Deuteronomio 24 - Dios Iwene

Tji̧lȩkwamunö kaatibakwawa jawa Moises yöawina jawa

¹ Tupakwö yöawinobe Moisesma: —Chömöledö, ökwödötjö bakwo̧ ilekwonö emena, ja̧danö emaja̧ ikena, taba lö̧ji̧ jawa öwaisachibena ilekwonö. Jejenö öwaisachibajo̧, ilekwonö öpöjödachibena, ja̧danö ilekwonö öpöjödö, kaatibakwawa jawa wȩyukwöja i̧wȩyudena, –Bisu chilekwobinujunö katatibajabe, –jö̧ba̧lö. Ja̧danö wȩyukwöja ilekwonö iyö, ö̧jelö lajebobö weena. Jejenö kaatiboko, jilekwebajo̧ ejutjö lajebena,

² ja̧danö labebaju, jelo̧nö jemena, jelo̧ ilekwo bajibanö.

^3-4 Jemi ikenama, ikena jojo jilekwebi jobujunö öpöjödachibena, ja̧danö jo̧babi ilekwonö kaatibakwawa jawa wȩyukwöja jobujunö iyö, ejutjö lajebobö weitjö̧ma, ajayi jilekwema yemidanö jobujunö emobö jwiakobe, ju'wibi ikena jilekwe ö'wö baibitjö̧bi ajayi jilekwe yemidanö jobujunö emoböma jwiakobe chömöledö, baikwö yötawa: Jobujunö kabatibö, –Katatibakwö, jelo̧nöda kwemo, –jö̧ba̧lö, iteda ilekwo jelo̧kwö bajibobö weinobe ichejekwa. Jo̧kwajabetjö̧ jejenö webajo̧, jelo̧kwö bajibaja̧ ikenama yemidanö jobujunö emoböma jwiobe. Isabenö Jo̧ edemi, jejenö ja̧oböma jwiinö sulena chömöledö, jo̧kwajabetjö̧ jejenö ja̧köbaduwoko, kwiteboduwi niji, kwiteboduwi baibanö kwuluwo̧duwi Isabenö Jo̧ Dios ökwödönö iyakwa̧ niji suli̧ kwöwaedaduwapji jö̧ba̧lö, —Moises yöawinobe.

Ju'wi weawa jawa Moises yöawina jawa

⁵ Tupakwö yöawinobe Moisesma: —Chömöledö, bakwo̧ ilekwonö emenama, juluwanö ilekwö jö̧jelö labebö, jelobe otidö ö̧jobö weköbaduwoko. Ilekwonö emaja̧ ikenama, o̧ba bakwaba baledibanö jö̧jelö labebö, ölakwabikwawoböbi, ju'wi otidö ö̧joböbi weköbaduwoko. Jau chömöledö, o̧ba bakwaba baledibanö ejutjö ilekwokwö ja̧nö, tjo̧'wo ösöwachibanö tjö̧jobö ja̧kobe.

⁶ —Ja̧danö, ju'wibi yötawaduwakwö chömöledö, ju'wedönö ju'wijaye kwöbalewaduwenama, isabenö tjimidakwa̧ wene i̧sekwa jawa tjiyobö akebaduwena, –Kwumusidi kwimidenama, bi̧ya kwiyaja̧ tjetatocha, –jö̧ba̧lö. Jo̧kwaijayonö, la'akatjöda trigoso̧pja otikwawa inawa jejenö tjiyobö weköbaduwoko chömöledö, baikwö yötawa: Ja̧ trigoso̧pja otikwawanö tju̧kwa kwakwawa tjotidobe, ja̧danö ja̧ jobadötjö kwemitjö̧ma, tju̧kwa 'dökebobedanö ichejekwa, tju̧kwa kwakwawa otikwawa 'dökebobetjö̧. Jo̧kwajabetjö̧ ja̧jaye tjiyoböma akebaduwoko chömöledö.

⁷ —Ju'wibi yötawaduwakwö chömöledö, kwömöledöduwi israel jojodönö do̧batö kwönaukwaduwobö jwiobe. Ökwödötjö bakwo̧ ömöledöso̧ israel jojonö do̧batö, iteda ömöayo̧ baibanö önaukwitjö̧bi, ju'wedö tjömöayo̧ baibanö mikwanö iyitjö̧bi, jejenö jojonö naukwabo̧nö kwabö loköbaduwobö ja̧kobe. Jejenö ja̧awama inesö suli̧ chömöledö, ja̧danö jojodönö naukwabo̧nö kwabö lobö, kwö̧'da̧deduwitjö ja̧ inesö suli̧ dichö loköbaduwena.

