Daniel 2 - Dios Iwene

Nabucodonosor i̧'wi̧dikwina wene

¹ Nabucodonosor inesö la'aka luwo̧ ja̧nö döbalataja o̧biya weaja̧ ikena baikwö baledinobe: Ju'wi yö̧te i̧'wi̧dikwinobe, ja̧danö edajiö̧kö̧ jawa i̧'wi̧dikwajabetjö, Ayö, dakwö jö̧ba̧lö chi̧'wi̧dikwaja̧jö jö̧ba̧lö bö̧ti̧ jwibekwö ö̧jinobe.

² Jo̧kwajabetjö̧ Nabucodonosorma weinobe okobe deinö mea otidadö i̧'wi̧dikwaja̧ yöbawö tjichobö, tupakwö baledakwa̧ yöbawadöbi, mea bobadöbi, si̧li̧'idönö waisachadöbi.

³ Ja̧danö, ichajadönö weinobe Nabucodonosorma, baikwö: —Jo̧da yö̧te chi̧'wi̧dikwatö, ja̧danö chi̧'wi̧dikwaja̧tjö cho̧'wo̧ tjoekwobe, taji jö̧ba̧lö chi̧'wi̧dikwaja̧jö jö̧ba̧lö. Jo̧kwajabetjö̧ chi̧'wi̧dikwaja̧bi, chi̧'wi̧dikwaja̧ labebö loawabi yöbawaduwitjö— jö̧ba̧lö weinobe.

⁴ Jejenö i̧'wi̧dikwa̧ja̧ jawa yöbawökönö, yötjawobö weawö̧, si̧li̧'idönö waisachadöma tjatadinobe Babilonia jojodö tjiwenenö: —La'aka duluwo̧, lekwe duluwo̧ kwö̧jobö dösöda. Ökwödö kwömöayedönö kwi̧'wi̧dikwaja̧ yökawo, ja̧danö a̧ja̧kwajadö, laebi̧ jawa labebö lobö yödawakobe— jö̧ba̧lö tjatadinobe.

⁵ Tjatadiökwe yöa̧linobe Nabucodonosorma: —Ja̧maökö. Ida̧ökö omukwatö chujunajabe, chi̧'wi̧dikwaja̧kwö, labebö loawakwö yökawaduwobö jo̧be jö̧ba̧lö. Ja̧danö weti̧danö yökawaduwökötjö̧ma chömöayedö guardia jojodönö wetakobe, ökwödönö bulabinö lotjobö, ja̧danö kwejuduwi jwiinö 'dobö pjolö lotjobö.

⁶ Jo̧kwaijayonö chi̧'wi̧dikwaja̧bi, labebö loawabi yökawaduwitjö̧ma, balekwa mikwa otiwanö chiyakwawö̧ja, isabenö otiwa jawa chiyakobe, ja̧danö okobe deinö ökwödönö otiwanö tjomukwatobö pjatatakobe. Jo̧kwajabetjö̧, chi̧'wi̧dikwaja̧bi, labebö loawabi yöbawaduwitjö— jö̧ba̧lö.

⁷ Weawö̧, yemidanö tjatadinobe: —Kwi̧'wi̧dikwaja̧ yökawo, ja̧danö a̧ja̧kwajadö labebö lobö yödawakobe— jö̧ba̧lö.

⁸ Tjatadiökwe, Nabucodonosorma yöa̧linobe: —Chöwaisaduwakwö, ökwödöma kwöwaisaduwobe, isabenö yöa̧lajadanö ökwödönö kwabö loakobe Nabucodonosorma jö̧ba̧lö, ja̧danö chi̧'wi̧dikwaja̧ wajwibadököbaduwobetjö̧, lekwe chite'ada̧lobö kwisakwaduwobe, juluwanö ökwödönö kwabö lotapji jö̧ba̧lö,

⁹ Isabenö yötawaduwakwö, chi̧'wi̧dikwaja̧ yökawaduwökötjö̧ma, kwabö lotakwawö̧ja. Chedemi bakobe omukwatö kwujunaduwajabe, tupakwönönö omöna wene ötjönö yökawaduwobö, Aaa, dite'ada̧litjö̧ma, Nabucodonosorma omukwati̧ kabatibö öbalewachena jö̧ba̧lö. Jo̧kwaijayonö chi̧'wi̧dikwaja̧ yökawaduwitjö̧ma, jenada chöwaisakwo̧sa, isabenö labebö loawabi yökawaduwobö waisadöja jö̧ba̧lö— yöa̧linobe Nabucodonosorma.

