Colosenses 1 - Dios Iwene

Pablo Colose jojodönö iwȩyudina'yetjö ajayi jawa

¹ Ötjöma Pablo mikwo̧sa, ja̧danö Diosma iteda ösödi̧danö ötjönö 'da̧batö ujuninobe, Cristo Jesús webawo̧ batibanö. Döjawo̧ Timoteokwö, böja kwialusöja chiwȩyudaduwakwö,

² chö̧ja̧wo̧dö Colose jojodötjö jwaikwöda Cristonö ösödadö Dios ömöledönö. Dabe'do Dios ökwödönö lȩlö̧jinö edobö chösöda, ja̧danö kwo̧'wo̧ luwo̧duwi ösöwachibanö pjaatobö chösöda.

Jesúsnö kwösödaduwobetjö̧, Diosnö ösödö adebobe ökwödönö, jö̧ba̧lö Pablo yöawina wene

^3-4 Chömöledö, ökwödönö da̧ja̧kwijatö baikwö: Colose jojodöma Cristo Jesúsnö ösödadötö, jö̧ba̧lö, ja̧danö okobe deinö Dios ömöledönö ösödabikwawö ju̧kwadötö, jö̧ba̧lö. Jejenö da̧ja̧kwinobetjö̧, ba̧kwȩlö̧jatebö ökwödönö omukwatö Diosnö, Duluwo̧ Jesucristo Abe'do Diosnö adebenama, jo̧banö ösödö adebobe, otiwanö ökwödönö pjaatinobe, jö̧ba̧lö.

⁵ Jau chömöledö, isabenö wene otiwa jawa wenema kwa̧ja̧kwinaduwobe, ja̧ wene ösödadöma mölejȩbe otiwanö tjö̧jakwedö jö̧ba̧lö. Jo̧kwajabetjö̧, mölejȩbe dö̧jakwedösa jö̧ba̧lö Cristo Jesúsnö kwösödinaduwobe, ja̧danö kwömöledö Jesúsnö ösödadönö ösödabikwawö kwö̧jaduwobe.

^6-7 Jau chömöledö, ökwödöbi ja̧ otiwa jawa wene kwa̧ja̧kwinaduwobe, böjȩ bakwameachibanö jojodö tja̧ja̧kwi̧danö. Ökwödöma Epafras mikwo̧ yöawi̧ kwa̧ja̧kwinaduwobe isabenö wene Dios jojodönö lȩlö̧jinö edö pjaati̧ wenema, ¿jö̧tö? Jau chömöledö, otiwanö jweinö kwa̧ja̧kwinaduwobe, ja̧danö ja̧ wene kwa̧ja̧kwinaduwa möletjö baikwö bajalenö, ja̧ wenema ökwödönö kwöbalewachaduwinö ja̧obedanö ichejekwa, ju'wedö böjȩ bakwameachibanö jojodönö tjöbalewachinö ja̧i̧danö. Ja̧danö wanedö yötawa chömöledö: Ja̧ wenema tupakwö nöachobedanö ichejekwa, jelobebi, jelobebi ju̧kwadö tja̧ja̧kwobetjö̧. Jau chömöledö, dömöledöso̧ Jesús ömöayo̧ jö̧ba̧lö dösödökwe Epafrasma jwaikwöda Cristo jawa otido̧. Jo̧bama ötjönö pjabatö, ökwödönö yötawo jö̧ta̧linama ökwödö Colose jojodönö yöawinobe chömöledö.

⁸ Ja̧danö jo̧bada ichö ökwödönö yöawinobe Dios O̧'wo̧ Luwo̧ pjaatawö̧ Colose jojodöma ösödabikwawö ju̧kwadötö jö̧ba̧lö.

