Deuteronomio 16 - Dios Iwene

Dios mönö öbaledina omukwatakwawa ba'ali jawa Moises yöawina jawa

¹ Tupakwö yöawinobe Moisesma: —Chömöledö, kwöwaisaduwa, damötjö kwuluwo̧duwi Isabenö Jo̧ Dios ökwödönö Egipto nijitjö lakebaduwinö pjaatinenama, ajayi jawo̧ Abib jawo̧nö lakebaduwinö pjaatinobe, jö̧tö? Jau chömöledö, Abib jawo̧nö, yö̧te ja'ö jobetjö lakebaduwinö öibinobe, jo̧kwajabetjö̧ ja̧ baledina omukwatö, ba̧kwelöjatebö o̧ba bakwabakwena Abib jawo̧nö Dios mönö öbaledina omukwatakwawa ba'ali kwujunaduwo.

² Ja̧ ba'ali kwujunaduwakwa̧ma baikwö labebö lobö yötawa: Isabenö Jo̧ma kwiteboduwitjö ju'wi comunidad omudawö ujunakobe, iteda eju comunidad baibanö. Ja̧danö, ökwödöma kwajwimuduwitjö pakayaö̧kö̧, obejaö̧kö̧ jobe Dios omudawö ujuninelö kwuluwo̧duwi Isabenö Jo̧ Diosnö kwabö juwö kwiyaduwakwedöja Abib jawo̧nö, mönö öbaledina omukwatakwawa iyawa baibanö.

³ Ja̧danö, ja̧ iyawa kwukwaduwenama, ye'yeachi̧ jawakwö kwukwaduwoko chömöledö. Ja̧ ba'ali kwukwaduwena, jelemutjö dötölataja möle baledibanö ye'yeachi̧ jawa jwi̧i panda kwukwaduwo. Ja̧ panma, usula emawa jawa pan ötjabobe, baikwö labebö lobö yötawa: Juluwanö teada̧lökönö Egipto nijitjö lakebinaduwobetjö̧, pan ye'yeachakwa̧ kwiteada̧loböma jwiinobe, juluwanö lakebaduwobetjö̧, jö̧tö? Ja̧danö ba̧kwelöjatebö Dios mönö öbaledina omukwatakwawa ba'ali kwukwaduwenama, ja̧ panbi kwukwaduwo, ba̧kwelöjatebö ja̧ Egipto nijitjö juluwanö lakebinaduwa kwomukwatibaduwakobetjö̧.

⁴ Isabenö pan 'ye'yeachi̧ jawa jwiinö kwö̧jaduwobö ja̧kobe, ja̧ ba'ali kwujunaduwonö chömöledö, okobe jwiinö kwiteboduwitjö, bakweju okwabi 'ye'yeachi̧ jawa jo̧bö jwiakobe, jelemutjö dötölataja möle baledibanö. Ja̧danö, ajayi yöte kwabö kwiyaduwajawö̧, Dios mönö öbaledina omukwatakwawa iyawa itebiyama, i̧ya̧da yö̧teda okobe jwiinö kwukwaduwo, itebiyama ja'yubebi kwu'yudaduwoko ju'wi dewachö baibanöma.

^5-6 —Ja̧danö, Dios mönö öbaledina omukwatakwawa iyawama, kwiteboduwi comunidadteniatjö kwiyaduwobö jwiakobe, sule kwuluwo̧duwi Isabenö Jo̧ Dios iteda eju comunidad baibanö omudawö ujunakwelöda kwiyaduwobö ja̧kobe. Jau chömöledö, kwuluwo̧duwi Isabenö Jo̧ Diosma kwiteboduwi iyakobe, ja̧danö nöinö comunidadbiya iyakobe, otiwanö kwö̧jaduwobö. Jo̧kwaijayonö sule Dios eju comunidadtjöda ja̧ iyawa kwiyaduwobö ja̧kobe. Ja̧danö Dios mönö öbaledina omukwatakwawa iyawa kwiyaduwakwa̧ma, baikwö yöbawö wetaduwakwö: Damötjö Egipto nijitjö lakebinaduwenama, yi̧bena jamatö lakebinaduwobe, jo̧kwajabetjö̧ yi̧bena kwabö kwiyaduwo Dios mönö öbaledina omukwatakwawa kwiyaduwökwenö, jawo̧ meajena jenanö.

⁷ Ja̧danö kwabö iyajadö, itebiya söbö kwukwaduwo, jobe Dios iteda eju comunidad baibanö omudawö ujuninemi comunidadtjö, Dios öba a'otjö kwukwaduwo. Ikenama, yȩayi dewachenama, okobe deinö sabana'wotjö otikweju kwejuduwibe kwȩwa̧bijaduwobö ja̧kobe.

