Colosenses 2 - Dios Iwene

¹ Yötawaduwakwö chömöledö, ökwödö Colose jojodöbi, Laodiceanö ju̧kwadö Jesúsnö ösödadöbi, ja̧danö ju'wedöbi ötjönö wajwiköbaduwobe edöma, jo̧kwaijayonö ina ökwödönö chedököjayonö, isabenö nöinö chotidobe, ökwödönö pjabatö.

² Jejenö chotidobe kwomajadeduwinö kwujuluwachibaduwakobetjö̧, ja̧danö bakobe kwömöledö Jesúsnö ösödadökwö dötewanö ja̧nö kwösödabikwawaduwakobetjö̧. Jau chömöledö, Dios ajayinö tojö ujuninökwenö kwöwaisaduwobö chösöda, Cristonöda kwöwaisaduwobö chösöda chömöledö, isabenö otiwanö kwöwaisaduwakobetjö̧, Dios i̧tji̧mubedösa jö̧ba̧lö.

³ Jo̧ba Cristoda okobe jwiinö jojodö ajayinö wajwitjina jawa waiso̧ma, jo̧batjö waisanö omukwatakwawabi, ja̧danö waisakwawabi döwaisachibo jö̧ba̧lö.

⁴ Jejenö yötawaduwakwö chömöledö, ju'wedö Aaa, biya̧ma waisakwawa ji̧ jö̧ba̧lö omöna yötja̧li̧ kwösödaduwapji jö̧ba̧lö.

⁵ Jau chömöledö, chiteba'o jelobe chö̧jijayonö, cho̧'wo̧ luwo̧ma ökwödökwö bakobe chö̧jobedanö ichejekwa. Ja̧danö cho̧'wo̧ luwo̧ ösöwachibanö chö̧jobe chömöledö, ja̧bö kwö̧jaduwo jö̧ka̧laduwi̧danö kwö̧jaduwobetjö̧, ja̧danö jwaikwöda Cristonö ösödö kwö̧jaduwobetjö̧.

Cristokwö dötewanö ja̧nöda isabenö ja̧kwawa jo̧be jö̧ba̧lö Pablo yöawina wene

⁶ Cristo Jesúsnö kwösödinaduwobe chömöledö, Duluwo̧ jö̧ba̧lö, jo̧kwajabetjö̧ jo̧bakwö dötewanö kwö̧jaduwobö jo̧be.

⁷ Wanedö yötawa chömöledö: Jo̧batjö pokwö kwö̧jaduwobe ichejekwa, jo̧kwajabetjö̧ kwö̧jaduwi̧ bö'diama 'diinö jo̧banö do̧ba̧lö kwöda̧peachaduwo, jo̧banö jwaikwöda ösödö kwö̧jaduwakobetjö̧. Jau chömöledö, jejenö ökwödönö tjöba̧ja̧dinadanö kwö̧jaduwo, ja̧danö jwaikwöda Diosnö ösödö kwö̧jaduwo, otiwanö pjabato̧ja jö̧ba̧lö.

⁸ Tjöbeba̧lakwawönö kwö̧jaduwo chömöledö, mikwa jwii̧ böjȩ waisakwawa jawa omöna yöba̧ladö yötjawi̧ a̧ja̧kwökönö, ökwödönö tjujuluwapji jö̧ba̧lö. Jobadö yötjawi̧ma, jojodö tja'dödö yötjawi̧ jawada, ja̧danö böjȩ a̧wȩtjö̧ yötjawi̧ jawada yötjawobe. Jobadö yötjawi̧ma Cristotjö ichökö ji̧ chömöledö, jo̧kwajabetjö̧ jobadö yötjawi̧ma a̧ja̧kwökönaduwi.

⁹ Jau chömöledö, jelobetjö Dios jawa kwisakwaduwoböma jwiobe, jojo babibina Cristoma okobe jwiinö Dios jawa ujuna̧lobetjö̧.

¹⁰ Cristoma okobe deinö luwedö inesö la'aka tjuluwo̧, ja̧danö weawa luwedö inesö la'aka tjuluwo̧ chömöledö. Ja̧danö jo̧banö dötewadö kwö̧jaduwobetjö̧, tjo̧wi̧ okobe jwiinö ja̧kwawa juna̧ladö bakibinaduwobe ida̧ökö chömöledö.

¹¹ Ja̧danö, Cristonö dötewadö kwö̧jaduwobetjö̧, isabenö 'wibekwadöja chömöledö. Ja̧ 'wiekwa yöta̧li̧ma, wame jojodö tjötade bajalesado̧ 'witjekwi̧ma yöta̧lökö chömöledö, ju'wi tjo̧'wo̧ luwo̧ jawa 'wiekwada yötawa, Cristo ja̧i̧da. Cristoma ajayi sulabenö kwösödinaduwa 'wibebö loinobe ichejekwa, ja̧ ujulutjö kwö̧jibaduwinö ja̧bö, jo̧kwajabetjö̧ isabenö 'wibekwadöja chömöledö.

¹² Jau chömöledö, Diosma ökwödönö ubu̧datinobedanö ichejekwa, Cristokwö i̧lȩdo̧ okwa ökwödönöbi tjo̧tjinö ja̧bö. Ja̧danö, Diosma isabenö juluwo̧ jö̧ba̧lö kwösödaduwiökwe, Cristonö woawatjö tjeachajinö ja̧binama ökwödönöbi Cristokwö tjekachajaduwinö ja̧inobe.

