Daniel 4 - Dios Iwene

La'aka luwo̧ Nabucodonosor Diosnö ösödö yöawina wene

¹ Ju'wi o̧ba, la'aka luwo̧ Nabucodonosorma jojodönö yöawinobe jo̧banö baledina wene, baikwö: —Ötjöma Nabucodonosor mikwo̧sa, ja̧danö okobe deinö jelesokwena jojodönö, ja̧danö tjitebotenia jojodönö, ja̧danö tjiwenetenia yöba̧ladönö yötawa baikwö: Wene jwiinö otiwanö kwö̧jaduwobö chösöda.

² Okobe jwiinö juluwo̧ Diosma isabenö iteda ujulu i̧sebö, jojodö edajitjökö jawa i̧sebö pjaatinobe ötjönö, ja̧danö jejenö i̧sebö pjaatinobetjö̧ kwöwaisaduwobö yötawaduwakwö.

³ Chömöledö, isabenö jojodö edajitjökö jawa i̧sebo̧ Diosma, isabenö iteda ujulu öwaetjöda otiwanö i̧sebobe. Jo̧ba yöbawö ö̧ji̧ma, la'akatjöda 'dö̧ibajökakobe, ja̧danö ba̧kwȩlö̧jatebö 'dö̧ibajökönö jojodö la'aka tjuluwo̧ ö̧jakwo̧ Diosma— jö̧ba̧lö yöawinobe.

Nabucodonosor yemidanö i̧'widikwina wene

⁴ Tupakwö yöawinobe Nabucodonosorma: Chömöledö, ötjö Nabucodonosorma cheju otiwejunö cho̧'wo̧ ösöwanö chö̧jijatö, wene jwiinö chö̧jijatö.

⁵ Ja̧danö, cho̧'wo̧ ösöwanö chö̧jemi ja'ötjö, chi̧'wi̧dikwijatö, ja̧danö chi̧'wi̧dikwajabetjö yetaibijatö, taji jö̧ba̧lö chi̧'wi̧dikwaja̧jö jö̧ba̧lö. Ja̧danö, kamapjonö ba̧nö chi̧'wi̧dikwaja̧ omukwatö yebabinö chö̧bijatö abökönö.

⁶ Jo̧kwajabetjö̧, wetijatö okobe deinö Babilonia nijinö ju̧kwadö waisanö omukwatadönö chöba a'o öbibö tjichejebobö, chi̧'wi̧dikwaja̧ jawa labebö lobö yötjawobö.

⁷ Jo̧kwajabetjö̧ mea bobadöbi, tupakwö baledakwa̧ yöbawadöbi, si̧li̧'idönö waisachadöbi chöba a'o tjichibinobe. Ichibajadönö chi̧'wi̧dikwaja̧ yötawijatö, jo̧kwaijayonö labebö lobö yötjawobö wajwitjinobe, baikwö jö̧ba̧lö kwi̧'wi̧dikwajabe jö̧ba̧lö.

⁸ Ja̧danö, bajaleapo Danielma chöba a'o ichibinobe, ju'wi imi Beltsasar jö̧ba̧lö chimidinökwema. Ja̧ Beltsasar jö̧ba̧lö chimidinama, o̧'wo̧ jawa chösödökwe imi omukwatö chimidinobe, ja̧danö jo̧ba Danielma isabenö diosbedö tjo̧'wo̧ luwo̧ tjö̧jö̧kwe. Ichibajo̧nö chi̧'wi̧dikwina yötawijatö, baikwö:

⁹ —Beltsasar, ökwöma okobe deinö chömöayedö tupakwö baledakwa̧ yöbawadötjö inesö yöbawo̧ja. Chöwaisa, diosbedö tjo̧'wo̧ luwo̧ tjö̧jökweja, ja̧danö isabenö okobe jwiinö jojodö wajwitji̧ jawa yökawobö waiso̧ja jö̧ba̧lö chöwaisa. Jwiinö waiyi̧ jawabi wayökö ökwönö, waiyi̧ jawabi jweinö yöbawo̧ja jö̧ba̧lö chöwaisobe, jo̧kwajabetjö̧ chi̧'wi̧dikwaja̧ jawa labebö loköbobö chösöda.

