Daniel 5 - Dios Iwene

Dios tjöekwemi wame iwȩyudina wene

¹ Ja'yubenö lekwajabetjö Nabucodonosor ö'wö baibaja̧ ikenama, Nabucodonosor itji̧ Belsasar mikwo̧ma Babilonia la'aka luwo̧ ö̧binobe. Ja̧danö, ju'wi möle pjiesta ujuninobe, iteda ömöaeyedö la'aka luwedö tjukwobö, ja̧danö jobadö milbedökwö nöinö ubasobu o̧'dobu owinobe.

² Belsasar abe'domine Nabucodonosor ajayinö Judá jojodönö ujuluwinenama, Jerusalénseju Dios ejutjö orotjöbi platatjöbi otikwa'do̧ dȩja̧'di̧ju emö ȩwa̧jinobe Babiloniabe. Ja̧danö, Babiloniaseju o̧'wo jawa ösödakwawejunö ödinobe, chuluwo̧ chösödökwema bidö tjuluwo̧ Diostjö bajalekwönönö juluwo̧ jö̧ba̧lö. Ja̧danö, Belsasar ubasobu owenama, iteda ömöayedönö weinobe abe'do Nabucodonosor Jerusaléntjö ichejebina dȩja̧'di̧ju o̧'wo jawa ösödakwawejutjö tjichejebobö. Jejenö weinobe ja̧'dijutjö, jo̧babi, ömöayedötjö la'aka luwedöbi, i̧lȩkwa̧mubi ja̧tjö tjowobö, ökwödö Babilonia jojodö dösödawö̧ma, Judá jojodö tjösödökwe Diostjö bajalekwönönö juluwadö jö̧ba̧lö.

³ Jejenö weawö̧, ömöayedöma Jerusalénseju Dios ejutjö tjichejebina dȩja̧'di̧ju tjichejebinobe, ja̧danö Belsasarbi, ömöayedötjö la'aka luwedöbi, i̧lȩkwa̧mubi ja̧tjö tjowinobe.

⁴ Jobadöma ubasobu o̧'dobu owö, tjösödawö̧ orotjö otikwedö o̧'wo̧ jawabi, platatjö otikwedö o̧'wo̧ jawabi, broncetjö otikwedö o̧'wo̧ jawabi, 'dii jawatjö otikwedö o̧'wo̧ jawabi, towisötetjö otikwedö o̧'wo̧ jawabi, inawatjö otikwedö o̧'wo̧ jawabi tjösödinobe, dösödawö̧ma isabenö Diostjö bajalekwönönö juluwadö jö̧ba̧lö.

⁵ Jejenö owö, o̧'wo̧ jawa tjösödemi ja'ötjö, juluwanö tjö̧jȩko tjöekweminö diwawemi wame tjömamu öwawachö i̧sekwachibö wȩyudobe tjedinobe, dejewa'yu̧ otiwanö dejatemima. Ja̧danö la'aka luwo̧ Belsasarma, ja̧ tjömamu öwawachö wȩyudobe edinobe.

⁶ Jejenö edö, yeaibinobe yelösöda, ja̧danö yeaibobetjö öbama deöja baibinobe, ja̧danö u̧yu̧kijuma tjö̧awinobe, ime'dawachibanö.

⁷ Ja̧danö Belsasarma juluwanö jwöeba̧linobe mea bobadönöbi, si̧li̧'idönö waisachadönöbi, tupakwö baledakwa̧ yöbawadönöbi öbibö tjichejebobö, ja̧danö tjichejebawö̧nö yöawinobe baikwö: —Bakwo̧ biya̧ wȩyukwi̧ yöba̧löbi labebö lobö yöbawöbi pjaatijö̧ma, isabenö otiwanö chiyakwo̧sa jobanö. La'aka luwo̧ ökamijido̧ 'dutatocha, ja̧danö orotjö otikwopja u̧lu̧meanö chöladocha, ja̧danö inesö la'aka luwo̧ baibanö 'da̧batö chujunocha, chipjea jojo, wa̧medukwa jojo baibanö— jö̧ba̧lö yöawinobe.

⁸ Jo̧kwaijayonö, okobe deinö jobadö waisanö omukwatadö jö̧ba̧lö ötjabiwö̧ tebachö tjedijayonö, bakwo̧bi deinobe wȩyukwi̧ yöba̧lo̧ma, ja̧danö bakwo̧bi deinobe labebö lobö yöbawo̧ma.

