina yöne ömöledöso̧obetjö̧.

⁶ Ja̧danö, itji̧ abönö jemökwema, öpöemine itji̧danö tjö̧ba̧jadakobe, –Bitema öpöemine itji̧, –jö̧ba̧lö. Jau chömöledö, tjitji̧mu tupadanö jojodö deinö ö'wö babibadöma, tjimi israel nijitjö söbekwö loawobedanö ichejekwa, jo̧kwajabetjö̧ jejenö baledapji jö̧ba̧lö, yötawaja̧danö öjawo̧ma wobekwö ujunibinokonö emobö ja̧kobe.

⁷ —Ja̧danö, bakwo̧ iteda öpöemine ilekwonö emobö öpöjöditjö̧ma, jobujuma comunidad apudebe ji̧'yakwuju, comunidad luwedö tjö̧jobekwö. Ja̧danö ichibaju, jobadönö yöjawobö ja̧kobe, –Chilekwemine öjawo̧ma, öpöeminenö pjaatobö öpöjödajabe, öpöemine imi söbekwö loawapji jö̧ba̧lö. Yönö tjömöledö tjemo jö̧tja̧li̧danö ötjönö emobö sulabenö öpöjödobe, chilekwemine itji̧ ötjabakwo̧nö chemakobetjö̧, –luwedönö yöjawobö ja̧kobe.

⁸ Jejenö yöjawiawö̧, jo̧ba itebo comunidad luwedöma jo̧banö jwötjobö ja̧kobe, tjöba a'obe ichibö yöa̧lakwawobö. Ja̧danö, yöba̧lakwawajadö, ina –Jobujunö chemobö chöpöjöda, –jö̧ba̧lö ina yöawitjö̧ma,

⁹ öpöemine ilekwobinujuma ö̧jobekwö 'ya̧wibö, ömasapatjö sapatu 'döjebobö ja̧kobe, ja̧danö öbanö sujobö ja̧kobe. Jemi ikenama yöja̧lobö ja̧kobe, –Ökwödanöjayedö, tjöpöemine ilekwobinujunö ji̧tji̧kwobö pjabatöködönö, ökwönö chi̧sȩbaja̧danö baledobö ja̧kobe, sulabenö tjöpöemine imi söbebö loawa ja̧tjobetjö̧, –yöja̧lobö ja̧kobe.

¹⁰ Ja̧danö, jejenö baledobetjö̧, jemi tupakwö jo̧banöbi, ömöledönöbi ja̧ baledina wanedö yötja̧lakwedö, –Sapatu 'döjebinökwe ömöledö, –jö̧ba̧lö, —Moises yöawinobe.

Ju'wi weawa jawa Moises yöawina

¹¹ Tupakwö yöawinobe Moisesma: —Chömöledö, ökwödötjö ömadö du̧ju̧taja tjölakwabikwawena, ja̧danö tjölakwabikwawonö, jobadötjö bakwo̧ ilekwoma jilekwenö pjajatobö jö̧ja̧lena, öpöjojo jo̧banö ujuluwapji jö̧ba̧lö. Jejenö jilekwe ö̧jibinö pjajatotö jö̧ba̧lö, öpöjojo ötade do̧jatitjö̧ma,

¹² jobujunö lȩekwa ja̧kobe, baikwö yötawa: Jejenö sulabenö do̧jatajobetjö̧, jömamu 'wibebö loköbaduwobö ja̧kobe. Jobujujayujunö lȩlöinö edökönö, jö̧mamu bulatö loköbaduwobö jakobe.

^13-16 —Ju'wibi yötawaduwakwö chömöledö, kwiteaduwi nönö kwö̧ba̧jadaduwenama, jweinö nönö kwö̧bajadaduwo, ömöki̧danö. Ju'wedö tjönaukwobö jö̧ba̧ladöma, nönawa jawa dötölatajanö tjujuna̧lena, ja̧danö trigoja̧ye ba̧ja̧dakwawa'do do'dolataja tjujuna̧lena, tea tjiyenama tjiyo jö̧tja̧litjö̧ baikwönönö tjiyobö, ja̧danö tjemenama tjemo jö̧tja̧litjö̧ bajalekwönönö tjemobö. Jobadöjayedö naukwabidö sulabenö ja̧tji̧danöma ja̧köbaduwoko. Kwuluwo̧duwi Isabenö Jo̧ Diosma jobadöjayedö omöna yöba̧ladönö jwiinö öpöjödo̧ chömöledö, –Inesö chöpöjödi̧nö ja̧badö, –jö̧ba̧lö, jo̧kwajabetjö̧ kwiteaduwi kwiyaduwenabi, kwemaduwenabi bakwainö kwö̧ba̧jadaduwo jö̧ka̧laduwi̧danö kwö̧ba̧jadaduwo. Jejenö ja̧bö kwö̧jaduwo chömöledö, kwiteboduwi kwuluwo̧duwi Isabenö Jo̧ Dios ökwödönö iyakwa̧ nijinö lekwe möle otiwanö kwö̧jaduwakobetjö̧.

¹⁷ —Ju'wibi yötawaduwakwö chömöledö, kwo̧'woduwi jwikibaduwoko, Egiptotjö lakebaduwena Amalecitas jojodö ökwödönö sulabenö ja̧tjinama.

¹⁸ Kwöwaisaduwa chömöledö, lekwe kwebachajadö kwime'dawachibinaduwenama, ökwödönö metjibinobe, ja̧danö ju'wedö me'dadawadö ökömanö tjo̧'omanö kwebachadönö kwabawö lotjinobe. Diosnö yebabökönö, jobekwö sulabenö ja̧tjinobe chömöledö,

¹⁹ jo̧kwajabetjö̧ balekwa mikwa jobadönö lȩkebaduwakwa̧ baikwö yötawaduwakwö: Kwuluwo̧duwi Isabenö Jo̧ Diosma ökwödönö niji iyakobe, kwiteboduwi baibanö jobe kwö̧jaduwobö, ja̧danö ju'wibi, niji iyajo̧, kwöpöjojodöduwi kwiteboduwi ö'öbötenia ju̧kwadönö kwujuluwaduwobö pjaatakwo̧, ölakwabikwawökönö, kwiteboduwinö wene jwiinö otiwanö kwö̧jaduwenanö baibanö. Jemi ikenama, jobe kwiteboduwinö wene jwiinö kwö̧jaduwenama, jobadö amalecita jojodönö söbebö loköbaduwobö ja̧kobe chömöledö. Jwiinö jobadönö kwabawö loköbaduwobö ja̧kobe, tja'dömine Amalec itji̧mu tupadanö jojodötjö ji̧bo̧ bakwo̧bi deakobetjö̧. Isabenö jobekwö jobadönö lȩkebaduwobö ja̧kobe chömöledö, kwo̧'wo jwikibaduwoko, —jö̧ba̧lö yöawinobe Moisesma.