Daniel 6 - Dios Iwene

Danielnö didiba tja̧jaju ilȩdo̧nö jatjina wene

¹ La'aka luwo̧ Darío mikwo̧ma omukwatö ujuninobe, yöbawö wei̧ nijima, pjeikwena 'da̧'yö ujunobe, cientoveinte estado baibanö. Ja̧danö, 'da̧'yö junajo̧, estadokwena gobernador baibanö la'aka luwo̧nö ujuninobe.

² Ja̧danö, jobadö ciento veintebedö tjuluwedö batjibanö ömadö wa̧medukwanö presidentedö batjibanö ujuninobe, Danielnöbi, ju'wedö du̧ju̧tajanöbi, jobadöda gobenadorbedönö wetjobö, ja̧danö tjotidina jawa tja̧ja̧kwobö. Jejenö omukwatö ujuninobe Daríoma, yöbawö wei̧ jawa otiwanö tjite'ada̧lobö.

³ Ja̧danö, Danielma omajadenö isabenö otiwanö otidobö jö̧a̧linobe, ja̧danö ju'wedötjö bajalekwönönö isabenö otiwanö otidinobe. Jejenö otiwanö otidö ö̧jiökwe, Daríoma omukwatinobe, okobe jwiinö iteda yöbawö weena niji la'aka luwo̧ baibanö Danielnöda ujunobö.

⁴ Jejenö omukwatiawö̧, ju'wedö presidentebedöbi, gobernadorbedöbi tjöpöjödinobe, ja̧danö Daniel sulabenö ja̧aja̧ yötjawobö tjisakwinobe, Danielma la'aka luwo̧ wei̧ jawa sulabenö otido̧ jö̧ba̧lö yötjawobö. Jo̧kwaijayonö, Daniel isabenö otido jö̧a̧li̧danö otiwanö otidobetjö̧, ja̧danö ja'yubebi 'dö̧welachibökönö otidobetjö̧, jejenö tjisakwi̧ma waekwinobe. Jo̧kwajabetjö̧, jo̧banö sulabenö yötjawotö jö̧ba̧lö tjisakwijayonö, tjöwaekwinobe, sule otiwanö otidaja̧da tjöbadekwajinobe.

⁵ Jejenö balediawö̧, yötja̧lakwawinobe baikwö: —Bite Daniel sulabenö ja̧aja̧ yödawobö döbadekwajökena, isabenö otiwanö otidobetjö̧. Jo̧kwaijayonö jo̧bama jwaikwöda iteda ösödökwe Dios wei̧ a̧ja̧kwo̧. Jo̧kwajabetjö̧ la'aka luwo̧ wei̧ma Dios wei̧tjö wainö laebitjö̧ma, jo̧banö wene jwödebena, bitema Dios wei̧da a̧ja̧kwö la'aka luwo̧ wei̧ a̧ja̧kwö̧kö̧— jö̧ba̧lö.

⁶ Jejenö yöba̧lakwawajadö, ja̧tja̧kwa̧ omukwatö tjujuninobe, ja̧danö gobernadorbedöbi, presidentebedöbi bakobe omukwatö la'aka luwo̧ Darío öba a'o ichibö jo̧banö yötja̧linobe: —La'aka duluwo̧, lekwe duluwo̧ kwö̧jobö dösöda.

⁷ Ökwödö okobe deinö yöbawö weköbena ju̧kwadö presidentebedöbi, gobernadorbedöbi bakobe omukwatö dujunajabe, otiwanö jojodönö weköbakwa̧ma. Isabenö otiwo̧ duluwo̧ja, diosdanöbo̧ja duluwo̧. Jo̧kwajabetjö̧ diosdanöbo̧ kwö̧jobetjö̧, isabenö ökwönöda tjo̧'wo̧ wana̧lö atjebobö jo̧be, treinta möle baledibanö. Jo̧kwajabetjö̧ jojodönö weawa kwiwȩyudo baikwö: Diosbedötjö bakwo̧nöbi, jojodötjö bakwo̧nöbi jojodö atjebobö jwiobe, sule inesö la'aka luwo̧ Daríonöda tjo̧'wo̧ wana̧lö atjebobö jo̧be treinta möle baledibanö. Ja̧danö bakwo̧ jelo̧nö o̧'wo̧ wana̧lö aebitjö̧ma, didibadö tja̧jaju i̧lȩdo̧nö jabö lotjakwo̧ jö̧ba̧lö kwiwȩyudo duluwo̧.

⁸ Jejenö weawama isabenö otiwa duluwo̧, ja̧danö bakwo̧bi ja̧ weawa balewö loapji jö̧ba̧lö wȩyudajo̧ sello dobö kwödo. Jau duluwo̧, ökwödö medo jojodöbi perso jojodöbi duluwo̧ sello dobö weitjö̧ma, balewakwawa jwiinö weawa jo̧be, ja̧danö ja̧ weawa isabenö otiwobetjö̧ jejenö weköbobö dösöda duluwo̧— jö̧ba̧lö yötja̧linobe.