¹⁰ Yöa̧lawö si̧li̧'idönö waisachadöma tjatadinobe: —La'aka duluwo̧, bakwo̧bi deobe böjȩtjö, kwi̧'wi̧dikwaja̧ ökwönö yöbawo̧ma. Ja̧danö okobe deinö la'aka luwedötjö, juluwöködötjöbi, juluwadötjöbi bakwo̧bi deobe babe akebaja̧danö abebo̧ma. Ökwödö mea bobadönöbi, tupakwö baledakwa̧ yöbawadönöbi, si̧li̧'i̧dönö waisachadönöbi la'aka luwo̧ bakwo̧bi la'akatjöda aebinokobe, ökwö babe akebaja̧danöma duluwo̧.

¹¹ Jwiobe yelösöda akebaja̧danö yödawoböma, ja̧danö böjȩnö ju̧kwadötjö bakwo̧bi deobe akebi̧danö yöbawo̧ma. Sule diosbedöda akebi̧danö yötjawobö juluwadö, jo̧kwaijayonö jobadöma dö'da̧de jö̧ködö, abebö da̧ja̧kwo jö̧ba̧lö— tjatadinobe.

¹² Jejenö yötja̧liökwe, jwiinö ödameakwinobe Nabucodonosorma, ja̧danö weinobe okobe deinö Babilonia nijinö ju̧kwadö waisanö omukwatadö jö̧ba̧lö ötjabiwö̧nö kwabö lotjobö.

¹³ Ja̧danö, Danielbi, ömöledöbi jobadötjöbedö tjö̧jobetjö̧, jobadönöbi tjisakwinobe, kwabö lotjobö.

¹⁴ Guardia jojodö la'aka luwo̧ Arioc mikwo̧ma Babilonia jojodötjö waisanö omukwatadö ötjabiwö̧nö kwabö loobö ichinobe, ja̧danö jejenö ichiökwe, Danielma otiwanö waisanö yöa̧linobe.

¹⁵ Ariocnö abebö a̧ja̧kwinobe: —Inesö la'aka luwo̧ma, ¿tajawedö jejenö okobe deinö kwabö lotjobö weaja̧da?— jö̧ba̧lö. Ja̧danö abebö a̧ja̧kwökwe Ariocma baledaja̧ yöawinobe Danielnö.

¹⁶ Yöawiökwe, Danielma inesö la'aka luwo̧nö abebö i̧'yinobe, ja'yubenö kwite'ada̧litjö̧ma, okobe jwiinö akebaja̧danö labebö lobö yötawocha jö̧ba̧lö.

Dios Nabucodonosor i̧'widikwina Danielnö i̧sebina wene

¹⁷ Ikenama jobetjö ȩwa̧bijö, Danielma ja̧ baledaja̧ yöawinobe ömöledö Ananiasnöbi, Misaelnöbi, Azaríasnöbi,

¹⁸ pjabatö Mölejȩbe Jo̧ Diosnö atjebobö, Dios lȩlö̧jinö edö Nabucodonosor i̧'wi̧dikwina Danielnö i̧sebobö. Jejenö atjebinobe, waisanö omukwatadö ötjabiwö̧nö kwabö lobö, jobadönöbi kwabö lotjapji jö̧ba̧lö.

