Deuteronomio 21 - Dios Iwene

Mejetjö kwabö lotjinökwenö badekwajadö ja̧tjakwa̧ weawa, Moises yöawina jawa

¹ Tupakwö yöawinobe Moisesma, israel jojodönö: —Chömöledö, kwuluwo̧duwi Isabenö Jo̧ Dios ökwödönö iyakwa̧ nijinö kwö̧jaduwena, jojodö deobe mejetjö bakwo̧nö kwöbadekwaduwena, ju'wedö kwabö lotjökwe ö'wö babibajo̧ma. Ja̧danö, jojodö deobetjö jo̧ba iteba'o kwöbadekwaduwobetjö̧, wajwiköbaduwena, –Bitenö kwabö lobinama tijö? –jö̧ba̧lö.

² Jobekwö baleditjö̧ma, baikwö ja̧köbaduwakwa̧ yötawaduwakwö chömöledö: Kwuluwedöduwibi, lȩekwa luwedöbi ö̧jobekwö tji̧'yobö ja̧kobe, ja̧danö iteba'o ö̧belö tjö̧ba̧ja̧dobö ja̧kobe, jobe pjeanö comunidadbiyatjö dokwa ödöojobö jö̧ba̧lö.

³ Ja̧danö, tjö̧ba̧ja̧daja̧ ikenama, jelö yöneawi̧ comunidad luwedöma pakaya itjijunö omudawö tjujunobö ja̧kobe, la'akatjöda otidinökuju pakayasujunö.

⁴ Ja̧danö omudawö junajadö, pakayasujunö öbibö tji̧'yobö ja̧kobe, jobe pjeanö wabeko, ojwe lȩkobe, ja̧danö ina batjo soböbi, ödebiya lödöbi tjotidokobema. Ja̧danö, jobe wabekobe ichibajadö, pakayasuju ju̧lu̧mea 'debatö lotjobö ja̧kobe, pakayasuju ö'wö bajibanö.

⁵ Ja̧danö, Levisaso jojodötjö Diostjö jojodötjö tjö̧'da̧de pjabatadöbi jobe tji̧'yobö ja̧kobe, baikwö yötawa: Kwuluwo̧duwi Isabenö Jo̧ Diosma jobadönö 'da̧batö ujuninobe, jo̧ba wei̧ otidö tjö̧jobö, Dios jojodönö pjaatakwa̧ jawa Isabenö Jo̧nö atjebobö. Ja̧danö, ju'wibi tjotidobö 'da̧batö ujuninobe, jojodö ju'wedökwö wene tjujuna̧lenabi, bakwo̧ jelo̧nö sulabenö kwaenabi, jobadöda lȩekwa yötjawobö ujuninobe. Ja̧danö, jejenö jobadönö 'da̧batö ujuninobetjö̧, jobadö tjö̧'da̧de pjabatadöbi jobe tji̧'yobö ja̧kobe.

⁶ Ikenama, tjöbadekwajinökwe iteba'o yö̧neawobe comunidad luwedöma, pakayasuju julume'a 'debatö lotjajoko jiteba'o wamenö tjömamiju tjidichawobö ja̧kobe,

⁷ ja̧danö tjömamiju dichawö yötjawakobe, –Ökwödöma ite ö'wö babibinanö kwabö lobinöködösa, ja̧danö kwabö lobinanö edinöködösa.

⁸ Duluwo̧ Isabenö Jo̧, jo̧banö kwabö lotjinobetjö̧, wene samajabe ökwöda kwömöledö badibanö kweminawö̧ israel jojodönö, ja̧danö bejenö dömamiju dichawö ökwönö adebakwö, wene dujuna̧li̧ söbebö loköbobö adebakwö. Jau duluwo̧, bakwo̧ wene jwibo̧nö kwabö lotjinobetjö̧, wene dujuna̧lobe, ja̧danö ja̧ wene dujuna̧li̧ma, ökwödö israel jojodönö lȩbebökönö söbebö loköbobö adebakwö, –jö̧ba̧lö tjömamiju tjidichawobö ja̧kobe.

⁹ Ja̧danö, jejenö ja̧bö wene kwujuna̧laduwi̧, wene jwibo̧nö kwabö lotjinobetjö̧ wene sami̧ma, kwö̧'da̧deduwitjö dichawö lököbaduwena, Isabenö Jo̧ ösödi̧danö ja̧köbaduwobetjö̧, —jö̧ba̧lö yöawinobe Moisesma.