⁹ Jejenö balediökwe, ajayitjö bajalekwönönö yeaibinobe Belsasarma, ja̧danö ajayitjö bajalekwönönö öba deöja baibinobe. Ja̧danö okobe deinö la'aka luwedö jo̧bakwö ju̧kwadöma wajwitjinobe, tajijö jö̧ba̧lö.

¹⁰ Belsasarbi, ju'wedö luwedöbi yötja̧lakwawobe a̧ja̧kwö, Belsasar ojo'doma pjiesta tjukwȩko̧ tebachö yöjawinobe: —La'aka chuluwo̧, lekwe duluwo̧ kwö̧jobö chösöda. Biya̧ baledaja̧ omukwatö yekaboko, ja̧danö kwöba deatji baibanö kwö̧joko chuluwo̧, pjabato̧ deokobe, isabenö pjabato̧ ö̧jobe.

¹¹ Isabenö kwömöayedötjö bakwo̧ ö̧jobe, juluwadö diosbedö tjo̧'wo̧ luwo̧ tjö̧jökwema. Kwabe'do Nabucodonosor ina yöbawö ö̧jayi, jo̧banö tjöbadekwajinobe, nöinö waiso̧nö, waisanö omukwato̧nö, bakwainö diosbedö tjomukwati̧danö omukwato̧nö tjöbadekwaijinobe. Ja̧danö ökwötjö ajayinö ji̧na la'aka luwo̧bina Nabucodonosorma jo̧banö ujuninobe, okobe deinö mea bobadötjöbi, si̧li̧'idönö waisachadötjöbi, tupakwö baledakwa̧ yöbawadötjöbi inesö la'aka luwo̧ baibanö.

¹² Jo̧ba imima Daniel mikwo̧, ja̧danö Nabucodonosorma jo̧banö ju'wi imi Beltsasar jö̧ba̧lö imidinobe. Jo̧bama isabenö waiso̧, nöinö öwaisobe, ja̧danö sule wamenödamaökö, isabenö okwa jawabi öwaisobe. Tji̧'wi̧dinö tjedina jawabi, wayi̧ yötja̧li̧bi labebö loobö waiso̧. Jo̧banö tjichejebobö weköbitjö̧ma, isabenö biya̧ wȩyukwi̧ jawa labebö lobö yöawakwo̧ Danielma, jo̧banö jwököbo chuluwo̧— jö̧ba̧lö yöjawinobe la'aka luwo̧ ojo'doma.

¹³ Jejenö yöjawiökwe, Belsasarma Danielnö tjichejebobö weinobe, ja̧danö tjichejebajökwenö yöa̧linobe baikwö: —¿Ökwöma chabe'do Nabucodonosor Judá nijitjö öbibö ȩwa̧jinökwe Daniel mikwo̧ kwö̧jiji̧?

¹⁴ Ökwönö cha̧ja̧kwajabe, isabenö diosbedö tjo̧'wo̧ luwo̧ tjö̧jökweja jö̧ba̧lö, ja̧danö isabenö waiso̧ja, ja̧danö okobe jwiinö waisanö okwanö omukwato̧ja jö̧ba̧lö cha̧ja̧kwajabe.

¹⁵ Ju'wedö waisanö omukwatadöbi, mea bobadöbi biya̧ wȩyukwi̧ jawa yötja̧loböbi, labebö lobö yötjawoböbi tjichatö, jo̧kwaijayonö waekwatö, labebö loböma yötjawökötö.

¹⁶ Jo̧kwaijayonö ökwönö cha̧ja̧kwajabe, isabenö tji̧'wi̧dinö tjedi̧ jawa labebö lobö yöbawo̧ja jö̧ba̧lö, ja̧danö isabenö tjöwaisobö wayi̧ jawa labebö lobö yöbawo̧ja jö̧ba̧lö cha̧ja̧kwajabe. Jo̧kwajabetjö̧ isabenö biya̧ wȩyukwi̧ yöka̧litjö̧ma, ja̧danö isabenö labebö lobö yökawitjö̧ma, isabenö otiwanö chiyakwo̧ja. Isabenö inesö la'aka luwedö tjökamijido̧ 'dutatocha, ja̧danö orotjö otikwopja kwulume'anö chöladocha, ja̧danö inesö la'aka luwo̧ bakibanö 'da̧batö chujunocha, chipjea luwo̧, wa̧medukwa jojo bakibanö— jö̧ba̧lö yöa̧linobe Belsasarma, Danielnö.

