Apocalipsis 7 - Dios Iwene

Bakwo̧ ángel ju'wedö ángelesdönö weina wene: —Ina sulabenö ja̧bökönuwi Diosnö ösödadönö seyu dobö diwȩyudenanö kabatö— jö̧ba̧lö

¹ Ikenama ángelesdö ö'wejemu luwanö chedijatö, böjȩ ö'wejemu jawa 'do̧'do̧kwetenia bakwo̧nökwena ja̧dönö. Bakwo̧, ja̧wo̧ ichobekwöbi, jelo̧ma ja̧wo̧ meajobekwöbi, jelo̧ma ja̧wo̧ ichobe u'dakwöbi, jelo̧ma ja̧wo̧ ichobe a̧li̧kwöbi ja̧dönö chedijatö. Jobadöma, bakwo̧nökwena, böjȩ sulabenö baledinö jwa̧lȩ'epjo tjöbeba̧lö tjö̧jobe chedijatö, böjȩnö jwa̧lȩ'ewökönö. Ja̧danö, böjȩnöbi, ojwenöbi, towibiyabi yelösöda sulabenö jwa̧lȩ'ewökönö, jwa̧lȩ'epjo tjöbeba̧lö tjö̧jobe chedijatö.

² Jemi ikenama jelo̧ ángelnö chedijatö, ja̧wo̧ ichobetjö labebö mölejȩbekwö kabekwajo̧nö. Jo̧bama seyu dobö wȩyukwa jawa do̧ba̧lö kaekwachajobe chedijatö, Ba̧kwȩlö̧jatebö 'Yaba̧lo̧ Dios u̧kwa seyu dobö wȩyukwa jawama. Kabekwachajo̧ mölejȩbe ichibö ángelesdönö, jwa̧lȩ'epjo tjöbeba̧ladönöma, böjȩbi, ojwebi, sulabenö baibanö ja̧tjobö webawedönöma labinö jwöi̧ cha̧ja̧kwijatö .

³ Baikwö cha̧ja̧kwijatö: —Kabataduwi, böjȩ, ojwe, towibiya sulabenö baibanö ja̧köbaduwi̧ma. Ina kwite'ada̧laduwo, Duluwo̧ Dios wei̧ ja̧badönö seyu dobö diwȩyudenanö kabatö. Ökwödöma seyu dobö diwȩyudakwedösa Dios wei̧ ja̧badö tjöbanö öwawobö, Bidöma Dios ömöayedö, jö̧ba̧lö— ángelma jwa̧lȩ'epjo tjöbeba̧lö ja̧dö ángelesdönö jwöi̧ma.

Seyu dobö wȩyudakwawedö ba̧ja̧dakwawina wene

⁴ Ikenama baikwö cha̧ja̧kwijatö, seyu dobö wȩyudakwawedö ba̧ja̧dakwawama: —Seyu dobö wȩyudakwawedöma ba̧jekwadö, ciento cuarenta y cuatro mil. Jobadöma, damötjö ji̧na Israelmine i̧tji̧mutjö tupadanö jojodö, a̧li̧nösamutjö du̧ju̧tajanö i̧tji̧mutjö, bakwo̧nökwenatjö i̧tji̧mu tupadanö jojodöma.

⁵ Ja̧danö, Reubenmine ömöledötjö tupadanö jojodö, doce mil jojodöma seyu dobö wȩyudakwawedöma. Ja̧danö, Gadmine ömöledötjö tupadanö jojodöma, doce mil seyu dobö wȩyudakwawedöma.

⁶ Ja̧danö, Asernine ömöledötjö tupadanö jojodö, doce mil jojodöma seyu dobö wȩyudakwawedöma. Ja̧danö, Naftalímine omöledötjö tupadanö jojodöma, doce mil seyu dobö wȩyudakwawedöma. Ja̧danö, Manasamine ömöledötjö tupadanö jojodöma, doce mil seyu dobö wȩyudakwawedöma.

⁷ Ja̧danö, Simeonmine ömöledötjö tupadanö jojodöma, doce mil seyu dobö wȩyudakwawedöma. Ja̧danö, Levímine ömöledötjö tupadanö jojodöma, doce mil seyu dobö wȩyudakwawedöma. Ja̧danö, Isacarmine ömöledö tupadanö jojodöma, doce mil seyu dobö wȩyudakwawedöma.