¹⁹ Ja̧danö, jejenö atjebiökwe, iya̧da yö̧te Diosma Danielnö i̧'wididanö i̧sebinobe Nabucodonosor i̧'wi̧dikwina jawabi, labebö loawabi. Ja̧danö jejenö i̧sebiökwe, Danielma Diosnö ösödinobe, isabenö otiwo̧ja jö̧ba̧lö,

²⁰ ja̧danö Diosnö ösödö Daniel yöa̧linobe: —Isabenö ba̧kwȩlö̧jatebö kabatökönö Diosnö dösödobö jo̧be, isabenö jo̧bada waisanö omukwato̧obetjö̧, ja̧danö isabenö jo̧bada juluwo̧obetjö̧.

²¹ Isabenö Diosda tupakwö baledakwa̧ omukwatö juno̧ma, babe baledakwa̧bi tupakwö baledakwa̧bi. La'aka luwedötjö ju'wedönö la'aka luwedö tjö̧ji̧tjö latjebobö webo̧ Diosma, ja̧danö la'aka luwedö tjö̧jinemi balekwedönö webo̧. Diosda jojodö waisanö omukwatadö batjibobö pjabato̧ma, ja̧danö jo̧bada waisachadö nöinö tjöwaisachibobö pjabato̧ma.

²² Jo̧bada okwa jawa, jojodö wajwitji̧ jawa i̧sebo̧ma, ja̧danö bakwainö dewinö ö̧jijayonö, okobe jwiinö yȩa'wo okwa ji̧ jawa waiso̧ma jo̧bada.

²³ Cha'dödö Tjuluwo̧ Dios, ökwönö ösödö yöta̧la, otiwo̧ja, otiwanö pjabato̧ja jö̧ba̧lö. Isabenö otiwanö pjakatajabe ötjönö, waisanö omukwato̧ batibobö, ja̧danö juluwo̧ batibobö. Jo̧kwaijayonö ja̧damaökö, jemi bajalekwönönö otiwanö pjakatajabe, ökwönö adebaja̧danö otiwanö kwi̧sebajabe, la'aka luwo̧ Nabucodonosor i̧'widikwina jawa otiwanö kwi̧sebajabe— jö̧ba̧lö yöa̧linobe Danielma, Diosnö ösödö.

Daniel Nabucodonosor i̧'wi̧dikwina labebö lobö yöawina wene

²⁴ Ikenama Danielma yöbawö i̧'yinobe Ariocnö, Babilonia ju̧kwadötjö waisanö omukwatadö ötjabiwö̧nö kwabawö loobö Nabucodonosor weinökwenö. Ja̧danö Danielma Ariocnö yöa̧linobe: —Jobadö waisanö omukwatadö ötjabiwö̧nö kwabö loköboko. Nabucodonosor öba a'o 'ya̧jebitjö, i̧'widikwina jawa labebö lotakobetjö̧— jö̧ba̧lö.

²⁵ Jejenö yöa̧liökwe, Ariocma juluwanö Danielnö öbibö i̧'yinobe la'aka luwo̧ Nabucodonosor ö̧jobekwö, ja̧danö jo̧banö yöawinobe baikwö: —Chuluwo̧, Judá nijitjö öbibö dichejebinawö̧tjö bakwo̧nö chöbadekwajabe, kwi̧'widikwina jawa labebö lobö yöawakwo̧nö— jö̧ba̧lö.

²⁶ Yöawiökwe, la'aka luwo̧ma Danielnö, ju'wi 'yayi̧ imi Beltsasar jö̧ba̧lö mikwo̧nö abebö a̧ja̧kwinobe: —¿Isabenö chi̧'wi̧dikwinabi, chi̧'wi̧dikwina labebö loawabi yökawobö waiso̧köbobeji̧?— jö̧ba̧lö?

²⁷ Abebö a̧ja̧kwökwe, Danielma atadinobe: —Isabenö böjȩtjö bakwo̧bi deobe kwi̧'wi̧dikwina yöbawo̧ma, waisanö omukwatadötjöbi, mea bobadötjöbi, tupakwö baledakwa̧ yöbawadötjöbi, si̧li̧'idönö waisachadötjöbi, bakwo̧bi deobe.