¹⁷ Yöa̧liökwe, Danielma la'aka luwo̧nö atadinobe baikwö: —Ja̧ kwiyobö jö̧ka̧laja̧ma chösödökö, ja̧ jawama ökwöda kwitea. Jelo̧nö kwiyobö jö̧ka̧litjö̧ma kwiyo, jo̧kwaijayonö ötjöma ja̧ jawa chösödökö chemobö. Jo̧kwaijayonö kwiyakwa̧ chemobö chöpöjödijayonö, yayonö weyukwi̧ jawa yöta̧locha, ja̧danö labebö lobö yötawocha ökwö la'aka chuluwo̧nö.

¹⁸ Chuluwo̧, Okobe Jwiinö Juluwo̧ Diosma kwabe'do Nabucodonosornö iyinobe inesö la'aka luwo̧ baibobö, ja̧danö ba̧jekwadö jo̧banö otiwanö tjomukwatobö, ja̧danö jo̧banö otiwanö yötja̧lobö iyinobe Diosma.

¹⁹ Ja̧danö, jejenö iyiawö̧, okobe deinö böjȩnö ju̧kwadöma jo̧ba Nabucodonosornö yetjaibinobe, tjitebokwena ju̧kwadöbi, tjiwenekwena yöba̧ladöbi. Ja̧danö kwabe'doma isabenö juluwo̧ ö̧jinobe, iteda ösödi̧danö ju'wedönö kwabö loinobe, ja̧danö ju'wedönö kwabö lobökönö lȩlö̧jinö edinobe, iteda ösödi̧danö. Iteda ösödi̧danö ösödawö̧nö otiwanö tjomukwatobö kabebö ujuninobe, ja̧danö öpöjödawö̧nö nija̧kwönönö ujuninobe, jobadönö mikwawöködö jö̧ba̧lö tjomukwatobö.

²⁰ Jejenö isabenö juluwo̧ baibanö ujuninobe Diosma, kwabe'do Nabucodonosornö chuluwo̧, jo̧kwaijayonö ju'wibi: Aaa, otiwo̧sa, juluwo̧sa jö̧ba̧lö omukwatö, yöawakwawa a̧ja̧kwökönö Nabucodonosor ö̧jenama, Diosma jo̧banö nijakwönönö ujuninobe. La'aka luwo̧ ö̧ja̧jama jo̧batjö 'döebinobe, ja̧danö ujulubi jo̧batjö 'döebinobe.

²¹ Jojodöma jo̧banö tjö'da̧detjö a'dewö lotjinobe, ja̧danö omukwati̧ma tebonö ju̧kwadö tjomukwati̧danö omukwatinobe, ja̧danö labidö buludökwö ö̧jinobe. Pa̧ka̧yö̧ tjukwi̧danö meje'ye ukwinobe, ja̧danö yȩayikwena si̧li̧'idö tji'olitjö i̧'bȩkwinobe. Jejenö ö̧jinobe, bajalianö otiwanö Diosnö öwaisachibenanö kabatö. Jau, böjȩtjö tjitebotenia yöbawö waeawatenia isabenö yöbawö webo̧ma Okobe Jwiinö Juluwo̧ Diosda, ja̧danö tjitebotenia yöbawö weawatenia la'aka luwo̧nö 'da̧batö juno̧ma, Okobe Jwiinö Juluwo̧ Diosda, ja̧danö jejenö öwaisachibenanö kabatö kwabe'do Nabucodonosorma tebonö ju̧kwadö tjö̧jidanö ö̧jinobe.

²² Ja̧ baledina jawa waiso̧ja chuluwo̧ Belsasar, jo̧kwaijayonö ja̧ baledina kwöwaisijayonö, Dios öba a'otjö nija̧kwönönöbo̧sa̧ jö̧ba̧löma omukwatökönö jo̧ja.