Tjujuluwajawö̧tjö ya̧dönö emawa jawa, Moises yöawina jawa

¹⁰ Tupakwö yöawinobe Moisesma: —Chömöledö, kwöpöjojodöduwinö kwölakwabikwawaduwobö labebajadö, kwuluwo̧duwi Isabenö Jo̧ Dios jobadönö kwujuluwaduwobö pjaatenama, jobadötjö ju'wedönö do̧kataduwena, kwömöayedöduwi batjibanö.

¹¹ Ja̧danö, do̧kataduwajawö̧tjö ökwödötjö bakwo̧ edena, bakwuju otiwujunö, ja̧danö jobujunö emobö ösödena, –Isuju otiwujunö chilekwo bajibanö chemobö jö̧ta̧la, –jö̧ba̧lö.

¹² Jobekwö baleditjö̧ma, jobujunö emakwa̧ jawa baikwö yötawa: Jobujunö ejube teatobö ja̧kobe, ja̧danö jöwö'ye jwobawö lojobö ja̧kobe, ja̧danö jineje 'dejawobö ja̧kobe.

¹³ Ja̧danö jö̧ka̧mijido̧ do̧kataduwena 'dujawinado̧ 'yobekwö lobö, balekwa̧do̧ 'dujawobö ja̧kobe. Ikenama, ilekwo bajibanö emakwa̧ abönö, jawo̧ bakwo̧ baledibanö ejunö ja̧nö, jabe'donöbi, jojo'donöbi jubudekwobö ja̧kobe. Ikenama, jawo̧ baledibaja̧ ikenama, jobujukwö ö̧jobö ja̧kobe, ilekwo bajibanö.

¹⁴ Jemi ikena, ilekwo bajibaja̧ ikenama jobujunö öpöjödachibö kaatibitjö̧ma, isuda ji̧'yobö jösödi̧danö ö̧jelö lajebobö jȩna. Ilekwo bajibanö webajo̧, jobujunö sulabenö kaatibobetjö̧, jobujunö taba lö̧jobö sulabenö ja̧ajabe, jo̧kwajabetjö̧ jemi tupakwönönö jobujunö taba lö̧jinö sulabenö ja̧oböma jwiakobe. Iteda ömöayuju midö eminoko jö̧ji̧nö weoböma jwiakobe, ja̧danö ju'wibi ju'wedö tjömöayuju bajibanö mikwanö iyoböma jwiakobe, sule mikwa jwiinö lajebobö ja̧kobe, —jö̧ba̧lö yöawinobe Moisesma.

Moises Abönö pöenö yöawina jawa

^15-16 Tupakwö yöawinobe Moisesma: —Chömöledö, ökwödötjö bakwo̧ ilekwamu du̧ju̧tajanö ujuna̧lena, ilekwo ile niebokonöbi, öpöjödokonöbi, ja̧danö, jobadö ilekwamu du̧ju̧tajama, bakwo̧nökwena tjitji̧munö tjujuna̧lena. Jo̧bajayo̧ itji̧mu jawa baikwö webö yötawaduwakwö chömöledö, iteda itji̧ abönö pöeda abönö pöe jawa emobö ja̧kobe, ösödoko jitji̧ ö̧jitjö̧böbi, öpöjödoko jitji̧ ö̧jitjö̧böbi. Jau chömöledö, ilekwo öpöjödoko jitji̧da abönö pöe ö̧jitjö̧ma, isabenö jo̧bada abönö pöe jawa ujuna̧lobö ja̧kobe, iteda abe'do itji̧ abönö pöeobetjö. Ja̧danö, abe'do iteda itea 'da̧batö junö, itji̧munö tjiteakwena iyenama, ilekwo öpöjödoko jitji̧nö öpöjödö, emo jö̧a̧li̧ jawa öjawo̧ ilekwo ile nieboko jitji̧nöda iyobö jwiakobe. Itji̧ abönö pöe ilekwo öpöjödoko jitji̧ ö̧jijayonö, yayonö abe'do itji̧ abönö pöe jo̧ jo̧bama, jo̧kwajabetjö̧ abönö pöe jawa emobö ja̧kobe.

