Deuteronomio 11 - Dios Iwene

Jwaikwöda Diosnö ösödö, wei̧ a̧ja̧kwö kwö̧jaduwo, Moises yöawina jawa

¹ Tupakwö yöawinobe Moisesma, israel jojodönö: —Diosma isabenö otiwanö pjaatobe ökwödönö chömöledö, jo̧kwajabetjö̧ isabenö jo̧banö kwösödaduwobö jo̧be, ja̧danö jwaikwöda jo̧ba wei̧ a̧ja̧kwö kwö̧jaduwobö jo̧be. Jau chömöledö, ja̧bö kwö̧jaduwobö wei̧ jawabi, ju'wi wei̧bi, okobe jwiinö kwuluwo̧duwi Isabenö Jo̧ Dios wei̧ a̧ja̧kwö kwö̧jaduwobö jo̧be.

² Kwöwaisaduwa chömöledö, kwuluwo̧duwi Isabenö Jo̧ Dios ökwödönö jwebebö ö̧ba̧ja̧di̧ma, jö̧tö? Jau chömöledö, kwitji̧muduwinöda yötawitjö̧ma, wajwitjo jö̧tja̧lena, Dios i̧sȩbina jawa tjedinokobetjö̧. Jo̧kwaijayonö ökwödöma isabenö Dios i̧sȩbina edinadöja chömöledö, Diosma isabenö juluwo̧, jö̧ba̧lö. Jau chömöledö, Dios inesö ujulu edinadöja, Isabenö öpöjojodönö ölakwabikwawobö juluwo̧, jö̧ba̧lö.

³ Okobe jwiinö ujulu i̧sȩbina, jojodö edajitjökö jawa Egipto nijinö i̧sebinama edinadöja, la'aka luwo̧ Faraonnöbi, ju'wedö ömöayedö Egipto nijinö ju̧kwadönöbi.

⁴ Ja̧danö jwaibalawa Duwobutjö baledinabi edinadöja chömöledö, Egipto ölakwabikwawa jojodö ökwödönö lutjibenama, jobadönöbi, tjitea kolukiyabi, tja̧jwi̧mu kabayudö̧nöbi jwaibalawa okwatibö söbebö loobö weina edinadöja. Jau chömöledö, Isabenö Jo̧ma jwiinö söbebö loinobe Egipto ölakwabikwawa jojodönö, babe mölebi baibanö ina juluwöködö tjö̧jinö.

⁵ —Ja̧danö Dios ökwödönö iteada̧linabi edinadöja chömöledö, jojodö deobe kwekachaduwonö, otiwanö ökwödönö iteada̧linobe, bemi nijibe kwichibaduwenanö kabatö, jö̧tö?

⁶ Ja̧danö Rubensaso jojodö, Eliab itji̧mu Datannöbi, Abirannöbi lȩebina edinadöja chömöledö, sulabenö ja̧tjiökwe Diosma weinobe, niji po̧bebö, jobadönö ö̧katobö, jö̧tö? Jau chömöledö, israel jojodö tjö̧'da̧de tjö̧jemi ja'ötjö, kweda̧laduwonö nijima po̧ebinobe, ja̧danö jobadönöbi, tjömöledönöbi, tja̧jwi̧munöbi tjejubiyabi ö̧katibinobe nijima, okobe deinö jobadökwö ju̧kwadö 'yaba̧ladöma debi batjibanö.

⁷ Isabenö ja̧ Isabenö Jo̧ i̧sȩbina waisadöja chömöledö, ökwödöda kwöbajaleduwinö kwedinaduwobetjö̧, jö̧tö?

