Deuteronomio 17 - Dios Iwene

¹ —Ja̧danö ju'wibi yötawaduwakwö chömöledö, kwajwimuduwitjö̧ pakayanöö̧kö̧, obejanöö̧kö̧ kwuluwo̧duwi Isabenö Jo̧nö kwabö juwö kwiyaduwenama, tjusula juna̧ladönö kwiyaduwoko. Jau chömöledö, ja̧jaye iyawama jwiinö öpöjödo̧ kwuluwo̧duwi Isabenö Jo̧ Diosma, jo̧kwajabetjö sule bakwainö otiwadönöda jo̧banö kwiyaduwobö jo̧be, —jö̧ba̧lö yöawinobe Moisesma.

O̧'wo jawa ösödadönö lȩekwa jawa Moises yöawina jawa

^2-3 Tupakwö yöawinobe Moisesma, israel jojodönö: —Chömöledö, kwuluwo̧duwi Isabenö Jo̧ Diosma ökwödönö iyobe, kwiteboduwi comunidadbiyama, kwiteboduwi nijinö otiwanö kwö̧jaduwobö. Ja̧danö jejenö iyaja̧ nijinö kwö̧jaduwena ökwödötjö bakwo̧ö̧kö̧, bakwujuö̧kö̧ Dios wei̧ öpöjödö, ju'wedö tjösödawö̧ o̧'wo jawanö ösödö, o̧'wo jawa wei̧ ja̧bö ö̧jena. Jejenö baleditjö̧ma, sulabenö o̧'wo jawa ösödo̧nö lȩkebaduwobö ja̧kobe. Jau chömöledö, kwuluwo̧duwi Isabenö Jo̧ Dios öpöjödinö, ju'wedö tjösödawö̧ o̧'wo jawaö̧kö̧, mölȩ jawo̧nöö̧kö̧, yö̧te jawo̧nöö̧kö̧, si̧li̧'idötjö ju'wedönöö̧kö̧ tjösödena, ja̧danö kwa̧ja̧kwaduwena, jejenö tjösödi̧ wenema.

⁴ Jejenö kwa̧ja̧kwaduwitjö̧ma, otiwanö kwöwaisachibaduwobö kwisakwaduwo chömöledö, isabenö yötjawi̧danö tjösödojobö jö̧ba̧lö. Ja̧danö, isakwajadö, –Jau, isabenö ju'wedö tjösödawö̧nö sulabenö ösödobeta, isabenö inesö sulabenö ösödakwawa baledobe ditebo israel nijitjö, –jö̧ba̧lö kwöbadekwaduwitjö̧ma, isabenö sulabenö ösödo̧nö lȩkebaduwobö ja̧kobe.

⁵ Jejenö sulabenö ösödo̧nö, ja̧danö ösödujunö lȩekwa baikwö yötawa, jobadönö do̧batö, comunidad apjudebe ökibaduwo, ja̧danö öbibajadö, okobe deinö inawiya ikwawö loköbaduwo, ö'wö batjibenanö kabatö, sulabenö Diosnö kabatibö, ju'wedö tjösödawö̧nö tjösödobetjö̧.

⁶ —Jo̧kwaijayonö, isabenö kwa̧ja̧kwaduwaja̧danö sulabenö tjösödojobö kwisakwaduwenama, sule bakwo̧da sulabenö ja̧tjaja̧ wene yöawitjö̧ma, lȩkebaduwobö jwiena, baikwö yötawa: Du̧ju̧tajaö̧kö̧, wamedukwaö̧kö̧ jweinö tjedaja̧ yötjawitjö̧ma, –Isabenö bite, bisuju sulabenö ja̧aja̧ dedajabe, –jö̧ba̧lö yötjawitjö̧ma, jenada yötjawi̧ kwösödaduwobö ja̧kobe, ja̧danö sulabenö ja̧bo̧nö kwabö loköbaduwobö ja̧kobe. Jo̧kwaijayonö sule bakwo̧da yöawitjö̧ma yöawi̧ kwösödaduwobö jwiakobe, ja̧danö lȩkebaduwobö jwiakobe.

