Deuteronomio 13 - Dios Iwene

Ju'wedö tjösödawö̧nö kwösödaduwoko, jö̧ba̧lö Moises yöawina jawa

^1-2 Tupakwö yöawinobe Moisesma, israel jojodönö: —Chömöledö, kwö'da̧deduwitjö ju'wedöma yötjawena, –Ötjöma Dios yöawi̧ yöbawo̧sa, ja̧danö baikwö baledakwa̧ yötawaduwakwö, –jö̧ba̧lö yötjawena. Ja̧danö ju'wedöma yötjawena, –Jojodö tji̧'wi̧dinö tjedi̧ jawa labebö lobö yöbawo̧sa, baikwö baledakwa̧ yötawakwö, –jö̧ba̧lö yötjawena. Tupakwö baledakwa̧ jawabi yötjawena, ja̧danö jojodö edajitjökö jawa tji̧sȩbakwa̧ yötjawena. Ikenama, yötjawaja̧danö baledena, ja̧danö baledaja̧ ikenama, ju'wibi yötjawena, –Chömöledö, isabenö ju'wedö tjösödawö̧nö ökwödöbi dösödobö jo̧be, –jö̧ba̧lö. Jau chömöledö, ju'wedö tjösödawö̧nö kwösödaduwobö ötjibena, ajayinö wajwiköbaduwinawö̧ tjösödawö̧nö, –Idö wetji̧bi a̧ja̧kwö dö̧jo, –jö̧ba̧lö.

³ Jejenö ju'wedö tjösödawö̧nö kwösödaduwobö ötjibitjö̧ma, ötjibi̧danö kwösödaduwoko chömöledö, la'akatjöda. Tupakwö baledakwa̧ yötjawinadanö baledijayonö, ju'wedönö kwösödaduwobö ötjibi̧ma kwa̧ja̧kwaduwoko chömöledö. Jau chömöledö, jejenö baledi̧ma, kwuluwo̧duwi Isabenö Jo̧ Dios baledobö weobe, otiwanö iteda wei̧ a̧ja̧kwö kwö̧jaduwojobö jö̧ba̧lö, isabenö kwösödaduwo jö̧ka̧laduwi̧danö okobe jwiinö kwomajadeduwinöbi, kwo̧'wo̧duwinöbi jwaikwöda kwuluwo̧duwi Isabenö Jo̧ Diosnö ile nibebö kwösödaduwojobö jö̧ba̧lö.

⁴ Jau chömöledö, kwuluwo̧duwi Isabenö Jo̧ Dios öibi̧danöda kwö̧jaduwobö jo̧be, jo̧banöda yebabinö omukwatö kwösödaduwobö jo̧be, jo̧ba wei̧danö ja̧bö kwö̧jaduwobö jo̧be, jo̧ba yöawi̧da a̧ja̧kwö kwö̧jaduwobö jo̧be, jo̧banöda ösödö kwö̧jaduwobö jo̧be, ja̧danö jo̧banö 'diinö do̧balö kwö̧jaduwobö jo̧be, –Biteda dösödökwema, –jö̧ba̧lö.

⁵ —Ja̧danö sulabenö Diosnö kakatibaduwobö öbibadö, –Dios yöawi̧ yöbawadösa, –jö̧ba̧lö omöna yöba̧ladönöbi, –Tji̧'wi̧dinö tjedi̧ labebö lobadösa, –jö̧ba̧lö omöna yöba̧ladönöbi kwabö loköbaduwobö ja̧kobe chömöledö, kwuluwo̧duwi Isabenö Jo̧ Diosnö kakatibaduwobö sulabenö ötjibobetjö̧. Jau chömöledö, kwuluwo̧duwi Diosda Egipto nijitjö lakebaduwinö ichejebinama, jo̧bada ju'wedö tjömöayedö kwö̧jinaduwelö kwö̧jibaduwinö pjabatinama, jo̧kwaijayonö jobadö sulabenö öbibadöma jo̧ba wei̧ kakatibaduwobö ötjibobe, wanedö yötawa, Kwuluwo̧duwi Isabenö Jo̧ Diosma jweinö weinobe otiwanö kwekachaduwakwa̧ma manama, ja̧manöda otiwanö kwekachaduwobö, jo̧kwaijayonö jobadöma ja̧matjö 'da̧bachibö, jelobekwö kwi̧'yaduwobö ötjibobe, sulabenö. Jo̧kwajabetjö̧ jobadönö kwabö loköbaduwobö ja̧kobe, inesö suli̧ kwö̧'da̧deduwitjö̧ söbebö loköbaduwakobetjö̧.

