Deuteronomio 14 - Dios Iwene

¹ Tupakwö yöawinobe Moisesma, israel jojodönö: —Chömöledö, ökwödö israel jojodöma kwuluwo̧duwi Isabenö Jo̧ Dios itji̧mubedöja. Ja̧danö, jo̧ba itji̧muköbaduwobetjö̧, o̧'wo tjo̧achö 'wikekwaduwoböma jwiobe, ja̧danö kwöwö'yeduwi kwöbasa'ye jwobö loköbaduwobö jwiobe, kwömöledö debö 'yi̧nadönö kwo̧'woduwi tjo̧achi̧ i̧sȩböma.

² Jau chömöledö, ökwödö israel jojodöma ju'wedö bö̧jȩ jojodötjö kwuluwo̧duwi Isabenö Jo̧ Dios wainö 'da̧batö ujuninawö̧ja, iteda ömöledö bakibaduwobö. Okobe deinö bö̧jȩnö ju̧kwadötjö ökwödö israel jojodönöda omudawö ujuninobe Diosma, iteda ömöledö, iteda ile niebawö̧ ömöledö kwö̧jaduwobö, jo̧kwajabetjö̧ ju'wedö bö̧jȩ jojodö ja̧bö tjö̧ji̧danöma kwö̧jaduwoko chömöledö, —jö̧balö yöawinobe Moisesma.

Kwakwawa jawa Dios weina jawa

³ Tupakwö yöawinobe Moisesma, israel jojodönö: —Chömöledö, ökwödö israel jojodöma Dios öpöjödi̧ jawa kwakwawa kwukwaduwoko, la'akatjöda.

⁴ Tebonö ju̧kwadötjö otiwanö kwukwaduwakwawö̧ma, bidö: Pakayadöbi, obejadöbi, chivodöbi,

⁵ yamabi, tebonö ju̧kwadö chivodöbi, mösa'onö ju̧kwadö obejadöbi.

⁶ Jobadö kwukwaduwakwa̧wö̧nö baikwö yötawa: Jobadö yöta̧lajawö̧ tjömasapiyama, tjinejebiya döjelataja jawa juna̧ladö, ja̧danö ju'wibi, tjukwaja̧ yemidanö cha'öbadö, ja̧danö jobadöjaye tebonö ju̧kwadönö kwukwaduwobö jo̧be.

⁷ Jo̧kwaijayonö tjukwaja̧ yemidanö cha'öbadötjöbi, tjömasapiya tjinejebiya döjelataja junaladötjöbi bidönö kwukwaduwoko: Camellonöbi, pjaikitunöbi, wobunöbi kwukwaduwobö jwiobe, baikwö yötawa: Jobadöma tjukwaja̧ yemidanö cha'öbadötjijayonö, tjömasapiya tjinejebiya döjelataja jwibadö, jo̧kwajabetjö̧ jobadönö kwukwaduwobö jwiobe, yȩbekwadö jö̧ba̧lö.

⁸ Ja̧danö kusi̧nöbi kwukwaduwobö jwiobe, baikwö yötawa: Kusi̧döma tjömasapiya tjineje döjelataja tjujuna̧lijayonö, tjukwaja̧ yemidanö cha'öböködö, jo̧kwajabetjö̧ jobadönö kwukwaduwoko, ja̧danö ju'wibi jobadö tjiteba'iju maböbi maköbaduwoko, yȩbekwadö jö̧ba̧lö.

⁹ —Ja̧danö, ojwenö ju̧kwadö ba̧i̧ kwukwaduwakwawö̧ma bidö, okobe deinö ba̧iso̧ a̧i̧chabiyabi, ba̧i̧so̧ itelobi juna̧ladönö kwukwaduwobö jo̧be,

¹⁰ jo̧kwaijayonö okobe deinö ba̧iso̧ a̧i̧chabiya jwibadönöbi, ba̧i̧so̧ itelo jwibadönöbi kwukwaduwobö jwiobe, yȩekwi̧ ji̧, jö̧ba̧lö.