⁷ Ja̧danö, lȩbebö kwabö loköbaduwenama, tjedaja̧ yöbawadöda abönö inawiya tjikwawobö ja̧kobe, ja̧danö tjikwaja ikena okobe deinö ju'wedö jojodöbi tjikwawobö ja̧kobe, sulabenö ja̧bajo̧ ö'wö baibenanö kabatö. Jejenö ja̧bö inesö suli̧ ju'wedö tjösödawö̧nö ösödakwawa kwiteboduwi israel nijitjö söbebö loköbaduwobö ja̧kobe chömöledö, —jö̧ba̧lö yöawinobe Moisesma.

Lȩekwa luwedönö weawa jawa, Moises yöawina jawa

⁸ Tupakwö yöawinobe Moisesma, israel jojodönö: —Ja̧danö, lȩekwa luwedönö yötawa: Ju'wikwenama, lȩekwa yökawaduwobö jȩnama, wayena, dakwö lȩekwa jweinö yökawaduwakwojobö jö̧ba̧lö, baikwö yötawa: Bakwo̧ jelo̧nö kwabö loenabi, ö'wö babibökönö kwaenabi, öwawökena, öpöjödö kwainojobö, öpöjödokonö a̧dekwanö baledinojobö jö̧ba̧lö. Ja̧danö bakwo̧ jelo̧ sulabenö ja̧ina yöawenama, öwawökena, isabenö sulabenö ja̧inojobö, ja̧inokojobö jö̧ba̧lö. Jejenö jweinö lȩekwa kwiteboduwi comunidadtjö yökawaduwobö wajwiköbaduwenama, juluwanö kwuluwo̧ Isabenö Jo̧ Dios iteda eju comunidad baibanö omudawö ujuninemi comunidadbe kwi̧'yaduwo.

⁹ Ja̧danö ichibajadö, Levisaso jojodötjö Diostjö jojodötjö tjö̧'da̧de pjabatadönöbi, jobe jo̧ inesö lȩekwa luwo̧nöbi akebaduwo, wajwiköbaduwi̧ pjatjatobö. Ja̧danö, akebaduwajawö̧, jobadöma wajwiköbaduwi̧ yötjawakwedö, –Bejenö lȩekwa yökawaduwo, –jö̧ba̧lö.

¹⁰ Jau chömöledö, jobadö Isabenö Jo̧ eju comunidad luwedöma, jweinö lȩekwa̧ yötjawakwedö, ja̧danö jwaikwöda yötjawi̧danö lȩkebaduwobö ja̧kobe.

¹¹ Isabenö lȩekwa yötjawi̧ a̧ja̧kwö, jwaikwöda lȩekwa yötjawi̧danö lȩkebaduwo chömöledö, ja'yubebi balewö lobökönö, jwaikwöda yötjawaja̧danö lȩkebaduwo.

¹² —Isabenö ökwödö lȩekwa jojodö jobadö Levisaso jojodö lȩekwa yötjawaja̧ kwa̧ja̧kwaduwobö ja̧kobe chömöledö, baikwö yötawa: Kwuluwo̧duwi Isabenö Jo̧ öba a'o otido̧ tjö̧'da̧de pjabato̧ yöawi̧bi, jobe jo̧ inesö lȩekwa luwo̧ yöawi̧bi öpöjödö, bakwo̧ lȩekwa luwo̧ öpöjödö, wainö lȩekwa yöawitjö̧ma, jejenö öpöjödo̧nö kwabö loköbaduwobö ja̧kobe, inesö suli̧ kwiteboduwi israel nijitjö dichö loköbaduwobö.

¹³ Ja̧danö, jejenö sulabenö a̧ja̧kwökönö öpöjödo̧nö kwabö loköbaduwiawö̧, ju'wedö israel jojodöma a̧ja̧kwö yetjaibena, ja̧danö jo̧ba sulabenö ja̧i̧nadanö ja̧tjö̧kena, –Ötjönöbi baledena, –jö̧ba̧lö, —Moises yöawinobe.

Inesö la'aka luwedönö tjujunakwa̧ jawa, Moises yöawina jawa

¹⁴ Tupakwö yöawinobe Moisesma: —Chömöledö, kwuluwo̧duwi Isabenö Jo̧ Dios iyakwa̧ nijibe ichibajadö, ja̧danö kwiteboduwi baibanö emajadö jobe kwö̧jaduwenama, omukwatö yöka̧lakwawaduwena, –Okobe deinö dipjeanö tjitebokwena jojodöma, tjitebokwena inesö la'aka tjuluwo̧nö tjujuna̧lobe, ökwödöbi inesö la'aka duluwo̧nö dösöda, jo̧ba weonö dö̧jobö, –jö̧ba̧lö inesö la'aka luwo̧ kwuluwo̧duwinö kwujunaduwobö jö̧ka̧laduwena.

