Daniel 1 - Dios Iwene

Nabucodonosor Israel jojodönö Judá nijinö ju̧kwadönö ujuluwina wene

¹ Judá nijitjö Joacim mikwo̧ma inesö la'aka luwo̧ ö̧binobe, ja̧danö Joacim jobe Jerusalénnö webö ö̧jonö, idaö̧kö wa̧pötakwa o̧biya weaja̧ ikena, öpöjojodöma tujuluwobö tjichinobe. Baikwö baledinobe, ju'wedö tjitebo la'aka luwo̧, Babilonia niji la'aka luwo̧ Nabucodonosor mikwo̧ma ichinobe iteda ömöayedö guardia jojodökwö, Judá niji jojodönö ujuluwobö. Ichibö, Judá nijitjö la'aka comunidad Jerusalén comunidad tjötjösawinobe, Jerusalén ju̧kwadönö tjujuluwobö.

² Ja̧danö, Isabenö Jo̧ Diosma weinobe, la'aka luwo̧ Joacimnöbi, ömöayedönöbi Nabucodonosor ujuluwobö. Ja̧danö Nabucodonosorma Joacimnö do̧atinobe, ja̧danö ju'wibi Dios Ejunö ji̧ jawatjöbi do̧atinobe, ja̧danö do̧batajo̧ öbibö ȩwa̧jinobe itebobe Babiloniabe. Ja̧danö, itebobe ichibö, iteda ösödökwe o̧'wo̧ jawa ejunö ödinobe Dios ejutjö do̧atina jawama. Jejenö iteda ösödökwe ejunö Dios eju jawa lödö i̧sebinobe Nabucodonosorma, chedemi ökwödö Babilonia jojodö dösödökwe o̧'wo̧ jawa duluwo̧ma bidö Judá jojodö tjösödökwe Diostjö bajalekwönönö juluwo̧ jö̧ba̧lö.

Danielnöbi, ömöledönöbi Nabucodonosor do̧atina wene

³ Ja̧danö, itebobe ichibajo̧, Nabucodonosorma iteda ejutjö otidadötjö la'aka luwo̧ Aspenaz mikwo̧nö weinobe öbibö tjichebajawö̧tjö ju'wedönö 'da̧batö ujunobö, Nabucodonosor ejunö ja̧nö ömöayedö baibanö tjö̧jobö. Aspenaznö weinobe, Judá niji inesö la'aka luwo̧ ömöledötjöbi, ju'wedö Judá la'aka luwedö tjömöledötjöbi, ömadö möayedönö 'da̧batö ujunobö.

⁴ Ja̧danö, sule bakwainö otiwadönöda, ja'yubebi suli̧ jwibadönöda, waisanö omukwatadönöda, otiwanö waisakwawa tjöba̧ja̧dinawö̧nöda, tupakwö waisachakwawa tjöwaisachibobö juluwadönöda, ja̧danö inesö la'aka luwo̧ ejunö ja̧nö tjotidobö waisadönöda 'da̧batö ujunobö weinobe Nabucodonosorma Aspenaznö. Ja̧danö tupakwö weinobe, jejenö 'da̧batö ujunajawö̧nö Babilonia jojodö tjiwene tjöba̧ja̧dobö, ja̧danö Babilonia jojodö tjiwȩyudina jawa tjöba̧ja̧dobö weinobe.

⁵ Ja̧danö, inesö otiwa kwakwawa tjukwobö weinobe, iteda u̧kwa kwakwawatjöbi, iteda owi̧ ubasobutjöbi weinobe Nabucodonosorma. Jejenö wa̧pötakwa o̧biya Babilonia jawa waisachöbi, la'aka luwo̧ u̧kwa kwakwawa kwanöbi tjöbaledöbo weinobe, ja̧danö jemi ikenama wa̧pötakwa o̧biya baledajadö, la'aka luwo̧ öba a'o ichejebö tjujunobö, iteda ömöayedö batjibanö, weinobe Nabucodonosorma.

