Deuteronomio 23 - Dios Iwene

Dios öba a'o tjichibobö jwibadönö Moises yöawina jawa

¹ Tupakwö yöawinobe Moisesma, israel jojodönö: —Chömöledö, israel jojodötjö bakwo̧ öla'yapo 'dainökwe ö̧jitjö̧bi, ötade 'wibekwo̧ ö̧jitjö̧bi, Isabenö Jo̧ öba a'o ichibobö jwiakobe. Ju'wedö israel jojodö Isabenö Jo̧ öba a'o tjo̧ko̧kwenama, jo̧bajayo̧ ju'wedökwö o̧ko̧kokwobö jwiakobe.

² —Ju'wibi wetaduwakwö, Diosma ökwödönö weinobe, –Jojodötjö ju'wedökwö kwilekwamuduwi batjibanö bakibaduwobö jwiobe, –jö̧ba̧lö, jö̧tö? Ja̧danö, Dios weöködanö bakobe babibö tji̧tji̧kwitjö̧ma, tji̧tji̧ma la'akatjöda Isabenö Jo̧ öba a'o ko̧ko̧kwajadökwö o̧ko̧kokwobö jwiakobe. Jo̧babi, itji̧mu tupadanö jojodöbi la'akatjöda ju'wedö Isabenö Jo̧ öba a'o ko̧ko̧kwadökwö tjo̧ko̧kokwobö jwitjakobe, iteda ö'dö̧dö tjö'nödö tupadanö bajaliyasaso baibenanö.

³ —Ja̧danö ju'wibi wetaduwakwö, Amonitas jojodöbi, Moabitas jojodöbi la'akatjöda Isabenö Jo̧ öba a'o ko̧ko̧kwadökwö tjo̧ko̧kokwobö jwitjakobe. La'akatjöda jobadöbi, tji̧tji̧mu tupadanö jojodöbi Isabenö Jo̧ öba a'o ko̧ko̧kwadökwö tjo̧ko̧kokwobö jwitjakobe, idöda tjö'dö̧dö tjö̧'dödötjö tupadanösaso bajaliasaso baibenanö.

⁴ Jau chömöledö, jobadöma la'akatjöda ökwödökwö Dios öba a'o tjo̧ko̧kokwobö jwitjakobe, baikwö labebö lobö yötawa: Egipto nijitjö labebajadö, baikwö kwichaduwenama, jobadöma ökwödönö pjabatö, ojwiyobi, panbi tjiyo jö̧tja̧linobe, jo̧kwaijayonö sulabenö pjatjatinokobe. Ja̧danö, ju'wibi, pjabatökönö, ökwödönö suli̧ tjöwaedobö tjisakwinobe, jobadöma Mesopotamia niji comunidad Petor comunidad jojo, Beor itji̧ Balaamnö tjimidinobe, ökwödönö suli̧ waedö, Dios lȩebakwa̧ ökwödönö jwöeba̧lobö.

⁵ Jo̧kwaijayonö kwuluwo̧duwi Isabenö Jo̧ Diosma Balaamnö a̧ja̧kwinokobe, ja̧danö ökwödönö suli̧ öwaedo jö̧a̧li̧nama, ökwödönö pjaatakwawa jawa baibanö balewö loinobe. Jau chömöledö, kwuluwo̧duwi Isabenö Jo̧ Diosma ökwödö israel jojodönö ile niebinobe, ja̧danö ökwödönö ile nibebö, Balaam ökwödönö suli̧ öwaedo jö̧a̧linama, ökwödönö pjaatakwawa jawa baibanö balewö loinobe.

⁶ Ja̧danö, Amonitas jojodöbi, Moabitas jojodöbi jejenö ökwödönö pjabatökönö, suli̧ tjöwaedobö tjisakwinobetjö̧, la'akatjöda jobadönö pjakataduwobö jwiakobe. La'akatjöda wene jwiinö tjö̧joböma kwisakwaduwoko, ja̧danö la'akatjöda nöinö tjujuna̧loböma kwisakwaduwoko.

⁷ —Jo̧kwaijayonö, jobadönö kwöpöjödaduwi̧danö kwöpöjödaduwoko Edomitas jojodönö, jobadöma yöne kwömöledötjobetjö̧. Ja̧danö ju'wibi Egipto jojodönö kwöpöjödaduwobö jwiakobe chömöledö, jobadö tjitebonö lekwe möle kwö̧jinaduwobetjö̧.

