Daniel 12 - Dios Iwene

'dö̧ibaji̧ möle jawa ángel Danielnö yöawina wene

¹ Tupakwö yöawinobe ángelma Danielnö: —Ja̧danö, ja̧ yötawaja̧ jawa baledaja̧ ikena, Miguel, inesö ökwödö Israel jojodönö te'ada̧lakwawa luwo̧ ángelso̧ma ichakobe. Isabenö yötawakwö ja̧ mölema nöinö usula tjemawakobe kwömöledö Israel jojodöma, la'akatjöda ja̧ jaye usula emawakwawa edajiböködö Israel jojodöma, ökwödötjö ajayinö ji̧nadö tjö̧jinatjö baikwö bajalenö, jwiinö nöinö usula tjemawakobe. Jo̧kwaijayonö, ja̧ möle ju'wibi baledakobe, Diosma kwialu'ye ujunalobe, bidöma ja̧kwawa juna̧ladö jö̧ba̧lö wȩyukwa'yema, ja̧danö okobe deinö ja'yenö tjimibiya wȩyudö lödawedönöma, tjö̧jibinö pjaatakobe Diosma.

² Ja̧danö ja̧ mölema, ba̧jekwadö ö'wö babibinadötjö tjebachajö wilutjakobe. Ja̧danö, wilubajadötjö ju'wedöma ba̧kwȩlö̧jatebö Dioskwö tjö̧jakwedö, ja̧danö jobadötjö ju'wedöma Dios lȩebawö̧ ba̧kwȩlö̧jatebö taba lö̧jawö̧ tjö̧jakwedö.

³ Waisanö omukwatadöbinadöma, isabenö otiwanö mölejȩ dewinö dejatobedanö tjidejatakwedö, ja̧danö ju'wedö Diosnö tjösödobö pjabatadöbinadöma si̧li̧'idö tjidejatidanö ba̧kwȩlö̧jatebö tjidejatakwedö.

⁴ Ja̧danö, ökwönö baikwö wetakwö Daniel, ökwönö yötawaja̧ jawa tojö kwujuno. Ju'wedö tjedapji jö̧ba̧lö, kwialu'ye kwiwȩyuda'ye mu'dudö tojö kwujuno, 'dö̧ibaji̧ möle baibenanö kabatö. Ja̧danö, ba̧jekwadö tjöwaisachibotö jö̧ba̧lö jelobebi, jelobebi tji̧'yakobe, ja̧danö ajayinö tjöwaisinatjö bajalekwönönö tjöwaisachibakobe— jö̧ba̧lö yöawinobe ángelma.

⁵ Jejenö yöawaja̧ ikena, ötjö Danielma möakwö chedijatö, ja̧danö ju'wedö du̧ju̧taja ángelesdönö chedijatö, ojwe bakwachödö bakwo̧nö, chipjeanö bakwo̧nö.

⁶ Ja̧danö jobadötjö bakwo̧ jwöbö abebö a̧ja̧kwinobe ökamijido̧ otiwado̧ dewado̧ 'dubawo̧nö, ojwe wame jo̧nö: —Ja̧ inesö labi̧ jawama, ¿dokwa lekwe baledakwa̧da 'dö̧ibakwa̧ abönöma— jö̧ba̧lö?

⁷ Abebö a̧ja̧kwökwe, ojwe wame jo̧ otiwado̧ dewado̧ 'dubawo̧ma, ömamiju kaebinobe mölejȩbekwö, ja̧danö yöa̧linobe: Ba̧kwȩlö̧jatebö Jo̧ Dios öba a'otjö ja̧nö, baikwö isabenö wene yötawakwö: Ja̧ jawama wa̧pötakwa o̧biya ja'ö baledibanö baledakobe. Jau, Dios ömöledö usula tjemawinö isabenö ja̧tja̧kobe Daniel, isabenö Dios ömöledö jejenö usula tjemawobö ja̧kobe, okobe jwiinö ja̧ yötawja̧ jawa baledenanö kabatö— jö̧ba̧lö atadinobe.

⁸ Jobekwö yöa̧lobe cha̧ja̧kwijatö, jo̧kwaijayonö yöa̧li̧ma otiwanö chöwaisachibijökötö, ¿taji jö̧ba̧lö yöa̧lobejö? jö̧ba̧lö. Jo̧kwajabetjö̧ abebö cha̧ja̧kwijatö: —Chuluwo̧, dakwö baledakwa̧da, okobe jwiinö ja̧ jawa 'dö̧ibajenama— jö̧ba̧lö.

⁹ Jejenö abebö cha̧ja̧kwökwe, atadinobe: —Ja̧ jawa omukwatöma kwo̧'wo̧ tjokekwa Daniel, abebö kwa̧ja̧kwaja̧ chatadobö jwiobe. Jau Daniel, 'dö̧ibaji̧ möle baibenanö kabatö ja̧ wene tojö ujunakobe Diosma, jo̧kwajabetjö̧ ja̧ omukwatöma kwo̧'wo̧ tjo̧kekwa.

¹⁰ Ja̧danö baikwö yötawakwö, ba̧jekwadö tjo̧'wo̧ luwo̧ tjusula otiwanö dichö lotjakobe, okwanö bakwainö dewadö batjibanö, jo̧kwaijayonö sulabedöma ina tupakwönönö sulabenö ja̧bö tjö̧jakobe. Ja̧danö sulabedöma la'akatjöda ökwönö yötawaja̧ jawa tjöwaisachibökakobe, jo̧kwaijayonö waisanö omukwatadöma kwiwȩyudi̧ yöba̧lö edinö tjöwaisachibakobe.

¹¹ Ja̧danö, 'dö̧ibaji̧ möle Diosnö öpöjödo̧ma, möletenia Diosnö iyawa katjatibobö ja̧akobe, ja̧danö inesö suli̧ jawa Dios ejunö ujunakobe. Ja̧ möle ikena, mil doscientos noventa möle baledakobe, 'dö̧ibakwa̧ abönö.

¹² Ja̧danö baikwö yötawakwö, tjo̧'wo̧ 'dibachibö, mil trecientos treinta y cinco möle baledibanö otiwanö Diosnö kabatibökönö baledajadöma, isabenö tjo̧'wo̧ ösöwachibanö tjö̧jakwedö.

¹³ Ja̧danö baikwö yöta̧lakwö Daniel, kwo̧'wo̧ ösöwanö kwö̧jo, 'dö̧ibaji̧ möle baibenanö kabatö. Ökwöma ö'wö babiböda, kwö'wachakwo̧ja, ja̧danö okobe jwiinö 'dö̧ibajenama, yemidanö woawatjö tjekachajakwo̧ja, Dios ökwönö iyakwa̧ otiwanö kwemobö— jö̧ba̧lö yöawinobe ángelma Danielnö, tupakwö baledakwa̧ jawama.