Deuteronomio 15 - Dios Iwene

Tjumusidi̧ söbebö loawa jawa Moises yöawina jawa

¹ Tupakwö yöawinobe Moisesma, israel jojodönö: —Chömöledö, ba̧kwelöjatebö o̧ba jelemutjö döbalataja o̧ba baibenama, okobe deinö kwömöledöduwi israel jojodö ökwödönö tjumusidi̧ma, söbebö loköbaduwobö ja̧kobe.

² Ja̧ weawa baikwö labebö lobö yötawa: Ju'wedö kwömöledöduwi israel jojodötjö bakwo̧nö balada kwöbalewaduwitjö̧ma, ökwönö umusidena, ja̧danö tjebatö imidobö ja̧kobe, ja̧ jelemutjö dötölataja o̧ba baibenanö kabatö. Ja̧danö, ja̧ o̧ba okobe deinö israel jojodö tjumusidi söbebö loköbaduwobö ja̧kobe, tupakwö tjimidobö abebökönö. Isabenö Jo̧ma jejenö ja̧ o̧ba tjumusidi̧ söbebö lotjobö weobetjö̧, isabenö okobe deinö israel jojodö tjumusidi̧ söbebö lotjobö ja̧kobe.

³ Ju'wedö tjitebo jojo ökwödönö umusiditjö̧ma, jo̧ba imidobö weköbaduwena, kwitebo jojookobetjö̧, jo̧kwaijayonö okobe deinö israel jojodö ökwödönö tjumusidi̧ma söbebö loköbaduwobö ja̧kobe.

^4-5 Isabenö ökwödö israel jojodötjö bakwo̧bi jwibö öjoböma jwiena chömöledö, baikwö yötawa: Okobe jwiinö kwuluwo̧duwi Isabenö Jo̧ Dios wei̧, babe ökwödönö webö yötawi̧ a̧ja̧kwö kwö̧jaduwitjö̧ma, Isabenö Jo̧ma otiwanö pjaatakwo̧ ökwödönö, ja̧danö ökwödönö iyakwa̧ nijinö ja̧nö, bakwo̧bi jwibo̧ma deena, okobe deinö otiwanö kwujuna̧laduwobetjö̧. Isabenö Dios wei̧ a̧ja̧kwö kwö̧jaduwitjö̧ma, jejenö ja̧kobe chömöledö, ja̧danö bakwo̧bi umusidoböma jwiena.

⁶ Jau chömöledö, wei̧ a̧ja̧kwö kwö̧jaduwiökwe, yöbawö ujuninadanö kwuluwo̧duwi Isabenö Jo̧ Dios ökwödönö pjaatenama, otiwanö kwujuna̧laduwakwedöja, ja̧danö ju'wedö tjitebokwena jojodötjö balewakwawa akebaduwobö jwiena yelösöda, ida̧ökö otiwanö kwujuna̧laduwobetjö̧. Jau chömöledö, jobadötjö abebökönö, ökwödö israel jojodöda jobadönö kwöbalewaduwena, ju'wedö tjitebo jojodö ökwödö israel jojodönö musidadö batjibanö. Ja̧danö ju'wibi ökwödö israel jojodöda ju'wedö tjitebokwena luwedö kwö̧jaduwena. Dios wei̧ a̧ja̧kwö kwö̧jaduwobetjö̧, ju'wedö tjitebokwena ömöayedö jö̧kö̧nö, ökwödö israel jojodöda ju'wedö tjitebokwena jojodö tjuluwedö kwö̧jaduwena chömöledö.

⁷ —Baikwö yötawaduwakwö chömöledö, jweinö kwomukwataduwakwa̧ma: Kwuluwo̧duwi Isabenö Jo̧ Dios iyakwa̧ nijinö kwö̧jaduwena, kwiteboduwitjö ju'wi comunidad jojo jwibö ö̧jitjö̧ma, dösölö̧jinö pjakataduwo kwömöledöso̧ israel jojonö. Jau chömöledö, lȩlöinö edökönö, a̧'dȩlö kwö̧jaduwoböma jwiakobe,

⁸ lȩlöjinö edö pjakataduwobö ja̧kobe. Öpöjödökönö, balewö kwiyaduwo jwibö ö̧jökenanö baibanö, jo̧ba usulaso̧bi otiwanö ujuna̧lakobetjö̧.