⁸ —Ju'wibi yötawaduwakwö chömöledö, ökwödötjö bakwo̧ tjisȩdo̧ 'doloi̧jaye tjö'wöchi̧ ö'wöchitjö̧ma, teada̧lönö kwö̧jaduwo, okobe jwiinö Levisaso jojodötjö tjö̧'da̧de pjabatadö wetji̧danö a̧ja̧kwö kwö̧jaduwobö. Ötjöma ja̧ jawa weawa yö̧tawijatö jobadönö, jo̧kwajabetjö̧ teada̧lönö yötjawi̧ kwa̧ja̧kwaduwo.

⁹ Kwuluwo̧duwi Isabenö Jo̧ Dios chöpöo Miriannö lȩebina, ja̧jaye jö'wöchobö lȩebina jawa kwomukwatibaduwo chömöledö, ja̧danö ja̧ omukwatö, teada̧lönö tjö̧'da̧de pjabatadö wetji̧ kwa̧ja̧kwaduwo.

¹⁰ —Ju'wibi yötawaduwakwö chömöledö, ökwödötjö bakwo̧ ju'wi jaye ömöledöso̧nö öbalewenama, isabenö imidakwa̧ i̧sȩkwa jawa iyobö aebena. Jejenö aebitjö̧ma, i̧sȩkwa jawa emotö jö̧ba̧lö ömöledöso̧ eju okwa teachoko.

¹¹ A̧petutjöda iteada̧lobö ja̧kobe, öbalewajökwe tebachö emonö, ja̧danö jo̧bada eju okwatjö ichejebobö ja̧kobe.

^12-13 Ja̧ imidakwa̧ i̧sȩkwa baibanö, ökamijido̧ wamesado̧ iyena chömöledö, ja̧danö baikwö yötawaduwakwö: Bakwo̧ usulaso̧ jejenö iteda ö̧kamijido̧ wamesa̧do̧ imidakwa̧ i̧sȩkwa baibanö iyitjö̧ma, jo̧banö dösölöjinö kwedaduwobö ja̧kobe. Yöte baledibanö jo̧ba ö̧kamijido̧ wamesa̧do̧ kwujuna̧laduwitjö̧ma, yöte abemi tiyuwena chömöledö, jo̧kwajabetjö̧ ina kwöbalewaja̧ imidököjayonö, yayonö yö̧te baibakwa̧ abönö ökamijido̧ tjekataduwonö, ja̧do̧nö otiwanö abakobetjö̧. Ja̧danö, jejenö dösölöjinö tjekatiökwe, ökwönö ösödö Diosnö aebena, Dios ökwönö pjaatobö. Ja̧danö, ju'wibi kwuluwo̧duwi Isabenö Jo̧ Diosma ja̧ dösölö̧jinö edö pjakataduwi̧ edakobe, ja̧danö edö ösödakobe, –Chömöledöma otiwadö, –jö̧ba̧lö.

¹⁴ —Ju'wibi yötawaduwakwö chömöledö, ju'wedö usula jojodönö tjotidobö weköbaduwena, –Weti̧ kwotiditjö̧ma, chimidocha, –jö̧ba̧lö. Jejenö tjotidobö weköbaduwajawö̧nö sulabenö ja̧köbaduwoko chömöledö, kwömöledöduwi israel jojodö tjö̧jitjö̧böbi, jelobetjö ichajadö tjö̧jitjö̧böbi, sulabenö ja̧köbaduwoko jobadönö.

¹⁵ Ja̧danö, jwibö tjö̧ji̧ kwöwaisaduwobetjö̧, bakwöta mölekwena, tjotidaja̧ ikenama, jobadönö kwimidaduwobö ja̧kobe chömöledö, midökönö, –Tupakwöda, –jö̧ba̧lö, lekwe tjiteada̧loböma weköbaduwoko. Jau chömöledö, jobadöjayedöma ja̧ kwimidaduwakwa̧ balada tjo̧'wo tjöwana̧lobe, –Tjimidakwa̧ baladanö chu̧kwa chemocha, –jö̧ba̧lö, jo̧kwajabetjö̧ juluwanö mölekwena tjotidaja̧ kwimidaduwobö ja̧kobe. Jau chömöledö, juluwanö midökönö, lekwe tjiteada̧lobö weköbaduwitjö̧ma, sulabenö ja̧köbaduwiawö̧ Isabenö Jo̧nö tjubudekwena, ja̧danö Dios öba a'otjö wene kwujuna̧laduwena, sulabenö ja̧köbaduwobetjö̧.