¹⁰ Kamapjonö ba̧nö chi̧'wi̧dikwaja̧ma baikwö yötawa: Böjȩ ö'wejenö jo̧wi towi chedijatö, jwiinö möowima.

¹¹ Jowi da̧peachinobe, bajalema mölejȩbe ichibanö da̧peachinobe, ödötjö böjȩ ö'öbötjöbi otiwanö öwawowi baibanö.

¹² Ja̧danö jowi öjiyama isabenö jwiinö otiwinobe, ja̧danö wa̧ji̧ma nöinö wa̧jowi ji̧nobe, okobe deinö jowitjö otiwanö tjukwobö. Tebonö ju̧kwadöma jowi teebe tiyuwena tjö̧binobe, ja̧danö pji̧yu̧ma jowinö tja'di̧ju̧ otidö pjabö tjö̧jinobe. Okobe deinö böjȩnö ju̧kwadöma jowitjö tjukwinobe— jö̧ba̧lö yöawinobe Nabucodonosorma.

¹³ Tupakwö yöawinobe Nabucodonosorma, i̧'wi̧dinö edina jawama: —Ja̧danö, kamapjonö chö̧bonö, chi̧'wi̧didanö chedijatö baikwö: Bakwo̧ mölejȩbe jo̧ ángelma mölejȩbetjö jwiachinobe,

¹⁴ ja̧danö labinö jwöinobe, bowi towi jubö lobaduwi, ja̧danö towi ötjebiya 'wibö lobaduwi, ja̧danö öjiya dilö lobaduwi, ja̧danö wa̧ji̧ pjebawö lobaduwi. Towi teebe ba̧ja̧dö tebonö ju̧kwadönö a'dewö lobaduwi, ja̧danö towinö ja̧dö pji̧yu̧nö a'dewö lobaduwi.

¹⁵ Jo̧kwaijayonö towi jubö loköbaduwijayonö, towi la'aka sa'oma 'yebökönaduwi, jubö lobajadö, 'dii jawanöbi, broncenöbi jwabaduwi. Ja̧danö isa'o jobe meje ö'wejenö jo̧bö junibaduwi jö̧ba̧lö weinobe ángelma. Ja̧danö tupakwö towi jawa yöawinobe ángelma, jojonö yöa̧li̧danö, baikwö: Jo̧banö webaduwi, tebonö ju̧kwadökwö mejenö ö̧jobö, ja̧danö mejenö ja̧nö, yȩayikwena si̧li̧'idö tji'olinö i̧'bȩkwobö webaduwi.

¹⁶ Ja̧danö jelemutjö döbalataja o̧biya baledibanö omukwati̧ma, jojo omukwati̧danö omukwatökönö, tebonö ju̧kwadö tjomukwati̧danö omukwatö öjobö webaduwi.

¹⁷ Jobekwö omukwatö tjujunajabe, böjȩ te'ada̧ladö la'aka ángelesdöma. Jobadöma jejenö wetjajabe, okobe deinö böjȩnö ju̧kwadö tjöwaisachibobö, Okobe Jwiinö Juluwo̧ Diosda böjȩnöbi yöbawö webo̧ jö̧ba̧lö, ja̧danö jo̧bada la'aka luwedönö omudawö juno̧ jö̧ba̧lö. Isabenö Diosda iteda ösödi̧danö omudawö juno̧ma, ja̧danö ösödenama jo̧kwadabedönöbi kabebö juno̧, la'aka luwedö batjibanö. Jobekwö böjȩ jojodö tjöwaisachibobö bite towi badekwachökwenö baledakwa̧ wetjajabe jö̧ba̧lö yöawinobe ángelma.

