Apocalipsis 9 - Dios Iwene

Trompeta pjubo̧, bakwamusanu pjubo̧ baibanö pjuina wene

¹ Jemi ikena trompeta pjubo̧, bakwamusanu pjubo̧ baibanö pjuenama sili'idanö ichejekwo̧, mölejȩbetjö nijakwö mebo̧nö chedijatö. Ja̧danö, jo̧banö Dios iyobe chedijatö, yawepi̧, böjȩ teebe laju apjude po̧ekwapi̧ma. Jajuma yelösöda jwiinö möaju, okwabi öwawökönö möaju.

² Ja̧danö, jo̧ba sili'idanö ichejekwo̧ma, jaju apjude po̧ebemi lajutjö imiyu'wo nöinö kaamobe chedijatö. Jejenö nöinö kaamobetjö̧ ja̧wo̧bi, möbi okobe jwiinö yȩatibobe chedijatö, ja'wo imiyu'wotjö.

³ Jemi ikenama, ja'wo imiyu'wotjö ma̧la̧ka̧yö̧, yelösöda ba̧jekwadö latjekwibobe chedijatö. Jobadönöma tjujulu iyajawö̧, i̧ti̧yu̧dö lotjawi̧danö lotjawobö.

⁴ Ja̧danö, jobadö ma̧la̧ka̧yö̧ma, böjȩnö ju̧kwadö Diosnö öpöjöjödadönö lotjawobö weawö̧, Dios u̧kwa seyu tjöbanö dobö wȩyukwöködönöda. Ja̧danö, böjȩma sulabenö ja̧tjoböma weököwö̧, meje'yebi, okobe jwiinö po̧kwi̧bi, towibiyabi sulabenö ja̧bökönö, sule Diosnö öpöjödadönöda.

⁵ Ja̧danö, jobadö ma̧la̧ka̧yö̧ma ja̧wo̧dö bakwamu luwanö Diosnö öpöjödadönö lotjawobö weinawö̧. Lotjawajawö̧ma inia tjöböda tjö̧jakwedö, ö'wö batjibökönö. Yelösöda, lotjibenama jwiinö nibadö, itiyu loibena nii̧danö.

⁶ Ja̧ mölema, bakwo̧ loibajökwema, ¡Akö, akö, ö'wö batibowe! jö̧ba̧lö, ubudekwabijayonö ö'wö baibökakwo̧. Inia tjöbö kabatibökönö ö̧jakwo̧.

Juan ma̧la̧ka̧yö̧nö, wainö ichejekwadönö edina wene

⁷ Jobadö chedinawö̧ ma̧la̧ka̧yö̧ma wainö ichejekwadö. Ka̧ba̧yu̧dödanö ichejekwadö, guardia tja̧jwi̧mu ka̧ba̧yu̧dödanö. Ja̧danö, 'dii̧ jawatjö tjöeba̧linö 'dubawadö, 'bötjabikwawakwedö tja̧jwi̧munö 'dutjati̧danö. Ja̧danö, tjuunö butjawaka, 'dii̧ ökiya, la'aka luwedö tjubutjawi̧ ökiyadanö, orotjö otikwa ökiya butjawadö. Tjöbabi jojodö tjöbadanö ja̧wö̧.

⁸ Ja̧danö, tjöwö'yema ya̧dö tjöwö'yedanö la̧wö̧. Ja̧danö, tjo'yebiyama didiba o'yebiyadanö la̧wö̧. Yelösöda, tjo'yebiyama sȩbadö.

⁹ Ja̧danö, jobadö ma̧la̧ka̧yö̧ma tjomukonö 'diöse tjöeba̧lawö̧, 'bötjabikwawakwedö tjomuko tjöeba̧linö 'dutjawi̧danö. Ja̧danö, jobadöma kötja̧lenama labinö ökwöinö köba̧ladö, tjo̧wa̧ja̧pi̧yatjö ökwöi̧ma. Yelösöda, ka̧ba̧yu̧dö ba̧jekwadö 'bötjabikwawakwedö kolukiyanö a̧jadönö töbö, juluwanö ö'ötjakwawi̧ ökwöi̧danö labinö ökwöinö köba̧ladö, tjo̧wa̧ja̧pi̧yatjö ökwöi̧ma.

¹⁰ Jobadö ma̧la̧ka̧yö̧ma itiyu ölö̧'i̧danö ja̧wö̧. Ja̧danö, jobadöma, i̧ti̧yu̧dö lotjawi̧danö lobawadö. Ja̧wo̧dö bakwamu luwanö Diosnö öpöjödadönö, lotjawobö weawö̧, inia tjötjinö.

¹¹ Jobadö ma̧la̧ka̧yö̧ tjuluwo̧ma sulabo̧ ángelso̧. Jo̧bama böjȩ teebe, laju a'o ja̧nö te'ada̧lo̧. Jo̧bama hebreo tjiwenenö Abadón mikwo̧. Ja̧danö, griego tjiwenenö Apolión mikwo̧, ma̧la̧ka̧yö̧ tjuluwo̧ma.

Juan yöawina wene: —Ina, ju'wi, dötölatajanö baibanö inia tjötjina baledakobe— jö̧ba̧lö

¹² Ja̧ ma̧la̧ka̧yö̧ inia tjötjinö ja̧tjobe chedinama, abönö inia tjötjinö baledi̧. Ina, jemi ikena trompeta pjubadö du̧ju̧tajama pjutjakobe, bakwo̧nökwena, ju'wi inia tjötjinö baledakwa̧ abönö.