²⁸ Jo̧kwaijayonö mölejȩbe Dios ö̧jobe, jojodö wajwitji̧ jawa i̧sebo̧ma, ja̧danö jo̧bama ökwö inesö la'aka luwo̧ Nabucodonosornö i̧sebinobe 'dö̧ibaji̧ möle baledakwa̧ma. Kamapjonö ba̧nö kwi̧'wi̧dikwinabi, ju'wi kwi̧'wi̧didanö kwedinabi baikwö yötawa:

²⁹ Kamapjonö ba̧nö tupakwö baledakwa̧ kwomukwatinobe la'aka chuluwo̧, tupakwö dakwö baledakwa̧jö jö̧ba̧lö. Ja̧danö jejenö kwomukwatiökwe, jojodö wajwitji̧ jawa i̧sebo̧ Diosma ökwönö i̧sebinobe tupakwö baledakwa̧ma.

³⁰ Ja̧danö, kwi̧'wi̧dikwina yötawijayonö, ötjönö omukwatökönuwi: Aaa, Danielma ju'wedö böjȩnö ju̧kwadötjö bajalekwönönö waiso̧obetjö̧ yöbawo̧ jö̧ba̧löma. Ju'wedötjö bajalekwönönö waiso̧bö̧kö̧sa, jo̧kwaijayonö Diosma ökwönö i̧sebobö jö̧a̧lobe, ja̧danö ökwö kwöwaiso jö̧ba̧lö, Diosma ötjönö iyajabe, omukwatö kwedina jawa kwöwaisakobetjö̧.

³¹ Kwi̧'wi̧dinö kwedina baikwö yötawa la'aka chuluwo̧: Jojo o̧'wo̧ jawa nöbo̧nö kwedinobe, juluwo̧nö, salöinö dejato̧nö. Kwedinökwema isabenö yetjaibinö juluwo̧nö kwedinobe chuluwo̧.

³² Ja̧danö kwedinökwe uuma, bakwai̧ orotjöda otikwo̧nö kwedinobe. Ja̧danö omukosa'obi, öjabi platatjö otikwo̧nö kwedinobe. Ja̧danö ukwa'wobi, i̧bȩjwa̧sa'bobi broncetjö otikwo̧nö kwedinobe.

³³ Ja̧danö i̧bȩjwa̧ma 'dii jawa hierrotjö otikwo̧nö kwedinobe. Ja̧danö ömasapiyama, 'dii jawakwö, lete'okwö pjaachalinö otikwo̧nö kwedinobe.

³⁴ Jejenö kwedinobe chuluwo̧, jo̧kwaijayonö ja̧damaökö, ju'wibi inawa mösa'otjö laebobe kwedinobe, jojo otidinököwama. Ja̧danö ja̧ inawa o̧'wo̧ jawanö ömasapiyanö töobe kwedinobe, ja̧danö töenama ömasapiya 'daobe kwediinobe, ömasapiya pjeikwena baibanö.

³⁵ Jemi ikenama okobe jwiinö o̧'wo̧ jawa a̧ja̧ma nijakwö meinobe, ja̧danö 'dii jawabi, lete'obi, broncebi, platabi, orobi okobe jwiinö bakobe 'dalachajibinobe, ja̧danö i̧so̧pja baibanö suli̧ waekwinobe. Ja̧danö jwa̧lȩ'epjo ja̧ i̧so̧pja jayubebi ji̧bökönö e'ewibobe kwedinobe, ajayinö kwedajökwe o̧'wo̧ jawama bakobenö jwiinö baibanö. Ja̧danö, jemi ikenama ju'wibi kwedinobe, ja̧ inawa ajawama nöamachibobe kwedinobe, mösa'o nöa'o, böjȩ bakwameachibanö ja̧'o baibanö nöamachibobe kwedinobe— jö̧ba̧lö yöawinobe Danielma.

³⁶ Tupakwö yöawinobe Danielma: —Jobekwö kwi̧'widinö kwedinobe chuluwo̧, ja̧danö babema kwedina jawa labebö lobö yötawocha.