²³ Diostjö nija̧kwönönöbo̧sa̧ jö̧ba̧lö omukwatökönö, Mölejȩbe Jo̧ Diostjö bajalekwönönöjo̧sa jö̧ba̧lö kwomukwatajabe, ja̧danö jejenö omukwatö Diosda ejutjö tjichejebina dȩja̧'di̧ju tjichejebobö weköbajabe. Ja̧danö ökwöbi, kwömöayedötjö la'aka luwedöbi, kwi̧lȩkwa̧mubi Dios itea dȩja̧'di̧jutjö ubasobu o̧'dobu kwowaduwajabe, Diostjö bajalekwönönöbedösa jö̧ba̧lö. Ja̧danö ju'wibi o̧'wo̧ jawa kwösödaduwajabe juluwadö jö̧ba̧lö, orotjöbi, platatjöbi, broncetjöbi, 'dii jawatjöbi, towisa'otjöbi, inawiatjöbi otikwedö o̧'wo̧ jawa kwösödaduwajabe, juluwadö jö̧ba̧lö. Jobadö kwösödaduwawö̧ma edöbi edöködö, ja̧danö a̧ja̧kwöbi a̧ja̧kwöködö, ja̧danö waisöbi waisöködö, jo̧kwaijayonö jobadönö ösödadöja, Isabenö Jo̧ Diosnö ösödökönö. Jau chuluwo̧, kwo̧'wo̧ kwemobö iyo̧ Diosnö, ju'wibi okobe jwiinö ökwönö baledakwa̧ webo̧nö otiwanö omukwatö ösödökönö, ju'wedönöda ösödo̧ja.

²⁴ Ja̧danö jejenö ja̧bö kwö̧jiökwe, Diosma ömamu kwedaduwajamu weatö, ökwönö yöawo jö̧a̧li̧ma.

²⁵ Baikwö laebobe iwȩyudaja̧ma: MENE, MENE, TEKEL, PARSIN jö̧ba̧lö.

²⁶ Ja̧danö baikwö labebö lobö yötawa ja̧ iwȩyudaja̧ma: Mene jö̧ba̧löma dokwa ödöojobö jö̧ba̧lö öba̧ja̧dajabe jö̧ba̧lö. Jejenö laebi̧ma, Diosma yöbawö weköbakwa̧ öba̧ja̧dajabe, dokwa lekwe luwo̧ kwö̧jakwojobö jö̧ba̧lö, ja̧danö tjo̧wi̧ 'dö̧iba jö̧ba̧lö.

²⁷ Ja̧danö Tekel jö̧ba̧löma, nönö edajabe, dokwa nöinö kwömökojobö jö̧ba̧lö. Jejenö laebi̧ma, wanedö yötawa, Diosma ökwönö nönö edajabe, ja̧danö kwömöki̧ma kwömöko jö̧ka̧lidanöma ömökö̧kö̧ja, ja̧bö kwö̧jo̧ jö̧ka̧li̧danö ja̧bö kwö̧jokobetjö̧.

²⁸ Ja̧danö Parsin jö̧ba̧löma, 'da̧'yö ujunajabe jö̧ba̧lö. Jejenö laebi̧ma, yöbawö weköbi̧ niji Diosma 'da̧'yö ujunajabe, ja̧danö ja'ö medo tjitebo jojodö wetjakobe, ja̧danö ja'ö perso jojodö wetjakobe, jö̧ba̧lö yöawinobe Danielma Belsasarnö.

²⁹ Wȩyukwi̧ jawa Daniel labebö lobö yöawiökwe, Belsasarma chiyocha jö̧ba̧lö yöa̧laja̧danö iyinobe. Ömöayedönö weinobe Danielnö la'aka luwo̧ ö̧ka̧misido̧nö 'dutjatobö, ja̧danö orotjö otikwopja tjöladobö, ja̧danö Danielnö yötjawinobe jojodö tjöba a'otjö, inesö la'aka luwo̧ wa̧medukwa la'aka luwo̧ jojoma Danielda, okobe deinö Babilonia jojodötjö, sule du̧ju̧tajada Danieltjö bajalekwönönö la'aka luwedö tjö̧jakobe jö̧ba̧lö,

³⁰ Ja̧danö, iya̧da yö̧teda Daniel yöawaja̧danö baledinobe, Babilonia jojodö la'aka tjuluwo̧ Belsasarnö kwabö lotjinobe.

³¹ Ja̧danö, Belsasar ajayinö yöbawö weinemima, medo jojo Darío mikwo̧ma Babilonia niji la'aka luwo̧ baibinobe. Darío jejenö la'aka luwo̧ baibenama, sesenta y dos o̧biya junalo̧ la'aka luwo̧ baibinobe.