Deuteronomio 19 - Dios Iwene

Tjöeba̧lakawa jawa comunidad Moises yöawina jawa

¹ Tupakwö yöawinobe Moisesma: —Chömöledö, kwuluwo̧duwi Isabenö Jo̧ Diosma ökwödönö iyakwa̧ niji ju̧kwadönö söbebö loakobe, tjiteboinemi nijinö kwö̧jaduwobö. Ja̧danö, jejenö jobadönö söbebö loaja̧ ikena, ökwödöma tjotidina comunidadbiyanö, ja̧danö tjotidina tjejubiyanö ökwödöma otiwanö kwö̧jaduwakwedöja.

^2-3 Jemi ikenama, kwuluwo̧duwi Isabenö Jo̧ Dios jejenö ökwödönö kwiteboduwi niji comunidadtenia iyaja̧ ikenama, ja̧ comunidadbiyatjö wapötakwa comunidad 'da̧batö kwujunaduwobö ja̧kobe, tjöeba̧lakwawa comunidad baibanö, bakwo̧ jelo̧nö sulabenö omukwatökönö ö'wö baibinö ja̧enama, ja̧ comunidadbe juluwanö döibajakobetjö̧. Baikwö yötawaduwakwö, ja̧ comunidadbiya omudawö kwujunaduwakwa̧ma: Niji ba̧ja̧dö kwedaduwo, ja̧danö ba̧ja̧dö edajadö, niji wapöjekwa niji baibanö 'da̧batö kwujunaduwo, ikenama bakwöjȩkwena bakwöta comunidad omudawö kwujunaduwo.

⁴ —Ja̧ tjöeba̧lakwawa comunidadbe dötjibakwedönö baikwö labebö lobö yötawa, okobe deinö kwabö lobadönö tjötjeba̧lobö jwiobe, jo̧kwaijayonö bakwo̧, ömöledöso̧nö öpöjödökönö, kwabö loobö omukwatökönö ömöledöso̧nö ö'wö baibanö kwaitjö̧ma, ja̧ comunidadbe döibajobö ja̧kobe, ö'wö babibajo̧ ömöledö balekwa mikwa jo̧banö kwabö lotjapji jö̧ba̧lö.

⁵ Baikwö wanedö yötawa, bakwo̧ ömöledöso̧kwö tebobe towi jubö i̧'yena, ja̧danö otomo'anö towi juonö, o̧tomo'a dilachajö döbajö ömöledöso̧nö töena bajaleso̧li, ö'wö baibenanö. Jejenö kwabö loobö omukwatököjayonö, ömöledöso̧ ö'wö baibiökwe, jo̧bama tjöeba̧lakwawa comunidadbe döibajobö ja̧kobe, ja̧ comunidad jojodö jo̧banö tjötjeba̧lonö ö̧jibobö.

⁶ Jo̧bajayo̧nö kwabö lotjobö jwiena, kwabö loobö omukwatajokobetjö. Jo̧kwaijayonö, sule bakwöta comunidadda tjöeba̧lakwawa comunidad baibanö kwujunaduwitjö̧ma, jobe 'ya̧kwawama jwiinö ödöena, ja̧danö bakwo̧ jobe döibajonö ime'dawena, ja̧danö ichibakwa̧ abönö, ö'wö babibajo̧ ömöledöso̧ balekwa mikwa kwabö lobo̧ma jo̧banö lubö ichibena, ja̧danö ö'wö baibobö jwiijayonö, jo̧banö kwabö loena.

⁷ Jejenö baledapji jö̧ba̧lö, ökwödönö wetobe, wapötakwa comunidadbiya 'da̧batö kwujunaduwobö, jobe dötjibajenama ödöapji jö̧ba̧lö.

^8-9 —Ja̧danö ju'wibi yöbawö wetaduwakwö chömöledö, kwuluwo̧duwi Isabenö Jo̧ Diosma kwa'dödönö inesö jalobe niji yöbawö ujuninobe, –Yadakwödanö chiyocha, –jö̧ba̧lö, ¿jö̧tö? Ja̧danö okobe jwiinö babe ökwödönö webö yötawi̧, –Jwaikwöda kwuluwo̧duwi Isabenö Jo̧ Diosnö ösödö kwö̧jaduwo, ja̧danö okobe jwiinö ja̧bö kwö̧jaduwi̧ma, jo̧ba wei̧danö ja̧bö kwö̧jaduwo, –jö̧ba̧lö yötawi̧ a̧ja̧kwö kwö̧jaduwitjö̧ma, ja̧ kwa'dönö yöbawö ujuninama ökwödönö badekwachakobe chömöledö. Ja̧danö, wei̧ a̧ja̧kwö kwöjaduwiökwe, ajayinö ökwödönö iyinatjö bajalekwönönö ja̧ yöbawö ujunina niji ökwödönö iyena chömöledö, ajayitjö bajalekwönönö kwiteboduwi inesö jalö̧je baibanö. Jejenö baleditjö̧ma, ajayinö 'da̧batö kwujuninaduwadanö, yemidanö ju'wi wapötakwa comunidadbiyabi 'da̧batö kwujunaduwobö ja̧kobe chömöledö,