⁶ Jejenö weökwe, Aspenazma tjichejebajawö̧tjö ju'wedönö omudawö ujuninobe, ja̧danö Judá nijitjö omudawö ujunajawö̧tjö ju'wedöma bidö, Daniel mikwo̧bi, Ananias mikwo̧bi, Misael mikwo̧bi, Azarías mikwo̧bi.

⁷ Ja̧danö, jobadönö omudawajo̧, Aspenazma jobadönö tjimi wainö imidinobe, Babilonia jojodö tjimikwi̧danö, baikwö: Danielnö Beltsasar jö̧ba̧lö imidinobe, ja̧danö Ananiasnö Sadrac jö̧ba̧lö imidinobe, ja̧danö Misael mikwo̧nö Mesac jö̧ba̧lö imidinobe, ja̧danö Azarías mikwo̧nö Abednego jö̧ba̧lö imidinobe.

Daniel Dios weökö jawa ukwobö öpöjödina wene

⁸ La'aka luwo̧ iteda u̧kwa kwakwawatjö tjukwobö weinajayonö, Danielma öwaisinobe, la'aka luwo̧ u̧kwama Dios weökö jawa Israel jojodö tjukwoböbi, ja̧danö tjowoböbi, jo̧kwajabetjö̧ chukwitjö̧ma yȩtekwinö chukwena, Dioskwö wene chujuna̧lakwawena jö̧ba̧lö öwaisinobe. Ja̧danö, jejenö öwaisobetjö̧, omukwatö ujuninobe, Dios weökö jawa chukwökakwo̧sa, ja̧danö chowökako̧sa, yȩtekwapji, jö̧ba̧lö. Jejenö omukwatö junajo̧, uluwo̧ Aspenaz mikwo̧nö aebinobe, ja̧ kwakwawa ukwobö weokobö, Dios öba a'otjö wene ujuna̧lapji jö̧ba̧lö.

⁹ Dios pjaatobetjö̧, Aspenazma Danielnö ösödinobe, ja̧danö lȩlö̧jinö edinobe Danielnö,

¹⁰ jo̧kwaijayonö Danielnö lȩlö̧jinö edijayonö, Daniel aebi̧ a̧ja̧kwobö öpöjödinobe, uluwo̧nö yeabobetjö̧. Danielnö atadinobe Aspenazma, baikwö: —Akebaja̧danö wetoböma yetabi. Chuluwo̧ inesö la'aka luwo̧ma weinobe, iteda u̧kwatjö kwukwaduwobö, ja̧danö, ökwöma weaja̧ kwakwawa kwökönö, ju'wida kwukwitjö̧ma, deöja jwöbachö kwö'dalökachena. Jejenö baleditjö̧ma chuluwo̧ma ökwönö edena, ju'wedö ökwödanö möayedötjö bajalekwönönö deöja jwöbachö 'dalöko̧nö edena, ja̧danö chuu bulatö loena, sulabenö te'ada̧lo̧ jö̧ba̧lö— atadinobe Aspenazma Danielnö.

¹¹ Jejenö Aspenaz öpöjödiökwe, Danielma jelo̧nöbi aebinobe, Aspenaz ömöayo̧nö. Aspenazdama kwakwawa iyaböma otidinokobe, ömöayedötjö ju'wedönö ujuninobe, kwakwawa iyawa luwedö batjibanö, ja̧danö jobadötjö bakwo̧nö Danielnöbi, ömöledönöbi kwakwawa iyawa luwo̧ baibanö ujuninobe. Jo̧kwajabetjö̧, jo̧ba kwakwawa iyawa luwo̧nö aebinobe Danielma.

¹² Jo̧banö aebinobe baikwö: —Domulataja möle baledibanö atebaja̧danö dukwobö weköbo, sule batjo jawada dukwobö weköbo, ja̧danö sule ojwiyoda dowobö weköbo, domulataja möle baledibanö.

¹³ Jemi ikenama, domulataja möle baledibajenama, döba edö badedö kwedo, didötjö o̧penönö otiwadö tjö̧jojobö jö̧ba̧lö, ökwödödaena, ju'wedö möayedö inesö la'aka luwo̧ u̧kwa kwadödaena. Ja̧danö, jejenö badedö edajo̧, kwomukwati̧danö du̧kwa weköbo— jö̧ba̧lö aebinobe Danielma.