¹⁷ Ja̧danö, itea 'da̧batö ujunenama, jo̧banöda ju'wedötjö bajalekwönönö dötölatajanö iyobö ja̧kobe, –Biteda chitji̧ abönö pöema, –jö̧ba̧lö. Jau chömöledö, jo̧bada iteda abe'do itji̧ abönö pöe ö̧jobetjö̧, jo̧bada iteda abe'do ujulu abönö i̧sȩkwo̧ ö̧jobedanö ichejekwa, jo̧kwajabetjö̧ isabenö jo̧bada abe'do iteatjö abönö pöe emo jö̧a̧li̧ jawa emibobö ja̧kobe, —jö̧ba̧lö yöawinobe Moisesma.

Tji̧tji̧mu a̧ja̧kwöködönö lȩebakwawa jawa Moises yöawina jawa

¹⁸ Tupakwö yöawinobe Moisesma, israel jojodönö: —Chömöledö, ökwödötjö bakwo̧ itji̧nö ujuna̧lena, uu 'dibo̧, jwaikwöda abe'do wei̧bi, ojo'do weji̧bi a̧ja̧kwökönö sulabenö ja̧bo̧ma. Ja̧danö, jo̧banö ba̧ja̧dö, otiwanö jwebebö tjö̧jijayonö, jwaikwöda wetji̧ a̧ja̧kwökönö, sulabenö ja̧bö ö̧jena, jo̧bama.

¹⁹ Jo̧bajayo̧ ökwödötjö bakwo̧ itji̧ jejenö ö̧jitjö̧ma, abe'dobi, ojo'dobi jo̧ba tjitji̧nö öbibö tjitebo comunidad luwedö tjöba a'o ö̧jobö ötjibobö ja̧kobe, comunidad apjudebe.

²⁰ Ja̧danö, ichibajadö jo̧ba ö̧jemi comunidad luwedönö yötjawobö ja̧kobe, baikwö: –Duluwedö, bite ditji̧ma uu 'dibo̧, ja̧danö wedi̧ a̧ja̧kwökönö sulabenö ja̧bö jo̧. Jo̧banö wedijayonö, wedi̧ a̧ja̧kwökönö, jwaikwöda iteda nöinö ukwotö jö̧ba̧lö isakwo̧, ja̧danö 'dukwachökwe jo̧, –jö̧ba̧lö comunidad luwedönö yötjawobö ja̧kobe.

²¹ Jemi ikenama, jejenö yötjawiawö̧, okobe deinö itebo comunidad ömadöma jo̧banö inawiya ikwawö lotjobö ja̧kobe, ö'wö baibenanö kabatö, jo̧bajayo̧ kwö̧'da̧deduwitjö ö̧jobö jwiobetjö̧. Ja̧danö, jejenö jo̧bajayo̧nö kwabö lobö, inesö suli̧ kwö̧'da̧deduwitjö söbebö loköbaduwena, ja̧danö ju'wibi, ju'wedö israel jojodöma baledaja̧ tja̧ja̧kwena, ja̧danö a̧ja̧kwö yetjabena, –Jo̧ba ja̧bö ö̧jinadanöma ja̧bö dö̧joko, –jö̧ba̧lö.

²² —Ja̧danö ju'wibi yötawaduwakwö chömöledö, Ökwödötjö bakwo̧ sulabenö ja̧ena, sulabenö ja̧iawö̧ jo̧banö kwabö loköbaduwo jö̧ka̧laduwinö. Ja̧danö, jo̧banö lȩkebaduwo jö̧ka̧laduwi̧danö, jo̧banö kwabö loköbaduwena, ja̧danö kwabö lobajadö, iteba'o towinö kwönaduwena.

²³ Jobekwö baleditjö̧ma, yöte baledibanö iteba'o towinö ö̧lo̧böma weköbaduwoko chömöledö, i̧ya̧da möleda iteba'o kwo̧tjaduwobö ja̧kobe. Baikwö labebö lobö yötawa chömöledö, towinö lö̧jadöma, Dios lȩebawö̧ lö̧jadö chömöledö, ja̧danö iteba'o lekwe lö̧jo̧bö kwönaduwitjö̧ma, kwiteboduwi niji suli̧ kwöwaedaduwena. Jo̧kwajabetjö̧ jo̧banö kwabö loköbaduwelö mölȩda, iteba'o meatö jo̧banö kwo̧tjaduwobö ja̧kobe, kwiteboduwi, kwuluwo̧duwi Isabenö Jo̧ Dios kwiteboduwi baibanö iyakwa̧ niji suli̧ kwöwaedaduwapji jö̧ba̧lö, —yöawinobe Moisesma, israel jojodönö.