¹⁰ ajayi 'da̧batö kwujuninaduwa comunidad ödöiawö̧, tjichibakwa̧ abönö balekwa mikwa kwabö lobadöma döbibajadönö lubö kwabö lotjapji jö̧ba̧lö. Jau chömöledö, tjöeba̧lakwawa comunidad jwiinö ödöitjö̧ma, kwabö lotjoko jö̧tja̧lawö̧nö kwabö lotjena, ja̧danö kwiteboduwi niji, kwuluwo̧duwi Isabenö Jo̧ Dios ökwödönö kwiteboduwi baibanö iyina niji suli̧ tjöwaedena, sulabenö ja̧böködö tjökwösobu jejenö ebawobetjö̧. Jejenö badeditjö̧ma, wene samena ökwödö israel jojodönö chömöledö, ja̧danö jejenö baledapji jö̧ba̧lö, kwiteboduwi jalö̧je baibenama, ju'wi wapötakwa comunidadbiyabi 'da̧batö kwujunaduwobö ja̧kobe.

¹¹ —Jo̧kwaijayonö bakwo̧ ömöledöso̧nö öpöjödö, kwabö lootö jö̧ba̧lö teada̧lajo̧, ömöledöso̧nö mebibö ö'wö baibanö kwabö loitjö̧ma, ja̧danö kwabö lobajo̧ tjöeba̧lakwawa comunidadbe döibajitjö̧ma, jo̧bajayo̧nö tjötjeba̧lobö jwiakobe.

¹² Jo̧ba kwabö lobina itebo comunidad luwedöma yöbawadönö wetjobö ja̧kobe, tjöeba̧lakwawa comunidadtjö tjichejebobö, ja̧danö ichejebajadö, balekwa mikwa kwabö lobo̧nö tjiyobö, sulabenö kwabö lobinanö kwabö loakobetjö̧.

¹³ Isabenö jo̧bajayo̧nö lȩlöjinö kwedaduwoböma jwiakobe chömöledö, isabenö jo̧banö kwabö loköbaduwobö ja̧kobe. Jo̧bama ömöledöso̧nö sulabenö kwabö loinenama, kwiteboduwi niji suli̧ öwaedinö yȩekwi̧nö ja̧inobe, ja̧danö balekwa mikwa jo̧banö kwabö loköbaduwenama, ja̧ yȩekwi̧ kwiteboduwitjö söbebö loköbaduwena. Jobekwö yötawaja̧danö ja̧köbaduwo chömöledö, kwiteboduwinö ja̧nö otiwanö kwö̧jaduwakobetjö̧, —jö̧ba̧lö yöawinobe Moisesma.

Niji ö'öbö i̧sȩkwi̧ jawa Moises yöawina jawa

¹⁴ Tupakwö yöawinobe Moisesma: —Chömöledö, kwuluwo̧duwi Isabenö Jo̧ Dios ökwödönö iyakwa̧ nijima, luwedö 'da̧batö junö, bakwo̧nökwena itebokwena 'da̧batö tjujunakobe, ja̧ nijima ba̧kwelöjatebö jo̧babi itji̧mu tupadanö jojodöbi tjitea niji ja̧kobetjö̧. Ja̧danö niji ö'öbö i̧sȩkwi̧ jawa tjujunakobe, itea niji ö'öbö öwawobö. Ja̧danö, baikwö wetaduwakwö, la'akatjöda kwömöledöso̧ itea niji kwönaukwotö jö̧ba̧lö, ja̧ ö'öbö i̧sȩkwi̧ jawa kwopjolatoko, ja̧danö kwitji̧mu tupadanö jojodöbi la'akatjöda jejenö niji tjönaukwotö jö̧ba̧lö ö'öbö i̧sȩkwi̧ jawa tjopjolatoko, —jö̧ba̧lö yöawinobe Moisesma.