⁹ Ja̧danö teada̧lönö kwö̧jaduwo, sulabenö a̧'dȩlanö omukwatö, –Aaa, jelemutjö dötölataja o̧ba yö̧neawachibobetjö̧, chöbalewoböma chöpöjöda, umusidi ina imidakwa̧ abönö umusidi söbebö lotobö baibapji jö̧ba̧lö. –Jobekwö omukwatö, a̧'dȩlanöma kwedaduwoko kwömöledöso̧ jwibo̧nöma chömöledö. Jejenö omukwatö, kwömöledöso̧ jwibo̧nö pjabatökönö kwö̧jaduwitjö̧ma, kwömöledöso̧ma Isabenö Jo̧nö ubudekwena, ja̧danö Dios öba a'otjö wene kwujuna̧lena, pjakato jö̧ka̧li̧danö pjakatokobetjö̧.

¹⁰ Isabenö a̧'dȩlökönö, kwo̧'wo ösöwanö otiwanö balewö kwiyaduwobö ja̧kobe chömöledö, ja̧danö baikwö yötawaduwakwö, jejenö otiwanö kwömöledöduwinö öpöjödökönö pjakataduwiökwe, kwuluwo̧duwi Isabenö Jo̧ Diosma edö ösödakobe, ja̧danö okobe jwiinö kwotidaduwi̧bi, ju'wi ja̧bö kwö̧jaduwi̧bi otiwanö laebi̧nö pjaatakwo̧, –Bidö chömöledöma otiwanö tjömöledönö a̧'dȩlökönö pjabatadö, –jö̧ba̧lö.

¹¹ Isabenö ba̧kwelöjatebö ju'wedö jwibadö tjö̧jakobe kwiteboduwitjö chömöledö, jo̧kwajabetjö̧ jweinö wetaduwakwö, Kwiteboduwi israel nijitjö ju'wedö kwömöledöduwi usula jojodö ja̧nö, jwibö tjö̧jenama, a̧'dȩlökönö otiwanö jobadönö iyö kwöbalewaduwo, —jö̧ba̧lö yöawinobe Moisesma.

Tjömöayedö jawa Moises yöawina jawa

¹² Tupakwö yöawinobe Moisesma, israel jojodönö: —Chömöledö, kwömöledöduwi israel jojodötjö bakwo̧ö̧kö̧, bakwujuö̧kö̧ ökwödönö tjiyawena, kwömöayedö batjibanö. Jejenö tjiyawitjö̧ma, jelemutjö̧ bakwöta o̧biya baledibanö kwömöayedö ja̧nö, tjotidobö ja̧kobe. Ikenama, jelemutjö dötölataja o̧ba baibenama, kwömöayedö tjö̧ji̧tjö latjebobö ja̧kobe.

¹³ Ja̧danö, kwömöayedö tjö̧ji̧tjö latjebobö weköbaduwenama, jwibö latjeboböma weköbaduwoko.

¹⁴ A̧'dȩlökönö kwajwimuduwitjöbi, kwöbatjo waji̧ jawatjöbi, ubasobu kwujuna̧li̧tjöbi iyö, latjebobö weköbaduwo. Jau chömöledö, kwuluwo̧duwi Isabenö Jo̧ Diosda ja̧ kwujuna̧li̧ kwujuna̧lobö otiwanö pjabatö iyinobe, jo̧kwajabetjö̧ ja̧ ökwönö otiwanö iyaja̧ jawatjö, 'da̧batö junö kwömöayo̧bajo̧nö a̧'dȩlökönö kwiyaduwo.

¹⁵ Ja̧ weawama baikwö labebö lobö yötawa: Ajayinöma ökwödöma Egipto nijinö ja̧nö, ju'wedö tjömöayedö kwö̧jinaduwobe, jö̧tö? Jo̧kwaijayonö kwuluwo̧duwi Isabenö Jo̧ Diosma ja̧ kwö̧ji̧naduwelö kwö̧ji̧baduwanö eminobe, ja̧danö ja̧ lakebaduwinö pjaatina omukwatö, kwömöayedö israel jojodönö ökwödöbi lakebaduwobö wetaduwakwö.

¹⁶ —Jo̧kwaijayonö, kwömöayo̧nö kwömöayo̧ ö̧ji̧tjö laebobö weköbenama, laebobö öpöjödena, –Bite chuluwo̧nöbi, ju'wedö ömöledönöbi chösöda, ja̧danö jo̧ba ömöayo̧ ja̧nö, otiwanö chö̧jobetjö̧, lateboböma chöpöjöda, –jö̧ba̧lö laekwa öpöjödena.

