Deuteronomio 1 - Dios Iwene

Moises israel jojodönö yöawina jawa

¹ Baikwö laebobe Moises israel jojodönö yöawina jawa, ina Jordan ojwetjö jawo̧ ichobekwö tjö̧jayi. Ja̧ möle ina jojodö deobe tjö̧jinobe, Suf ötjabobe badeibö mejenö, Paran comunidadbi, Tofel comunidadbi, Laban comunidadbi, Jazerot comunidadbi, Dizahab comunidadbi ö'wejenö.

² Ja̧danö, Cades Barnea nijima, Sinai mösa'otjö ödöokobe, Seir mösa'o ö'öbönö jojodö kwetjachitjö̧ma, a̧li̧nösamutjö bakwöta möle kwebachö, juluwanö ichikwobe Cades Barneabema.

^3-4 Ja̧ Moises israel jojodönö yöawina mölema, Egipto nijitjö latjebaja̧ ikena treinta y nueve o̧biyabi, jawo̧dö bakwamubedö baledibaja̧ ikena jawo̧ ajayi möle. Ja̧danö ju'wibi, ja̧ möle abönö, Moisesma ida̧ökö amorreos jojodötjö la'aka luwo̧ Hesbon comunidadtjö webina Sijon mikwo̧nö ujuluwinobe, ja̧danö ju'wibi Astarot comunidadtjöbi, Edrey comunidadtjöbi webo̧ Basan niji la'aka luwo̧ Og mikwo̧nö ujuluwinobe. Ja̧ möle Moisesma israel jojodönö yöawinobe, ja̧danö jobadönö yöawi̧ma, jwaikwöda Isabenö Jo̧ jobadönö yöawobö wei̧danö, israel jojodönö yöawinobe Moisesma.

⁵ Jordan ojwetjö jawo̧ ichobekwö Moab nijinö ja̧nö, Moisesma Isabenö Jo̧ jobadönö wei̧ jawa labebö lobö yöawinobe, baikwö:

⁶ —Chömöledö, damötjö Sinai mösa'otjö dö̧jenama, ökwödö israel jojodö Duluwo̧ Isabenö Jo̧ Diosma ökwödönö weinobe, –Tjowita, ida̧ökö lekwe bi'o mösa'otjö lekwe kwö̧jaduwajabe, ja̧danö tjo̧wi tupakwö kwi̧'yaduwobö badekwachajabe.

⁷ Jo̧kwajabetjö̧ belö labebö, tupakwö mösa'iju jȩmi niji amorreo jojodö tjitebobebi, Araba ötjabobe nijibebi, ju'wi mösa'iju jȩmi nijibebi, mösa'o ö'öbö nijibebi, Neguev ötjabobe nijibebi, jwaibalawa ö'öbö nijibebi kwi̧'yaduwo. Jau, jobe cananeos jojodö tjibebobebi, Libano nijibebi, ojwe nöödö Eufrates nijibebi kwi̧'yaduwo, kwiteboduwi baibanö kwemaduwakobetjö̧.

⁸ Jau, damötjö kwa'dödö Abrahamnöbi, Isaacnöbi, Jacobnöbi yöbawö chujunijatö, jobadönöbi, tjitji̧mu tupadanö jojodönöbi ja̧ niji isabenö chiyakwa̧ wenema, ja̧danö yöbawö chujunina badekwachinö isabenö ja̧ niji kwemaduwobö chujunajabe. Jo̧kwajabetjö̧, jobe 'ya̧nö, kwiteboduwi baibanö ja̧ niji emö, jobe kwö̧jaduwobö badekwachajabe, –jö̧ba̧lö weinobe Diosma, Sinai mösa'otjö, —jö̧ba̧lö Dios yöawina jawa yöawinobe Moisesma.

Moises ju'wedö luwedönö 'da̧batö ujunina jawa

⁹ Tupakwö yöawinobe Moisesma, israel jojodönö: —Ja̧danö chömöledö, ina Sinai mösa'otjö dö̧jayi, ötjöma ökwödönö yöta̧lijatö, –Jo̧dawa'ye ötjöda kwuluwo̧duwi chö̧joböma juluwö̧kö̧sa.

¹⁰ Kwuluwo̧duwi Isabenö Jo̧ Diosma kwö̧ba̧jȩkwachaduwinö pjaatinobe, mölejebe ju̧kwadö si̧li̧'idö tjö̧ba̧jekwi̧danö kwö̧ba̧jekwachaduwinö.