Ju'wedö sulabenö ja̧tjina yöbawadönö Moises yöawina jawa

¹⁵ Tupakwö yöawinobe Moisesma: —Chömöledö, lȩekwa luwedö tjöba a'otjö jelo̧ sulabenö ja̧ina wene yötjawenama, sule bakwo̧da, –Bite sulabenö ja̧ina chedijatö, –jö̧ba̧lö yöawitjö̧ma, lȩekwa luwedö a̧ja̧kwö lȩtjebobö jwiena, sule bakwo̧da yöawajabetjö̧. Du̧ju̧tajaö̧kö̧, wamedukwaö̧kö̧ tjedaja̧ bakwainö yötjawitjö̧da yötjawi̧ tjösödobö ja̧kobe, ja̧danö yötjawi̧ ösödö, sulabenö ja̧binanö lȩekwa yötjawobö ja̧kobe.

¹⁶ —Ja̧danö, ömöledöso̧nö suli̧ öwaedotö jö̧ba̧lö, bakwo̧ omöna yöba̧lö ömöledöso̧ sulabenö ja̧ina yöawitjö̧ma,

¹⁷ baikwö ja̧köbaduwobö ja̧kobe: Jobadö du̧ju̧taja, –Chömöledöso̧ sulabenö ja̧ajabe, –jö̧ba̧lö yöba̧lajo̧bi, yöa̧linökwebi Dios eju comunidad jo̧bekwö tji̧'yobö ja̧kobe, Isabenö Jo̧ öba a'obe, jobe otidadö Diostjö jojodötjö tjö̧'da̧de pjabatadöbi, inesö lȩekwa luwo̧bi tjöba a'o tjö̧jobö.

¹⁸ Ja̧danö jejenö tjichibiawö̧, lȩekwa luwedöma teada̧lönö otiwanö abebö tja̧ja̧kwobö ja̧kobe, jweinö yöbawo̧ma ditejö jö̧ba̧lö tjöwaisachibakobetjö̧. Ja̧danö, jejenö abebö a̧ja̧kwajadö, –Ömöledöso̧ sulabenö ja̧ököjayonö, sulabenö ja̧aja̧ wene omöna yöa̧lajabe, –jö̧ba̧lö tjöwaisachibitjö̧ma, jo̧ba omöna yöba̧lo̧nö lȩekwa yötjawobö ja̧kobe.

¹⁹ —Baikwö yötawaduwakwö jo̧ba omöna yöba̧lo̧nö lȩkebaduwakwa̧ma: Ömöledöso̧nö omöna yöba̧lö, ömöledöso̧nö lȩkebaduwobö isakwinobe, jo̧kwajabetjö̧ i̧yada, ömöledöso̧nö lȩkebaduwobö isakwina lȩekwada balekwa mikwa jo̧banö lȩkebaduwobö ja̧kobe. Ja̧danö, jejenö jo̧banö lȩbebö, omöna yöa̧lina yȩekwi̧ma, ökwödö kwö̧'da̧deduwitjö söbebö loköbaduwena.

²⁰ Ja̧danö, jejenö omöna yöba̧lo̧nö jejenö lȩkebaduwiawö̧, ju'wedö israel jojodöma a̧ja̧kwö yetjaibakobe, –Dömöledönö suli̧ döwaedotö jö̧ba̧lö omöna yöda̧loko, –jö̧ba̧lö, ja̧danö yebabinö omukwatö jo̧ba sulabenö ja̧inadanöma ja̧tjökena la'akatjöda.

²¹ Isabenö jo̧bajayo̧nö lȩlöjinö kwedaduwoböma jwiakobe chömöledö, ömöledöso̧nö lȩekwa isakwina jawada, bakwainö lȩekwa jo̧banö lȩkebaduwo, baikwö wanedö yötawa: Ömöledöso̧nö kwabö loköbaduwobö isakwinatjö̧ma, jo̧banö kwabö loköbaduwo, öbajale kelebö loköbaduwobö isakwinatjö̧ma, öbajale kelebö loköbaduwo, oo'ye 'yebö loköbaduwobö isakwinatjö̧ma, oo'ye 'yebö loköbaduwo, ömamu 'wibebö loköbaduwobö isakwinatjö̧ma, ömamu 'wibebö loköbaduwo, ömasapa 'wibebö loköbaduwobö isakwinatjö̧ma, ömasapa 'wibebö loköbaduwo. Jau chömöledö, sulabenö ömöledöso̧nö suli̧ öwaedotö jö̧ba̧lö omöna yöa̧linobetjö̧, ömöledöso̧nö lȩkebaduwobö isakwi̧danö bakwainö jo̧ba omöna yöba̧lo̧nö lȩkebaduwonö, —jö̧ba̧lö yöawinobe Moisesma, israel jojodönö.