¹⁸ Ötjö inesö la'aka luwo̧ Nabucodonosorma jobekwö chi̧'wi̧dinö chedina yötawakwö Beltsasar, ja̧danö labebö loköbobö atebakwö. Jau Beltsasar, okobe deinö ju'wedö chömöayedö waisanö omukwatadöma, labebö lobö yötjawobö jwibadö, jo̧kwaijayonö jobadö yötjawobö jwitjijayonö, chöwaisa ökwönö Beltsasar, isabenö yökawobö jo̧be jö̧ba̧lö. Jau Beltsasar, chöwaisa, isabenö diosbedö tjo̧'wo̧ luwo̧ tjö̧jökweja, ja̧danö isabenö yökawobö jo̧be— jö̧ba̧lö yöawinobe Nabucodonosorma Danielnö.

Daniel Nabucodonosor i̧wi̧dikwina labebö lobö yöawina wene

¹⁹ Jejenö yöawiökwe, Daniel, ju'wi imi Beltsasarma o̧'wo̧ tjo̧bekwö ö̧jinobe, yöbawökönö, ja̧danö Nabucodonosor i̧'wi̧dikwina jawa omukwatö, Ayö jö̧ba̧lö omukwatö ö̧jinobe. Jejenö ö̧jiökwe, Nabucodonosorma jo̧banö yöa̧linobe: —Yebabökönui, chi̧'wi̧dikwina omukwatö yebabökönui, ja̧danö labebö loawa omukwatöma yebabökönui, yebabökönö jweinö yöbawitjö— jö̧ba̧lö. Yöa̧liökwe, Daniel ju'wi imi Beltsasarma atadinobe: —Chuluwo̧, kwi̧'wi̧dikwina jawa ökwönö baledobö chöpöjöda, kwöpöjojodönöda baledobö chösöda, isabenö labi̧ jawa baledakwa̧ kwi̧'wi̧dikwinobetjö̧.

²⁰ Baikwö labebö lobö yötawa kwi̧'wi̧dikwina jawama: Kwi̧'wi̧dinö kwedinobe towi möowi, juluwowi, ¿jö̧tö? Ja̧danö jowima mölejȩbe ichibanö da̧peachowi, ödötjö böjȩ ö'öbötjöbi otiwanö öwawowi,

²¹ ja̧danö öjiyama jwiinö otiwowi, ja̧danö nöinö wa̧jowi kwedinobe, ¿jö̧tö? Ja̧danö okobe deinö wa̧ji̧ tjukwowi, ja̧danö tebonö ju̧kwadö teebe tjö̧bowi, ja̧danö pji̧yu̧ tjö̧wajowi kwedinobe kwi̧'wi̧dinö, ¿jö̧tö?

²² Baikwö yötawakwö la'aka chuluwo̧ Nabucodonosor, jowi badekwachökwema ökwöda. Ökwöma isabenö juluwo̧ bakibajabe, ja̧danö wanedö yötawa, mölejȩbe ichibanö juluwo̧ bakibajabe ichejekwa, ja̧danö böjȩ bakwameachibanö ju̧kwadönö kwujuluwajabe, tjuluwo̧ bakibanö.

²³ Ja̧danö ángel böjȩ jawa te'ada̧lo̧nö kwedina jawa baikwö labebö lobö yötawa: Mölejȩbetjö jwibachö yöbawo̧nö kwedinobe, ja̧danö jo̧ba ángelma yöawinobe, bowi towi jubö lobaduwi. Jo̧kwaijayonö towi jubö loköbaduwijayonö, towi la'akasa'oma 'yebökönaduwi, jubö lobajadöma, 'dii jawatjö hierronöbi, broncenöbi jwabaduwi. Jobe meje ö'wejenö junibaduwi, ja̧danö si̧li̧'idö tji'olinö 'bȩkwobö junibaduwi, tebonö ju̧kwadökwö jelemutjö döbalataja o̧biya ö̧jobö, jö̧ba̧lö ángel weina kwedinobe, ¿jö̧tö?

²⁴ Chuluwo̧ Nabucodonosor, ja̧ kwedina baikwö labebö lobö yötawakwö: Ja̧ yöawinama, Okobe Jwiinö Juluwo̧ Dios yöbawö wei̧ma, ökwönö baledobö.

