Daniel 7 - Dios Iwene

Daniel i̧'wi̧dinö edina wene

¹ Babilonia niji la'aka luwo̧ Belsasar la'aka luwo̧ ö̧bena, Danielma i̧'wi̧dinö edinobe. Ja̧ i̧'wi̧dinö edinama, Belsasar luwo̧ weayi ajayi o̧banö i̧'wi̧dinö edinobe. Kamapjonö yö̧te ba̧nö, i̧'wi̧dinö edinobe, ja̧danö i̧'wi̧didanö edinobe. Jemi ikenama, i̧'wi̧dinö edaja̧ iwȩyudinobe, baikwö:

² Ötjö Danielma yö̧te chi̧'wi̧dinö chedobekwö chedatö, baikwö: Ja̧wo̧ laebobekwötjöbi, jakwölakwötjöbi, ja̧wo̧ meajobekwötjöbi, jakwölakwötjöbi bakobe jwa̧lȩ'epjo jwa̧le'ewinobe. Ja̧danö jelobetjöbi jelobetjöbi jejenö jwa̧lȩ'ewobetjö̧, jwaibalawama wiwokwachibö jalachajinobe.

³ Ja̧danö, jwaibalawatjö ö'wejemubedö tebonö ju̧kwadö ödöbaedö latjebinobe, wainökwena ichejekwadö ödöbaedöma.

⁴ Ajayi labebo̧ma, didibadanö ichejekwijayonö, o̧wa̧ja̧pi̧yabi ujunalinobe, muko nöbo̧ o̧wa̧ja̧padanö. Ja̧danö, jo̧banö chedemi, o̧wa̧ja̧pi̧ya 'yetjinobe, ja̧danö jojo öjamati̧danö ömasapiya döpalatajanö a̧laibinobe. Ja̧danö ju'wibi jojo omukwati̧ jo̧banö iyinobe, jojo omukwati̧danö omukwatobö.

⁵ Jemi ikenama, jelo̧bi laebinobe, jwiinö nöbo̧ ojwe yawidanö ichejekwo̧ma. Jo̧bama meibotö jö̧ba̧lö bȩbachö ö̧jinobe, ja̧danö o'yenö tjö̧tö̧böbö jawaö'ibiya wa̧pö'ikwa yö̧ba̧lö ö̧jinobe. Ja̧danö jo̧banö wei̧ cha̧ja̧kwatö, a̧laibi, nöinö itebiya kwukwo jö̧ba̧lö.

⁶ Jemi ikena jelo̧nöbi chedatö, yawidanö ichejekwo̧nö. Jo̧bama yawidanö ichejekwijayonö, pjiyuwadanö o̧wa̧ja̧pa ujuna̧linobe, oma'anö ö'wejemu jawa o̧wa̧japiya ujuna̧linobe. Ja̧danö ju'wibi, uuma, ö'wejemu jawa uubiya ujuna̧linobe. Ja̧danö, jo̧banö iyinobe, jojodö la'aka tjuluwo̧ ö̧jobö.

⁷ Ja̧danö jemi ikenama jelo̧nöbi chedatö, ju'wedötjö bajalekwönönö juluwo̧nö, ja̧danö nöinö yetjaibökwe jwiinö labo̧nö. Jo̧ba o'yema 'dii jawatjö otikwo'ye ujuna̧linobe aanö, ja̧danö ju'wedönö yö̧bö libawö loinobe, ja̧danö 'delachajinö kwainobe, ja̧danö ji̧bajadönö ömasapiyanö ja̧tö loinobe. Jo̧bama jo̧batjö ajayinö jwaibalawatjö labebajadötjö jwiinö wainö ichejekwo̧ ö̧jinobe, ja̧danö ju'wibi uunö i'yeka domulataja jawaökiya ujuna̧linobe.

⁸ Ja̧danö ja̧ domulataja jawa ökiya chedemi, ju'wibi chedatö, 'da̧detjö jeleka ja'yuwaka laebobe chedatö. Jakama ju'wiökiya wa̧pökakwa pabebö loinobe. Ja̧danö ju'wibi chedatö jakanö, jojo öbajaledanö öbajalebiya ji̧nobe i'yekanö, ja̧danö aabi ji̧nobe, ja̧danö ja̧ aatjö nöinö yöa̧linobe, ötjöma juluwo̧sa̧ jö̧ba̧lö.

⁹ Ja̧danö, ina cheda̧lonö, ju'wibi la'aka luwedö tjö̧ba̧kwaökiya tjujunobe chedatö, ja̧danö ajayitjö ji̧na Diosma tebachö öbamatobe chedatö. Jo̧ba ökamijido̧ma jwiinö bakwainö dewado̧ chedatö, ja̧danö öwö'yema, obeja öwö'yedanö bakwainö dewa'ye chedatö. Ja̧danö, iteaka ba̧kwawaka chedatö, kolukasa'o ja̧kama, ja̧danö iteaka ökwölanö ubobe chedatö, ja̧danö iteaka kolukasa'o ubobe chedatö.

