Deuteronomio 2 - Dios Iwene

Jojodö deobe israel jojodö kwetjachina jawa

¹ Moisesma tupakwö yöawinobe israel jojodönö: —Ja̧danö chömöledö, Cadestjö labebajadö, Isabenö Jo̧ weinadanö tjebachajö, jojodö deobe kwedachijatö, ja̧danö jwaibalawa Duwobu lo̧bekwö 'ya̧nö, lekwe möle Seir mösa'o niji söpödö kwedachijatö.

² Ja̧danö, lekwe möle jobe kwedachajabema, Isabenö Jo̧ma ötjönö weinobe,

³ –Tjo̧wi, ida̧ökö lekwe möle bemi mösa'iju jȩmi niji kwekachaduwajabe, babema u'dakwö kwekachaduwobö badekwachajabe. Jo̧kwajabetjö̧ u'dakwö kwekachaduwo,

⁴ ja̧danö lakebaduwakwa̧ abönö, baikwö weköbo israel jojodönö: Isabenö Jo̧ma ökwödönö yöawobe, babema kwömöledöduwi Esau itji̧mu tupadanö jojodö tjitebo ö'wejenö kwöbaledaduwobö jo̧be. Ja̧danö, jejenö kwöbaledaduwiawö̧, jobadöma yetjabikobe ökwödönö, jo̧kwajabetjö̧ teada̧lönö kwö̧jaduwo,

⁵ jobadökwö kwölakwabikwawaduwapji jö̧ba̧lö. Jobadö tjitebo Seir mösa'oma, ötjöma jobadö Esau itji̧mu tupadanö jojodönöda chiyijatö, tjitebo baibanö jobe tjö̧jobö, ja̧danö tjitebo niji ja'yubebi ökwödö israel jojodönö chiyökakwo̧sa. Jo̧kwajabetjö̧ jobadökwö kwölakwabikwawaduwobö jwiobe.

⁶ Tjitebo ö'wejenö kwöbaledaduwena, kwakwawa kwukwaduwakwa̧ jobadönö balada midö kwemaduwobö ja̧kobe, ja̧danö ojwio kwowaduwakwa̧bi, midö kwemaduwobö ja̧kobe, –jö̧ba̧lö weinobe Diosma, —Moises yöawinobe.

⁷ Tupakwö yöawinobe, —Kwuluwo̧duwi Isabenö Jo̧ Diosma isabenö otiwanö iteada̧linobe ökwödönö chömöledö. Jo̧bama okobe jwiinö cuarenta o̧biya baledibanö kwekachaduwina waiso̧, ja̧danö okobe jwiinö kwö̧jaduwi̧ waekwökönö kwöbaledaduwobö pjaatinobe. Kwekachaduwonö, ökwödökwö ja̧nö pjaatinobe, kwujuna̧laduwo jö̧ka̧laduwi̧ma ja'yubebi jwiköbaduwapji jö̧ba̧lö.

⁸ Ja̧danö chömöledö, Dios weinadanö dömöledö, Seirnö ju̧kwadö Esau itji̧mu tupadanö jojodö tjitebo tupakwönö döbaledijatö. Arababe ya̧kwawamatjö labebö, ja̧danö Elat comunidadtjöbi, Ezion Gueber comunidadtjöbi labebö, tupakwö di̧'yijatö, jojodö deobe Moab jojodö tjitebo jo̧bekwö.

⁹ —Ja̧danö, Moab jojodö tjitebobe di̧'yenama, Isabenö Jo̧ma ötjönö weinobe, –Moab niji jojodökwöma jwöjwököbakwawaduwoko, ja̧danö jobadökwö kwölakwabikwawaduwoko, jobadö tjitebo nijitjö ja'yubebi ökwödönö chiyökakobetjö̧. Jau, ida̧ökö Ar niji Lotmine itji̧mu tupadanö jojodö Moabitas jojodönö chiyijatö, tjitebo baibanö, jo̧kwajabetjö̧ tjitebo nijitjö ja'yubebi ökwödö israel jojodönö chiyökö, –jö̧ba̧lö weinobe Diosma, —Moises yöawinobe.