¹⁴ Jejenö aebiökwe, te'ada̧lo̧ma Daniel aebaja̧ a̧ja̧kwinobe, ja̧danö aebaja̧danö domulataja möle batjo jawada, ojwiyoda weinobe, dakwö baledojobö jö̧ba̧lö.

¹⁵ Ja̧danö, domulataja möle baledibajenama, te'ada̧lo̧ma Danielnöbi ömöledönöbi edinobe, ju'wedö inesö la'aka luwo̧ u̧kwa kwadötjö bajalekwönönö otiwadönö, ju'wedötjö bajalekwönönö otiwanö nöbadönö.

¹⁶ Ja̧danö, jejenö edajo̧, jemi tupakwö sule batjo jawada tjukwobö, ja̧danö sule ojwiyoda tjowobö weinobe, inesö la'aka luwo̧ u̧kwa tjukwoböma weinokobe.

Danielnöbi, ömöledönöbi Dios pjaatina wene

¹⁷ Diosma isabenö otiwanö pjaatinobe Danielnöbi, wa̧medukwa ömöledönöbi, ju'wedötjö bajalekwönönö waisanö tjomukwatobö, ja̧danö ju'wedötjö bajalekwönönö Babilonia jojodö tjiwȩyudina jawabi, ju'wi tjöwaisachi̧ jawabi tjöwaisachibobö. Ja̧danö ju'wibi Danielnö pjaatinobe, tji̧'wi̧dinö tjedi̧ jawabi, tji̧'wi̧didanö tjedi̧ jawabi labebö lobö yöawobö.

Danielbi ömöledöbi la'aka luwo̧ Nabucodonosor öba a'o tjö̧jina wene

¹⁸ La'aka luwo̧ Nabucodonosorma ajayinö weinobe, wa̧pötakwa o̧biya baledibanö tjöwaisachobö, ja̧danö waisachajadö öba a'o ichibö tjöjamatobö. Ja̧danö, ja̧ wa̧pötakwa o̧biya baledibajenama, Nabucodonosor eju la'aka luwo̧ Aspenazma jobadönö öbibö ujuninobe, öba a'o tjöjamatobö.

¹⁹ Ja̧danö Nabucodonosorma böjö edö, ichejebawö̧kwö yöala̧kwawinobe bakwo̧nökwena, ja̧danö okobe deinö ichejebawö̧tjö bakwo̧bi deinobe Danieldanöbi, Ananiasdanöbi, Misaeldanöbi Azaríasdanöbi waiso̧ma. Jo̧kwajabetjö̧, jobadöma la'aka luwo̧ öba a'o tjö̧jinobe, la'aka luwo̧ waisanö omukwatö ö̧jobö pjabatadö batjibanö.

²⁰ Isabenö otiwanö waisanö tjomukwatinobe jobadöma. La'aka luwo̧ma nöinö abebö a̧ja̧kwinobe jobadönö, waisanö tjatadojobö jö̧ba̧lö. Waisanö omukwatakwawa ji̧ jawabi, waisakwawa ji̧ jawabi abebö a̧ja̧kwinobe, ja̧danö okobe deinö ju'wedötjö o̧penönö waisanö tjatadinobe. Okobe deinö Nabucodonosor ömöayedö mea boawa luwedötjöbi, yuawa luwedötjöbi jwiinö bajalekwönönö waisanö omukwatö tjatadinobe, domulatajanö baibanö jwiinö bajalekwönönö waisanö omukwatö tjatadinobe, Danielbi, ömöledöbi.

²¹ Ja̧danö, Danielma lekwe möle jobe Babilonianö ja̧nö la'aka luwo̧ waisanö omukwatobö pjabatö ö̧jinobe. Lekwe o̧biya jobe ö̧jinobe, la'aka luwo̧ Ciro mikwo̧ luwo̧ yöbawö weina o̧ba, ajayi o̧ba baibenanö kabatö.