⁹ Jejenö yötja̧liökwe, Daríoma ösödinobe, ja̧danö atjebaja̧danö weawa iwȩyudinobe, ja̧danö wȩyudajo̧ sello dobö ödinobe, balewö loawa jwiinö weawa baibanö.

¹⁰ Danielma ja̧ weawa wȩyudö sello dobö ödina wene a̧ja̧kwinobe, ja̧danö a̧ja̧kwajo̧, ba̧kwȩlö̧jatebö abebajiadanö o̧do okwa tebachö Diosnö aebinobe. Jo̧bama ba̧kwȩlö̧jatebö mö̧sȩko̧ ventana po̧bebö, Jerusalénkwö edö Diosnö o̧'wo̧ wana̧lö abebiainobe, ja̧danö la'aka luwo̧ weaja̧ a̧ja̧kwajo̧, yayonö mösȩko̧nö uyu̧ko̧nö bamatö ventanasa'donö banö aebinobe, ju̧kwawökönö. Ba̧kwȩlö̧jatebö abebajiadanö, mölekwena wa̧pötakwanö jejenö Diosnö aebinobe, otiwanö pjabato̧ja jö̧ba̧lö.

¹¹ Ja̧danö, Danielnö öpöjödadöma bakobe omukwatö Daniel aebobe edö tjichinobe, ja̧danö ichajadö, Daniel Diosnö aebobe tjedinobe, Dios pjaatobö aebobe tjedinobe.

¹² Jejenö edajadö, la'aka luwo̧ Darío öba a'o ichibö yötja̧linobe: —Duluwo̧, weawa kwiwȩyudatö, diosbedötjö bakwo̧nöbi, jojodötjö bakwo̧nöbi atjebobö jwiobe, sule la'aka luwo̧ Daríonöda tjo̧'wo̧ wana̧lö atjebobö jo̧be treinta möle baledibanö jö̧ba̧lö kwiwȩyudatö, ¿jö̧tö? Ja̧danö bakwo̧ jelo̧nö aebitjö̧ma, didibadö tja̧jaju i̧lȩdo̧nö ikwö lotjakwo̧ jö̧ba̧lö kwiwȩyudatö, ¿jö̧tö?— jö̧ba̧lö. Yötja̧liökwe, Darío atadinobe: —Jau, jejenö wȩyudö wetajabe, ja̧danö ökwödö medo jojodönöbi perso jojodönöbi weawaobetjö̧, balewö loawa jwiobe ja̧ weawama— jö̧ba̧lö atadinobe Daríoma.

¹³ Jejenö atadawö̧ la'aka luwo̧ Daríonö yötja̧linobe: —La'aka duluwo̧, damötjö iteda itebo Judátjö öbibö tjichejebinökwe Danielma ökwönö a̧ja̧kwö̧kö̧. Jelo̧nö aebobö jwiobe jö̧ba̧lö wȩyudö weköbinajayonö, yayonö mölekwena wa̧pötakwanö iteda ösödökwe Diosnö abebo̧— jö̧ba̧lö yötja̧linobe.

¹⁴ Jejenö yötja̧li̧ a̧ja̧kwö, jwiinö o̧'wo̧ tjoekwinobe Daríoma, ja̧danö möle baledibanö omukwatö isakwinobe, ja̧ weaja̧tjö̧ Daniel ö̧jibobö. Yö̧te baibenanö kabatö, Danielnö pjaatobö omukwatinobe Daríoma, jo̧kwaijayonö waekwinobe.

¹⁵ Ja̧danö, yö̧te baibenama, Danielnö öpöjödadöma ichö la'aka luwo̧nö yötja̧linobe: —La'aka duluwo̧, kwöwaisa ökwödö meda jojodöbi perso jojodöbi weawa jawama. La'aka duluwo̧ weawa wȩyudajo̧ imi öditjö̧ma, tupakwö balewö loawa jwiinö jo̧be ja̧ weawama. Jo̧kwajabetjö̧ Danielnö didibadö tja̧jaju i̧lȩdo̧nö jabö lotjobö jo̧be— jö̧ba̧lö.

¹⁶ Yötja̧liökwe, la'aka luwo̧ Daríoma weinobe Danielnö ikwö lotjobö, ja̧danö ikwö lotjakwa̧ abönö Danielnö yöa̧linobe: —Daniel, ba̧kwȩlö̧jatebö kwuluwo̧ Dios wei̧ a̧ja̧kwö jo̧ja, ja̧danö kwösödökwe Dios kwö̧jibinö pjaatobö chösödakwö— jö̧ba̧lö.

¹⁷ Ja̧danö, Danielnö ikwö lotjaja̧ ikena, inaba tjichejebinobe i̧lȩdo̧ teachakwawemi tjutumatobö, ja̧danö tumatajadö, sello tjödinobe la'aka luwo̧ Daríobi, ju'wedö la'aka luwedöbi, jelo̧bi ichö Danielnö ö̧jibinö pjaatapji jö̧ba̧lö.