¹⁰ Ja̧danö i̧'yonö, öba a'otjö ökwöla labebö 'yo̧be chedatö, ojwese'dotjö ojwiyo labebö isuwidanö. Jo̧ba ömöayedö yelösöda ba̧jekwadö, millones tupakwö ba̧jekwadö iteda ömöayedö wei̧ tjotidobe chedatö, ja̧danö öba a'otjö yelösöda tjöba̧ja̧dökenanö ba̧jekwadö tjö̧jobe chedatö. Ikenama tjöbamatobe chedatö, Dios jojodö ja̧tji̧ sulojobö otiwojobö yöawakobetjö̧, ja̧danö kwialu'ye, jojodö ja̧tjina wȩyukwa'ye 'bobebö yötja̧lobe chedatö.

¹¹ Ja̧ baledobe chedonö, ina jwaibalawatjö bajaleapo labebajo̧ tebonö jo̧ i'yeka yöa̧li̧ ökwöobe cha̧ja̧kwatö, Ötjöma jwiinö juluwo̧sa̧ jö̧ba̧lö yöa̧lobe ökwöi̧ma. Ja̧danö, tupakwö chedemi, jo̧ba tebonö jo̧nö kwabö lotjobe chedatö, ja̧danö iteba'o ökwölanö juwö lotjobe chedatö.

¹² Ja̧danö ju'wibi chedatö, ju'wedö ajayinö jwaibalawatjö labebajadö tebonö ju̧kwadö tjujulu 'dötjebobe chedatö. Jo̧kwaijayonö, tjujulu 'dötjebijayonö, juluwanö jobadönö kwabö lotjökötö bajaleapo labebajo̧ tebonö jo̧nö kwabö lotjidanö. Tjujulu 'dötjebijayonö, ina ja'yubenö tjöjobö ji̧nobe, Dios badedö ujunina möle badekwachenanö kabatö.

¹³ Ja̧danö chi̧'wi̧dinö ina cheda̧lonö, ju'wibi chedatö, bakwo̧ ojwio'wokwö mölejȩbetjö jwibacho̧nö chedatö. Jo̧ba mölejȩbetjö jwibacho̧ma, jojoso̧ ichejekwinobe, ja̧danö jo̧banö ichejebö, Ajayitjö ji̧na Dios öba a'o tji̧sebinobe Diosnö.

¹⁴ Ja̧danö Diosma jo̧banö iyobekwö chedatö, inesö la'aka luwo̧ baibobö. Dejatinö ujulu jo̧banö iyatö, ja̧danö yöbawö weakwa̧bi iyatö, okobe deinö böjȩ bakwameachibanö ju̧kwadö jo̧ba wei̧ tjotidobö, tjitebotenia ju̧kwadöbi, tjiwenetenia yöba̧ladöbi. Jo̧ba yöbawö wei̧ma, ba̧kwȩlö̧jatebö 'dö̧ibajökenanö yöbawö weakwo̧. Bakwo̧bi la'akatjöda söbebö loökakobe jo̧ba yöbawö wei̧ma, 'dö̧ibajökenanö kabatökönö yöbawö weakwo̧.

Daniel i̧'wi̧dinö edina labebö loawa wene

¹⁵ Tupakwö iwȩyudinobe Danielma: Jobekwö chedatö chi̧'wi̧dinö, ja̧danö jejenö edajo̧ cho̧'wo̧ tjo̧bekwö chö̧jatö, tajijö jö̧ba̧lö.

¹⁶ Jejenö chi̧'wi̧dinö cho̧'wo̧ tjobekwö ja̧nö, jelo̧ chi̧'wi̧dinö chedökwenö abebö cha̧ja̧kwatö, biya̧ dedi̧ma, ¿tajida? Labebö lobö yökawakwa̧ji̧ jö̧ba̧lö abebö cha̧ja̧kwatö chi̧'wi̧dinö. Abebö cha̧ja̧kwökwe, labebö lobö yöawatö, baikwö:

¹⁷ —Kwedajawö̧ tebonö ju̧kwadö ö'wejemubedöma, böjȩ la'aka luwedö ö'wejemubedö la'aka luwedö tjö̧ja̧kwa̧ badekwachobe. Jobadöma yöbawö wetjakobe böjȩtjö,

¹⁸ jo̧kwaijayonö jemi ikenama bajalianö Mölejȩbe Jo̧ Diosma iteda ömöledönö iyakobe, böjȩtjö yöbawö wetjobö. Ja̧danö, Dios ömöledö yöbawö wetjakwa̧ma, ba̧kwȩlö̧jatebö 'dö̧ibajökenanö yöbawö wetjakobe— jö̧ba̧lö yöawinobe.