¹¹ Ja̧danö babe kwö̧ba̧jȩkwaduwitjö̧ jwiinö tupakwönönö kwö̧ba̧jekwachaduwobö kwuluwo̧duwi Isabenö Jo̧ Dios pjaatobö chösöda, -Tjö̧ba̧jadökenanö kwö̧ba̧jȩkwachaduwinö pjatatocha, -jö̧ba̧lö yöbawö ujuninadanö, ja̧danö isabenö yöbawö ujuninadanö ökwödönö otiwanö pjaatobö chösöda.

¹² Jo̧kwaijayonö, kwöba̧jȩkwaduwobetjö̧, okobe jwiinö wene kwujuna̧laduwi̧ma ötjöda dakwö jwetebobö chömöledö, jo̧dawo̧chobetjö̧ jejenö jweteboböma juluwö̧kö̧sa,

¹³ jo̧kwajabetjö̧ ökwödö bakwasokwena jojodöma ökwödötjö waisadö, ja̧danö otiwanö omukwatadö, ja̧danö jojodö otiwanö tjomukwatawö̧nö omudawö kwujunaduwo, ja̧danö omudawö kwujunaduwajawö̧nö kwuluwedöduwi lȩekwa luwedö batjibanö 'da̧batö chujunocha, –jö̧ba̧lö ökwödönö yötawijatö Sinaitjöma.

¹⁴ Ja̧danö, jejenö yöta̧liawö̧, kwatadinaduwobe, –Jau, 'da̧batö dujunobö omukwatö yöka̧laja̧ma, otiwa, –jö̧ba̧lö atadö ju'wedönö 'da̧batö kwujuninaduwobe.

¹⁵ Jo̧kwajabetjö̧ 'da̧batö kwujuninaduwawö̧nö kwuluwedöduwi batjibanö chujunijatö, ju'wedö ba̧jȩkwadö milbedö jenanö tjuluwedönöbi, ju'wedö cienbedö jenanö tjuluwedönöbi, ju'wedö cincuentabedö jenanö tjuluwedönöbi, ju'wedö domulatajabedö jenanö tjuluwedönöbi. Bakwasokwena kwuluwedöduwi batjibanö jejenö chujunijatö,

¹⁶ ja̧danö jejenö chujunenama, otiwanö tjotidakwa̧ jobadönö wetijatö, baikwö: –Kwömöledöduwi wene tjujuna̧lenama, otiwanö kwa̧ja̧kwaduwo, jojodönö bakweminö omukwatö. Jau, kwömöledö israel jojodönöbi, jelobetjö ichajadönöbi, bakwainö jweinö lȩekwa yökawo jö̧ka̧laduwi̧danö yökawaduwo, baledaja̧ jawada omukwatö.

¹⁷ Jojodö kwöba a'o tjichibenama, nöinö tjujuna̧litjö̧böbi, jwibadö tjö̧ji̧tjöböbi, bakwainö jweinöda lȩekwa yökawaduwo. Ja̧danö lȩekwa yökawaduwobö jȩnama, jojodönö yebabökönö jweinö yökawaduwobö ja̧kobe. Diosda inesö lȩekwa luwo̧ chömöledö, jo̧kwajabetjö̧ jojodönö yebabökönö, jo̧ba wei̧da a̧ja̧kwö, jweinö lȩekwa yökawaduwobö ja̧kobe. Ja̧danö, lȩekwa yökawaduwobö waiyitjö̧ma, chöba a'o tjichibobö ökibaduwo, wene juna̧ladönö, ötjö Moises yötja̧li̧ a̧ja̧kwö lȩekwa yötawobö,

¹⁸ –jö̧ba̧lö wetijatö lȩekwa luwedönö, tjotidakwa̧ jawa wetenama, —jö̧ba̧lö yöawinobe Moisesma.

Israel jojodö ajayinö canaan niji tetjachobö tjöpöjödina jawa

¹⁹ Tupakwö yöawinobe Moisesma, israel jojodönö: —Ja̧danö, duluwo̧ Isabenö Jo̧ Dios ökwödönö weinadanö, Sinaitjö labebö inesö jalobe, ja̧danö labobe jojodö deobe döbaledijatö. Jau chömöledö, ökwödöma ja̧ niji edö waisadöja, isabenö labobe jö̧ba̧lö. Amorreo jojodö tjitebo mösa'iju jȩmi niji dichibotö jö̧ba̧lö, ja̧ niji döbaledijatö, Cades Barneabe dichibenanö kabatö.