¹⁷ Jejenö laebobö öpöjöditjö̧ma, baikwö ja̧ öpöjödi̧ jawa kwi̧sȩbaduwo: Jo̧banö öbibö kwi̧'yo apjude a'obe, ja̧danö ösö'inö ölakiyu 'da̧kebo apjudetjö, –Bite chömöayo̧ laebobö ji̧jayonö, laeboböma öpöjödo̧, –jö̧ba̧lö. Ja̧danö, jemi tupakwö, ina 'ya̧alayi, jo̧bama ökwö kwömöayo̧ ö̧jakwo̧ jo̧bama. Ja̧ weawama kwömöayedö israel jojodötjö ömadönöbi, ya̧dönöbi badekwachobe chömöledö.

¹⁸ —Ja̧danö chömöledö, jelemutjö dötölataja o̧ba baibena, kwömöayedö latjebobö baibenama, kwo̧'wo suli̧nö, –Tajawedö chömöayedö weti̧tjö latjeboböjö, –jö̧ba̧lö a̧'dȩlanö kwomukwataduwoko chömöledö, baikwö yötawa: Jobadöma ida̧ökö jelemutjö bakwöta o̧biya baledibanö kwömöayedö ja̧nö tjotidajabe, jobadönö kwimidaduwokonö. Ja̧danö, jobadö tjotidaja̧ma, ju'wedönö midö tjotidobö weköbinatjö̧ma, isabenö nöinö kwimido jö̧ka̧linena jö̧ba̧lö. Ja̧danö, ju'wibi kwomukwataduwobö jo̧be chömöledö, –Bejenö chömöayedö tjö̧ji̧tjö otiwanö latebiökwe, chuluwo̧ Isabenö Jo̧ Diosma okobe jwiinö otidö chö̧ji̧ma pjaatakwo̧, –jö̧ba̧lö kwomukwataduwobö jo̧be, —jö̧ba̧lö yöawinobe Moisesma.

Tja̧jwi̧mutjö abönö tjemawö̧nö 'da̧batö tjujunobö Moises yöawina jawa

¹⁹ Tupakwö yöawinobe Moisesma: —Kwajwimuduwi pakayadötjöbi, obejadötjöbi abönö tjemawö̧nö 'da̧batö kwujunaduwobö ja̧kobe, kwuluwo̧duwi Isabenö Jo̧ Diosnö iyawa baibanö. Jo̧kwajabetjö̧ abönö tjemökwe pakayaso̧ otidoböma la'akatjöda weköbaduwoko, ja̧danö abönö tjemökwe obejaso̧ öwö'ye 'wikebaduwoko, –Bitema Diosnö iyawa baibanö 'da̧batö chujunökwe, –jö̧ba̧lö.

²⁰ Jobadö abönö tjemawö̧nö öbibö, Dios ejube kwi̧'yaduwobö ja̧kobe, jobe Dios öba a'otjö ökwöbi, kwejunö ju̧kwadöbi kwuluwo̧duwi Isabenö Jo̧ Dios öba a'o kwukwaduwakobetjö̧. Jejenö o̧ba bakwabakwena ja̧köbaduwobö ja̧kobe chömöledö. Isabenö Jo̧ma iteda eju itebo baibanö ju'wi comunidad omudawö ujunakobe, ja̧danö o̧ba bakwabakwena jobetjö ajayinö tjemawö̧nö kwabö kwukwaduwobö ja̧kobe.

²¹ Jo̧kwaijayonö jobadö abönö tjemawö̧ tjusula tjujuna̧litjö̧ma, kwebachöködö tjö̧jitjö̧böbi, tjöbajale tjewawadö tjö̧jitjö̧bö, ja̧jaye tjusula tjuju̧na̧litjö̧böbi, abönö tjemawö̧ tjö̧jijayonö, kwuluwo̧ Isabenö Jo̧ Diosnö kwiyaduwobö jwiobe, jobadöjayedöma Diosnö tjiyoböma mikwawöködötjobetjö̧.

²² Ja̧danö Diosnö kwabö juwö iyökönö, kwiteboduwi comunidadtjö kwukwaduwena. Okobe deinö ökwödö israel jojodö ja̧ itebiya wene jwiinö kwukwaduwena, yama itebiya kwukwaduwi̧danö. Ökwödötjö yȩekwi̧ jwibadöbi, Dios öba a'o tjichibökönö yȩekwi̧ juna̧ladöbi, okobe deinö wene jwiinö ja̧ itebiya kwukwaduwena, Dios öba a'o ichibökönö kwukwaduwobetjö̧.

²³ Jo̧kwaijayonö, tjökwösobuma la'akatjöda kwukwaduwoko, ojwiyo nijinö tobö lotji̧danö, ökwösobu ebawinö nijinö tobö loköbaduwo, —jö̧ba̧lö weinobe Moisesma, israel jojodönö.