⁹ Jo̧kwajabetjö̧ ökwödönö da̧ja̧kwina möle baikwö bajalenö, kabatökönö ökwödönö omukwatö Diosnö adebobe chömöledö. Jau chömöledö, Diosnö adebobe, okobe jwiinö jo̧ba ösödi̧ma ökwödönö öba̧ja̧do jö̧ba̧lö. Dios O̧'wo̧ Luwo̧ ökwödönö pjaatobö adebobe chömöledö, waisanö omukwatö kwöwaisaduwobö Dios ösödi̧ma,

¹⁰ Duluwo̧ ömöledö tjö̧jo jö̧tja̧li̧danö kwö̧jaduwo jö̧ba̧lö. Jau chömöledö, Duluwo̧ ösödi̧danö ja̧bö kwö̧jaduwobö dösöda, ja̧danö okobe jwiinö otiwanö ja̧awa jwaikwöda ja̧bö kwö̧jaduwobö dösöda, ja̧danö tupakwö Diosnö kwöwaisaduwobö dösöda.

¹¹ Ja̧danö Dios inesö ujulutjö jwiinö kwujuluwachibaduwobö dösöda, me'dawachibökönö kwo̧'wo̧ 'dibachibö kwo̧'wo̧ ösöwanö kwö̧jaduwakobetjö̧,

¹² ja̧danö kwo̧'wo̧ ösöwanö ja̧nö Dabe'do Diosnö kwösödaduwakobetjö̧, otiwanö pjabato̧ja jö̧ba̧lö. Jau chömöledö, Dios ömöledöma, mölejȩbe ja̧nö Dios iyi̧tjö tjemakwedö, ¿jö̧tö? Ja̧danö, Dabe'do Diosma ökwödönö ja̧inobe, ja̧ jawa demo jö̧ba̧ladö badibanö.

¹³ Jo̧ba Diosma yȩa'wotjö, Awetja ujulutjö dö̧jibanö ja̧inobe, ja̧danö iteda ösödökwe Itji̧ la'aka luwo̧ ö̧jobe dichibanö ja̧inobe.

¹⁴ Jau chömöledö, iteda Itji̧nötjö Diosma Awetja ujulutjö dö̧jibanö ja̧inobe, sulabe dujuna̧li̧ söbebö lobö.

Cristoda inesö la'aka juluwo̧ma jö̧ba̧lö Pablo yöawina wene

¹⁵ Jo̧ba Cristonö dedenama, öwawö̧kö̧ Diosnöbi dedobedanö ichejekwa, Cristoma okobe jwiinö Dios jawa i̧sekwobetjö̧. Ja̧danö, jo̧bama okobe deinö Dios otidinawö̧tjöbi, okobe jwiinö Dios otidina jawatjöbi la'aka luwo̧danö jo̧ma jo̧ba Cristoda,

¹⁶ Diosma jo̧banötjö okobe jwiinöbi okobe deinöbi otidinobetjö̧. Jau chömöledö, Cristonötjö Diosma okobe jwiinöbi okobe deinöbi otidinobe, mölejȩnö ji̧bi, böjȩnö ji̧bi, jojodö tjedi̧ jawabi, tjedökö jawabi. Cristonötjö Diosma okobe deinö luwedönö ujuninobe, böjȩ luwedönöbi, mölejȩ luwedönöbi. Jau chömöledö, Cristonötjö okobe jwiinöbi okobe deinöbi otidinobe Diosma, Cristo ösödi̧danö tjö̧jo jö̧ba̧lö.

¹⁷ Jo̧bada okobe deinötjöbi, okobe jwiinötjöbi ajayinö ji̧nama, ja̧danö okobe jwiinöbi okobe deinöbi iteda ujulunö tjö̧jobe.

¹⁸ Ja̧danö, jo̧banö ösödadö iteda iteba'o babibinadötjö uudanö jo̧ la'aka luwo̧ma Cristoda, jo̧bada iteda ömöledönö ja̧kwawa iyo̧ma, woawatjö tjetjachajakwedötjö jo̧bada woawatjö ajayinö tjebachajinama. Jejenö jo̧be chömöledö, jo̧bada inesö la'aka luwo̧ ö̧jo jö̧ba̧lö.

