Deuteronomio 18 - Dios Iwene

Tjö̧'da̧de pjabatadönöbi, ju'wedö Levisaso jojodönöbi tjiyakwa̧ jawa Moises yöawina jawa

^1-2 Tupakwö yöawinobe Moisesma: —Chömöledö, Israel niji baibanö bakwasokwena jojodönö tjitebokwena niji Dios iyenama, Diostjö jojodötjö tjö̧'da̧de pjabatadönöbi, ju'wedö tjömöledö Levisaso jojodönöbi tjitebo niji iyökakobe. Jobadöma jelesokwena jojodö niji tjujuna̧li̧danöma jwitjakwedö, Dios jobadönö iyi̧ma wainö ji̧, baikwö yötawa: Damötjö Isabenö Jo̧ma jobadönö yöbawö ujuninobe, –Ötjödasa ökwödönö iyawadanö chö̧ja̧kwo̧sa, ökwödönö iyö chiteada̧lakobetjö̧, –jö̧ba̧lö, jo̧kwajabetjö̧ israel jojodöma kwakwawa jawa iyawa Diosnö tjiyenama, jobadöma ja̧ Isabenö Jo̧nö iyawa kwakwawatjö tjukwakwedö.

³ Ja̧ Diosnö iyawatjö tjemakwa̧ jawa baikwö yötawa: Jojodö pakayanöö̧kö̧, obejanöö̧kö̧ kwabö juwö Diosnö tjiyenama, tjiyajökwe öböbe'obi, ibekasa'wijubi, ukwa'wo jawabi tjö̧'da̧de pjabatadönö tjiyobö ja̧kobe, tju̧kwa̧ baibanö.

⁴ Ju'wibi trigo waji̧bi, trigojaye waji̧bi ajayi kwe'daduwi̧ma, jobadönö kwiyaduwobö ja̧kobe, ja̧danö ubasobubi, olivo o̧tesobubi ajayi kwemaduwaja̧ jobadönö kwiyaduwobö ja̧kobe, ja̧danö kwajwimu obejadö tjöwö'ye ajayi 'wikebaduwi i'yebiya jobadönö kwiyaduwobö ja̧kobe.

⁵ Jau chömöledö, kwuluwo̧duwi Isabenö Jo̧ Diosma Levisaso jojodönöda 'da̧batö ujuninobe, ba̧kwȩlöjatebö jo̧ba öba a'o ja̧nö, Diostjö jojodötjö tjö̧'da̧de pjabatadö otidö tjö̧jobö, ja̧danö jejenö tjotidobetjö̧, yötawaja̧ jawa jobadönö kwiyaduwobö ja̧kobe.

^6-7 —Ja̧danö, ju'wibi baikwö yötawa Levisaso jojodönö. Jobadöma kwiteboduwi ba̧kwemeachibanö kwiteboduwi comunidadnö tjö̧jonö, jobadötjö bakwo̧ omukwatö ujunena, –Ötjöma isabenö chuluwo̧ Isabenö Jo̧ öba a'o chotidobö jö̧ta̧la, iteda eju comunidad baibanö omudawö ujuninemi comunidadbe chi̧'yo, jobe otidö chö̧jobö, –jö̧ba̧lö. Jejenö Isabenö Jo̧ öba a'o ja̧nö, tjö̧'da̧de pjaatakwawa otidobö jö̧a̧litjö̧ma, wene jwia, jobe i̧'yobö ja̧kobe, ja̧danö ju'wedö ömöledö Levisaso jojodö tjotidi̧danö jobe ja̧nö otidobö ja̧kobe. Ja̧danö, jobe Dios ejutjö tjö̧'da̧de pjabatö otidobetjö̧,

⁸ ju'wedö jobe ju̧kwadö Levisaso jojodönö tjiyi̧ kwakwawatjö, jo̧babi ba̧kweminö ukwobö ja̧kobe, jo̧babi jobe tjo̧'da̧de pjabatö otidobetjö̧. Iteda ömöledö mikwanö tjiyi̧tjö balada ida̧ökö ujuna̧litjö̧böbi, yayonö jojodö Levisaso jojodönö tjiyi̧tjö ukwobö ja̧kobe, tjö̧'da̧de pjabatö otidi̧ mikwa jö̧ba̧lö, —yöawinobe Moisesma.

