Deuteronomio 22 - Dios Iwene

Ju'wi weawa jawa Moises yöawina jawa

¹ Tupakwö yöawinobe Moisesma: —Chömöledö, ökwödötjö bakwo̧ ajwi pakayaökö, obejaökö ile'dewitjö̧ma, ja̧danö okwödötjö jelo̧ ile'dewajo̧nö editjö̧ma, –Jo̧kwada, wainö le'dewö 'yo̧, –jö̧ba̧lö kwomukwataduwoböma jwiakobe. Isabenö kwömöledöso̧nö pjabatö, ö̧jobekwö tjekatajaduwobö ja̧kobe.

² Ja̧danö, ajikwo̧ ödö ö̧jobetjö̧, –Ti ajwijö? –jö̧ba̧lö wajwiköbaduwitjö̧ma, kwejube ökibobö ja̧kobe, ja̧danö kwiteada̧lobö ja̧kobe, ajikwo̧ isakwö ichenanö kabatö. Ja̧danö, isakwö ichenama, jo̧banö tjekatobö ja̧kobe.

³ Kwömöledöduwiso̧ ajwi bulubi, okobe jwiinö ju'wi jaye iteabi ja̧danö. Ö̧ka̧mijido̧bi, ju'wi iteabi jwiaja̧ kwöbadekwaitjö̧ma, –Jo̧kwada, –jö̧ba̧lö pjabatökönö kwö̧jobö jwiakobe, isabenö tjekatobö ja̧kobe.

⁴ —Ju'wibi ökwödötjö bakwo̧ ajwi buluökö, pakayaökö nöinö e'ewö meitjö̧ma, ja̧danö ökwödötjö bakwo̧ meajobe editjö̧ma, –Jo̧kwada, –jö̧ba̧lö pjabatökönö ö̧joböma jwiakobe. Isabenö ajikwo̧nö pjaatobö ja̧kobe, ajwinö kaebobö.

⁵ —Ju'wibi yötawaduwakwö chömöledö, ya̧döma ömadö tjö̧kamijido̧ 'dutjawobö jwiobe, ja̧danö ömadö ya̧dö tjö̧kamiji̧do̧ 'dutjawobö jwiobe. Kwuluwo̧duwi Isabenö Jo̧ Diosma ja̧jaye ja̧badönö jwiinö öpöjödo̧ chömöledö, jo̧kwajabetjö̧ ja̧bökönaduwi jejenöma.

⁶ —Ju'wibi yötawaduwakwö chömöledö, pji̧yu̧ tja̧'do̧ nijinöbi, towinöbi kwöbadekwaduwenama, pjiyuwasuju iyabiya yöjachobe kwedaduwitjö̧bi, jitji̧mu yöjachobe kwedaduwitjö̧bi, pjiyuwasuju jitji̧mukwö kwemaduwoböma jwiakobe.

⁷ Kwösödaduwitjö̧ma, jitji̧munö wene jwiinö kwemaduwena, jo̧kwaijayonö tjojo'donöbi kwemaduwobö jwiakobe. Jobekwö ja̧bö kwö̧jaduwobö wetaduwakwö chömöledö, otiwanö ja̧nö, lekwe möle kwö̧jaduwakobetjö̧.

⁸ —Ja̧danö ju'wibi wetaduwakwö: O̧do yayeju kwotidaduwenama, o̧do mö tjöekwaka ji̧nö kwotidaduwo, kweju mö ju̧kwadö jobetjö metjapji jö̧ba̧lö. Jau chömöledö, tjöekwi̧ jwiinö bakwo̧ kwejuduwi mötjö mebö, ö'wö baibitjö̧ma, ökwöbi kwejunö ju̧kwadöbi wene kwujuna̧laduwena, tjöekwi̧ otidökönö, bakwo̧ mebö ö'wö baibobö ja̧köbi̧naduwobetjö̧.

⁹ —Ja̧danö, ju'wibi wetaduwakwö chömöledö, kwöbatjiju ubasayutjö, ju'wi ödebiyabi kwödaduwoko chömöledö. Jejenö ubasayutjö ju'wi waji̧kwö pokwobö kwödaduwitjö̧ma, okobe jwiinö wa̧ja̧kwa̧ kwemaduwobö jwiakobe chömöledö, uba waji̧bi, ju'wi jaye waji̧bi kwemaduwobö jwiakobe, uba batjotjö bakwainö uba ödebiyada kwödaduwobö ja̧kobe chömöledö.

