Colosenses 4 - Dios Iwene

¹ Ökwödö tjömöayedö tjuluwedönö baikwö weta: Bakweminö ja̧köbaduwo jö̧ka̧laduwi̧danö ja̧baduwidönö kwömöayedöduwinöma, kwöwaisaduwobetjö̧ ökwödö kwuluwo̧duwima mölejȩbe jo̧, jö̧ba̧lö.

Pablo Colose jojodönö bajaleapo weina wene

² Ba̧kwȩlö̧jatebö Diosnö abebö kwö̧jaduwo. Jau chömöledö, te'ada̧lönö ja̧nö, Diosnö abebö kwö̧jaduwo, ja̧danö, Otiwanö pjaatajabe, jö̧ba̧lö Diosnö ösödö akebaduwonö.

^3-4 Ja̧danö, ökwödönö pjabatö Diosnö akebaduwo chömöledö, jojodönö jo̧ba iwene yödawobö pjaatakobetjö̧, jojodö wajwitjina wene, Cristo jawa wene yödawobö pjaatakobetjö̧. Ja̧danö, öwaetjöda ja̧ wene labebö lobö yötawobö akebaduwonö, yötawo jö̧ta̧li̧danö yötawobö akebaduwonö chömöledö. Jau chömöledö, ja̧ Cristo jawa wene yöbawö chö̧jobetjö̧, ka̧lena ba̧kwaweju okwa chö̧bobe babema.

⁵ Chömöledö, ju'wedö Cristonö ösödöködökwö ja̧bö kwö̧jaduwi̧ma waisanö omukwatö ja̧bö kwö̧jaduwo. Jobadönö Cristo jawa kwi̧sebaduwobö jȩnama, i̧sebö kwö̧jaduwo, jobadöbi tjö̧jibo jö̧ba̧lö.

⁶ Ja̧danö, jobadönö yöka̧laduwi̧ma, dösölö̧jinö yöka̧laduwodönö. Ja̧danö wanedö yötawa: Meyuwanöma yöka̧laduwoko, söinö yöka̧laduwodönö chömöledö. Ja̧danö, jojodö ökwödönö abebö tja̧ja̧kwenama, otiwanö kwatadaduwo jö̧ka̧laduwi̧danö atadakwawa kwöwaisaduwo chömöledö, otiwanö jobadönö kwatadaduwakobetjö̧.

Pablo bajaleapo yöawina

⁷ Chömöledö, Tíquico mikwo̧ma kwiteboduwibe i̧'yakwo̧. Jo̧ba Tíquicoma dösödökwe chömöledö, döjawo̧ Jesúsnö ösödo̧ jö̧ba̧lö, ja̧danö ökwödökwö jwaikwöda Duluwo̧ jawa otido̧ jo̧bama. Jo̧bama kwiteboduwibe ichibö ökwödönö yöawakobe okobe jwiinö ötjönö baledi̧ wenema.

⁸ Jejenö ökwödönö yöawo jö̧ba̧lö, jo̧banö wetajabe chömöledö, ökwödö dö̧ji̧ kwöwaisaduwo jö̧ba̧lö, ja̧danö kwo̧'wo̧ luwo̧duwi ösöwachibanö pjaato jö̧ba̧lö.

⁹ Ja̧danö, jo̧ba Tíquicokwö jelo̧bi i̧'yakobe, Onésimo mikwo̧ma. Jo̧ba Onésimoma jö̧a̧li̧danö ja̧bo̧, ja̧danö dösödökwe döjawo̧, ja̧danö ju'wibi jo̧bama ökwödö Colose jojodötjö jojo. Jobadöma okobe jwiinö bai baledi̧ wene yötjawakobe ökwödönö.

¹⁰ Aristarco mikwo̧ma ötjökwö ka̧lena bo̧ chömöledö, ja̧danö jo̧bama deawobedanö dokwa jö̧ba̧lö aebobe ökwödönö. Ja̧danö, Bernabé ömöledöso̧ Marcos mikwo̧bi deawobedanö dokwa jö̧ba̧lö aebobe ökwödönö. Jo̧ba Marcos mikwo̧nö belö ökwödönö yötawijatö chömöledö, kwiteboduwibe ichibitjö̧ma, kwösodaduwonö jö̧ba̧lö.

¹¹ Ja̧danö, Jesús mikwo̧, ju'wi imi Justo mikwo̧ma ökwödönö deawobedanö dokwa jö̧ba̧lö aebobe. Jobadöda judío jojodötjö ötjökwö otidadöma, Dios La'aka Luwo̧ Ö̧jobe jawa, ja̧danö jobadöma chujuluwachibanö pjatjatajabe chömöledö.

¹² Ja̧danö, ökwödö Colose jojodötjö jojo ja̧danö Cristo Jesús ömöayo̧ Epafras mikwo̧ma ökwödönö deawobedanö dokwa jö̧ba̧lö aebobe. Jo̧bama kabatökönö ökwödönö omukwatö nöinö Diosnö aebobe chömöledö, kwo̧'wo̧ luwo̧duwi da̧peachö kwö̧jaduwakobetjö̧, ja̧danö dötölatajanö omukwatökönö, jwaikwöda Dios ösödi̧ jawada ja̧bö kwö̧jaduwakobetjö̧.

¹³ Ötjöma jo̧banö chöwaisa chömöledö, Epafrasma isabenö 'diinö otidinobe ökwödönöbi, Laodicea comunidadnö ju̧kwadötjö Jesúsnö ösödadönöbi, Hierápolis comunidadnö ju̧kwadötjö Jesúsnö ösödadönöbi pjaatobö.

¹⁴ Ja̧danö dösödökwe dötölöso̧ Lucas mikwo̧bi, ja̧danö Demas mikwo̧bi detjawobedanö ökwödönö dokwa jö̧ba̧lö atjebobe.

¹⁵ Ja̧danö Laodicea comunidadnö ju̧kwadötjö Jesúsnö ösödadönöbi, Ninfas mikwujunöbi, Ninfas jejutjö ko̧ko̧kwö ba̧ja̧dö Jesúsnö ösödadönöbi yökawaduwo, Pabloma deawobedanö dokwa jö̧ba̧lö aebobe jö̧ba̧lö.

¹⁶ Chömöledö, ökwödö Colose jojodö böja kwialusöja yöka̧laduwaja̧ ikena, Laodiceanö ju̧kwadö Jesúsnö ösödadönö kwiyaduwo, jobadöbi yötja̧lo jö̧ba̧lö. Ja̧danö, jobadö Laodiceanö ju̧kwadönö chiwȩyudinöja kwialusöjama, ökwödöbi yöka̧laduwo.

¹⁷ Ja̧danö Arquipo mikwo̧nö baikwö yökawaduwo chömöledö, Dios jo̧banö otidobö weinama, tupakwö kaatenanö baibanö ja̧ otidö ö̧jobö yökawaduwonö.

¹⁸ Ötjö Pabloma biya̧ bajaleapo jawa chömamunö chiwȩyuda, ötjö Pabloma detawobedanö dokwa jö̧ba̧lö ateba. Chömöledö, ötjö ka̧lena chö̧bi̧ma kwo̧'wo̧ jwibibökönaduwi. Diosma ökwödönö lȩlö̧jinö edobö chösöda chömöledö. Biya̧data.