⁸ —Jo̧kwajabetjö̧ okobe jwiinö babe Dios wei̧ ökwödönö wetima, a̧ja̧kwö kwö̧jaduwobö jo̧be chömöledö. Babe juluwanö pekibaduwakwedöja chömöledö, Dios ökwödönö iyakwa̧ nijibe, ja̧danö baikwö wetaduwakwö, otiwanö Dios wei̧ a̧ja̧kwö kwö̧jaduwo, jobe iyakwȩmi nijibe kwichibaduwobö kwujuluwaduwakobetjö̧, ja̧danö ichibajadö kwiteboduwi baibanö kwemaduwobö kwujuluwaduwakobetjö̧,

⁹ ja̧danö lekwe möle ja̧ kwiteboduwinö wene jwiinö kwö̧jaduwakobetjö̧. Jau chömöledö, ja̧ niji kwa'dödönö yöbawö ujuninobe Isabenö Jo̧ma, jobadönöbi, tji̧tji̧mu tupadanö jojodönöbi ja̧ inesö otiwemi, ajikwakwawedöbi otiwanö tjöbötjachemi, ja̧danö batjobi otiwanö wa̧jemi niji iyobö, jo̧kwajabetjö̧ jo̧ba wei̧ a̧jakwö kwö̧jaduwo, lekwe möle otiwanö jobe kwö̧jaduwakobetjö̧.

^10-11 —Isabenö otiwobe, babe tekachaduwakwemi nijima chömöledö, baikwö yötawa: Kwöwaisaduwa Egipto nijitjö batjo otikwa chömöledö, jobetjö kwichinaduwobetjö. Ju'wi kwakwawa jawa batjoma, ba̧kwelöjatebö ojwiyo sa̧sa̧ba̧lö tjotidobö ji̧, kwakwawa wa̧jakobetjö̧, jö̧tö? Ja̧danö, ja̧jaye batjo tjotidi̧danö, Egiptotjö batjo tjotidenama, ödebiya lödajadö, ju'wibi ba̧kwelöjatebö ojwiyo sa̧sa̧ba̧lö tjotidobö jo̧be, jötö̧? Jejenömaökö babe tekachaduwakwȩmi nijima chömöledö. Jobema mösa'ijubi, wabekijubi jȩmi niji chömöledö, ja̧danö ojwiyo otiwanö o̧bemi niji, jo̧kwajabetjö̧ ojwiyo sa̧sa̧bö kwotidaduwoböma jwiakobe.

¹² Jau chömöledö, kwuluwo̧duwi Isabenö Jo̧ Diosma otiwanö teada̧lo̧ ja̧ niji kwiteboduwi baibakwȩmi nijima, ja̧danö o̧bakwena otiwanö eda̧lö iteada̧lobe, o̧ba jamatö, imiame 'dö̧ibajenanö kabatö.

¹³ —Ja̧danö chömöledö, Dios ökwödönö wei̧, babe ökwödönö yötawi̧ otiwanö a̧ja̧kwö ja̧nö, jwaikwöda kwuluwo̧duwi Isabenö Jo̧ Diosnö ile nibebö, jo̧banö ösödö kwö̧jaduwitjö̧ma,

¹⁴ isabenö o̧bakwena ojwiyo otiwanö o̧bobö weakobe, kwöbatjiju otiwanö pokwobö. Jau chömöledö, o̧bakwena ajayinö ojwiyo o̧bo jö̧a̧lenabi, bajaleapo o̧bo jö̧a̧lenabi, otiwanö o̧bo jö̧a̧lidanö ojwiyo o̧bobö weakobe. Ja̧danö jejenö ojwiyo o̧bobö weobetjö̧, otiwanö kwöbatjiju wa̧ji̧ kwemaduwakwedöja, kwakwawa jawa batjo wa̧ji̧bi, uba batjo wa̧ji̧bi, olivo batjo wa̧ji̧bi,

¹⁵ ja̧danö ju'wibi meje'ye otiwanö pokwobö weakobe, kwa̧jwi̧muduwibi otiwanö tjukwobö. Jau chömöledö, Dios wei̧ a̧ja̧kwö kwö̧jaduwitjö̧ma, jejenö otiwanö iteada̧lakobe, ja̧danö kwomeawaduwinö otiwanö kwukwaduwakwedöja.

