Deuteronomio 10 - Dios Iwene

Dios yemidanö inaba wei̧ wȩyukwaba iyina jawa

¹ Tupakwö yöawinobe Moisesma, israel jojodönö: —Ja̧danö chömöledö, ja̧ möle Isabenö Jo̧ma ötjönö weinobe, –Ajayinö inabiya wȩyukwaba chiyinadanö öbiyama inawatjö döbalataja kwotido, ja̧danö ju'wibi towi ötebiyatjö isapjo kwotido, inabiya a̧ja̧kwapjoma. Ikenama, inabiya otidajo̧, chö̧jobekwö mösa'o nöchö kwichejebo Moises.

² Ja̧danö kwichejebaja̧ inabiyanö chi̧wȩyudocha, 'dakebina inabiyanö chi̧wȩyudinadanö, ja̧danö jemi ikenama ja̧ inabiya kwotidajapjo okwa kwanakwo̧ja, –jö̧ba̧lö weinobe.

³ Jo̧kwajabetjö̧, jejenö wei̧tjö̧, acacia towi ötebiyatjö isapjo chotidijatö, ja̧danö inaba döbalataja chotidijatö. Ikenama, inabiya e'ewö mösa'o chönöchijatö.

⁴ Ikenama Diosma chichejebaja̧ inabiyanö i̧wȩyudinobe, ajayinö inabiyanö bakwa̧inö i̧wȩyudinadanö. Iteda domulataja jawa weina, ökwödö israel jojodö mösa'o la'aka ko̧ko̧kwö kwö̧jaduwonö, ökwöla okwatjö iwene ökwöinö ökwödönö weinama inabiyanö i̧wȩyudinobe, ja̧danö wȩyudajo̧, Isabenö Jo̧ma ötjönö iyinobe.

⁵ Ja̧danö, jejenö iyitjö̧, jalachibö mösa'obetjö yutuchajijatö, ja̧danö yutubajo̧, isapjo chotidinapjo okwa chanijatö, Isabenö Jo̧ ötjönö weinadanö, ja̧danö ina ja̧pjo okwa a̧jo̧be, babebi, —jö̧ba̧lö yöawinobe Moisesma, israel jojodönö.

⁶ Israel jojodö damötjö kwetjachina labebö loawama, baikwö laebobe: Israel jojodöma Berot Bene Yacan mikwobetjö labebö, Moserabe tji̧'yinobe. Ja̧danö, jobe Moseratjö ö'wö baibinobe Aaronma, ja̧danö jobetjö jo̧banö tjo̧tji̧nobe. Ja̧danö, Aaron Diostjö jojodötjö inesö tjö̧'da̧de pjabato̧ ö̧jinemima, Aaron itji̧ Eleazarda inesö tjö̧'da̧de pjabato̧ baibinobe.

⁷ Ikenama tupakwö Gudgodabe kwetjachinobe israel jojodöma, ja̧danö jobetjö tupakwö Jotbata nijibe kwetjachinobe, ojwe nöinö lȩmi nijibe.

⁸ Ja̧danö, ja̧ möle jenanö, Isabenö Jo̧ma Levisaso jojodönö 'da̧batö ujuninobe, Isabenö Jo̧ iteapjo, wei̧ wȩyukwaba a̧ja̧pjo tje'ewobö, ja̧danö ju'wibi Isabenö Jo̧ öba a'o ja̧nö, wei̧ tjotidobö, ja̧danö ju'wibi, jojodönö pjabatö Isabenö Jo̧nö atjebobö, jojodönö pjaatobö. Jobekwö otidö tjö̧jobö 'da̧batö ujuninobe, ja̧danö babe mölebi baibanö, ina jejenö tjotidobe Levisaso jojodöma.

⁹ Ja̧danö, jejenöobetjö̧, niji emöködö Levisaso jojodöma, tjitebo baibanöma. Israel jojodö tjuluwo̧ Isabenö Jo̧ Dios Levisaso jojodönö yöbawö ujuninadanö, jobadönö iyi̧ma nijimaökö, jobadönö iyi̧ma Isabenö Jo̧ öba a'o otidö tjö̧jobö.