¹⁰ Ja̧danö ju'wibi wetaduwakwö, kwajwi̧mu ju'wi jaye tötjobö weköbaduwenama, pakaya bakobe bulukwö töoböma weköbaduwoko.

¹¹ Ja̧danö ju'wibi wetaduwakwö, kwö̧ka̧miji̧do̧ 'dukawaduwakwa̧ma, obejadö tjöwö'yekwö, linokwö pjabacha̧lö 'dö̧awa̧do̧ 'dukawaduwoko.

¹² Ja̧danö ju'wibi wetaduwakwö, kwö̧ka̧mijido̧ wamesa̧do̧ 'do̧'dokwetenia ö'wejemu jawa 'do̧'do̧kweteniama, isa'ye li̧nö kwotidaduwo, —jö̧ba̧lö weawa jawa yöawinobe Moisesma.

Tji̧lekwamu jawa weawa Moises yöawina jawa

¹³ Tupakwö yöawinobe Moisesma: —Chömöledö, bakwo̧ ilekwonö emö, jobujukwö bakobe baibena. Ja̧danö jemi ikenama ja'yubenö lekwajabetjö jobujunö öpöjödachibena, –Bisunö chöpöjöda, –jö̧ba̧lö.

¹⁴ Ja̧danö, ilekwonö öpöjödö, jobujunö yöa̧lena, –Bisu chilekwonö emajo̧, jobujukwö batibenama, ina iso̧kwö ju̧kujunö batibijökötö, ötjönö jemakwa̧ abönö sulabenö jelo̧kwö jö̧jinobe, –jö̧ba̧lö ilekwonö yöba̧lö, jojodö jobujunö sulabenö tjomukwatobö yöa̧lena.

¹⁵ Jejenö yöa̧litjö̧ma, ilekwo jabe'dobi, jojo'dobi tjitiju isabenö iso̧kwö jö̧jinökö wene i̧sȩkwa'wo sabana'wo i̧'yejebö tji̧'yobö ja̧kobe, comunidad apjude a'obe, comunidad luwedö tjö̧jobekwö.

¹⁶ Ja̧danö, tjöba a'o ichibö, jabe'do comunidad luwedönö yöawobö ja̧kobe, baikwö: –Chitjijunö wetijatö, ite cho̧jo̧li ilekwo bajibanö, jo̧kwaijayonö chitjijunö öpöjödachibajabe.

¹⁷ Ja̧danö, juwibi, chitjijunö öpöjödö sulabenö yöa̧lajabe, Isunö chemakwa̧ abönö, sulabenö jelo̧kwö jö̧jinobe, ja̧danö jobujukwö batibenama iso̧kwö jö̧kuju jö̧ji̧ma öwawinokobe, jö̧ba̧lö chitjijunö yöa̧lajabe. Jo̧kwaijayonö jejenö yöa̧lijayonö, omöna, edaduwi, bi'wo sabana'woma öwawinö i̧sȩkwobe, chitjijunö eminenama, isabenö iso̧kwö ji̧nökujunö eminobe, –jö̧ba̧lö, tjöba a'otjö iso̧kwö jö̧kujunö emina i̧sȩkwa'wo sabana'wo sedatö tji̧sebobö ja̧kobe.

¹⁸ Jejenö i̧sȩbiawö̧, comunidad luwedöma jo̧ba ilekwonö sulabenö yöba̧lo̧nö do̧batö, jo̧banö kwakwatjakobe,

¹⁹ ja̧danö ju'wibi ilekwo jabe'donö nöinö balada imidobö wetjakobe, cien plata ö̧piya öjabanö imidobö wetjakobe, otiwuju, israel jojodötjö iso̧kwö ji̧nökujunö sulabenö tjomukwatobö omöna yöa̧linobetjö̧. Ja̧danö, ju'wibi, jo̧bama la'akatjöda jobujunö kaatibobö jwiakobe, ba̧kwelöjatebö jobuju ilekwokwö ö̧jobö ja̧kobe.

²⁰ —Jo̧kwaijayonö, ilekwo sulabenö jelo̧kwö jö̧jina jweinö yöawinatjö̧ma, ilekwonö lȩtjebobö ja̧kobe, baikwö yötawa: Isabenö ilekwonö emena, iso̧kwö sulabenö ji̧nujunöda eminobe jö̧balö öwawitjö̧ma,

²¹ jobujunö öbibö tji̧'yobö ja̧kobe, jabe'do eju apjudebe. Ja̧danö, jitebo comunidad ömadöma jobujunö inawiya ikwawö lotjobö ja̧kobe, –Bisu israel jojosujuma, jwiinö sulabenö ja̧buju, –jö̧ba̧lö. Jau chömöledö, ina jabe'do ejunö jö̧jayi, jilekwebö̧kö̧kwö sulabenö jö̧jenama, inesö suli̧ jawa israel jojodö la'akatjöda sulabenö ja̧tjökö jawa sulabenö ja̧jinobe, jo̧kwajabetjö̧ yötawaja̧danö jobujujayujunö lȩtjebobö ja̧kobe, inesö suli̧ kwö̧'da̧deduwitjö dichö loköbaduwakobetjö̧.