^6-7 —Jau chömöledö, isabenö Diostjö 'da̧bachibö, ju'wedö tjösödawö̧nö kwösödaduwobö öbibadönö kwabö loköbaduwobö jo̧be, baikwö yötawa: Ökwöda yöne kwöjawo̧bi, ökwöda kwitji̧bi, ökwöda kwitjijubi, kwilekwobi, jelo̧ yö̧ne kwömöledöso̧bi Diosnö kakatibaduwobö öbibö, –Ju'wedö tjösödawö̧nö dösödo, –jö̧ba̧lö sulabenö ötjibitjö̧ma, ile nikebaduwawö̧ tjö̧jijayonö, yayonö jobadönö kwabö loköbaduwobö ja̧kobe, ökwödöbi kwa'dödöbi wajwiköbaduwawö̧nö kwösödaduwobö sulabenö ötjibobetjö̧. Jau chömöledö, bö̧jȩ ba̧kwemeachibanö ju̧kwadötjö ju'wedö tjösödawö̧nö̧ kwösödaduwobö sulabenö öbibö, bemi nijinö ju̧kwadö tjösödawö̧nö kwösödaduwobö ötjibitjö̧bi, jelobe ödö ju̧kwadö tjösödawö̧nö kwösödaduwobö ötjibitjö̧bi,

⁸ ötjibi̧da̧nö kwösödaduwoböma jwiakobe chömöledö, öbibö yötja̧li̧bi kwa̧ja̧kwaduwoböma jwiakobe, ja̧danö ju'wibi jobadönö kwabö loköbaduwobö ja̧kobe chömöledö. Jau chömöledö, jobadönö lȩlöjinö kwedaduwoböma jwiakobe, ja̧danö ju'wedö kwabö lotjapji jö̧ba̧lö tjökeba̧laduwobö jwiakobe, isabenö lȩlöjinö edökönö,

⁹ jobadönö kwabö loköbaduwobö ja̧kobe. Yöne kwömöledö tjö̧jitjö̧böbi, yayonö jobadönö kwabö loköbaduwobö ja̧kobe, ja̧danö ökwöda jobadö sulabenö ötjibaja̧ kwa̧ja̧kwaduwobetjö̧, ökwöda ajayinö inawiya kwikwobö ja̧kobe, ja̧danö kwi̧sȩbaja̧danö okobe deinö ju'wedö israel jojodöbi inawiya tjikwobö ja̧kobe, debö tji̧'yenanö baibanö.

¹⁰ Jobadöma kwuluwo̧duwi Isabenö Jo̧ Dios, Egipto nijitjö ju'wedö tjömöayedö kwö̧jinaduwelö ichejebina Diosnö kakatibaduwobö sulabenö ötjibobö tjisakwobetjö̧, jejenö inawiya ikwö kwabö loköbaduwobö ja̧kobe chömöledö.

¹¹ Ja̧danö chömöledö, jejenö sulabenö öbibadönö kwabö loköbaduwiawö̧, ju'wedö israel jojodöma tja̧ja̧kwakwedö, ja̧danö a̧ja̧kwö yetjaibakwedö, ja̧danö yebabinö omukwatö, la'akatjöda jobadö sulabenö öbibadö ötjibi̧danö ötjibökakwedö, –Diosnö katjatibobö ötibitjö̧ma, ötjönöbi lȩtjȩbena, –jö̧ba̧lö.