¹¹ —Ja̧danö okobe deinö pji̧yu̧tjö yȩekwi̧ jwibadönö kwukwaduwobö jo̧be.

^12-18 Jo̧kwaijayonö bidönö kwukwaduwobö jwiobe: Woi̧ kwadö bolebi, jo̧ba jayedönöbi kwukwaduwobö jwiyobe, ja̧danö pji̧bole, ja̧danö jo̧bajayedönöbi kwukwaduwobö jwiobe, ja̧danö tumulu'unöbi, kwesuwanöbi, 'duwinöbi ja̧danö jobadöjayedönöbi kwukwaduwobö jwiobe.

¹⁹ Ja̧danö pjebadö insecto ötjabawö̧ tjöwaja̧piya junaladönö kwukwaduwobö jwiobe, yȩekwi̧ juna̧ladö jö̧ba̧lö.

²⁰ Jo̧kwaijayonö okobe deinö ju'wedö mö kö̧ba̧ladö, yȩekwi̧ jwibadö Dios jö̧a̧lawö̧nö wene jwiinö kwukwaduwobö jo̧be.

²¹ —Okobe deinö yȩbekwöködönö kwukwaduwobö jo̧be chömöledö, jo̧kwaijayonö jobadötjö bakwo̧ a̧dekwanö ö'wö baibitjö̧ma, jo̧bajayo̧nö kwukwaduwobö jwiakobe, ökwösobu otiwanö ebawö̧kö̧ jö̧ba̧lö. Ju'wedö tjitebotjö ichajo̧ kwiteboduwi comunidadnö ö̧jitjö̧ma, jo̧banö kwiyaduwena, jo̧ba ukwobö, ja̧danö jelobetjö ichajadönö mikwanö kwiyaduwena, jobadö tjukwobö, ja̧danö israel jojodötjokobetjö̧, wene jwiinö tjukwena. Jo̧kwaijayonö ökwödö israel jojodö kwukwaduwobö jwiobe, kwuluwo̧duwi Isabenö Jo̧ Diosma iteda ömöledö bakibaduwanö ökwödö israel jojodönö 'da̧batö ujuninobetjö̧. Ja̧danö, ju'wibi wetaduwakwö, chivoso̧ ja'yuwo̧nö iteda ojo'do jo̧do'bi̧sobunö toköbaduwobö jwiobe, —jö̧ba̧lö yöawinobe Moisesma, israel jojodönö.

Dios itea baibanö 'da̧batö tjujunakwa̧ jawa Moises yöawina jawa

²² Tupakwö yöawinobe Moisesma, israel jojodönö: —Chömöledö, o̧ba bakwabakwena, kwöbatjoduwi wa̧ji̧ jawatjö 'da̧batö kwujunaduwobö ja̧kobe, Dios itea baibanö. Okobe jwiinö kwöbatjoduwi wa̧ji̧ domulataja jawatjö, bakwöta jawa 'da̧batö kwujunaduwobö ja̧kobe,

²³ ja̧danö ja̧ 'da̧batö kwujunaduwaja̧ jawama, Dios ejutjö kwuluwo̧duwi Isabenö Jo̧ Dios öba a'otjö kwukwaduwobö ja̧kobe, 'da̧batö kwujunaduwaja̧ trigo waji̧bi, ubasobubi, olivo o̧tesobubi, kwajwimuduwi pakayadötjö abönö tjemawö̧nöbi, kwajwimuduwi obejadötjö abönö tjemawö̧nöbi. Diosma kwiteboduwitjö jelobe 'da̧batö ujunakobe, iteda eju comunidad baibanö, ja̧danö jobetjöda Dios öba a'otjö ja̧ 'da̧batö kwujunaduwaja̧ jawa kwukwaduwobö ja̧kobe. Jejenö ja̧köbaduwobö ja̧kobe chömöledö, ba̧kwelöjatebö kwuluwo̧duwi Isabenö Jo̧ Diosnö yebabinö kwösödaduwobö kwöwaisachibaduwakobetjö̧.