²² —Ju'wibi yötawaduwakwö chömöledö, bakwo̧ jelo̧ ilekwokwö bakobe baibobe tjöbadekwajitjö̧ma, jobadönö kwabö loköbaduwobö ja̧kobe, tjöbadekwajawö̧ jojonöbi, jojosujunöbi. Jejenö jobadönö kwabö lobö, inesö suli̧ kwö̧'da̧deduwitjö dichö loköbaduwena.

²³ —Ja̧danö ju'wibi yötawaduwakwö, comunidad okwatjö bakwo̧ ina iso̧kwö jö̧kuju, ina jilekwenö jemököjayonö jemakwo̧nö yöbawö juninujukwö bakobe baibitjö̧ma,

²⁴ jobadö du̧ju̧tajanö comunidad apjude a'obe öbibö, inawiya ikwawö loköbaduwobö ja̧kobe. Ja̧ jobadönö kwabö loköbaduwakwa̧ jawa baikwö labebö lobö yötawa: Comunidad okwa ja̧nö, ju'wedö pjatjatobö jwöjeba̧lokobetjö̧, öwawobe, isujubi sulabenö ja̧buju, jö̧ba̧lö, ja̧danö jobujunöbi kwabö lotjobö ja̧kobe. Ja̧danö jojoso̧nö kwabö lotjobö ja̧kobe, jelo̧ ömöledöso̧ ilekwokwö sulabenö ö̧jinobetjö̧. Ja̧danö, jobadöjayedönö kwabö lobö, kwö̧'da̧deduwitjö inesö suli̧ dichö loköbaduwena.

²⁵ —Jo̧kwaijayonö mejetjö bakwo̧ möayujunö, jemakwo̧nö ida̧ökö yöbawö juninujunö badekwajo̧, jobujunö do̧batö 'da̧'da̧itjö̧ma, sule jo̧banöda kwabö lotjobö ja̧kobe.

^26-27 Jo̧kwaijayonö 'da̧'da̧inokonö kwabö loköbaduwobö jwiakobe, baikwö labebö lobö yötawa: Mejetjö jobujunö do̧batö 'da̧'da̧enama, pjatjatobö jwöjeba̧lijayonö, pjabato̧ deinobe, jo̧kwajabetjö̧ jelo̧nö jemakwa̧ yöbawö jujuninajayonö, sulabenö ja̧binökuju. Jau chömöledö, jobujunö sulabenö mejetjö do̧batö 'da̧'da̧binama, bakwo̧ ömöledöso̧nö mebibö kwabö loobedanö wanekwachobe, jo̧kwajabetjö sule jo̧ba sulabenö ja̧binanöda kwabö loköbaduwobö ja̧kobe.

²⁸ —Ju'wibi yötawaduwakwö chömöledö, bakwo̧ ina iso̧kwö ji̧nökujunö, ina jemakwo̧nö yöbawö juninokonö do̧batö, jobujunö 'da̧'da̧bö ja̧itjö̧ma, ja̧danö jo̧banö tjöbadekwajitjö̧ma,

²⁹ ilekwo bajibanö emobö ja̧kobe. Ja̧danö ju'wibi jabe'donö cincuenta plata ö̧piya imidobö ja̧kobe, sulabenö jobujunö 'da̧'da̧bö ja̧inobetjö̧. Ja̧danö, jo̧bama jobujunö kaatiboböma jwiakobe la'akatjöda, ba̧kwelöjatebö ilekwo jö̧jobö ja̧kobe.

³⁰ —Ja̧danö ju'wibi yötawaduwakwö, bakwo̧ iteda abe'do ilekwobi̧nujunö emobö jwiakobe. Jejenö abe'do ilekwobinujunö emitjö̧ma, inesö sulena, abe'do a̧do̧ jwii̧ i̧sȩbena ichejekwa, iteda abe'do ö̧jinokokwö jo̧babi sulabenö ö̧jobetjö̧, —jö̧ba̧lö yöawinobe Moisesma.