²⁵ Diosma ökwönö weobe, jojodö tjö̧'da̧detjö a'dewö lotjobö, ja̧danö mejȩnö ju̧kwadö tebonö ju̧kwadökwö kwö̧jobö. Ja̧danö jelemutjö döbalataja o̧biya baledibanö pa̧ka̧yö̧ tjukwi̧danö meje'ye kwukwakwo̧ja, ja̧danö si̧li̧'idö tji'olitjö kwi̧'bȩkwakwo̧ja, otiwanö Diosnö kwöwaisachibenanö kabatö. Jau chuluwo̧, okobe jwiinö yötawaja̧danö baledaja̧ ikena, bajalianö kwöwaisachibakwo̧ja, Okobe jwiinö Juluwo̧ Diosda tjitebotenia ju̧kwadö inesö la'aka tjuluwo̧ma, jo̧bada iteda ösödi̧danö la'aka luwedönö juno̧ma, iteda omudawö ujunawö̧nöda jö̧ba̧lö. Ja̧danö, jejenö kwöwaisachibenama, yemidanö la'aka luwo̧ kwö̧jakwo̧ja.

²⁶ Jau chuluwo̧ Nabucodonosor, kwi̧'wi̧dinö kwedinama, ángelma weinokobe towi la'aka 'yebö lotjobö, ¿jö̧tö? Ja̧danö, isabenö Diosnö otiwanö kwöwaisachibenama, Diosda inesö la'aka luwo̧ma jö̧ba̧lö kwöwaisachibenama, la'aka luwo̧ kwö̧ji̧ tjeatakobe Diosma, yemidanö inesö la'aka luwo̧ kwö̧jobö.

²⁷ Jobekwö laebobe kwi̧'wi̧dikwina chuluwo̧, jo̧kwajabetjö̧ baikwö pjabatö yötawakwö: Sulabenö ja̧bö kwö̧ji̧ kabatibö, otiwanö Dios ösödi̧danö ja̧bö kwö̧jo, ja̧danö usula jojodönö lȩlö̧jinö edö pjakato. Ja̧danö jejenö ja̧bö kwö̧jitjö̧ma, Diosma lȩlö̧jinö edena, ja̧danö yötawaja̧ jawa baledökönö lekwe möle otiwanö kwö̧jena— jö̧ba̧lö yöawinobe Danielma, la'aka luwo̧ Nabucodonosornö.

Daniel yöawaja̧danö Nabucodonosornö baledina wene

²⁸ Ja̧danö, okobe jwiinö Daniel yöawaja̧danö baledinobe la'aka luwo̧ Nabucodonosornö.

²⁹ Daniel yöawaja̧ ikena o̧ba bakwaba baledaja̧ ikenama, iteda eju otiweju, Babilonia comunidadsejutjö mö kweachinobe, o̧dobi, comunidadbi edö kweachinobe.

³⁰ Ja̧danö, edö, yöa̧linobe itedada, isabenö biya̧ inesö otiwobe comunidad Babiloniama, ötjöda otiwanö chotidajabe, yöbawö weti̧ comunidad baibanö. Ötjöda chujulunö otiwanö chotidajabe, chujulu otiwanö öwawobö, okobe deinö edö ötjönö tjöwaisobö, Nabucodonosorma isabenö jwiinö juluwo̧ jö̧ba̧lö, yöa̧linobe Nabucodonosorma itedada.

³¹ Ja̧danö, jejenö ina yöa̧layi, mölejȩbetjö tjiwene ökwöinobe, baikwö: —La'aka Luwo̧ Nabucodonosor, ökwönö yöawakwawa baikwö laebobe, Diosma la'aka luwo̧ kwö̧ji̧ma ökwötjö 'döbebö ujunajabe,

³² ja̧danö jojodö tjö̧'da̧detjö ökwönö a'dewö lotjakwo̧ja. Tebonö ju̧kwadökwö kwö̧jakwo̧ja, ja̧danö pa̧ka̧yö̧ tjukwi̧danö meje'ye kwanö kwö̧jakwo̧ja, jelemutjö döbölataja o̧biya baledibanö. Jejenö baledakobe ökwönö, Diosnö bajalianö kwöwaisachibenanö kabatö, Isabenö Okobe Jwiinö Juluwo̧ Diosda inesö la'aka luwo̧ma, Diosda böjȩ luwedönö omudawö juno̧ma jö̧ba̧lö kwöwaisachibenanö kabatö— jö̧ba̧lö ökwöinobe.