^10-11 Ja̧ Moab niji Dios iyina jawa labebö loawama baikwö laebobe: Ajayinö ba̧jȩkwadö anaquitas jojodödanö ichejekwadö inesö ödöbaedö emitas ötjabawö̧ma ja̧ nijinö tjö̧jinobe. Anaquitas jojodönöbi, emitas jojodönöbi ju'wedöma bakwainö ötjabinobe, inesö ödöbaedö Refaitas jö̧ba̧lö, jo̧kwaijayonö Moabitas jojodöma jobadönö emitas jö̧ba̧lö ötjabinobe. Ja̧danö, tjiteboinemima Diosma moabitas jojodönö iyinobe, tjitebo baibanö.

¹² Ja̧danö, Esau itji̧mu tupadanö jojodönö Dios iyina labebö loawama baikwö laebobe. Ajayinö horeos jojodöma Seir nijinö tjö̧jinobe, jo̧kwaijayonö Isabenö Jo̧ israel jojodö tjitebo baibobö iyinadanö, Isabenö Jo̧ma Esau itji̧mu tupadanö jojodönö Seir niji iyinobe, tjitebo baibobö. Ja̧danö, jejenö iyiawö̧, Esau itji̧mu tupadanö jojodöma horeos jojodönö söbebö lotjinobe, ja̧danö tjiteboinemi nijinö, idöda tjitebo niji baibanö jobe tjö̧jinobe.

¹³ Tupakwö yöawinobe Moisesma, israel jojodönö: —Diosma tupakwö weinobe, –Tjo̧wi, Zered ojwe pekibaduwo, –jö̧ba̧lö, jo̧kwajabetjö̧ weaja̧danö Zered ojwe pedibijatö.

¹⁴ Ja̧danö, Cades Barneatjö ladebinelö, Zered ojwe pedibenanö baibanö, treinta y ocho o̧biya baledinobe. Ojwe pedibakwa̧ abönö, lekwe möle kwebachö dö̧jijatö, okobe deinö ökwödö israel jojodötjö ajayinö ji̧nadö ölakwabikwawa jojodöma debö tji̧'yenanö kabatö. Ja̧ debö tji̧'yi̧ma, canaan niji tetjachobö tjöpöjödiökwe Isabenö Jo̧ ajayinö jobadönö yöbawö ujuninadanö badekwachinobe, –Yötawi̧ tjöpöjödobetjö̧, okobe deinö chiyakwa̧ niji tebachökönö debö tji̧'yakwedö, –jö̧ba̧lö yöbawö ujuninadanö.

¹⁵ Jau chömöledö, Isabenö Jo̧ma jobadö iteda wei̧ öpöjödinadö tjöpöjojo ja̧nö, jobadökwö ölakwabikwawinobe ichejekwa, okobe deinö jobadöma ju'wedö israel jojodö tjö̧da̧detjö debö tji̧'yenanö kabatö.

¹⁶ —Jemi ikenama, okobe deinö jobadö ajayinö nijibe tjichibena ölakwabikwawa jojodö ji̧nadö debö tji̧'yaja̧ ikenama,

¹⁷ Isabenö Jo̧ma ötjönö weinobe,

¹⁸ –Babe Moab niji kwöbaledaduwobö badekwachajabe. Jo̧kwajabetjö̧ tjitebo comunidad Ar pjeanö tebachö,

¹⁹ tupakwö amonitas jojodö tjitebo ö'öböbe kwi̧'yaduwo. Jo̧kwaijayonö, amonitas jojodö tjitebo ö'öböbe kwichibaduwena, jobadökwö jwöjwököbakwawaduwoko, ja̧danö tjödameakwinö ja̧köbaduwoko, jobadökwö kwölakwabikwawaduwapji jö̧ba̧lö. Jau, jobadökwö kwölakwabikwawaduwoko, tjitebo nijitjö ja'yubebi chiyökakobetjö̧, damötjö jobadö Lotmine itji̧mu tupadanö jojodönö ida̧ökö chiyinobetjö̧, –jö̧ba̧lö weinobe Diosma, —yö̧awinobe Moisesma.

²⁰ Ja̧ Amonitas jojodö tjitebo labebö loawama, baikwö laebobe: Tjitebo nijima, ju'wedö jojodöma inesö ödöbaedö Refe itji̧mu tupadanö jojodö tjitebo, jö̧ba̧lö ötjabobe, jobadö Refe itji̧mu tupadanö jojodöma ajayinö ja̧ nijinö tjö̧jinobetjö̧. Ja̧danö, amonitas jojodöma ja̧ nijinö ajayinö ji̧nadönö zanzumitas jö̧ba̧lö ötjabinobe.

