Daniel 10 - Dios Iwene

Daniel yemidanö i̧'wi̧didanö edina wene

¹ Ciro mikwo̧ Persia niji la'aka luwo̧ inesö la'aka luwo̧ ö̧benama, ida̧ökö wa̧pötakwa o̧biya yöbawö weenama, Diosma yemidanö Danielnö, ju'wi imi Beltsasarnö iteda yöawi̧ yöawinobe. Ja̧ Dios Danielnö yöawi̧ma, isabenö wene yöawinobe, jo̧kwaijayonö yelösöda waiyinobe ajayinö, Daniel öwaisachibanö a̧ja̧kwobö. Jo̧kwaijayonö, Dios yöawaja̧ a̧ja̧kwöbi, i̧'wi̧didanö edaja̧kwöbi bajalianö öwaisachibanö omukwatinobe Danielma. Baikwö laebobe Daniel ja̧ wene iwȩyudina jawama:

² Dios ötjönö yöawakwa̧ abönö, ötjö Danielma chu̧kwa ö̧tö̧chö chubudekwijatö wa̧pötakwa semana baledibanö.

³ Söi̧ kwakwawabi, itebiabi kwökönö, ja̧danö ubasobu o̧'do̧bubi owökönö ö̧töchö chö̧jijatö. Ju'wibi ja̧ wa̧pötakwa semana baledibanö ja'yubebi omewasobu dubawökönö chö̧jijatö, jwiinö cho̧'wo̧ tjoachobetjö̧.

⁴ Ja̧danö, wa̧pötakwa semana baledibanö ö̧töchö baledajo̧, o̧ba ajayi jawo̧, veinticuatronö möle, ojwe nöödö, Tigris mikwödö ö'öbö chö̧jijatö.

⁵ Ja̧danö, möakwö chedemi, bakwo̧nö chedijatö, jwiinö otiwado̧ dewado̧ 'dubawo̧nö, ödölö̧'anö coleasö̧jȩ bakwai̧ orotjö otikwöjȩ nönawo̧nö chedijatö.

⁶ Jo̧ba iteba'oma, nöinö mikwawi̧ inawiyadanö salöinö dejatinobe, ja̧danö öbama böba idejati̧danö dejatinobe. Öbajalebiyama dejewa'yu̧ ubö dejati̧danö dejatinobe, ja̧danö öjabi, ibȩjwa̧bi salöachibanö 'do̧tjaja̧ broncedanö salöinobe. Ja̧danö, yöa̧lenama, iwenema ba̧jekwadö jojodö bakobe jwötebali̧danö labinö ökwöinobe.

⁷ Ötjö Danielda jo̧banö chedijatö, ju'wedö ötjökwö ji̧nadöma ö'wiakwaö dötjibajinobetjö̧. Jobadöma chedökwenö tjedököjayonö, bakwo̧ ökwödökwö ö̧jobe jö̧ba̧lö tjöwaisinobe, ja̧danö yebabinö tjö̧bawö, ö'wiakwaö dötjibajinobe.

⁸ Jo̧kwajabetjö̧ jo̧dawa'ye jobe chö̧jibijatö, ja̧danö ötjöda ja̧ jojodö edajitjökö jawa chedijatö. Chedenama, chujulu 'dö̧ibaijinobe, ja̧danö chöbama deöja baibinobe ötjönö wajwitjachibanö.

⁹ Ja̧danö chedajökwe iwene ökwöobe cha̧ja̧kwenama, 'dö̧bachibö nijakwö apanö chöbamatijatö.

¹⁰ Jemi ikenama bakwo̧ ötjönö do̧atinobe, ja̧danö ötjönö möakwö a̧lapedinobe, chömamunöbi chu̧yu̧kijunöbi chö̧jobö. Jo̧kwajabetjö̧ chömamunö chu̧yu̧ki̧junö chö̧jijatö, jo̧kwaijayonö ina yebabinö tjö̧bawö chö̧jijatö.

¹¹ Ikenama ötjönö yöawinobe: —Daniel, Dios jwiinö ösödökweja, ja̧danö ökwönö yötawobö weajabe, jo̧kwajabetjö̧ a̧laibö yötawi̧ kwa̧ja̧kwo— jö̧ba̧lö. Jejenö yöa̧li̧tjö̧, cha̧laibijatö, jo̧kwaijayonö ina tjö̧tawijatö.

