Deuteronomio 20 - Dios Iwene

Tjöpöjojodönö tjölakwabikwawakwa̧ jawa Moises yöawina jawa

¹ Tupakwö yöawinobe Moisesma, israel jojodönö: —Chömöledö, kwöpöjojodöduwinö ölakwabikwawö lakebaduwenama, tja̧jwi̧mu kabayudönöbi, kolukiyabi juna̧ladönö kwedaduwena, ja̧danö ökwödötjö bajalekwönönö ba̧jȩkwadö ölakwabikwawadönö kwedaduwena. Jejenö ökwödötjö bajalekwönönö juluwadönö kwedaduwijayonö, jobadönö yekabiduwoböma jwiakobe chömöledö, baikwö yötawa: Kwöwaisaduwa, kwuluwo̧duwi Isabenö Jo̧ Diosma, iteda ujulu i̧sȩbö Egipto nijitjö lakebaduwinö ichejebinobe, ja̧danö jo̧bada ökwödökwö ö̧jakwo̧ chömöledö. Ja̧danö jo̧ba inesö juluwo̧da ökwödökwö ja̧nö pjaatobetjö̧, kwöpöjojodöduwinö yekabiduwoböma jwiakobe chömöledö.

² —Ja̧danö, kwöpöjojodökwö kwölakabikwawaduwakwa̧ yöneawachibenama, Diostjö jojodötjö tjö̧'da̧de pjabatadötjö bakwo̧ma jamatö jojodönö yöawobö ja̧kobe, baikwö:

³ –Chömöledö israel jojodö, baikwö yötawakwa̧ a̧ja̧kaduwi. Babe möle kwöpöjojodöduwinö kwölakwabikwawaduwakwedöja, jo̧kwaijayonö jobadönö yekabiduwoko. Jobadönö yebabinö tjö̧bawö, Bidönö dakwö dujuluwakwajö, jö̧ba̧löma yekabiduwoko,

⁴ kwuluwo̧duwi Isabenö Jo̧ Diosda ökwödökwö 'ya̧nö kwöpöjojodöduwinö ölakwabikwawakobetjö̧. Jo̧ba Diosda ökwödönö pjaatakwo̧, kwöpöjojodöduwinö kwujuluwaduwobö, –jö̧ba̧lö tjö̧'da̧de pjabato̧ yöawobö ja̧kobe.

⁵ —Ikenama, ölakwabikwawa jojodö tjuluwedö jojodönö yötjawobö ja̧kobe, baikwö: –Chömöledö, ökwödötjö bakwo̧ o̧do 'yayeju otidinaji̧, ja̧danö otidö kaatinajayonö, ina otidinejunö ö̧japji, baikwö ölakwabikwawobö ichaji̧? Jo̧bajayo̧ bai ö̧jitjö̧ma, ejube ȩwa̧jobö jo̧be, otiwanö iteda otidinejunö ö̧jakobetjö̧. Ȩwa̧jökönö döpöjojodökwö ölakwabikwawitjö̧ma, ölakwabikwawö ö'wö baibena. Ja̧danö, jejenö ö'wö baibitjö̧ma, jelo̧da iteda otidina ejunö ju̧kwadönö Dios pjaatobö abebö, jo̧bada otidinejunö ö̧jena.

⁶ –Ja̧danö ökwödötjö bakwo̧ uba batjo 'yayayu otidajo̧, ina ja̧ batjo̧ waji̧ 'döokobeji̧? Jo̧bajayo̧bi ejube ȩwa̧jobö jo̧be, otidina batjo ajayi wa̧ji̧ o̧'wo ösöwachibanö 'döakobetjö̧. Ȩwa̧jökönö babe ölakwabikwawitjö̧ma, ölakwabikwawö ö'wö baibena, ja̧danö jelo̧da otidina batjo waji̧ o̧'wo ösöwachibanö 'döena.

⁷ –Ja̧danö, ökwödötjö bakwo̧, ilekwonö emaka̧ yöbawö junajo̧, yöbawö ujuninokonö ina ilekwo bajibanö eminökiji̧? Jo̧bajayo̧ ejube ȩwa̧jobö jo̧be, yöbawö ujuninokonö ilekwo bajibanö emakobetjö̧. Ȩwa̧jökönö, babe ölakwabikwawitjö̧ma, ölakwabikwawö ö'wö baibena, ja̧danö jelo̧da yöbawö ujuninokonö emena, iteda ilekwo bajibanö, –jö̧ba̧lö̧ ölakwabikwawa luwedö abebö tja̧ja̧kwobö ja̧kobe.

⁸ —Ja̧danö jemi tupakwöbi jobadö ölakwabikwawa luwedö jojodönö yötja̧lobö ja̧kobe, baikwö: –Ökwödötjö bakwo̧ yebabo̧, ja̧danö yebabinö me'dawo̧ ö̧jobeji̧? Jo̧babi ȩwa̧jobö jo̧be, ju'wedö ölakwabikwawa jojodökwö ja̧nö, jobadöbi jo̧ba yeabi̧danö yebabinö tjime'dawobö ja̧apji jö̧ba̧lö, –ölakwabikwawa luwedö yötja̧lobö ja̧kobe.

⁹ Ikenama, luwedö jojodönö jejenö yöba̧lö katjatajenama, ölakwabikwawa jojodönö 'da̧batö tjujunobö ja̧kobe bakwasokwena batjibanö, ja̧danö 'da̧batö junajadö, bakwasaso jojodö tjuluwedökwena 'da̧batö omudawö tjujunobö ja̧kobe.