¹⁰ Tupakwö yöawinobe Moisesma, israel jojodönö: —Ja̧danö chömöledö, ja̧ möle mösa'onö yemidanö chö̧jenama, ajayinö chö̧jenadanö yemidanö cuarenta mölebi, yötebi jobe Isabenö Jo̧kwö chö̧jijatö. Ja̧danö, jobe ja̧nö, yemidanö Isabenö Jo̧nö atebijatö, ökwödönö lȩlöinö edobö, ja̧danö yemidanö atebi̧ a̧ja̧kwinobe Isabenö Jo̧ma, –Israel jojodönö söbebö lotökakwo̧sa, –jö̧ba̧lö.

¹¹ Ja̧danö, jemi ikenama Isabenö Jo̧ma ötjönö weinobe, –Tjo̧wita, a̧la̧ibö kwömöledö israel jojodönö öbibö kwi̧'yo, tja'dödönö yöbawö chujuninemi nijibe tetjachobö, ja̧danö tebachajadö tjitebo baibanö jobe tjö̧jobö, –jö̧ba̧lö weinobe Isabenö Jo̧ma, —yöawinobe Moisesma.

Isabenö Dios wei̧ kwa̧ja̧kwaduwobö jo̧be, jo̧bada inesö Diosobetjö̧, jö̧ba̧lö Moises yöawina jawa

¹² Tupakwö yöawinobe Moisesma, israel jojodönö: —Ja̧danö chömöledö israel jojodö, kwuluwo̧duwi Isabenö Jo̧ Dios ökwödönö wei̧ma, di̧ya? Sule bi̧yada weobe chömöledö: Kwuluwo̧duwi Isabenö Jo̧ Diosnö yebabinö omukwatö, jo̧ba ösödi̧danö ja̧bö ja̧nö, jo̧banö ile nibebö kwösödaduwobö. Ja̧danö okobe jwiinö kwomajadöduwinöbi, kwo̧'woduwinöbi jwaikwöda kwuluwo̧duwi Isabenö Jo̧ Dios ömöayedö kwö̧jaduwobö,

¹³ ja̧danö okobe jwiinö kwuluwo̧duwi Isabenö Jo̧ Dios ökwödönö wei̧ babe ökwödönö yötawi̧ jawa ja̧bö kwö̧jaduwobö. Ja̧da ökwödönö weobe chömöledö, ja̧danö baikwö yöta̧la jejenö wei̧ma, ökwödönö suli̧ öwaedotö jö̧ba̧löma jejenö webö̧kö̧, otiwanö kwö̧jaduwobö ösödobetjö̧, ökwödönö pjaatakwawa baibanö jejenö webo̧ chömöledö.

¹⁴ Chömöledö, kwuluwo̧duwi Isabenö Jo̧ Diosma okobe jwiinöbi, okobe deinöbi inesö la'aka tjuluwo̧, okobe jwiinö mölejȩbi, bö̧jebi, okobe jwiinö bö̧jȩnö ji̧bi, inesö la'aka luwo̧ma jo̧bada.

¹⁵ Jo̧kwaijayonö, okobe deinö inesö la'aka tjuluwo̧ ö̧jijayonö, Isabenö Jo̧ma ökwödö israel jojodö da'dödönöda ile nibebö omudawö ujuninobe, ja̧danö ökwödö jobadö tji̧tji̧mu tupadanö jojodönöda omudawö ujuninobe, iteda ömöledö kwö̧jaduwobö. Jau chömöledö, okobe deinö bö̧jȩnö ju̧kwadötjö ökwödö israel jojodönöda omudawö ujuninobe, iteda ömöledö kwö̧jaduwobö, ja̧danö ina babe mölebi, iteda ömöledöbedöja.