⁸ Ja̧danö, jemi tupakwö, ina jelemutjö bakwöta mölebiya baledibanö, 'ye'yeachi̧ jawa jwii̧ pan kwukwaduwobö ja̧kobe. Ja̧danö, jelemutjö dötölataja möle baibenama, okobe deinö kwo̧ko̧kokwaduwo, kwuluwo̧duwi Isabenö Jo̧ Diosnö kwösödaduwobö. Ja̧ mölema otikwökö möle ja̧kobe, jo̧kwajabetjö̧ ja̧ möle kwotidaduwoko, —jö̧ba̧lö yöawinobe Moisesma, israel jojodönö.

Ju'wi ba'ali, Batjo waji̧ ko̧ko̧dö 'döbö jawa ba'ali Moises yöawina jawa

⁹ Tupakwö yöawinobe Moisesma: —Ja̧danö chömöledö, Trigo batjo otidajadö, otiwanö wa̧jenama, ajayi wa̧ji̧ 'wibö 'dököbaduwobö ja̧kobe, jö̧tö? Ja̧danö, baikwö wetaduwakwö, ja̧ ajayi wa̧ji̧ 'wibö 'dököbaduwi̧ möletjö jelemutjö dötölataja semana kwö̧ba̧jadaduwo.

¹⁰ Ja̧danö, jelemutjö dötölataja semana baledibajenama, batjo waji̧ ko̧ko̧dö 'döbö jawa ba'ali kwujunaduwo, kwuluwo̧duwi Isabenö Jo̧ Diosnö ösödö. Ja̧danö, ja̧ ba'ali kwujunaduwenama, Diosnö kwiyaduwobö kwösödaduwi̧danö, waji̧ jawatjö ichejebö kwiyaduwonö. Dios ökwödönö pjaataja̧danö ba̧jȩkwachinö kwiyaduwo, nöinö ke'daduwobö pjaatinatjö̧ma, nöinö kwichejebaduwena, ja'yubeda kwe'daduwatjö̧ma, ja'yubeda kwichejebaduwena.

¹¹ Ja̧danö, kwuluwo̧duwi Isabenö Jo̧ Dios öba a'obe ichibajadö, jo̧ba öba a'otjö kwo̧'wo ösöwanö ba'ali kwujunaduwo, kwi̧tji̧muduwikwöbi, kwömöayedöduwikwöbi, kwitebo comunidadnö ju̧kwadö Levisaso jojodöbi, jeleobetjö ichajadö ökwödökwö ju̧kwadöbi, löyödöbi, tjilekwamu wobekwinadöbi. Okobe deinö kwuluwo̧duwi Isabenö Jo̧ Dios iteda eju comunidad baibanö omudawö ujunakwemibe ichibö, jejenö ba'ali junö kwo̧'woduwi ösöwanö Diosnö kwösödaduwobö ja̧kobe.

¹² —Ba̧kwȩlöjatebö Egipto nijinö kwö̧ji̧naduwa jawa kwomukwatibaduwobö jo̧be chömöledö, ja̧danö ja̧ jawa omukwatibö, yöbawö weti̧danö Diosnö ösödö ba'ali kwujunaduwo, –Duluwo̧ Diosma otiwanö Egiptotjö dö̧jibinö pjaatinobe, –jö̧ba̧lö.

Löwötenö ja̧kwawa ba'ali Moises yöawina jawa

¹³ Tupakwö yöawinobe Moisesma: —Ja̧danö, batjo waji ko̧ko̧dö kabatajadö, okobe jwiinö trigo ja̧danö trigojaye sula'wo chabö lobajadö, kwu̧kwa̧duwa ko̧ko̧dö kwödaduwaja̧ ikena, ja̧danö uba waji̧ ubasobu baibanö ja̧tö kwotidaduwaja̧ ikenama, ju'wi ba'ali kwujunaduwo, löwötenö ja̧kwawa ba'alima.

¹⁴ Ja̧ ba'ali kwujunaduwenama, kwo̧'woduwi ösöwanö kwujunaduwo, ökwödöbi, kwitji̧muduwibi, kwömöayedöduwibi, ja̧danö ju'wibi ökwödökwö kwitebo comunidadnö ju̧kwadö Levisaso jojodöbi, jelobetjö ichajadöbi, löyödöbi, tjilekwamu wobekwinadöbi ökwödökwö tjo̧'wo ösöwanö ja̧ ba'ali tjujunobö ja̧kobe.