¹² Jejenö tjöbawö chö̧jiökwe, yöawinobe baikwö: —Daniel, yekabi, Diosma isabenö akebi̧ a̧ja̧kwobetjö̧. Jau Daniel, ökwöma Dios öba a'otjö, mikwawö̧kö̧sa̧ jö̧ba̧lö, kwedina jawa kwöwaisachibobö akebinobe Diosnö, ja̧danö ja̧ möletjö baikwö bajalenö, akebi̧ a̧ja̧kwo̧ Diosma, ja̧danö jejenö akebiökwe ökwönö yötawobö weajabe Diosma.

¹³ Jo̧kwaijayonö juluwanö chicho jö̧ta̧laja̧ma waekwatö, juluwanö akebaja̧ ikena yöbawö chichijayonö, chichemi ja'ötjö o̧'wo̧ luwo̧ sulabo̧ Persia niji luwedönö öbibö webo̧ma ötjönö tjöbeba̧lö ö̧jinobe, wa̧pötakwa semana baledibanö. Ja̧danö kwö̧jobekwö ichibökönö Persia luwo̧kwö kwakwabakwawö chö̧jiökwe, bajalianö Dios ömöayedö inesö juluwadö ángelesdötjö bakwo̧ Miguel mikwo̧ma ötjönö pjabatö ichibinobe, ja̧danö Miguelda okobetjö ölakwabikwawö ö̧jonö, ökwönö yöbawö chichajabe.

¹⁴ Jau Daniel, ökwö kwömöledö Israel jojodönö 'dö̧ibaji̧ möle baledakwa̧ kwöwaisachibobö yöbawö chichajabe, kwedina jawama 'dö̧ibaji̧ möle baledakwa̧ kwedinobetjö̧— jö̧ba̧lö yöawinobe.

¹⁵ Jobekwö yöa̧lena, ötjöma chöba nijakwö bȩtachibijatö, ja̧danö chiwene jwiinobe, jo̧banö yöta̧lobö.

¹⁶ Jejenö chiwene jwiökwe, bakwo̧ jojodanö ichejekwo̧ma cha̧jȩ mainobe. Jejenö maaja̧ ikena, chiwene tjeachajinobe, ja̧danö chabönö jo̧ ángelso̧nö yöta̧lijatö: —Chuluwo̧, chi̧'wi̧didanö chedinobetjö̧, chujulu 'dö̧ibajabe, chi'medawachibajabe, ja̧danö tjö̧bawö chö̧jobe.

¹⁷ Chuluwo̧, chujulu jwiobe ökwökwö yöta̧lakwawobö, ja̧danö wayobe cho̧'wo̧ chemobö— jö̧ba̧lö.

¹⁸ Jejenö yöta̧liökwe, jojodanö ichejekwo̧ma yemidanö ötjönö mainobe, ja̧danö chujuluwachibanö pjaatinobe.

¹⁹ Ja̧danö ötjönö yöa̧linobe: —Jojoso̧, Dios jwiinö ile niebökweja, yebabökönui, kwo̧'wo̧ ösöwachibanö ja̧wi. Kwujuluwachibanö ja̧nö yebabökönö ja̧wi— jö̧ba̧lö yöa̧linobe. Jejenö yöa̧litjö, chujuluwachibijatö, ja̧danö jo̧banö chatadijatö: —Tjo̧wi̧ ötjönö chujuluwachibanö pjakatajabe, jo̧kwajabetjö̧ yöba̧li̧ chuluwo̧— jö̧ba̧lö.

^20-21 Yöta̧liökwe, ángelso̧ma yöa̧linobe: —Daniel, ¿bai edö chichaja̧ kwöwaisiji̧ tajawedö chichaja̧jö jö̧ba̧lö? Baikwö yötawakwö, Dios isabenö wene wȩyukwa'ye laebi̧ jawa ökwönö yötawobö chichajabe, ja̧danö yöbawajo̧, juluwanö tjebachajö o̧'wo̧ luwo̧ sulabo̧ Persia luwo̧kwö ölakwabikwawö chö̧jobö ja̧kobe. Ja̧danö, jo̧bakwö kwakwabakwawö katatajenama o̧'wo̧ luwo̧ sulabo̧ Grecia luwo̧ ichakobe. Ökwödö Israel jojodönö inesö te'ada̧lakwawa luwo̧ ángel Miguelma ötjönö pjaatakobe, jo̧kwaijayonö ökwödö du̧jutajada 'diinö ja̧nö tjöbeba̧lö kwakwabakwawö te'ada̧ladösa— jö̧ba̧lö yöa̧linobe ángelma.