Canaan niji ju̧kwadö ja̧bö tjö̧ji̧danöma ja̧bö kwö̧jaduwoko, jö̧ba̧lö Moises yöawina jawa

⁹ Tupakwö yöawinobe Moisesma: —Chömöledö, kwiteboduwi, kwuluwo̧duwi Isabenö Jo̧ Dios ökwödönö iyakwa̧ niji kwichibaduwenama, jobe ju̧kwadö tjitebokwena jojodö inesö sulabenö ja̧bö tjö̧ji̧danöma ja̧bö kwö̧jaduwoko.

^10-11 La'akatjöda jobadö ja̧tji̧danöma ja̧köbaduwoko, baikwö yötawa: Jobadötjö ju'wedöma idöda tji̧tji̧munö kwabö juwö tjiyobe, tjösödawö̧nö iyawa baibanö, jo̧kwaijayonö ökwödötjö bakwo̧bi jejenö kwitji̧muduwinö kwiyaduwobö jwiobe. Ja̧danö jobadötjö ju'wedöma mea boawa ja̧tjobe, tupakwö baledakwa̧ jawa tjöwaisachiboböbi, jojodö tjedaja̧ labebö lobö yötjawoböbi, ja̧danö tjöpöjojodönö suli̧ tjöwaedoböbi, ja̧danö baledakwa̧ otiwanö baledoböbi, jo̧kwaijayonö ökwödöma jejenö ja̧köbaduwoko, la'akatjöda. Ja̧danö jobadötjö ju'wedöma ö'wö babibinadö tjo̧'wo luwo̧nö yötja̧lakwawobö tjotidobe, jo̧kwaijayonö ökwödö israel jojodötjö bakwo̧bi jejenö ö'wö babibinadönö yöa̧lakwawobö jwiakobe.

¹² Isabenö jejenö ja̧bö tjö̧ji̧danö ja̧köbaduwobö jwiakobe chömöledö, Isabenö Jo̧ edemi ja̧ ja̧ye ja̧awama jwiinö öpöjödobetjö̧, –Inesö sulabenö ja̧awa, –jö̧ba̧lö. Ja̧danö, baikwö yötawaduwakwö chömöledö, ja̧ jawa sulabenö ja̧bö tjö̧jiökwe, kwuluwo̧duwi Isabenö Jo̧ Diosma jobadönö tjitebo nijitjö a'dewo loobe, jo̧kwajabetjö̧ jobadö ja̧tji̧danöma ja̧köbaduwoko.

¹³ Ökwödöma sulabenö ja̧bökönö, kwuluwo̧duwi Isabenö Jo̧ Dios öba a'otjö wene jwibö kwö̧ja̧duwobö jö̧ba̧ladöja chömöledö, jobadö ja̧tji̧danö ja̧bökönö.

¹⁴ Jau chömöledö, jobadö tjitebokwena jojodö, juluwanö kwiteboduwi baibanö 'döbebö kwemaduwakwa̧ nijinö ju̧kwadöma, mea bobö tupakwö baledakwa̧ yöbawadönöbi, ju'wedö ja̧jaye yöbawadönöbi abebö, yötja̧wi̧ a̧ja̧kwadö. Jo̧kwaijayonö kwuluwo̧duwi Isabenö Jo̧ Diosma ökwödönö weokobe, jo̧badöjayedö yötjawi̧ kwa̧ja̧kwaduwobö.

¹⁵ —Kwuluwo̧duwi Isabenö Jo̧ Dios ökwödönö yöawobö jö̧a̧lenama, jobadöjayedönötjö̧ yöawökakobe chömöledö. Ökwödönö yöawobö jö̧a̧lenama, ökwödötjö bakwo̧ iteda yöawi̧ yöbawo̧nö weakobe, ötjö Moisesja̧yo̧nö, ökwödönö Dios yöawi̧ yötawi̧danö yöawobö. Ja̧danö, jo̧ba Dios yöawi̧ yöawenama, isabenö jo̧ba yöawi̧ kwa̧ja̧kwaduwobö ja̧kobe chömöledö.