⁸ Jo̧kwajabetjö̧ Edomitas jojodöbi, Egipto jojodöbi kwö̧'da̧deduwi tjö̧jitjö̧ma, ajayinö ökwödökwö ichibadö ökwödökwö Isabenö Jo̧ öba a'o tjo̧ko̧kokwobö jwiijayonö, tjö̧'dödöma israel jojodö babibö, ökwödökwö Isabenö Jo̧ öba a'o tjo̧ko̧kokwobö ja̧kobe, —jö̧ba̧lö yöawinobe Moisesma.

Ölakwabikwawö kwö̧jaduwena, yȩbekwökönö kwö̧jaduwo jö̧ba̧lö Moises yöawina jawa

⁹ Tupakwö yöawinobe Moisesma, israel jojodönö: —Chömöledö, kwöpöjojodönö kwölakwabikwawaduwobö lakebaduwenama, teada̧lönö kwö̧jaduwo, Dios öba a'otjö yȩkekwaduwapji jö̧ba̧lö.

¹⁰ —Ja̧danö, jobe kwöpöjojodöduwinö kwölakwabikwawaduwobö kwabaduwakwemi otidajadö, jobe kwö̧jaduwonö, ökwödötjö bakwo̧ yöte abonö ötadesalo salöobu welachibö 'dukwibitjö̧ma, yȩbekwo̧sa batibajabe jö̧ba̧lö, yȩayi tjabakwelö laebobö ja̧kobe, ja̧danö möle baledibanö a̧petukwöchobe ö̧jobö ja̧kobe, yi̧ibenanö baibanö.

¹¹ Ikenama, yi̧ibenama, ojwiyonö idichawobö ja̧kobe, ikenama yö̧te baibenama yemidanö comunidad okwa teachobö ja̧kobe, ida̧ökö yȩekwi̧ jwibo̧ jö̧ba̧lö.

¹² —Ja̧danö ju'wibi yötawaduwakwö, kwölakwabikwawaduwobö sabana'wotjö otikweju comunidadnö kwö̧jaduwena, comunidad a̧petukwöchobe yo'otjakwawemi baibanö 'da̧batö kwujunaduwo, comunidadtjö labebö jobetjö yo'oköbaduwobö.

¹³ Ja̧danö jobekwö latjebena, ju'wi tjiteakwö niji soawapi kwetjato, laju sobö yo'otjobö, ja̧danö yo'obajadö tjide'o tjo̧tjo̧bö.

¹⁴ Ja̧ weawa baikwö labebö lobö yötawa chömöledö, kwuluwo̧duwi Isabenö Jo̧ Diosma kwö̧jaduwemi comunidad ö'wejenö kwebacho̧, kwöpöjojodöduwitjö kwö̧jibaduwinö pjaatoböbi, kwöpöjojodöduwinö kwujuluwaduwobö pjaatoböbi. Ja̧danö, Diosma kwö̧jaduwemi ö'wejenö kweachobetjö̧, jobetjö taba ji̧ jawabi, ju'wi suli̧ ja̧danö yȩekwi̧ jawa jobetjö jwiobö jo̧be, kwö̧jaduwemi kweachonö ja̧jaye edapji jö̧ba̧lö, ja̧danö edajo̧, ökwödönö le'dedö laebapji jö̧ba̧lö, —yöawinobe Moisesma.

Ju'wi weawa jawa Moises yöawina jawa

¹⁵ Tupakwö yöawinobe Moisesma: —Chömöledö, bakwo̧ ju'wedö tjö̧mö̧ayo̧ma, uluwo̧ ö̧jelö döbibajö, kwiteboduwi israel nijibe ichibitjö̧ma, ajayi uluwo̧nö tjekataduwoböma jwiakobe.

¹⁶ Tjebatökönö, kwö̧'da̧deduwinö wene jwiinö ö̧jobö weköbaduwonö. Ju'wi comunidadnö ö̧jobö jö̧a̧litjö̧ma, wene jwiinö ja̧ comunidadnö ö̧jobö ja̧kobe, ja̧danö sulabenö ja̧köbaduwoko jo̧banö.

¹⁷ —Ju'wibi yötawaduwakwö, kwöwaisaduwa ju'wedö sulabenö o̧'wo jawa tjösödawö̧nö ösödö ja̧tji̧ma, jobadötjö ju'wedö ya̧döbi, ömadöbi 'da̧'da̧bakwawö tju̧ju̧kwobe tjösödawö̧nö ösödadökwö, ¿jö̧tö? Ja̧jaye ökwödö israel jojodötjö bakwo̧bi, bakwujubi jejenö 'da̧'da̧bakwawö tjösödawö̧nö ösödadökwö tju̧ju̧kwobö webökönaduwi chömöledö.