³⁷ Ökwöma inesö la'aka luwo̧ja, ja̧danö ju'wedö jelobetenia ju̧kwadö la'aka luwedö la'aka tjuluwo̧ma ökwöda. Ja̧ inesö la'aka luwo̧ kwö̧ja̧kwa̧ma, Mölejȩbe jo̧ Diosda iyinobe. Jo̧bada ökwönö kabebö ujuninobe, ju'wedö tjuluwo̧ bakibanö. Jo̧bada inesö kwujulu iyinobe ju'wedönö kwujuluwobö, ja̧danö jo̧bada ujuninobe jojodö ökwönö otiwanö tjomukwatobö.

³⁸ Diosma ökwönö ujuninobe, okobe deinö tjitebotenia ju̧kwadö tjuluwo̧ bakibanö, jojodöbi, tebonö ju̧kwadöbi, mö kö̧ba̧ladöbi tjuluwo̧ bakibanö. Ja̧danö o̧'wo̧ jawa kwedinökwe uuma, orotjö otikwuuma ökwönö badekwachobe.

³⁹ Ja̧danö ökwö la'aka luwo̧ kwöja̧ja okobe, ju'wedötjö jelo̧ inesö la'aka luwo̧ öbamatakobe. Jo̧bama inesö la'aka luwo̧ öjijayonö ökwö kwujuluwi̧danöma ujuluwökakobe. Ja̧danö o̧'wo̧ jawa kwedinökwe platatjö otikwi̧ma, jo̧ba inesö la'aka luwo̧ ö̧jakwa̧ badekwachobe. Ja̧danö jo̧ba ömöledö luwedö tjö̧ji̧ okobe, ju'wedötjö jelo̧ öbamatakobe böjȩ bakwameachibanö jojodö la'aka tjuluwo̧ baibanö, ja̧danö broncetjö otikwi̧ma jo̧ba ö̧jakwa̧ badekwachobe.

⁴⁰ Ja̧danö jo̧ba ömöledö luwedö tjö̧jaja̧ okobe, ju'wedötjö jelo̧ öbamatakobe inesö la'aka luwo̧ baibanö. O̧'wo̧ jawa kwedinökwe 'dii jawatjö otikwi̧ma, jo̧banö badekwachobe. 'Dii jawama ju'wi jawatjö bajalekwönönö 'diobe, ja̧danö 'dii jawanö ju'wi jaye kwatjitjö̧ma, 'dalachajibobe, ¿jö̧tö? Jo̧ba ömöledö luwedö tjö̧jakwa̧bi ja̧danö, tjömöayedö guardia jojodö jobadötjö ajayinö ji̧nadö la'aka luwedönö tjujuluwakobe, ja̧danö labinö juluwö söbebö lotjakobe 'dii jawa ju'wi jawa 'dalachajibobedanö.

⁴¹ Ja̧danö kwedinökwe ömasapiyabi, ötö'iyabi 'dii jawakwö, lete'okwö otikwo̧nö kwedinobe, ¿jö̧tö? Ja̧ badekwachi̧ma baikwö yötawa: Jobadö luwedö tjö̧ji̧ma 'dii jawa 'dii̧danö tjujuluwijayonö, wainökwena omukwatö tjö̧jakobe.

⁴² O̧'wo̧ jawa kwedinökwe ömasapa ötö'iyama 'dii jawakwö lete'okwö kwedinobe, ¿jö̧tö? Ja̧danö, jobadö luwedö tjö̧jakwa̧ baikwö yötawa, 'dii jawa 'dii̧danö ja'yubenö tjujuluwijayonö, ju'wibi lete'o 'dalachajinö ji̧danö tjime'dawakobe.

⁴³ Ja̧danö, 'dii jawakwö lete'okwö kwedinadanö, jobadötjö luwedö wainökwena omukwatadöma bakobe tjö̧jobö tjisakwakobe, ja̧danö tji̧tji̧mu ju'wedö luwedö tji̧tji̧mukwö batjibobö tjisakwakobe: Aaa, ditjimu jobadö tji̧tji̧munö tjemitjö̧ma, otiwanö bakobe omukwatö dö̧jena jö̧ba̧lö. Jo̧kwaijayonö, waekwakobe, baikwö wanedö yötawa: 'dii jawama lete'okwöma otiwanö pjaacha̧lokobe, ¿jö̧tö? Ja̧danö jobadöma bakobe bakwaibedö babibö tjö̧jobö tjomukwatijayonö, waekwakobe, bakwaibedö batjibökakobe, 'dii jawakwö lete'okwö bakwainö baiböködanö.