¹⁹ Jejenö yöawitjö̧, abebö cha̧ja̧kwatö baikwö: —Jo̧da chedemi, ö'jemubedö tebonö ju̧kwadötjö bajaleapo jwaibalawatjö labebajo̧nö chedatö, ju'wedötjö wainö ichejekwo̧nö, jwiinö labo̧nö chedatö, o'ye 'dii jawatjö otikwo'ye, ja̧danö inejȩ broncetjö otikwöjȩ juna̧lo̧nö chedatö, ja̧danö öpöjojodönö yö̧yö̧bö kwo̧nö, tji'delachajibanö kwabo̧nö, ji̧bajadönö ja̧tö lobo̧nö chedatö.

²⁰ Ja̧danö jo̧ba uunö i'yeka domulataja jawa'yekiya juna̧lo̧nö chedatö, ja̧danö chedemi jeleka laebobe chedatö, ja̧danö jakama ju'wi i'yekiya wa̧pökakwa juluwobe chedatö. Ja̧danö jakanö öbajalebiyabi chedatö, ja̧danö aabi chedatö, ja̧danö ja̧kama jelekatjö bajalekwönönö juluwaka chedatö.

²¹ Ja̧danö chedemi, ja̧kama Diosnö ösödadökwö ölakwabikwawö jo̧bekwö chedatö, ja̧danö jobadönö juluwobekwö chedatö.

²² Ja'yubenö lekwe Diosnö ösödadönö ujuluwinobe, bajaleapo Ajayitjö ji̧na Dios ichibö, itenöda ösödadönö pjabatö tebonö jo̧nö lȩebenanö kabatö. Ja̧danö bajalianö Diosnö ösödadö yöbawö webadö batjibobe chedatö. Jobekwö chedaja̧ma, ¿taji jö̧ba̧lö chedaja̧da? Labebö loköbobö chösöda— jö̧ba̧lö abebö cha̧ja̧kwatö.

²³ Abebö cha̧ja̧kwökwe, baikwö atadinobe: —Ö'wejemubedö tebonö ju̧kwadönö badekwachi̧ma, baikwö yötawa, ju'wedö tjitebo jojodönö tjujuluwakwedö ö'wejemu jawasaso ja̧kobe, bakwasokwena ju'wedönö tjujuluwakwedöma. Ja̧danö bajaleaposaso jojodöma, ajayisasotjö jwiinö wainösaso ja̧kobe, isabenö böjȩ bakwameachibanö ju̧kwadönö tjujuluwakobe, ba̧jekwadönö kwabö lotjakobe, ja̧danö kwabö lobajadö ja̧tö lobö söbebö lotjakobe.

²⁴ Ja̧danö domulataja jawa'yekiya jawama, baikwö labebö lobö yötawa: Ö'wejemusasotjö bajaleaposaso jojodötjö la'aka luwedö domulatajabedö tjöbamatakobe, luwedö batjibanö. Ja̧danö jobadö tjöbamataja̧ ikena, jelo̧bi öbamatakobe, ajayinö ba̧ja̧dö luwedödanöbö̧kö̧. Ja̧danö jo̧bama wa̧medukwa luwedönö ujuluwakobe.

²⁵ Ju'wibi jo̧bama sulabenö Diosnö yöa̧lakobe, ja̧danö Diosnö ösödadönö sulabenö ja̧akobe, usula tjemawinö. Ja̧danö Dios weina pjiesta jawa möle balewö loobö isakwakobe, ja̧danö Dios jojodönö wei̧bi balewö lobö wainö weobö isakwakobe. Ja̧danö Diosma weakobe, wa̧pötakwa o̧biabi, ju'wi o̧ba ja'öbi Diosnö ösödadönö ujuluwobö.

²⁶ Jo̧kwaijayonö bajalianö Diosma lȩekwa yöawobö öbamatakobe, ja̧danö lȩekwa yöbawö, jo̧ba ujulu 'döebakobe, ja̧danö jo̧banö jwiinö söbebö loakobe.

²⁷ Jemi ikenama okobe deinö ajayinö ji̧nadö böjȩ luwedö tjujuluma, okobe jwiinö juluwo̧ Dios ömöledönö iyakobe. Ja̧danö ba̧kwȩlö̧jatebö yöbawö weakobe, ja̧danö okobe deinö böjȩnö tjitebotenia ju̧kwadöma jo̧ba wei̧ otidö tjö̧jakobe— jö̧ba̧lö yöawinobe.

²⁸ Jobekwö chedatö chi̧'wi̧dinö. Ja̧danö ötjö Danielma, ja̧ jawa omukwatö yetaibatö, tajijö jö̧ba̧lö, ja̧danö chöbama deöja baibatö. Jo̧kwaijayonö ju'wedönö yötawökötö ja̧ chedaja̧ma.