¹⁸ Ja̧danö, kabatajo̧, La'aka luwo̧ Daríoma iteda ejube ȩwa̧jinobe. Ja̧danö, ja̧ yö̧te baledibanö Daríoma kwakwawa kwökönö ö̧töchö ö̧jinobe, ja̧danö o̧'wo̧ ösöwachibobö pjabatadö tjichobö weinokobe, Danielnö omukwatö. Ja̧danö, Danielnö omukwatö, bö̧ti̧ jwiinö yö̧te baledibanö abökönö ö̧jinobe Daríoma.

¹⁹ Ikenama, dewachenama, Daríoma a̧laibö juluwanö i̧lȩdo̧ didibadö tjö̧bajȩdo̧be i̧'yinobe.

²⁰ Yöne ichibö, o̧'wo̧ tjo̧achö jwöinobe: —Yabalo̧ Dios ömöayo̧ Daniel, ¿ba̧kwȩlö̧jatebö wei̧ a̧ja̧kwö kwösödökwe Diosma, didibatjö kwö̧jibinö pjaatobö ujuluwaji̧?— jö̧ba̧lö.

²¹ Jwöiökwe, Daniel atadinobe: —La'aka chuluwo̧, lekwe chuluwo̧ kwö̧jobö chösöda.

²² Chuluwo̧ Dios öba a'otjö wene jwiinö chö̧jiökwe, Diosma iteda weökwe ángelnö weajabe, didibadö tjaa umu'dudobö, jo̧kwajabetjö̧ ötjönö suli̧ tjöwaedökötö. Jau chuluwo̧, Dios öba a'otjöbi, ökwö kwöba a'otjöbi wene jwiinö chö̧jobe, isabenö suli̧ waedökönö otiwanö chö̧jobetjö̧— jö̧ba̧lö atadinobe Danielma.

²³ Daniel ina yaba̧lo̧ ö̧jiökwe, Daríoma jwiinö o̧'wo̧ ösöwachibanö ö̧jinobe, ja̧danö weinobe Danielnö i̧lȩdo̧tjö tötjebobö. Ja̧danö i̧lȩdo̧tjö Danielnö latjebenama, ja'yubebi didibadö suli̧ tjöwaedajökökwenö tjedinobe. Diosnö o̧'wo̧ wana̧lö ösödiökwe, Diosma tjöbeba̧lö ite'ada̧linobe Danielnö, didibadö ja'yubebi Danielnö suli̧ tjöwaedapji jö̧ba̧lö.

²⁴ Jemi ikenama la'aka luwo̧ Daríoma weinobe okobe deinö iteda öba a'o ichibö tjo̧'wo̧ sulinö Danielnö wene jwöbebajadönö tjichejebobö, ja̧danö jobadönöbi, tji̧lȩkwa̧munöbi, tji̧tji̧munöbi okobe deinö i̧lȩdo̧ okwa ikwö lotjinobe, didibadö tjukwobö. Ja̧danö, jejenö tjikwenama, didibadöma juluwanö mebibö tjukwinobe, ina nijinö metja̧pjinö, jwiinö tji'delachajinö mebibö tjukwibinobe jobadönö.

²⁵ Jemi ikenama Daríoma kwialusöja iwȩyudinobe okobe deinö jojodö iteda ömöayedönö, baikwö: —Ökwödö böjȩ bakwameachibanö ju̧kwadö kwiteboduwitenia ju̧kwadö, ja̧danö kwiweneduwitenia yöba̧ladönö chiwȩyudobe baikwö: Wene jwiinö otiwanö kwö̧jaduwobö chösöda.

²⁶ Ja̧danö, ökwödönö wȩyudö weta, yöbawö wetena bakwameachibanö okobe deinö jojodöma Daniel ösödökwe Dios öba a'otjö yebabinö tjö̧bawö tjösödobö jo̧be jö̧ba̧lö. Jo̧bama isabenö okobe jwiinö juluwo̧ Dios, ja̧danö ba̧kwȩlö̧jatebö ö̧jakwo̧. Jo̧ba yöbawö wei̧ma, ba̧kwȩlö̧jatebö yöbawö weakobe, la'akatjöda yöbawö wei̧ söbebö lötjökakobe, ja̧danö ba̧kwȩlö̧jatebö inesö la'aka luwo̧ ja̧nö yöbawö weakobe Diosma.

²⁷ Jo̧bama iteda ömöledönö tjö̧jibinö pjabato̧, ja̧danö wene tjujuna̧li̧tjö latjebobö pjabato̧. Mölejȩbetjöbi, böjȩtjöbi iteda ujulu i̧sebö jojodö edajitjökö jawa i̧sebo̧ Diosma, ja̧danö jo̧bada iteda ujulu i̧sebö Danielnö didibadötjö ö̧jibinö pjaatajabe— jö̧ba̧lö iwȩyudinobe Daríoma.

²⁸ Ja̧danö, Danielma otiwanö otidö ö̧jinobe, Darío la'aka luwo̧ ö̧jonöbi, Perso jojo Ciro mikwo̧ inesö la'aka luwo̧ ö̧jonöbi.