¹⁶ —Jo̧kwaijayonö, Diosnö kabatibö, ju'wedö tjösödawö̧nö kwösödaduwitjö̧ma, iteada̧lökakobe jejenöma chömöledö. Isabenö teada̧lönö kwö̧jaduwo chömöledö, omöna wene ösödö, Diosnö kabatibö ju'wedö tjösödawö̧nö kwösödaduwapji jö̧ba̧lö. Jau chömöledö, ju'wedö tjösödawö̧nö bȩbachibö kwösödaduwitjö̧ma,

¹⁷ Isabenö Jo̧ma isabenö ödameakwakobe ökwödönö, ja̧danö mölejȩ utumatakobe, ojwiyo o̧bökönö. Ja̧danö, ojwiyo o̧bokobetjö̧, wa̧jökakobe kwöbatjijuduwima, ja̧danö Isabenö Jo̧ma inesö otiwemi niji ökwödönö iyijayonö, juluwanö iyaja̧ nijitjö debö kwi̧'yaduwakwedöja, —jö̧ba̧lö yöawinobe Moisesma, israel jojodönö.

¹⁸ Tupakwö yöawinobe Moisesma, israel jojodönö: —Chömöledö, isabenö mikwawobe, ökwödönö yötawi̧ kwomukwataduwoböma, isabenö kwomajadeduwinöbi, kwo̧'woduwinöbi 'diinö do̧ba̧lö kwö̧jaduwobö jo̧be. Ja̧danö yötawaja̧ wȩyudö, kwömamijuduwinöbi, kwöbaduwinöbi di̧kataduwo, ba̧kwelöjatebö ja̧ jawa omukwatö kwö̧jaduwakobetjö̧.

¹⁹ Ja̧danö ju'wibi ökwödönö yötawi̧ jawa kwitji̧muduwinöbi kwö̧ba̧ja̧daduwo, jobadöbi omukwatö tjö̧jakobetjö̧. Kwejuduwinö kwö̧jaduwenabi, jelobe kwö̧jaduwenabi, kwabaduwobö kwöbamataduwenabi, kwa̧la̧ibaduwenabi, ja̧ jawa yöka̧laduwobö jo̧be chömöledö, isabenö mikwawobetjö̧.

²⁰ Ju'wibi kwejuduwi apjude a'onö yötawi̧ jawa kwi̧wȩyudaduwo, ja̧danö comunidad apjude a'onöbi kwi̧wȩyudaduwo, ba̧kwelöjatebö edö kwomukwatibaduwakobetjö̧.

²¹ Isabenö jejenö yötawi̧ jawa omukwatö kwö̧jaduwobö jobe chömöledö, lekwe möle ökwödöbi, kwitji̧mubi Dios iyakwemi niji, kwa'dödönö yöbawö ujuninemi nijinö kwö̧jaduwakobetjö̧. Jau chömöledö, ja̧ jawa omukwatö kwö̧jaduwitjö̧ma, isabenö lekwe möle kwiteboduwi nijinö otiwanö kwö̧jaduwakwedöja, bö̧jȩ 'dö̧ibajenanö kabatö, kwitji̧mu tupadanö jojodöma ba̧kwelöjatebö 'dö̧ibajökenanö kwiteboduwinö otiwanö tjö̧jakwedö.

²² —Ja̧danö ju'wibi yötawaduwakwö chömöledö, Dios wei̧ babe ökwödönö webö yötawi̧ teada̧lönö a̧ja̧kwö ja̧nö, kwuluwo̧duwi Isabenö Jo̧ Diosnö ile nibebö, ösödi̧danö ja̧bö ja̧nö, 'diinö jo̧banö do̧ba̧lö kwö̧jaduwitjö̧ma,

²³ Isabenö Jo̧ma isabenö okobe deinö kwöpöjojodö, babe kwiteboduwinö ju̧kwadönö a'dewö loakobe, kwöba a'oduwitjö. Ja̧danö chömöledö, jobadöma ökwödö kwö̧ba̧jȩkwaduwitjö bajalekwönönö tjö̧ba̧jȩkwijayonö, ja̧danö kwujuluduwitjö bajalekwönönö tjujuluwijayonö, jobadö tjiteboinemi nijinö kwöjaduwakwedöja, Diosnö kwösödaduwiökwe ökwödönö pjaatobetjö̧.