Trompeta pjubo̧, jelemutjö bakwanusanu pjubo̧ baibanö pjuina wene

¹³ Ja̧danö, jemi ikena ángel trompeta pjubo̧, jelemutjö bakwanusanu pjubo̧ baibanö pjuenama iwene ökwi̧ cha̧ja̧kwijatö. Ja̧ iwenema, Dios ö̧bemi badeibö, söinö nöekwi̧ jawa juwö iyawapjo, orotjö otikwapjotjö ökwöi̧ cha̧ja̧kwijatö, ö'wejemu jawa ö'ibiya ju̧kwa 'do̧'do̧kwetenia.

¹⁴ Ja̧danö, trompeta pjubo̧nö webö ökwöi̧ cha̧ja̧kwijatö: —Sulabedö ángelesdönö ejati latjebo, ojwe nöödö Eufrates mikwödö ö'öbö di̧batö ujuninawö̧nöma —jö̧ba̧lö, ökwöi̧ cha̧ja̧kwijatö.

¹⁵ Jejenö weökwe jobadö sulabedö ángelesdönö, Dios ajayinö nu'yö ujuninawö̧nöma latjekwobö ejatobe chedijatö, Diosma jobadö latjekwobö iteda badedö ujunina möle badekwachajobetjö̧. Ja̧danö, jobadö latjekwakwa̧ badekwachakwa̧ma, o̧babi, ja̧wo̧bi, mölebi, horabi badedö junijetö Diosma ajayinöma. Ja̧danö, sulabedö ángelesdöma jojodö böjȩ okobe jwiinö ju̧kwadötjö ju'wedönöda kwabawö lotjobö latjekwobe chedijatö.

¹⁶ Ja̧danö, chedemi ju'wedönöbi chedijatö, ba̧jekwadönö, sulabedö labekwajadö tjömöayedönö. Jobadöma ka̧ba̧yu̧dönö wa̧nö tji̧'yobe chedijatö. Ju'wedö yötjawi̧ cha̧ja̧kwijatö, ¿Dokwa ba̧jekwadöda ka̧ba̧yu̧dönö wa̧nö 'ya̧döma? Dos cientos mil jenanö, jö̧ba̧lö, atadi̧ cha̧ja̧kwijatö.

¹⁷ Ja̧danö, ötjönö i̧sebi̧ma, baikwö chedijatö, abökönö chi̧'wi̧di̧danö: Jobadö ka̧ba̧yu̧dönö wa̧nö 'ya̧döma tjomuko tjöeba̧li̧ 'dubawadö. Ja̧ tjöeba̧li̧ 'dii̧ jawa 'dutjawi̧ma duwi̧, ökwöla ubi̧danö duwi̧. Ja̧danö, ö̧'dö̧wibi, duwapjayibi, ja̧ jawa tjöeba̧li̧ 'dutjawi̧ jawama. Ja̧danö, tja̧jwi̧mu ka̧ba̧yu̧döma, tjuuma, di̧di̧ba̧dö tjuudanö ichejekwadö. Ja̧danö, jobadö ka̧ba̧yu̧dö tjaatjöma ökwöla ubi̧kwö, imiyu'wokwö tubinö pjubadö. Ja̧danö, ju'wi jawa, azufre mikwi̧ laebi̧ chedijatö, jwiinö tubinö ubi̧ jawa, jobadö ka̧ba̧yu̧dö tjaatjö.

¹⁸ Ja̧danö, ökwöla ubi̧, imiyu'wo, azufre, ja̧ wa̧pötakwa jawa, ka̧ba̧yu̧dö tjaatjö laebi̧tjö jojodötjö ju'wedöma wotjawinö ja̧tjobe chedijatö.

¹⁹ Ja̧danö, jobadö ka̧ba̧yu̧döma, tjaatjö laebi̧bi, tjöwali'bijunöbi jwiinö juluwi̧ juna̧ladö. Tjöwali'bijuma a̧ko̧'dö̧ tjuubiyadanö lö̧jawö̧. Ja̧ tjöwali'biju bajalema tjuubiya lö̧jawö̧. Ja̧danö, tjöwali'biju bajale tjuubiya lö̧jinö jojodönö yelösöda yö̧yö̧badö. Jejenö ötjönö i̧sebi̧ chedijatö.

²⁰ Ina i̧sebi̧ chedijatö. Yelösöda, ka̧ba̧yu̧döma inia tjötjinö ba̧jekwadö wotjawinö ja̧tjobe chedijatö. Jejenö ji̧jayonö, ju'wedö woböködöma, ina sulabenö omukwatö ju̧kwadönö chedijatö. Tjomukwati̧ tjöbalewacho jö̧tja̧laja̧ma balewachökönö ju̧kwadönö chedijatö. Ina jobadöma Awetja ömöayedönö ösödöbi, o̧'wo̧ jawa ösödöbi, sulabenö tjomukwati̧ kabatibökönö ju̧kwadö. Ja̧ o̧'wo̧ jawa tjösödi̧ma, orotjö platatjö broncetjö towitjö otikwa o̧'wo̧ jawama 'yaa̧lökö. Edöbi edökö. A̧ja̧kwöbi a̧ja̧kwökö. Kwebachöbi kweachökö o̧'wo̧ jawama. Yayonö jobadöma sulabenö tjomukwati̧ kabatibökönö ja̧ jawa ösödö ju̧kwadönö chedijatö.

²¹ Ja̧danö, jobadöma idöda tjösödi̧da omukwatö ju̧kwadö. Jojodönö kwabawö lotji̧bi, mea boawa ja̧tji̧bi, tjilekwobökujukwö tjilekwebökökwö tjö̧ji̧bi, tjönaukwabi̧bi kabatibö balewachöködö. Jejenö ötjönö i̧sebi̧ chedijatö.