¹² —Chömöledö, kwuluwo̧duwi Isabenö Jo̧ Diosma ökwödönö kwiteboduwi baibanö iyakobe, ja̧danö ja̧ nijitjö kwiteboduwi comunidad baibanö iyakobe. Ja̧danö, iyaja̧ nijinö ja̧nö, ju'wi comunidad Dios iyaja̧ comunidad jojodönö kwa̧ja̧kwaduwena,

¹³ –Ökwödötjö ju'wedö sulabedöma ja̧ comunidad jojodönö sulabenö öbibö yötja̧lajabe, -Ju'wedö tjösödawö̧nö ökwödöbi dösödo, -jö̧ba̧lö, ja̧danö yötja̧li̧ ösödö, sulabenö ajayinö wajwiköbaduwinawö̧nö sulabenö tjösödobe ja̧ comunidad jojodöma, –jö̧ba̧lö kwa̧ja̧kwaduwena.

¹⁴ Jejenö kwa̧ja̧kwaduwitjö̧ma, jweinö abebö a̧ja̧kwö kwisakwaduwo, isabenö yötja̧laja̧danö sulabenö ju'wedö tjösödadawö̧nö ösödö tjö̧jojobö jö̧ba̧lö. Ja̧danö, teada̧lönö abebö a̧ja̧kwajadö, –Jau, isabenö inesö suli̧ jawa ja̧bö, ju'wedö tjösödawö̧nö tjösödobe, –jö̧ba̧lö kwöbadekwaduwitjö̧ma,

^15-16 okobe deinö ja̧ comunidadnö ju̧kwadönö kwabawö loköbaduwobö ja̧kobe, comunidadnö ju̧kwadö jojodönöbi, okobe deinö tjajwi̧munöbi. Ja̧danö, okobe deinö jobe ju̧kwadönö kwabawö lobajadö, okobe jwiinö tjiteainama, comunidad ö'wejenö ko̧ko̧dö kwödaduwo, ja̧danö lödajadö, comunidadbi, okobe jwiinö teabi ökwölanö juwö loköbaduwo. Jwiinö juwö loköbaduwo, kwuluwo̧duwi Isabenö Jo̧ Diosnö iyawa, jwiinö ubinö iyawa baibanö. Jejenö söbebö loköbaduwo, ökwödö israel jojodötjö Diosnö kabatibö ju'wedö tjösödawö̧nö ösödadö tjitebo comunidadma, ja̧danö ju'wibi baikwö yötawaduwakwö, yemidanö ja̧ comunidad tjotidoböma jwiakobe, la'akatjöda, ba̧kwelöjatebö juwö loawemida ji̧bobö ja̧kobe, ba̧kwelöjatebö.

^17-18 Ja̧danö, jejenö söbebö loköbaduwenama, baikwö yötawaduwakwö, teada̧lönö kwö̧jaduwo, söbebö loköbaduwobö Dios weina jawatjö ja'yubebi kwemaduwapji jö̧ba̧lö. Söbebö loköbaduwo jö̧ka̧laduwi̧ jawa kwemaduwitjö̧ma, Diosma ökwödönöbi ödameakwena, jo̧kwaijayonö wei̧ a̧ja̧kwö, wei̧danö okobe jwiinö söbebö loköbaduwitjö̧ma, Isabenö Jo̧ma ödameakwi̧, ju'wedönö tjösödiökwe ö̧dameakwi̧ma kaatibena. Ja̧danö ökwödö israel jojodönö lȩlöinö edena, ja̧danö lȩlöinö edö, kwö̧ba̧jȩkwachaduwinö pjaatena. Jau chömöledö, kwuluwo̧duwi Isabenö Jo̧ Diosma kwa'dödönö yöbawö ujuninobe, tji̧tji̧mu tupadanö jojodö tjö̧ba̧jȩkwachinö pjaatakwa̧ma, ja̧danö jo̧ba iwene, ja̧bö kwö̧jaduwobö wei̧ a̧ja̧kwö kwö̧jaduwitjö̧ma, isabenö ökwödönö badekwachakobe ja̧ kwa'dödönö yöbawö ujuninama. Babe möle kwuluwo̧duwi Isabenö Jo̧ Dios wei̧ yöbawö wetaduwakwö chömöledö, ja̧danö yötawi̧ a̧ja̧kwö, kwuluwo̧duwi Isabenö Jo̧ Dios ösödi̧danö ja̧bö kwö̧jaduwitjö̧ma, isabenö otiwanö kwö̧ba̧jekwachaduwinö pjaatakobe, —jö̧ba̧lö yöawinobe Moisesma.