¹⁹ Jau chömöledö, Diosda omukwatö ujuninadanö, okobe jwiinö Dios jawa juna̧lo̧ma Cristoda,

²⁰ ja̧danö Diosda omukwatö ujuninobe, iteda Itji̧ Cristonötjö okobe deinö mölejȩbe ju̧kwadöbi, böjȩnö ju̧kwadöbi yemidanö Dioskwö tjichibanö ja̧obö, ja̧danö iteda Itji̧ towisa'onö ja̧nö ökwösobu ebawinö woinobetjö̧ Diosma jo̧bakwö wene dujuna̧li̧ söbebö loinobe.

Ajayinö Dios öpöjojodö kwö̧jinaduwajayonö, Cristo midawö woinobetjö̧, babema Dios ömöledöja jö̧ba̧lö Pablo yöawina wene

²¹ Ökwödö Colose jojodöma ajayinö Diostjö ödö kwö̧jinaduwobe, ja̧danö sulabenö omukwatö, ja̧danö sulabenö ja̧bö jo̧banö öpöjödö kwö̧jinaduwobe, ¿jö̧tö?

²² Jo̧kwaijayonö, babema iteda Itji̧ böjȩ jojoso̧ baibanö midawö woinobetjö̧, Diosma iteda ömöledö bakibaduwanö ja̧inobe, ja̧danö ökwödönö 'da̧batö ujuninobe, bakwainö sulabe jwibadö, ja̧danö wene jwibadö jo̧ba öba a'o kwö̧jaduwakobetjö̧.

²³ Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.

Jesúsnö ösödadö tjömöayo̧danö jo̧sa jö̧ba̧lö Pablo yöawina wene

²⁴ Chömöledö, ökwödönö pjabatö usula chemawobe, ja̧danö jejenö ökwödönö pjabatö usula chemawobetjö̧, cho̧'wo̧ ösöwanö chö̧jobe. Jau chömöledö, ökwödö Cristo iteba'obedö usula demawobö jo̧be, ja̧danö Cristo iteba'obedö usula tjemawo jö̧tja̧li̧ma, ötjöma pjabatö usula emawö chö̧jobe.

²⁵ Jau chömöledö, Diosma ötjönö ujuninobe, Cristonö ösödadö tjömöayo̧ batibanö, ja̧danö chotidobö ujuninobe, Dios iwene okobe jwiinö yötawo jö̧ba̧lö.

²⁶ Jau chömöledö, Dios la'akatjöda tojö ujunina wene yötawobe. Ajayima Diosma ja̧ wene tojö ujuninobe chömöledö, jo̧kwaijayonö babema iteda ömöledönö i̧sebinobe.

²⁷ Jojodö ajayinö wajwitjina wene Diosma iteda ömöledönö i̧sebobö jö̧a̧lobe, inesö otiwi̧ wenema. Ja̧danö ja̧ wenema sule judío jojodönöda i̧sebobömaökö, judío jojodöböködönöbi ja̧ ajayinö wajwitjina wene i̧sebobe chömöledö. Ja̧ wajwitjina wenema biya̧ chömöledö, Cristoma kwo̧'wo̧ luwo̧duwinö ö̧jobetjö̧, inesö otiwobe mölejȩbe kwö̧jaduwakwedöja jö̧ba̧lö.

²⁸ Jo̧kwajabetjö̧, Cristonö yödawobe okobe deinö jojodönö chömöledö. Jau chömöledö waisanö omukwatö okobe deinö jojodönö lȩbebö yödawobe, ja̧danö jobadönö döba̧ja̧dobe, jobadö bakwo̧nökwena Cristokwö dötewanö ja̧nö tjo̧'wo̧ luwo̧nö tjöda̧peacho jö̧ba̧lö, ja̧danö wanedö yötawa jejenö da̧peachajadönö Dios öba a'o öbibö dujuno jö̧ba̧lö.

²⁹ Jejenö okobe deinö chöda̧pedo jö̧ba̧lö ötjöma usula emawö chotidobe chömöledö. Jau chömöledö, Cristoma ötjönö ujulu iyobe, ja̧ chotido jö̧ba̧lö, ja̧danö iyaja̧ ujulunö jwaikwöda jejenö otidö chö̧jobe.