⁴⁴ Ja̧danö, jobadö tjö̧jakwa̧ möle, mölejȩbe jo̧ Diosma bakwo̧nö ujunakobe, inesö la'aka luwo̧ baibanö, ja̧danö jo̧ba yöbawö ö̧jakwa̧ma la'akatjöda 'dö̧ibökakobe. Bakwo̧bi jo̧banö ujuluwökakobe, ja̧danö jo̧ba ömöledöböködöma la'akatjöda jo̧ba yöbawö ö̧jemi balewö lotjökakwedö, öpöjojodöda webö tjö̧jobö. Jo̧bama okobe deinö jo̧batjö ajayinö ji̧nadö la'aka luwedöbinadö yöbawö tjö̧jinama söbebö loakobe, ja̧danö jo̧ba yöbawö ö̧jakwa̧ma ba̧kwȩlö̧jatebö ja̧kobe.

⁴⁵ Jau chuluwo̧, jejenö badekwachobe inawa mösa'otjö laekwobe kwedina, jojo otidokonö laekwobe kwedinama. Ja̧ inawa o̧'wo̧ jawanö söbebö loinadanö, Dios ujunakwo̧ma okobe deinö ju'wedönö ujuluwakobe, ja̧danö jo̧ba yöbawö ö̧jakwa̧ma la'akatjöda 'dö̧ibökakobe. Chuluwo̧ Diosma isabenö otiwo̧, ja̧danö jo̧bama otiwanö i̧sebajabe tupakwö baledakwa̧ jawa ökwö la'aka chuluwo̧nö. Isabenö bakwainö kwi̧'widikwinadanö yötawajabe, ja̧danö isabenö okobe jwiinö yötawaja̧danö baledakobe— jö̧ba̧lö yöawinobe Danielma, la'aka luwo̧ Nabucodonosornö.

Nabucodonosor Danielnö kabebö ujunina wene, luwo̧ baibanö

⁴⁶ I̧'wi̧dikwina jawa yöawiökwe, Nabucodonosorma Daniel öba a'o öba nijakwö bamatö ösödinobe. Ja̧danö iteda ömöayedönö weinobe, iyawa juwö tjiyobö, ja̧danö omewi̧ jawa tjujuwobö, isabenö Danielma otiwanö yöawajabe jö̧ba̧lö.

⁴⁷ Ja̧danö Nabucodonosorma Danielnö yöawinobe: —Chi̧'wi̧dikwina jawa jweinö yökawi̧tjö̧, chöwaisobe, isabenö kwuluwo̧ Diosda ju'wedö diosbedö tjuluwo̧ Diosma jö̧ba̧lö, ja̧danö jo̧bada la'aka luwedö inesö la'aka tjuluwo̧ma jö̧ba̧lö, ja̧danö isabenö jojodö wajwitji̧ jawa i̧sebo̧ kwuluwo̧ Diosma— jö̧ba̧lö.

⁴⁸ Ikenama la'aka luwo̧ Nabucodonosorma nöinö otiwa jawa iyinobe Danielnö, ja̧danö jo̧banö kabebö ujuninobe, okobe jwiinö Babilonia niji la'aka luwo̧ baibanö, ja̧danö okobe deinö iteda ömöayedö waisanö omukwatadö ötjabiwö̧tjö la'aka luwo̧ baibanö.

⁴⁹ Ja̧danö, Danielma Nabucodonosornö aebinobe, ömöledö Sadracnöbi, Mesacnöbi, Abednegonöbi luwedö batjibanö kabebö ujunobö. Ja̧danö Daniel aebaja̧danö jobadönö ujuninobe, luwedö babibö Babilonia niji jawa tjotidobö. Jo̧kwajabetjö̧, ja̧ tjotidinobe, ja̧danö Danielma Nabucodonosor ejunö otidö ö̧jinobe.