²⁰ Ja̧danö, dichibenama, ökwödönö yötawijatö, –Duluwo̧ Isabenö Jo̧ Dios ökwödönö iyakwa̧ nijibe dichibajabe, amorreo jojodö tjitebo mösa'iju jȩmi nijibema.

²¹ Edaduwi, Kwuluwo̧duwi Isabenö Jo̧ Diosma i̧ya nijida ökwödönö iyobe, kwiteboduwi baibanö kwemaduwobö. Jau, kwa'dödö tjösödinökwe Isabenö Jo̧ Diosma ökwödönö iyakwa̧ yöbawö ujuninobe, jo̧kwajabetjö̧ yebabökönö tebachö kwemaduwo, ja'yubebi yekabiduwobö jwiobetjö̧, –jö̧ba̧lö yötawijatö ökwödönö.

²² —Jo̧kwaijayonö, jejenö yöta̧liawö̧, ökwödöma chö̧jobekwö ichö, yöka̧linaduwobe, –Tebachö niji demakwa̧ abönö, ju'wedö tjedakwedönö wedobö jö̧da̧lobe, niji kwebachö tjedobö. Ikenama kwebachö edajadö, ȩwa̧bijö ökwödönö yötjawakwedö, dimanö otiwanö kwedachakwojobö, ja̧danö di̧ya comunidadbiyabe dichibakwojobö, –jö̧ba̧lö.

²³ Akebaduwitjö̧, chösödijatö, ja̧danö bakwasokwena jojodötjö bakwo̧nö omudawö chujunijatö, ömadö a̧li̧nösamutjö du̧ju̧taja batjibanö.

²⁴ —Ja̧danö, jobadöma labebö, mösa'iju jȩmi niji edö kwetjachinobe, Escol wabekobe tjichibenanö kabatö, ja̧danö jobe ichibajadö, ja̧ niji edö kwetjachinobe.

²⁵ Ju'wibi ja̧ niji waji̧tjö 'döbö tjichejebinobe dö̧jobekwö, ja̧ waji̧ ökwödöbi dedobö. Ja̧danö ökwödönö tjedaja̧ yötjawinobe, –Isabenö duluwo̧ Isabenö Jo̧ Dios iyakwa̧ nijima otiwobe, –jö̧ba̧lö yötjawinobe.

²⁶ Jo̧kwaijayonö, inesö otiwobe jö̧ba̧lö yötjawijayonö, ökwödöma jobe kwi̧'yaduwobö kwöpöjödinaduwobe. Kwuluwo̧duwi Isabenö Jo̧ Dios wei̧ öpöjödö, Dios iyi̧ nijibe kwi̧'yinaduwokobe.

²⁷ Ja̧danö, kwejuduwi sabana'wotjö otikwejunö ja̧nö, kwo̧'woduwi suli̧nö yöka̧linaduwobe, –Isabenö Jo̧ma ökwödönö öpöjödobetjö̧, Egipto nijitjö ökwödönö laebajabetija, baikwö ichejebö, amorreos jojodöma ökwödönö kwabö lotjakobetjö̧.

²⁸ Jobe di̧'yobö jwiobe, isabenö labobetjö̧. Jau, dömöledöma yedaibanö yötjawajabe, jobe ju̧kwadö inesö tjujuluma. Tjitebobetjö edö kwebachajadö, yötjawajabe: Jobe ju̧kwadöma ökwödötjö bajalekwönönö ödöbaedö, ökwödötjö bajalekwönönö juluwadö, ja̧danö tjitebo comunidadbiyama, otiwanö 'diinö tjöekwobe, tjöekwemima mölȩjȩbe ichibenanö. Ja̧danö ju'wibi, jobe inesö juluwadö ödöbaedö anaquitas jojodö ötjabawö̧nö dedijatö, jö̧ba̧lö tjedaja̧ yötjawinobe. Isabenö ja̧ niji tedachoböma jwiobe, labobe, –jö̧ba̧lö Dios jobe kwi̧'yaduwobö wei̧ma kwöpöjödinaduwobe.