¹³ Ajayinöma Dios weökö jawa ja̧köbinaduwobetjö̧, ja̧danö judío jojodöböködö kwö̧jinaduwobetjö̧, kwo̧'wo̧ luwo̧duwinö wobinadöda kwö̧jinaduwobe chömöledö, jo̧kwaijayonö Diosma Cristokwö 'yakibajaduwinö ja̧inobe. Jau chömöledö, Diosma dusula söbebö loinobe.

¹⁴ Wanedö yötawa, ökwödö dumusidi̧ wȩyukwöja, bidöma wotjakwedö jö̧ba̧lö wȩyukwöjama, Diosma ja̧ wȩyukwöja towisa'onö pöbebö bȩbö söbebö loinobe.

¹⁵ Ja̧danö, mölejȩbe luwedö ja̧danö weawa luwedö tjujulu söbebö lobö, jobadönö ujuluwinobe, ja̧danö wanedö yötawa, okobe deinö tjöba a'otjö tjöbaledobö ja̧inobe, bidöma chujuluwajawö̧ jö̧ba̧lö.

¹⁶ Jo̧kwajabetjö̧ ju'wedö kwakwawa jawa ja̧danö owawa jawa wetji̧ma, a̧ja̧kwökönaduwi, ja̧ jawa mikwawokobetjö̧. Ja̧danö wainö ji̧ möle pjiesta jawa wetji̧ma a̧ja̧kwökönaduwi, ja̧danö yö̧te jawo̧ pjiesta jawa wetji̧ a̧ja̧kwökönaduwi, ja̧danö otikwökö möle jawa wetji̧ma a̧ja̧kwökönaduwi.

¹⁷ Ja̧ jawama mikwawökö ji̧ babema chömöledö. Baikwö yötawa: Ja̧ pjiesta jawa Dios weinenama, tupakwö ichakwo̧nö badekwachinö weinobe, jo̧banö tjomukwato jö̧ba̧lö. Jo̧kwaijayonö, ja̧ jawa badekwachökwe Cristoma ida̧ökö ichibinobetjö̧, tupakwö ja̧ jawa domukwatobö jwiobe. Jau chömöledö, Cristoda isabenö mikwawo̧ma, jo̧bama isabenö jo̧.

¹⁸ Ja̧danö ju'wedöma yötja̧lena, Aaa, chi̧'wi̧di̧danö chedajabe, usulasedö mikwawöködö tjö̧ji̧danö dö̧jitjö̧ma otiwena, ja̧danö ángelesdönö dösöditjö̧ma otiwena, jö̧ba̧lö yötja̧lena. Jejenö ja̧böködöma sulabedö jö̧ba̧lö yötja̧lena, jo̧kwaijayonö jejenö yöba̧ladö wetji̧ma a̧ja̧kwökönaduwi. Jobadöma böjȩ jojodö tjomukwati̧da omukwatö, Otiwadösa, jö̧ba̧lö tjomukwatobe chömöledö,

¹⁹ ja̧danö Cristonö dötewö tjö̧jokobetjö̧ jejenö tjomukwatobe chömöledö. Jau chömöledö, ökwödö Cristonö ösödadöma Cristo iteba'obedösa, ja̧danö Cristoda jo̧ba iteba'obedötjö uudanö jo̧ma. Ja̧danö wanedö yötawa: Ökwödö jo̧ba iteba'obedöma, bakobe jo̧ba uudanö jo̧kwö dötewadö dö̧jobetjö̧, jo̧batjö ja̧kwawa jawa emö döda̧peachobe. Jau chömöledö, ja̧ döda̧peachi̧ma, ökwödö jawaokobe, Diostjöda ichi̧ jejenö döda̧peachi̧ma.

Cristokwö wodinobetjö̧, böjȩ jawa domukwatoböma jwia jö̧ba̧lö Pablo yöawina wene

²⁰ Chömöledö, ökwödöma bakobe Cristokwö woköbinaduwobe, ¿jö̧tö? Ja̧danö, jejenö woköbinaduwobetjö̧, a̧wȩtjö̧ tjujulutjö kwö̧jibinaduwobe, ¿jö̧tö? Jo̧kwajabetjö̧ ¿tajawedö ina böjȩ jojodödanö kwö̧jaduwobeda chömöledö? ¿Tajawedö wetji̧ jawa ina kwa̧ja̧kwaduwobeda?

²¹ Aaa, biya̧ kwakwawama do̧batökönuwi, ja̧danö biya̧ kwakwawama 'dȩbawökönuwi, ja̧danö biya̧ kwakwawa mabökönuwi, jö̧ba̧lö wetji̧ma ¿tajawedö kwa̧ja̧kwaduwobeda?

²² Ja̧ jawama sule jojodö wetji̧da, ja̧danö jojodö tjöba̧ja̧di̧ jawada. Ja̧danö ju'wibi yötawaduwakwö chömöledö, ja̧ kwakwawa jawama okobe jwiinö 'dö̧ibobe, dukwaja̧ okobema.

²³ Jau chömöledö, jejenö ja̧badö ja̧tji̧ edö, böjȩ jojodöma, Aaa, waisanö ja̧badöwe, jö̧ba̧lö tjomukwatena. Jobadö ángelesdönö tjösödobe edö, ja̧danö usulasedö mikwawöködö tjö̧ji̧danö tjö̧jobe edö, ja̧danö tjiteba'o usula emawinö ja̧tjobe edö, böjȩ jojodöma, Aaa, waisanö ja̧badöwe, jö̧ba̧lö tjomukwatena. Jo̧kwaijayonö baikwö yötawaduwakwö chömöledö, ja̧tji̧ma waisanö ja̧awadanö ichejekwijayonö, isabenö pjaatökö ji̧, ja̧danö sulabenö dösödi̧ jawa ja̧dapji jö̧ba̧löma pjaatökö ji̧.