¹⁶ Jo̧kwajabetjö̧, isabenö jo̧ba wei̧ kwa̧ja̧kwaduwobö jo̧be chömöledö, baikwö wanedö yötawa, kwomajadeduwi bajalesa̧do̧ 'diado̧ma 'wibekwö loköbaduwo, kwuu 'diinö a̧ja̧kwökönö kwö̧jaduwi̧ kakatibaduwakobetjö̧.

¹⁷ —Jau chömöledö, isabenö Dios wei̧ kwa̧ja̧kwaduwobö jo̧be, baikwö yötawa: Kwuluwo̧duwi Isabenö Jo̧ Diosma, okobe deinö tjösödawö̧tjö inesö Diosbo̧ chömöledö, ja̧danö okobe deinö luwedötjö inesö la'aka luwo̧, ja̧danö jo̧bada inesö juluwo̧ Diosma, okobe deinö yetjaibo jö̧tja̧lökwema. Ju'wibi, wainökwena omukwatökönö, bakwainö edo̧ jo̧bama jojodönö. Ju'wedö lȩekwa jojodöma jweinö yöbawökönö, jojodö tjimidobö abebadö, sulabenö lȩekwa yötjawobö, jo̧kwaijayonö jejenöbö̧kö̧ Diosma chömöledö, bakweminö jweinö lȩbebo̧, juna̧ladönöbi jwibadönöbi.

¹⁸ Ja̧danö löyödönöbi, tji̧lekwamu wobekwinadönöbi tjöbeba̧lö pjabato̧, ju'wedö jobadönö sulabenö ja̧tja̧pji jö̧ba̧lö. Ja̧danö ju'wibi jelobetjö ichajadönö ösödö pjabato̧, tju̧kwa kwakwawabi, tjitea ka̧miji̧do̧bi iyö.

¹⁹ Ja̧danö chömöledö, baikwö yötawaduwakwö, damötjö ökwödöma jelobetjö ichajadö, ju'wedö tjitebo nijinö kwö̧jinaduwobe, Egiptonö, jö̧tö? Jo̧kwajabetjö̧ ja̧ jelobetjö ichajadö ju'wedö tjitebonö kwö̧jinaduwa omukwatö, ju'wedö jelobetjö ichajadö kwiteboduwinö tjö̧jenama, jobadönö kwösödaduwo, kwuluwo̧duwi Dios jobadönö ösödi̧danö.

²⁰ —Kwuluwo̧duwi Isabenö Jo̧ Diosnöda yebabinö omukwatö kwösödaduwo chömöledö, jo̧banöda bȩbachibö kwösödaduwo, jo̧banöda do̧ba̧lö kwö̧jaduwo, –Duluwo̧ Dios, –jö̧ba̧lö, ja̧danö jo̧ba iminöda yöbawö kwujunaduwo, –Yöbawö chujunaja̧danö ja̧bökönö, wainö ja̧titjö̧ma, Isabenö Jo̧ lȩebobö ja̧kobe, –jö̧ba̧lö.

²¹ Jo̧banöda ösödö, Otiwo̧ja jö̧ba̧lö kwösödaduwonö. Jo̧bada kwuluwo̧duwi Dios chömöledö, ja̧danö ökwödöma kwöbajaleduwinö edinadöja, iteda ujulu i̧sȩbö, juluwi̧ ji̧ jojodö edajitjökö jawa i̧sȩbinama.

²² Jau chömöledö, isabenö ökwödönö pjaatajabe kwuluwo̧duwi Isabenö Jo̧ Diosma, damötjö kwa'dödö Egiptobe tji̧yinenama, sule setentabedöda jobe tji̧'yinobe, jö̧tö? Jo̧kwaijayonö o̧bukwedöda tjö̧jinajayonö, ökwödönö kwö̧ba̧jekwachaduwinö pjaatajabe, si̧li̧'idö tjö̧ba̧jȩkwi̧danö kwö̧ba̧jekwachaduwobö, —jö̧ba̧lö yöawinobe Moisesma, israel jojodönö.