¹⁶ Jejenö yöawi̧ yöbawo̧nö weakwa̧ma, damötjö Sinai mösa'otjö akebinaduwada̧nö baledakobe, baikwö yötawa: Ja̧ möle kwuluwo̧duwi Isabenö Jo̧ Dios öba a'o ja̧nö, iwene ökwöi̧ kwa̧ja̧kwaduwinenama, akebinaduwobe, –Duluwo̧ Isabenö Jo̧ Dios, babe kwiwene ökwöinö da̧ja̧kwaja̧danö bemi tupakwö da̧ja̧kwobö döpöjöda, ja̧danö bola ökwöla, inesö kwujulu i̧sȩkwöla bemi tupakwö dedobö döpöjöda, debö di̧'yapji jö̧ba̧lö. Bemi tupakwö ökwödönö yökawi̧ma, bakwo̧nö yökawobö adebakwö, jemi tupakwö jo̧bada yökawi̧ ökwödönö yöawakobetjö̧, –jö̧ba̧lö kwuluwo̧duwi Isabenö Jo̧ Diosnö abebinadöja.

¹⁷ —Ja̧danö, jejenö yöka̧linaduwiökwe, Isabenö Jo̧ma ötjönö yöa̧linobe, –Jejenö yötja̧laja̧ma, waisanö yötja̧lajabe.

¹⁸ Jo̧kwajabetjö̧ jobadönö yöta̧lobö jö̧ta̧lenama, jobadötjö bakwo̧nö 'da̧batö chujunakwo̧sa, ökwödajayo̧nö. Ja̧danö, 'da̧batö junajo̧, jo̧banö yötawocha, jojodönö yötawo jö̧ta̧li̧ma, ja̧danö jo̧bada yöawobö weti̧danö okobe jwiinö ötjö yötawaja̧ tupakwö jojodönö yöawakobe.

¹⁹ Ja̧danö ötjöda jo̧banö yöawobö wetobetjö̧, isabenö jo̧banö israel jojodö tja̧ja̧kwobö ja̧kobe, ja̧danö jobadötjö bakwo̧ a̧ja̧kwobö öpöjöditjö̧ma, öpöjödo̧nö lȩtebocha, ötjö yötawi̧da a̧ja̧kwokobetjö̧.

²⁰ Jo̧kwaijayonö bakwo̧, yöawobö wetököjayonö, Dios yöawi̧ yöbawo̧sa̧ jö̧ba̧lö jojodönö yöawitjö̧ma, jo̧banö kwabö lotjobö ja̧kobe, yöawobö wetököjayonö, Dios yöawi̧ yöbawo̧sa jö̧ba̧lö omöna yöa̧lobetjö̧. Ja̧danö, ju'wibi, bakwo̧, –Ju'wedö tjösödawö̧ diosbedö yötjawi̧ yöbawo̧sa, jobadö yötjawi̧ma baikwö yötawaduwakwö, –jö̧ba̧lö yöawitjö̧ma, jo̧banö kwabö lotjobö ja̧kobe, –jö̧ba̧lö yöawinobe Diosma.

²¹ —Jejenö yötawaja̧ a̧ja̧kwö, kwomajadeduwinö kwomukwataduwena, –Bakwo̧ Dios yöawi̧ yöbawo̧sa jö̧ba̧lö omöna yöba̧lo̧ yöawi̧ da̧ja̧kwenama, dakwö döwaisakwajö, Omöna, Isabenö Jo̧ yöawi̧ yöbawö̧kö̧, jö̧ba̧lö döpöjödobö? –jö̧ba̧lö kwomukwataduwena.

²² Baikwö yötawaduwakwö jobadönö kwöwaisaduwakwa̧ma chömöledö: Bakwo̧ isabenö Dios yöawi̧ yöawitjö̧ma, isabenö baledakwa̧ yöawi̧danö baledakobe. Jo̧kwajabetjö̧ bakwo̧, –Ötjöma Isabenö Jo̧ yöawi̧ yötawakwö, tupakwö baledakwa̧ baikwö yöawajabe, –jö̧ba̧lö yöawijayonö, yöawaja̧danö baledökötjö̧ma, jo̧banö kwöwaisaduwakwedöja, –Bitema omöna yöba̧lo̧, Isabenö Jo̧ yöawi̧ yöbawo̧sa jö̧a̧lijayonö, omöna yöa̧lajabe, Dios yöawajökö jawada yöawajabe, –jö̧ba̧lö kwöwaisaduwena. Ja̧danö, jejenö kwöwaisaduwobetjö̧, jo̧banö yekabiduwobö jwiakobe, —jö̧ba̧lö yöawinobe Moisesma, israel jojodönö.