²⁴ Isabenö okobe jwiinö ja̧ niji, kwö̧ja̧taduwemitenia nijima, kwiteboduwi ja̧kobe chömöledö, isabenö jalakobe kwiteboduwima, jojodö deobetjö Libano nijibe ichibanö, ja̧danö ojwe nöödö Eufrates mikwödötjö, jawo̧ ichobekwösobu jwaibalawa Mediterraneobe ichibanö.

²⁵ Ja̧danö, kwöpöjojodöduwitjö bakwo̧bi kwöba a'oduwi ja̧nö, tjöbeba̧lö ölakwabikwawoböma jwiakobe, okobe deinö kwekachaduwi̧tenia niji ju̧kwadö jwiinö ökwödönö yetjaibobö kwuluwo̧duwi Isabenö Jo̧ Dios weakobetjö̧. Jau chömöledö, ökwödönö yöbawö ujuninadanö, isabenö jejenö pjaatakobe, jo̧ba wei̧ kwa̧ja̧kwaduwobetjö̧.

²⁶ —Teada̧lönö kwa̧ja̧kwaduwo chömöledö, Dios lȩebakwa̧ wenebi, otiwanö pjaatakwa̧ wenebi, di̧yatjö omudawö kemaduwakwojobö jö̧ba̧lö.

²⁷ Otiwanö pjaatakwa̧ wenema bi̧ya: Kwuluwo̧duwi Isabenö Jo̧ Dios ökwödönö wei̧, babe ökwödönö yötawi̧ jawa a̧ja̧kwö, wei̧danö ja̧bö kwö̧jaduwitjö̧ma, isabenö yötawaja̧danö pjaatakwo̧ kwuluwo̧duwi Diosma, jö̧ba̧lö.

²⁸ Ja̧danö lȩebakwa̧ wenema bi̧ya̧: Kwuluwo̧duwi Isabenö Jo̧ Dios wei̧ a̧ja̧kwökönö, babe ökwödönö weti̧ jawa kabatibö, wainö ja̧bö ju'wedö tjösödawö̧nö, ajayinö wajwiköbinaduwawö̧nö kwösödaduwitjö̧ma, Diosma isabenö ökwödönö lȩebakobe, jö̧ba̧lö. Jobekwö yötawobe, pjaatakwojobö, lȩebakwojobö jö̧ba̧lö ökwödöda kwomudawaduwakobetjö̧.

²⁹ —Kwuluwo̧duwi Isabenö Jo̧ Diosma kwiteboduwi baibakwa̧ nijibe tekachaduwobö öibakobe chömöledö, ja̧danö jobe tebachajadö, ja̧köbaduwakwa̧ baikwö wetaduwakwö: Jobe ichibajadö, ökwödönö yötawaja̧ pjaatakwa̧ jawabi, lȩebakwa̧ jawabi jobetjö yökawaduwo. Pjaatakwa̧ jawa yöbawadöma, Guerizin mösa'onö ja̧nö yötjawakwedö, ja̧danö lȩebakwa̧ wene yöbawadöma badeibösa'o Ebal mösa'onö ja̧nö yötjawakwedö.

³⁰ Ja̧ mösa'iju kwöwaisaduwa chömöledö, Jordan ojwe tupakwö, jawo̧ meajobekwö ja'yubenö ödöobe, Araba nijinö ju̧kwadö cananeos jojodö tjitebonö. Ju'wibi jobema Guilgal badeibö, encina towi More ötjabowi yö̧neawobe.

³¹ —Jau chömöledö juluwanö Jordan ojwe pebibö, kwuluwo̧duwi Isabenö Jo̧ Dios ökwödönö iyakwȩmi nijibe kwi̧'yaduwakwedöja, ja̧danö ja̧ niji kwiteboduwi baibanö emajadö, jobe kwö̧jaduwenama,

³² teada̧lönö kwö̧jaduwo, okobe jwiinö Dios wei̧ jawa a̧ja̧kwö kwö̧jaduwobö. Jau chömöledö, babe Dios ja̧bö kwö̧jaduwobö wei̧bi, ju'wi wei̧bi webö yötawaduwakwö, ja̧danö isabenö jobe ja̧nö a̧ja̧kwö kwö̧jaduwobö jo̧be, —jö̧ba̧lö yöawinobe Moisesma, israel jojodönö.