²⁹ —Jejenö kwöpöjödinaduwi̧tjö̧, ökwödönö yöta̧lijatö, –Yekabiduwobö jwiobe, ja'yubebi yekabiduwobö jwiobe chömöledö.

³⁰ Kwuluwo̧duwi Isabenö Jo̧ Diosma kwabönöduwi kwebacho̧, ja̧danö jo̧bada kwabönöduwi 'ya̧nö, ölakwabikwawakwo̧ kwöpöjojodöduwinöma. Jau chömöledö, kwöwaisaduwa, kwedaduwonö Egipto nijitjö jo̧bada ölakwabikwawinobe, tjujulutjö kwö̧jibaduwobö, ¿jö̧tö?

³¹ Ja̧danö, jojodö deobe kwekachaduwonö, kwuluwo̧duwi Isabenö Jo̧ Diosma ökwödönö öbibö e'ewinobe ichejekwa, bakwo̧ iteda itji̧nö öbibö apjö̧alobedanö, jö̧tö? Okobe jwiinö kwekachaduwi̧ma, otiwanö teada̧lö öibinobe, baikwö kwichibaduwenanö kabatö, jö̧tö? Isabenö otiwanö teada̧lö ölakwabikwawo̧ kwuluwo̧duwi Diosma chömöledö.

³² Jo̧kwaijayonö, otiwanö iteada̧linajayonö, yayonö kwuluwo̧duwi Isabenö Jo̧ Diosnö kwo̧'wo wa̧na̧löködöja.

³³ Kabatökönö kwabönöduwi 'ya̧nö, otiwanö kwabekwaduwakwemi isakwiainobe, ja̧danö mölekwena ojwiyo'wonö otiwanö kwekachaduwakwa̧ i̧sȩbiainobe, ja̧danö yö̧tekwena ökwölasa'onö otiwanö kwedaduwobö i̧sȩbiainobe, jo̧kwaijayonö kabatökönö jejenö otiwanö pjabatiainajayonö yayonö o̧'wo wa̧nalöködöja, –jö̧ba̧lö yöta̧lijatö ökwödönö, Dios iyakwemi nijibe tekachaduwobö kwöpöjödaduwenama, —jö̧ba̧lö yöawinobe Moisesma, israel jojodönö.

Israel jojodö niji tetjachobö tjöpöjödiökwe, Dios jobadönö lȩebina wene

³⁴ Tupakwö yöawinobe Moisesma, israel jojodönö: —Ja̧danö chömöledö, sulabenö yöka̧laduwiökwe, Isabenö Jo̧ma yöka̧laduwi̧ a̧ja̧kwinobe, ja̧danö a̧ja̧kwö ödameakwinobe ökwödönö. Ja̧danö, sulabenö ja̧köbaduwiökwe, ökwödönö yöbawö ujuninobe lȩebakwa̧ wenema,

³⁵ –Isabenö bidö sulabedö ömadöma, tja'dödönö chiyakwo̧sa jö̧ba̧lö yöbawö chujuninemi otiwemi nijima, la'akatjöda edö tetjachökakwedö, sulabedötjobetjö̧.

³⁶ Jo̧kwaijayonö ju'wedö damö tetjachököjayonö, Jefone itji̧ Calebma teachakwo̧. Jo̧bama jwaikwöda ötjö Isabenö Jo̧ weti̧ ja̧bö ö̧jobetjö̧, jo̧bama isabenö chiyakwemi nijibe ichibakobe, ja̧danö jo̧banöbi, itji̧mu tupadanö jojodönöbi edö kweachinemi niji chiyakwo̧sa, jobadö tjitebo niji baibanö, –jö̧ba̧lö lȩebakwa̧ jawa yöbawö ujuninobe Diosma.

³⁷ —Isabenö lȩbebo̧ Isabenö Jo̧ma, wei̧ a̧ja̧kwöködönö chömöledö. Ja̧danö, ökwödö israel jojodö kwöba a'oduwitjö weökö jawa sulabenö ja̧tiökwe, ötjö Moisesnöbi ödameakwinobe Isabenö Jo̧ma, ja̧danö ötjönöbi yöawinobe, –Moises, ökwöbi chiyakwemi nijibe tekachökakwo̧ja.