¹⁰ —Ja̧danö, ju'wedö tjitebo comunidad kwölakwabikwawaduwobö kwi̧'yaduwenama, kwölakwabikwawaduwakwa̧ abönö ja̧ comunidadnö ju̧kwadönö dösölöjinö kwö̧jaduwakwa̧ wene yöbawö kwujunaduwo, –Ökwödö dömöayedö bakibaduwanö kwiyawaduwitjö̧, ökwödönö mebibö kwabö lodökena, –jö̧ba̧lö dösölöjinö kwö̧jaduwakwa̧ wene yöbawö kwujunaduwo.

¹¹ Ja̧danö, yökawaduwiawö̧, yökawaduwaja̧ ösödö, comunidad apjude po̧bebö tjiyawitjö̧ma, kwömöayeduwi batjibanö kwujunaduwodönö, ja̧danö kwömöayedöduwi ja̧nö, weköbaduwi̧danö otidö tjö̧jena.

¹² Jo̧kwaijayonö kwömöayedöduwi batjibobö öpöjödö, ja̧ comunidad jojodö ökwödökwö tjölakwabikwawitjö̧ma, comunidad tjötjösawö kwölakwabikwawaduwo.

¹³ Ja̧danö, kwuluwo̧duwi Isabenö Jo̧ Dios ja̧ comunidad jojodönö kwujuluwaduwobö pjaatenama, okobe deinö ja̧ comunidadnö ju̧kwadö ömadönö dȩdȩbö loköbaduwo.

¹⁴ Jo̧kwaijayonö jobadötjö ya̧dönöbi, tjemunöbi kwömöayedöduwi batjibanö kwemaduwo, ja̧danö tjajwimu ökwödöda kwajwimuduwi batjibanö kwemaduwo, ja̧danö okobe jwiinö ja̧ comunidadnö ju̧kwadö tjiteaja̧ma, ökwödö kwiteaduwi baibanö kwemaduwobö ja̧kobe, jobadönö kwujuluwaduwajobetjö̧. Kwuluwo̧duwi Isabenö Jo̧ Diosda jejenö kwöpöjojodöduwi tju̧kwaaja̧ma kwemaduwobö iyakwo̧ma chömöledö, jo̧kwajabetjö̧ jejenö iyiawö̧, kwo̧'woduwi ösöwanö iyakwa̧ kwemaduwobö ja̧kobe.

¹⁵ —Jobekwö ja̧köbaduwo kwiteboduwitjö ödö ju̧kwadö tjitebo comunidadkwena ju̧kwadönö chömöledö, Dios ökwödönö iyakwa̧ niji Canaan nijinö jö̧ködönö.

¹⁶ Jo̧kwaijayonö kwiteboduwi baibanö kwuluwo̧duwi Isabenö Jo̧ Dios iyakwa̧ nijinö ju̧kwadönöma dösölö̧jinöma kwedaduwokö. Okobe deinö jobadönö bakwo̧bi ö̧jibökönö kwabawö loköbaduwobö ja̧kobe chömöledö, okobe deinö tjo̧'wo emadönö tjo̧'wo emöködö batjibanö kwabawö loköbaduwobö ja̧kobe, bakwo̧bi ö̧jibökönö.

¹⁷ Jau chömöledö, jwiinö jobadönö söbebö loköbaduwo, hititas jojodönöbi, amorreos jojodönöbi, cananeos jojodönöbi, heveos jojodönöbi, ferezeo jojodönöbi, jebuseos jojodönöbi, jobadötjö bakwo̧bi ö̧jibökenanö baibanö. Jobekwö jobadönö kwabawö loköbaduwobö weajabe kwuluwo̧duwi Isabenö Jo̧ Diosma, ja̧danö weaja̧danö jobadönö kwabawö loköbaduwo chömöledö,

¹⁸ jobadö tjösödawö̧ o̧'wo jawanö ösödö, inesö sulabenö ja̧bö tjö̧ji̧danö ökwödöbi ja̧köbaduwobö tjö̧ba̧jadapji jö̧ba̧lö. Jau chömöledö, tjösödawö̧nö ösödö, jwiinö sulabenö ja̧bö ju̧kwadö jobadöma, ja̧danö tjö̧ba̧jadiawö̧, ökwödöbi kwuluwo̧duwi Isabenö Jo̧ Dios öpöjödi̧nö, jo̧ba öba a'otjö sulabenö ja̧köbaduwapji jö̧ba̧lö, okobe deinö jobadönö kwabawö loköbaduwobö ja̧kobe.

¹⁹ —Ja̧danö ju'wibi wetaduwakwö chömöledö, ju'wi comunidad kwujuluwaduwobö, lekwe möle tjösawö kwö̧jaduwitjö̧ma, ja̧ comunidad ö'öbö ji̧ kwakwawa waji̧ towibiyama jubö loköbaduwoko. Towinö waji̧ma otiwanö kwukwaduwo chömöledö, jo̧kwaijayonö jubö loköbaduwoko. Jau chömöledö, ja̧ towibiyama jojodöokobe, ja̧danö kwöpöjojodöokobe, jobe tjösawö ja̧ towibiya jubö loköbaduwoböma.

²⁰ Ju'wi towibiya, kwakwawa wa̧jökö towibiyama wene jwiinö juköbaduwena chömöledö, ja̧ towibiyatjö comunidad pjolö loawa kwotidaduwobö, ja̧danö ja̧jaye kwakwawa wa̧jökö towibiya jubö, ölakwabikwawa jawa kwotidaduwena, ja̧ comunidad jojodönö kwujuluwaduwenanö kabatö, —jö̧ba̧lö yöawinobe Moisesma, israel jojodönö.