¹⁸ Ja̧danö ju'wedö tjilekwamuböködökwö 'da̧'da̧bakwawö ju̧kwadö, 'da̧'da̧bakwawö tjö̧ji̧ mikwa balada tjemitjö̧ma, ja̧ baladama la'akatjöda kwuluwo̧duwi Isabenö Jo̧ Dios ejunö tekataduwoko. Ja̧u chömöledö, –Isabenö Diosnö chiyakwo̧sa, –yöbawö junajadö, yöbawö kwujuninaduwa balada kwichejebaduwitjö̧ma, la'akatjöda ja̧ jawa midawa balada kwichejebaduwoko. Kwuluwo̧duwi Dios edemi, ömadöbi, ya̧döbi tji̧lȩkwa̧muböködökwö 'da̧'da̧bakwawö tju̧ju̧kwoböma inesö suli̧, jo̧kwajabetjö̧ ja̧ jawa midawa balada la'akatjöda Dios ejube tekataduwoko.

¹⁹ —Ja̧danö ju'wibi yötawaduwakwö, ju'wedö kwömöledöduwi israel jojodönö ju'wi jaye kwöbalewaduwena, baladaö̧kö̧, kwakwawaö̧kö̧, ju'wi jayeö̧kö kwöbalewaduwenama, sule kwöbalewinaduwada mikwawi̧da tjetjatobö akebaduwo, kwöbalewinaduwatjö, bajalekwönönöbi tjetjatoböma weköbaduwoko.

²⁰ Ju'wedö tjitebo jojodönö kwöbalewaduwenama, kwöbalewinaduwatjö bajalekwönönö tjimidobö weköbaduwena, jo̧kwaijayonö kwömöledöduwi israel jojodönö weköbaduwoko. Jejenö kwömöledöduwi israel jojodönö dösölöjinö pjakataduwo chömöledö, kwuluwo̧duwi Isabenö Jo̧ Diosma otiwanö ökwödönö pjaatakobetjö̧. Ja̧danö chömöledö, kwiteboduwi niji, babe kwiteboduwi baibanö kwemaduwobö tekachaduwakwa̧ nijinö ja̧nö, jejenö wei̧danö ja̧köbaduwitjö̧ma, isabenö kwotidaduwi̧tenia otiwanö laebobö pjaatakwo̧ Diosma.

²¹ —Ju'wibi yötawaduwakwö chömöledö, kwuluwo̧duwi Isabenö Jo̧ Diosnö yöbawö junö, –Isabenö chiyakwo̧sa, –jö̧ba̧lö yöbawö kwujunaduwitjö̧ma, lekwe iyökönö kwiteada̧lobö jwiakobe chömöledö, juluwanö yöbawö kwujunaduwaja̧danö kwiyaduwo, baikwö yötawa: Jejenö –Isabenö chiyakwo̧sa, –jö̧ba̧lö yöbawö kwujunaduwiökwe, isabenö kwiyaduwobö weakwo̧, ja̧danö yöbawö kwujuninaduwa badekwachinö kwiyaduwökötjö̧ma, Dios öba a'otjö wene kwujuna̧laduwena, kwiyo jö̧ka̧lidanö iyökönö omöna yöka̧linobetjö̧.

²² Jo̧kwaijayonö isabenö kwiyakwa̧ jawa yöbawö kwujunaduwökötjö̧ma, kwiyaduwököjayonö wene jwiinö kwö̧jaduwena.

²³ Isabenö teada̧lönö kwö̧jaduwo chömöledö, yöbawö kwujuninaduwadanö badekwachinö ja̧köbaduwobö. Dios kwiyaduwobö weököjayonö, ökwödöda, –Isabenö duluwo̧ Isabenö Jo̧ Diosnö diyakwedösa, –jö̧ba̧lö yökawaduwobetjö̧, isabenö yöka̧linaduwadanö kwiyaduwobö ja̧kobe.

²⁴ —Ju'wibi yötawaduwakwö chömöledö, kwömöledöduwi tjöbatjiju ubasayu ö'wejenö kwöbaledaduwitjö̧ma, kwöbaledaduwonö uba waji̧tjö wene jwiinö 'deköbaduwena. Jo̧kwaijayonö sule kwekachaduwonö 'deböda, tuda'wo okwa anö, kwömöledöso̧ öbatjo waji̧ kwemaduwoko.

²⁵ Ja̧danö kwömöledöso̧ trigobi, trigojayebi öbatjo ö'wejenö kwöbaledaduwitjö̧ma, ochobiyatjö kwömamunö kwemaduwena, jobe kwöbaledaduwonö kwukwaduwobö. Jo̧kwaijayonö isa'ye 'wibö, öbatjo waji̧ kwemaduwoko chömöledö, sule kwekachaduwonö kwömamijunöda emö kwukwaduwobö jo̧be, —jö̧ba̧lö yöawinobe Moisesma.