¹⁵ Ja̧ ba'alibi, Isabenö Jo̧ iteda eju comunidad baibanö omudawö ujunakwelö kwujunaduwo, kwuluwo̧duwi Isabenö Jo̧ Diosnö ösödö. Jau chömöledö, kwuluwo̧duwi Isabenö Jo̧ Diosma isabenö otiwanö pjaatakobe ökwödönö, kwöbatjoduwi isabenö otiwanö wa̧jobö, ja̧danö kwotidaduwi̧tenia otiwanö laebobö, jo̧kwajabetjö isabenö jo̧ba öba a'o kwo̧'woduwi ösöwanö ba'ali kwujunaduwobö ja̧kobe, –Duluwo̧ Diosma isabenö otiwanö pjaatajabe, –jö̧ba̧lö.

¹⁶ —O̧ba bakwabakwena, ökwödö israel jojodötjö ömadöma wapötakwanö kwuluwo̧ Isabenö Jo̧ Dios omudawö ujunakwemibe kwichibaduwobö ja̧kobe, Dios öba a'o ba'ali kwujunaduwobö, 'Ye'yeachi̧ jawa jwii̧ pan kwakwawa ba'alibi, Batjo waji̧ ko̧ko̧dakwawa jawa ba'alibi, Löwötenö ja̧kwawa ba'alibi. Ja̧danö, Isabenö Jo̧ öba a'o kwichibaduwenama, jwiböma kwichibaduwoko chömöledö,

¹⁷ okobe deinö bakwo̧nökwena tjiyobö tjujuna̧li̧danö, iyawa ichejebö tjiyobö ja̧kobe. Jau chömöledö, kwuluwo̧duwi Isabenö Jo̧ Diosma otiwanö pjaatakobe ökwödönö, ja̧danö ökwödönö pjaataja̧danö, bakweminö ichejebö kwiyaduwonö, —jö̧ba̧lö yöawinobe Moisesma.

Lȩekwa luwedö jawa Moises yöawina

¹⁸ Tupakwö yöawinobe Moisesma, israel jojodönö: —Chömöledö, kwiteboduwi bakwasokwena niji ba̧kwȩmeachibanö, okobe jwiinö kwiteboduwi comunidadteniatjö lȩekwa luwedönöbi, ju'wedö luwedönöbi 'da̧batö kwujunaduwo, tjömöledö wene yötjawi̧ a̧ja̧kwö, jweinö lȩekwa yötjawakobetjö̧.

¹⁹ Ja̧danö, lȩekwa sulabenö yötjawobö jwiakobe chömöledö, jweinö, bakwainö lȩekwa yötjawo jö̧tja̧li̧danöda yötjawobö ja̧kobe, jojodönö wainökwena omukwatökönö. Ja̧danö jojodö tjimidi̧, –Chösödi̧danö lȩekwa yökawitjö̧ma chimidocha, –jö̧ba̧lö tjimidi̧ tjemoböma jwiakobe, baikwö wanedö yötawa jejenö midawama, Ja̧ midawama suli̧ waedi̧, waisadö tjöbajale tjewawadödanö batjibobö ja̧i̧, jö̧ba̧lö. Jau chömöledö, jejenö midawama, lȩekwa luwedö tjöba a'o ju̧kwadö otiwadönö suli̧ öwaedobe, lȩekwa yötjawo jö̧tja̧li̧danö yöbawökönö, midadönöda pjabatö sulabenö lȩekwa yötjawobetjö̧.

²⁰ Jo̧kwajabetjö̧ lȩekwa luwedö kwö̧jaduwenama, bakwainö jwei̧ jawada kwisakwaduwo, jweinö lȩekwa yökawaduwo jö̧ka̧laduwi̧danö jweinö yökawaduwakobetjö̧. Jejenö Dios wei̧danö lȩekwa yökawaduwo chömöledö, jejenö lȩekwa yökawaduwiökwe kwuluwo̧duwi Isabenö Jo Dios ökwödönö iyakwemi nijibe tekachaduwobö pjaatakobetjö̧, ja̧danö iyemi nijinö kwiteboduwi baibanö otiwanö kwö̧jaduwakobetjö̧, —jö̧ba̧lö yöawinobe Moisesma.

Diosnö kwösödaduwi̧ma, ju'wedönö ösödakwawakwö pjabacha̧löma kwösödaduwoko, jö̧ba̧lö Moises yöawina jawa

²¹ Tupakwö yöawinobe Moisesma: —Ja̧danö chömöledö, kwuluwo̧duwi Isabenö Jo̧ Diosnö iyawöte kwotidaduwenama, jöte ö'öbönö ju'wedö tjösödoko Aseranö ösödakwawowi towima kwujunaduwoko,

²² ja̧danö ju'wibi jobe inawatjö otikwa'o o̧'wo jawanö ösödakwawa'oma kwujunaduwoko. Kwuluwo̧duwi Isabenö Jo̧ Diosma ja̧ ösödakwawama jwiinö öpöjödo̧ chömöledö, jo̧kwajabetjö̧ ja̧köbaduwoko jejenöma.