²¹ Jobadö zanzumitas jojodöma anaquitas jojodö tjö̧ba̧jekwi̧danö tjö̧ba̧jekwinobe ajayinöma, ja̧danö ödöbaedö tjö̧jidanöbi, juluwadö tjö̧ji̧danöbi tjö̧jinobe. Jo̧kwaijayonö ödöbaedö juluwadö tjö̧jijayonö, Isabenö Jo̧ma amonitas jojodönö pjabatö, jobadönö söbebö loinobe, tjiteboinemi nijinö, amonitas jojodöda tjö̧jobö, idöda tjitebo baibanö.

²² Ja̧danö, amonitas jojodönö pjaati̧danö, Seirnö ju̧kwadö Esau itji̧mu tupadanö jojodönöbi pjaatinobe. Jobadönö pjabatö, Seir nijinö ajayinö ji̧nadö horeos jojodönö söbebö loinobe, tjiteboinemi nijima, idöda tjitebo niji baibanö tjemobö, ja̧danö babe mölebi baibanö, ina jobe tju̧ju̧kwobe Esau itji̧mu tupadanö jojodöma.

²³ Ja̧danö, aveos jojodöma ajayinö Gaza nijinö tjö̧jinobe, jo̧kwaijayonö filisteo jojodöma Cretatjö ichö, jobadönö söbebö lotjinobe, ja̧danö söbebö lobajadö, aveos jojodö tjiteboinemi nijinö tjö̧jinobe, idöda tjitebo niji baibanö.

²⁴ Tupakwö yöawinobe Moisesma, israel jojodönö: —Jemi ikenama Isabenö Jo̧ma weinobe, –Tupakwö 'ya̧nö, Arnon ojwe pekibaduwo, ja̧danö baikwö yötawakwö, Amorreos jojodö tjitebo comunidad Hesbon la'aka luwo̧ Sijon mikwo̧nö kwujuluwaduwobö chiyajabe, jo̧banö juluwajadö itebo niji 'dökebaduwakobetjö̧. Jo̧kwajabetjö̧, itebo niji jamatö kwemaduwakobetjö̧, jo̧bakwö kwölakwabikwawaduwo.

²⁵ Babe möle jamatö, bö̧jȩ bakwemeachibanö jojodö ökwödönö omukwatö yetjaibobö pjatatakwo̧sa. Ja̧danö, jwiinö kwujuluwaduwobö pjatatobetjö̧, ökwödönö bö̧jȩ ba̧kwemeachibanö jojodö tja̧ja̧kwenama, yebabinö tjö̧bawö, usula emawö tjö̧jakwedö, -Idö israel jojodötjö dakwö dö̧jibakwajö? -jö̧ba̧lö, —Dios yöawina jawa yöawinobe Moisesma.

La'aka luwo̧ Sijonnö tjujuluwina jawa

²⁶ Tupakwö yöawinobe Moisesma, israel jojodönö: —Ja̧danö, jojodö deobe dö̧jelö, yöbawadönö wetijatö, Hesbon comunidad la'aka luwo̧ Sijon ö̧jobekwö 'ya̧nö, jo̧bakwö wene jwiinö dö̧jakwa̧ wene yötjawobö, baikwö:

²⁷ –La'aka luwo̧ Sijon, kwitebobenö döbaledobö adebakwö, döbaledobö weköbakwa̧ji̧? Döbaledöbö weköbitjö̧ma, jwaikwöda jalama mananöda kwedachakwedösa, jelobekwö di̧'yoböma jalachibökönö.

²⁸ Ja̧danö, kwitebobenö döbaledonö, kwitea midökönö demökakwedösa, mikwanö kwiyi̧ kwakwawada dukwobö demakwedösa, ja̧danö mikwanö kwiyi̧ ojwiyoda demakwedösa, dowobö. Adebi̧ma bi̧yada, dömasapiyanö kwitebo döbaledobö, tupakwö Jordan ojwebe dichibenanö kabatö.