¹⁶ —Ja̧danö, ju'wibi yötawaduwakwö, jojodö sulabenö ja̧tjenama, sule sulabenö ja̧badönöda lȩkebaduwobö ja̧kobe, baikwö yötawa: Bakwo̧ itji̧ sulabenö ja̧itjö̧ma, abe'donö kwabö loköbaduwoko, itji̧ sulabenö ja̧ina lȩekwa baibanö, itji̧da sulabenö ja̧inobetjö̧, itji̧nöda lȩkebaduwobö ja̧kobe. Ja̧danö bakwo̧ abe'do sulabenö ja̧itjö̧ma, itji̧nö kwabö loköbaduwoko, abe'do ja̧ina lȩekwa baibanö, abe'doda sulabenö ja̧inobetjö̧, abe'donöda lȩkebaduwobö ja̧kobe. Jau chömöledö, bakwo̧ sulabenö ja̧ina mikwa baibanö woawa lȩkebaduwobö ji̧tjö̧ma, sule sulabenö ja̧binanöda lȩkebaduwobö ja̧kobe.

¹⁷ —Ja̧danö, ju'wibi yötawaduwakwö, jojodö jelobetjö ichajadönöbi, löyödönöbi suli̧ tjöwaedobö webökönaduwi. Jojodö jobadöjayedönö sulabenö ja̧tji̧tjö̧ma, –Aaa, Idöma mikwawöködö, jobadönö sulabenö ja̧tjijayonö, lȩekwa yödawökö, –jö̧ba̧lö lȩkebaduwoko. Isabenö jobadöjayedönö pjabatö lȩkebaduwobö ji̧tjö̧ma, jweinö lȩekwa yökawaduwo. Ja̧danö jilekwe wobekwinujunö ju'wi jaye kwöbalewaduwitjö̧ma, jö̧ka̧mijido̧ wamesa̧do̧ isabenö jimidakwa̧ i̧sȩkwa baibanö jiyoböma webökönaduwi, usula jemawapji jö̧ba̧lö.

¹⁸ Jau chömöledö, ökwödö Egiptonö kwö̧jinaduwa wene kwomukwatibaduwo. Jobe ja̧nö, ju'wedö tjö̧möayedö kwö̧jinaduwobe, ¿jö̧tö? Jo̧kwaijayonö jobe usula emawö kwö̧jinaduwelö, kwuluwo̧duwi Isabenö Jo̧ Diosma kwö̧jibaduwinö pjaatinobe chömöledö, jo̧kwajabetjö̧ ja̧ jawa omukwatö, kwö̧'da̧deduwitjö usula emawö ju̧kwadönö yötawaja̧danö dösölöjinö kwedaduwobö yötawaduwakwö.

¹⁹ —Ja̧danö, batjo waji̧ kwe'daduwenama, trigo ochiju 'wibö 'di̧batö kwotidaduwena, okobe jwiinö kwödaduwobö kwe'ewaduwaja̧ ikenama, kwomukwatibaduwena, –Aaa, bakwa'bu̧ batjotjö ji̧bajabe, –jö̧ba̧lö. Jejenö kwomukwatibitjö̧ma, tjebachajö kwemaduwoko, batjonö kwujunibaduwo, jelobetjö ichajadöbi, löyödöbi, tjilekwamu wobekwinadöbi ja̧ emö tjukwobö.

²⁰ Ja̧danö olivo towi ya̧bajadö waji̧ tjoduwaja̧ kwe'daduwaja̧ ikenama, tjebachajö ina towinö waji̧ma kwemaduwoko, wainö wa̧ji̧, jelobetjö ichajadöbi, löyödöbi, tjilekwamu wobekwinadöbi ja̧ tjemobö.

²¹ Uba batjobi ja̧danö, uba waji̧ kwe'daduwenama, tjebachajö u̧'yu̧kwi̧ jwiinö kwe'daduwobö kwisakwaduwoko chömöledö, jelobetjö ichajadöbi, löyödöbi, tjilekwamu wobekwinadöbi ja̧ tjemakobetjö̧.

²² Jau chömöledö, damötjö jobadö tjö̧ji̧danö ökwödöbi ju'wedö tjö̧möayedö Egiptjo nijinö kwö̧jinaduwobe. Jo̧kwajabetjö̧ ökwödönö baikwö wetaduwakwö, ja̧ damötjö̧ kwö̧ji̧naduwa wene omukwatö, kwiteboduwi nijinö ju̧kwadö jelobetjö ichajadönöbi, löyödönöbi, tjilekwamu wobekwinadönöbi dösölöjinö kwedaduwobö, —jö̧ba̧lö yöawinobe Moisesma.