Apocalipsis 8 - Dios Iwene

Ösöja töawa'be 'dö̧ibajemi sa'be ji̧na wene

¹ Ikenama Obeja Itji̧danö Jo̧ma ösöja töawa'be 'dö̧ibajemi sa'be kaebobe chedijatö, jelemutjö dötölatajasa'be baibanö. Kaebena mölejȩbetjöma wi̧ baibobe chedijatö, media hora jȩnanö.

² Jemi ikenama chedijatö ángelesdönö, jelemutjö du̧ju̧tajanö, Dios öba a'o ju̧kwadönö. Jobadönö iyabobe chedijatö, bakwo̧nökwena, pjuawa onu, trompeta mikwi̧.

³ Jemi ikenama jelo̧ ángel ichö, juwö iyawemi la'aka jamato̧nö chedijatö. Jo̧ba dȩja̧'do̧danö ichejekwa'do̧, orotjö otikwa'do̧ do̧ba̧lo̧nö chedijatö. Ja̧'do̧ma söinö 'dö̧ekwi̧ jawa, juwawa okwa'do̧. Ja̧danö, söinö nöekwi̧ jawa iyajökwe, jo̧ba ángelma, ja̧ söinö nöekwi̧ jawakwö, Dios ömöledö babibinadö atjebi̧kwö ja'do̧ okwa iwiwodobe chedijatö. Wiwodajo̧, ujuwobe chedijatö.

⁴ Ja̧danö, söinö 'dö̧ekwi̧ jawakwö Diosnö atjebi̧ jawakwö ubemi imiyu'woma, Dios ö̧bemi badeibö kaamobe chedijatö, ángel juwö iyajemitjö.

⁵ Ja̧danö, ángelma juwö iyawelö ujuwaja̧pja̧ yemidanö juwawa okwa'do̧nö anajo̧ ja̧'do̧nö labinö nijibe wa̧ebobe chedijatö. Nijibe wa̧ebena böba labinö kwawobe ökwöi̧ cha̧ja̧kwijatö. Ja̧danö, tjiwene ökwöi̧bi cha̧ja̧kwijatö. Böba nei̧bi, ja̧danö, böjȩbi jwiinö tjö̧bebö lileibobe chedijatö.

Trompeta juna̧ladö pjutjobe Juan edina wene

⁶ Ikenama ángelesdö jelemutjö du̧ju̧tajanö, trompeta iyajawö̧ma ida̧ökö, trompeta pjutjobö tjö̧jobe chedijatö.

⁷ Abönö pjubo̧ pjuena mölejȩbetjö nijakwö inawiyadanö ji̧, ubi̧ öwiyabi, tjökwösobudanö ji̧kwö pjaachinö labinö tjoduwobe chedijatö. Nijibe meena jwiinö labinö, böjȩma ö'wemida ubobe chedijatö, towibiyabi, okobe jwiinö meje'yebi.

⁸ Jemi ikenama pjubo̧ pjuena, mö'ösa'odanö, möa'o, uba'o, ojwe nöödö ö'wödönö loobe chedijatö, jödönö jamatinö.

⁹ Ja̧danö, ja'o jamatenama ojwe nöödöma tjökwösobuda baibobe chedijatö, ö'wödöda. Jo̧kwaobetjö̧ jödö ö'wödönö ju̧kwadöma wobajadönö chedijatö. Ja̧danö, ökwösowi jödö ö'wödönöda 'yo̧wi isowima meajobe chedijatö.

¹⁰ Jemi ikena trompeta pjubo̧ pjuena sili'i nöbo̧, dejewa'yu̧danö ubo̧ mölejȩbetjö ojwebiyanöbi, ojwe se'dijunöbi meobe chedijatö, ö'wemida.

¹¹ Jo̧ba sili'ima, lebo̧ mikwo̧. Meajemima leinö baibinemi, ojwebiyabi ojwe se'dijubi ö'wemida. Jo̧kwaobetjö̧ ojwenö ojwese'donö meajelö owadöma ba̧jekwadö wobajadönö chedijatö, ojwiyo niinö baibanö leobetjö̧.

¹² Jemi ikena pjubo̧ pjuenama möle ja̧wo̧tjöbi, yö̧te ja̧wo̧tjöbi, ö'wedöda, si̧li̧'i̧dötjöbi ö'wedöda suli̧ tjöwaekwibobe chedijatö, juluwanöda dejatadö baibanö. Ja̧danö, möle ja̧wo̧ma, möle ja'ö baibenama yȩatibobe chedijatö, dejatökönö baibanö. Ja̧danö, yö̧te jawo̧bi, si̧li̧'i̧döbi, yö̧te ja'ö baibenama yȩtjatibobe chedijatö, tjidejatökönö.

Muko jwöeba̧lina wene trompeta pjubo̧ bakwamusanu pjubo̧ baibanö pjuakwa̧ abönö

¹³ Ikenama cha̧ja̧kwijatö muko jwöeba̧li̧ma. Jo̧bama mö köba̧lö labinö jwöeba̧li̧ cha̧ja̧kwijatö: —¡Ayö, ökwödöwe! ¡Inia tjököbaduwinö baledakobe! ¡Ayö! Ju'wedö ángelesdö trompeta pjutjenama yelösöda inia tjököbaduwinö baledakobe. ¡Ökwödöwe! Jwiinö inia tjököbaduwinö baledakwawö̧ja ökwödö, böjȩnö ju̧kwadönöma— labinö muko jwöeba̧li̧ma cha̧ja̧kwijatö.