²⁹ Jau Sijon, Esau itji̧mu tupadanö jojodö Seirnö ju̧kwadö döbaledobö wetjinadanö, ja̧danö Arnö ju̧kwadö Moabitas jojodö döbaledobö wetjinadanö, kwitebo ö'wejenö döbaledobö adebakwö, Jordan ojwe pebibö, duluwo̧ Isabenö Jo̧ Dios ökwödönö iyakwa̧ nijibe dichibenanö kabatö, ¿jejenö döbaledobö weköbakwa̧ji̧? –jö̧ba̧lö yöbawadönö wetijatö.

³⁰ Jo̧kwaijayonö jejenö atjebinajayonö, Hesbon comunidad la'aka luwo̧ Sijonma itebo ö'wejenö döbaledobö öpöjödinobe. Ja̧danö, ja̧ öpöjödinama, baikwö labebö lobö yötawobe, kwuluwo̧duwi Isabenö Jo̧ Diosda jo̧ba o̧'wo 'diachibanö weinobe, adebaja̧ öpöjödö, ökwödökwö ölakwabikwawakobetjö̧. Jejenö o̧'wo 'diachibanö weinobe, jo̧banö dujuluwobö pjaatakobetjö̧, ja̧danö kwöwaisaduwa, isabenö jejenö webajo̧, Sijonnö dujuluwobö pjaatinobe chömöledö.

³¹ —Jau chömöledö, Isabenö Jo̧ma ötjönö yöawinobe, –A̧ja̧kwi, ida̧ökö jamatö chiyobe, la'aka luwo̧ Sijonnö kwujuluwobö, itebo niji kwemakobetjö̧. Jo̧kwajabetjö̧, itebo niji jamatö kwemaduwo, –jö̧ba̧lö yöawinobe.

³² Ja̧danö, Sijonma okobe deinö ömöayedökwö ichinobe, Yahaza comunidadbe, ökwödökwö ölakwabikwawobö.

³³ Ja̧danö, jejenö ölakwabikwawö ichenama, duluwo̧ Isabenö Jo̧ Diosma pjaatinobe, Sijonnö dujuluwobö, ja̧danö jo̧banöbi, okobe deinö itji̧munöbi, okobe deinö ömöayedö itebo jojodönöbi kwabawö lodijatö.

³⁴ Ja̧ möle okobe jwiinö itebo comunidadtenia dujuluwijatö, ja̧danö juluwajadö, okobe deinö jobe ju̧kwadönö kwabawö lodijatö, ömadönöbi, ya̧dönöbi, tjemunöbi, bakwo̧bi ö̧jibökönö okobe deinö Sijon ömöayedöbinadönö kwabawö lodijatö.

³⁵ Sule tja̧jwi̧munöda kwabawö lodijökötö, tja̧jwi̧munö kwabawö lobökönö, ökwödöda da̧jwi̧mu batjibanö 'döbebö demijatö, ja̧danö comunidadteniatjö tjiteainama, ökwödö ditea baibanö demijatö.

³⁶ —Jau chömöledö, okobe jwiinö Sijon iteboinemi comunidadtenia dujuluwijatö, Arnon ojwe ö'öbö jȩmi comunidad Aroertjöbi, ju'wi Arnon ojwe wabeko ö'wejenö ji̧ comunidadtjöbi, u'dakwö Galaad niji baibanö, okobe jwiinö dujuluwijatö. Ja̧danö, ju'wi comunidadkwena jwiinö mönö tjöekwinajayonö, yayonö bakwöta comunidadbi dujulutjö ji̧binokobe, okobe jwiinö dujuluwijatö, duluwo̧ Isabenö Jo̧ Dios ja̧ okobe jwiinö dujuluwobö iyobetjö̧.

³⁷ —Jau chömöledö, okobe jwiinö ja̧ niji dujuluwijatö, jo̧kwaijayonö amonitas jojodö tjitebobema di̧'yijökötö, Dios wei̧ da̧ja̧kwobetjö̧. Duluwo̧ Isabenö Jo̧ Diosma jweinö weinobe ökwödönö, amonitas jojodökwö dölakwabikwawokobö, ja̧danö ja̧ wei̧ a̧ja̧kwö, Jabok ojwe ö'öbö nijibebi di̧'yijökötö, ja̧danö tjitebo mösa'iju jȩmi nijibe di̧'yijökötö, —jö̧ba̧lö yöawinobe Moisesma israel jojodönö, Dios jobadönö pjaatina jawama.