¹⁵ Jejenö inesö la'aka luwo̧ kwuluwo̧duwinö kwujunaduwobö jö̧ka̧laduwenama, isabenö bakwo̧nö kwujunaduwobö ja̧kobe chömöledö, ja̧danö kwujunaduwakwo̧nö baikwö yötawa: Sule kwuluwo̧duwi Isabenö Jo̧ Dios 'da̧batö ujunakwo̧nöda kwujunaduwobö ja̧kobe, kwömöledöso̧ israel jojonöda. Jau chömöledö, sule kwömöledöso̧ israel jojonöda kwuluwo̧duwi baibanö kwujunaduwobö ja̧kobe, ju'wedö tjitebo jojonö kwujunaduwoböma jwiakobe, israel jojookobetjö̧.

¹⁶ —Ja̧danö 'da̧batö kwujunaduwakwo̧nö weawa baikwö yötawa: Kabayudönö ba̧jekwadönö ajikwoböma isakwoko, ja̧danö israel jojodö Egipto nijibe 'ya̧nö, kabayudönö tjemoböma weoko. Jau chömöledö, Isabenö Jo̧ma ökwödönö weinobe, la'akatjöda Egipto nijibe tjekachaduwoko jö̧ba̧lö, jo̧kwajabetjö̧ jejenö weoböma jwiakobe.

¹⁷ —Ja̧danö ba̧jȩkwadö ilekwamunö emoko kwuluwo̧duwi ö̧jakwo̧ma, jwaikwöda Diosnö ösödo jö̧a̧li̧tjö 'da̧bachibö i̧'yobö ötjibapji jö̧ba̧lö. Ja̧danö nöinö orobi, platabi iteda ujuna̧lobö emoko, inesö la'aka luwo̧ kwuluwo̧duwi ö̧jakwo̧ma.

¹⁸ —Ja̧danö, jo̧bama kwu̧luwo̧duwi baibanö öbamatenama, böja Dios wei̧ wȩyukwöja jawa kwiyalu'yenö i̧wȩyudobö ja̧kobe. Jau chömöledö, Levisaso jojodötjö tjö̧'da̧de pjabatadöma bi'ye Dios wei̧ wȩyukwa'ye Dios ejutjö tjujuna̧lakobe, ja̧danö jo̧ba la'aka luwo̧ma otiwanö i̧wȩyudobö ja̧kobe, otiwanö Dios wei̧ wȩyukwa'ye laebi̧danö bakwainö laebakobetjö̧.

¹⁹ Ja̧danö, wȩyudajo̧, ba̧kwelöjatebö ja̧ i̧wȩyudaja̧'ye ujuna̧lobö ja̧kobe, ja̧danö mölekwena yöa̧lobö ja̧kobe, otiwanö uluwo̧ Isabenö Jo̧ Diosnö yebabinö ösödakwawa öwaisachibakobetjö̧, ja̧danö ba̧kwelöjatebö Dios wei̧, ja̧bö kwöjaduwobö wei̧ a̧ja̧kwö ö̧jakobetjö̧.

²⁰ Jejenö Dios wei̧ wȩyukwa'ye yöba̧lö öwaisachobö ja̧kobe, –Aaa, ötjöma ju'wedö israel jojodötjö bajalekwönönö jo̧sa, –jö̧ba̧lö omukwatapji jö̧ba̧lö, ja̧danö Dios wei̧ a̧ja̧kwökönö, jelobekwö jalachibö sulabenö wainö ja̧apji jö̧ba̧lö. Ja̧danö, jo̧ba kwuluwo̧duwi ö̧jakwo̧ otiwanö Dios wei̧ a̧ja̧kwö ö̧jitjö̧ma, jo̧babi, itji̧mu tupadanö jojodöbi lekwe möle otiwanö israel jojodö tjuluwedö tjö̧jakwedö, wei̧ a̧ja̧kwiökwe Diosma otiwanö pjaatakobetjö̧.