³⁸ Kwömöayo̧ Josueda israel jojodönö öbibö teachakwo̧, jo̧kwajabetjö̧ ujuluwachibanö pjakatonö, jo̧bada chiyakwemi niji israel jojodö tjemobö pjaatakobetjö̧, tjitebo niji baibanö, –jö̧ba̧lö yöawinobe Diosma, ötjö Moisesnö lȩebakwa̧ma.

³⁹ —Ja̧danö, ju'wibi yöawinobe Diosma ökwödönö: –Ökwödöma yöka̧laduwajabe, -Döpöjojodöma ökwödö damönö kwabö lobajadö, ditji̧munö do̧tjatakwedö, idöda tjö̧möayedö̧ batjibanö, -jö̧ba̧lö. Jo̧kwaijayonö baikwö yötawaduwakwö: Jobadö kwitji̧muduwi, tjömöayedö batjibanö tjemakwedö jö̧ba̧lö jö̧ka̧laduwajawö̧da chiyakwemi nijibe tetjachakwedö. Jobadöma babe möle ina pjebadö, ina suli̧bi otiwi̧bi wajwibadö, ja̧danö jobadönöda tjitebo baibanö niji chiyocha, ja̧danö jobadöma isabenö tjitebo baibanö tjemakwedö.

⁴⁰ Jo̧kwaijayonö babe ökwödö tjebachajö jojodö deobe kwebachaduwi, Jwaibalawa Duwobö lo̧bekwö, –jö̧ba̧lö lȩbebö weinobe Diosma.

⁴¹ —Ja̧danö, jejenö lȩebakwa̧ yöa̧liawö̧, ökwödöma ötjönö yöka̧linaduwobe, –Isabenö Jo̧ öpöjödi̧nö sulabenö ja̧dajabe. Jo̧kwaijayonö babe da̧ja̧kwakwedösa, niji tedachobö weinama, –jö̧ba̧lö. Ja̧danö, yöba̧lajadö, ölakwabikwawa jawa nönawö kwekachaduwobö jö̧ka̧linaduwobe, Wene jwiinö mösa'iju jȩmi niji dujuluwena, jö̧balö.

⁴² Ja̧danö, jejenö kwi̧'yaduwobö jö̧ka̧linaduwiökwe, Isabenö Jo̧ma ötjönö weinobe, –Israel jojodönö yökawo, jobe ölakwabikwawö tji̧'yokobö, jobadökwö chi̧'yökakobetjö̧. Ja̧danö, jobadökwö chi̧'yokobetjö̧, tjöpöjojodöma isabenö jobadönö tjujuluwakwedö, –jö̧ba̧lö tjölakwabikwawobö jö̧ba̧ladönö yötawobö weinobe.

⁴³ Jo̧kwaijayonö, weaja̧danö ökwödönö yötawinajayonö, kwa̧ja̧kwinaduwokobe. Isabenö Jo̧ wei̧ öpöjödö, weokonö mösa'iju jȩmi niji kwujuluwaduwobö kwi̧'yinaduwobe, –Dios ökwödönö pjaatobö jo̧be, –jö̧ba̧lö.

⁴⁴ Ja̧danö, jobe kwi̧'yaduwajabema, Dios yöa̧linadanö baledinobe. Ja̧ niji ju̧kwadö amorreos jojodöma ökwödönö ölakwabikwawö latjebinobe, ja̧danö ökwödönö juluwö a'dewö lotjinobe. Ja̧danö, ökwödönö juluwö, ba̧jȩkwadö wayö̧ jojodönö mebibö lutji̧danö, ökwödönö lubö kwakwatjinobe, Seir niji jamatö, Jorma comunidadbe kwichibaduwenanö kabatö.

⁴⁵ —Ikenama tjujuluwiawö̧, ökwödöma ȩwa̧bijö Isabenö Jo̧ ö̧jobekwö ichibö kwubudekwinaduwobe, ökwödönö pjaatobö. Jo̧kwaijayonö jejenö kwubudekwinaduwajayonö, a̧ja̧kwinokobe Isabenö Jo̧ma, ja̧danö pjaatobö öpöjödinobe, –Bidöma weti̧ a̧ja̧kwöködö, –jö̧ba̧lö.

⁴⁶ Ja̧danö, jejenö baledobetjö̧, ökwödöma lekwe möle Cades Barneatjö dö̧jijatö, —jö̧ba̧lö yöawinobe Moisesma israel jojodönö, damötjö baledina jawama.