²⁴ —Jobekwö 'da̧batö kwujunaduwaja̧ jawa e'ewö, Dios öba a'o kwi̧'yaduwobö jo̧be chömöledö. Jo̧kwaijayonö, kwiteboduwi inesö jalobe baibanö kwuluwo̧duwi Isabenö Jo̧ Dios ökwödönö pjaataja̧ ikenama, ökwödötjö ju'wedöma jwiinö ödö kwö̧jaduwena Dios ejutjö, ja̧danö 'da̧batö kwujunaduwaja̧ Dios ejube kwe'ewaduwobö jwiena.

²⁵ Jejenö baleditjö̧ma, kwiteboduwitjö 'da̧batö kwujunaduwaja̧ jawa mikwanö kwiyaduwena, ja̧danö ja̧ balada e'ewö Dios ejube kwi̧'yaduwena, kwuluwo̧duwi Isabenö Jo̧ Dios 'da̧batö ujunakwemibe.

²⁶ Ja̧danö, jobe ichibajadö, kwichejebaduwaja̧ baladanö Dios öba a'o kwukwaduwakwa̧ jawa kwemaduwena, ökwödöda kwösödaduwi̧danö. Itebiya kwukwaduwobö jö̧ka̧laduwitjö̧ma, pakayadönöö̧kö̧, obejadönöö̧kö̧ kwemaduwena, ja̧danö, ubasobubi, ju'wi nio ojwiyo kwösödaduwi̧bi kwemaduwena, –Biya̧ chukwowe, chowowe, –jö̧ba̧lö ökwödöda kwösödaduwi̧danö. Ikenama, emajadö, jobe Dios ejutjö, kwuluwo̧duwi Isabenö Jo̧ Dios öba a'otjö ba'ali kwujunaduwo, ja̧danö ökwöbi, kwejunö ju̧kwadöbi jobe bakobe kwo̧'woduwi ösöwanö kwösödaduwo, –Duluwo̧ Diosma otiwanö pjaatajabe, –jö̧ba̧lö.

²⁷ —Ja̧danö, kwiteboduwi comunidadnö ju̧kwadö Levisaso jojodönö kwo̧'wo jwikibaduwobö jwiobe chömöledö, ökwödö kwiteboduwi kwujuna̧laduwi̧danö tjujuna̧lokobetjö̧. Jau chömöledö, jobadö Levisaso jojodöma tjitebo niji jwibadö, jo̧kwajabetjö̧ isabenö jobadönö kwiteada̧laduwobö jo̧be.

²⁸ Jobadönö kwiteada̧laduwakwa̧ baikwö yötawa: Batjo waji̧ jawa domulataja jawatjö bakwöta jawa 'da̧batö kwujunaduwi̧ma, ajayi o̧babi, ikena o̧babi Dios ejube kwe'ewaduwobö ja̧kobe. Ikenama, o̧ba wapöbakwa baledaja̧ ikena, Dios ejube e'ewökönö, kwiteboduwi comunidadtjöda kwödaduwo.

²⁹ Ja̧danö, Levisaso jojodö idöda tjitebo niji jwitjobetjö̧, ja̧ 'da̧batö kwujunaduwaja̧tjö tjukwena, ja̧danö ju'wibi jelobetjö ichajadö kwiteboduwinö ju̧kwadö ja̧tjö tjukwena, ja̧danö löyödöbi, tjilekwamu wobekwinadö ya̧döbi ja̧tjö tjukwena. Jau chömöledö, jobadöma 'da̧batö kwujunaduwaja̧tjö tjemobö ja̧kobe, tjomeawinö tjukwakobetjö̧, ja̧danö jejenö otiwanö wei̧danö jobadönö kwiteada̧laduwiökwe, kwuluwo̧duwi Isabenö Jo̧ Diosma okobe jwiinö ökwödö israel jojodö kwotidaduwi̧tenia pjaatakobe, —jö̧ba̧lö yöawinobe Moisesma.