³³ Jobekwö ökwöinobe mölejȩbetjöma, ja̧danö juluwanö jejenö baledinobe. Nabucodonosornö jojodö tjö̧'da̧detjö a'dewö lotjinobe, ja̧danö pa̧ka̧yö̧ tjukwi̧danö meje'ye ukwinobe, ja̧danö yȩayikwena si̧li̧'idö tji'olitjö i̧'bȩkwinobe. Jejenö lekwe ja̧nö, öwö'yema ödöachinö pokwinobe, muko öwöyedanö, ja̧danö inejȩma pji̧yu̧ tji̧nejȩdanö ödöachinobe.

Nabucodonosor bajalianö Diosnö öwaisachibina wene

³⁴ Ja̧danö, ja̧ jelemutjö döbalataja o̧biya baledibajenama, ötjö Nabucodonosorma mölejȩbekwö chedijatö, ja̧danö yemidanö jojo omukwati̧danö otiwanö chomukwatijatö. Ja̧danö Okobe Jwiinö Juluwo̧ Diosnö chösödijatö, ba̧kwȩlö̧jatebö jo̧nö chösödijatö, otiwo̧, juluwo̧ jö̧ba̧lö. Isabenö ba̧kwȩlö̧jatebö la'aka luwo̧ jo̧ Diosma, isabenö ba̧kwȩlö̧jatebö 'dö̧ibajökönö la'aka luwo̧ ö̧jakwo̧.

³⁵ Jo̧ba öba a'otjö isabenö mikwawöködösa ökwödö böjȩ jojodöma, jo̧ba ujuluwi̧danöma juluwöködösa. Jo̧bama iteda ösödi̧danöda ja̧bo̧ma, ángelesdö tjöjena mölejȩbetjöbi, jojodö dö̧jena böjȩtjöbi. Bakwo̧bi deobe jo̧banö, Kabati, jö̧ba̧lö webo̧ma, bakwo̧bi deobe sulabenö ja̧köba, ¿tajawedö jejenö ja̧köbaja̧da? jö̧ba̧lö lȩbebo̧ma jö̧ba̧lö yöa̧linobe Nabucodonosorma Diosnö.

³⁶ Ja̧ möle tebonö ju̧kwadö tjo̧mukwati̧danö omukwatökönö, chomukwati̧ma yemidanö otiwanö chomukwatijatö. Ja̧danö, jojo omukwati̧danö yemidanö otiwanö chomukwatenama, yemidanö otiwanö tjomukwatinobe ötjönö, ja̧danö yemidanö inesö la'aka luwo̧ chö̧jijatö. Okobe jwiinö ajayinö chujuna̧linama tjeachajinobe, chujulubi, otiwi̧ jawa chujuna̧linabi. Ja̧danö ötjönö pjabatinadöbi, ju'wedö luwedöbi ötjönö tjisakwinobe, ja̧danö inesö la'aka luwo̧ batibanö yemidanö chö̧jijatö, ja̧danö ajayitjö bajalekwönönö jwiinö juluwo̧ batibijatö.

³⁷ Ja̧danö, babema ötjö Nabucodonosorma, Diosnö otiwanö omukwatö chösödobe, mölejȩbe jo̧ Diosnö. Okobe jwiinö Dios otidi̧ma otiwanö otidobe, ja̧danö okobe jwiinö ja̧i̧ma, jweinö otiwanö ja̧obe. Ja̧danö otiwadösa jö̧ba̧lö omukwatadönö nijakwönönöbedösa jö̧ba̧lö omukwatadö batjibanö ujunobö waiso̧ Diosma, jö̧ba̧lö yöbawö iwȩyudinobe Nabucodonosorma, böjȩ bakwameachibanö ju̧kwadö jojodönö.