⁸ Ja̧danö, Zebulónmine ömöledötjö tupadanö jojodöma, doce mil seyu dobö wȩyudakwawedöma. Ja̧danö, Josémine ömöledötjö tupadanö jojodöma, doce mil seyu dobö wȩyudakwawedöma. Ja̧danö, Benjamínmine ömöledötjö tupadanö jojodöma, doce mil seyu dobö wȩyudakwawedöma. Jobadö Israelmine i̧tji̧mutjö tupadanö jojodö, ciento cuarenta y cuatro mil jojodöma, seyu dobö wȩyudakwawedöma— ja̧ yöawi̧ cha̧ja̧kwijatö, seyu dobö wȩyudakwawedö ba̧ja̧dakwawama.

Mölejȩbetjö ba̧jekwadö kamisi dewi̧ odo̧ 'dubawadö tjö̧jobe Juan edina wene

⁹ Ikenama chedemi yelösöda jojodö, ba̧jekwadönö, ba̧ja̧dakwawa jwienanö ba̧jekwadönö chedijatö. Jobadö chedinawö̧ma jelobebi jelobe jojodöbi, wainökwena ji̧nadötjö tupadanö jojodöbi, wainökwena tjiwene yöba̧ladöbi, okobe deinö jojodöma. Jobadöma Dios ö̧bemi badeibö, Obeja Itji̧danö Jo̧ ö̧jemi badeibö tjö̧jobe chedijatö. Jobadöma kamisi dewi̧ odo̧ 'dubawadö. Ja̧danö, öjiya, 'wiawa öjiya, wa̧cha öjiyadanö ichejekwi̧ tjömamunö do̧ba̧lakwawadö.

¹⁰ Ja̧danö, labinö jwöbeba̧lö tjösödi̧ma cha̧ja̧kwijatö: —Bidöda ökwödö dö̧jibinö pjabatadöma, inesö ba̧kwawakanö bo̧nö Duluwo̧ Diosbi, Obeja Itji̧danö Jo̧bi— jwöbeba̧lö tjösödobe chedijatö.

¹¹ Ja̧danö, ju'wedönö chedijatö, okobe deinö ángelesdönö. Jobadöma inesö ba̧kwawaka jemitjöbi, damö la'aka luwedö veinticuatronö tjö̧bajemitjöbi, tjöbajalebiya a̧tja̧bayedöda ju̧kwawö̧ tjö̧bajemitjöbi ö'wejenö i̧sȩko̧nö tjuju̧kwachakwawibobe chedijatö. Ja̧danö, ángelesdöma, inesö ba̧kwawaka jemi badeibö, nijinö de'bo'bonö tjöbajamakwawibobe chedijatö, Diosnö ösödö.

¹² Ja̧danö, Diosnö ösödö yötja̧li̧ cha̧ja̧kwijatö: —Jau, bidö, dewi̧ odo̧ 'dubawadöma jweinö yöba̧ladö Diosnöma. Jau, jö̧tja̧li̧danö Diosma jwiinö otiwo̧. Diosma jwiinö dewinö dejato̧, jwiinö waiso̧, otiwanö pjabato̧. Ja̧danö, jwiinö mikwawo̧obetjö̧ jo̧banö dösödoböma jo̧be. Okobe jwiinö badekwachobö yöbawo̧. Jwiinö juluwo̧ Diosma— jejenö jö̧ba̧lö, ángelesdö mölejȩbe ja̧nö Diosnö ösödö yötja̧li̧ma cha̧ja̧kwijatö.

¹³ Ikenama damö la'aka luwedötjö bakwo̧ ötjönö edö abebö a̧ja̧kwijatö: —Bidö jojodöma, kamisi dewi̧ odo̧ 'dubawadöma ¿Didöjayedö? ¿Detjö ichinadöda?—abebö a̧ja̧kwijatö ötjönöma.

¹⁴ Jejenö abebö a̧ja̧kwitjö̧ chatadijatö: —Chuluwo̧ma, ökwöda kwöwaisa— jö̧ta̧lökwe: —Jau, yötawakwö. Bidöma, inia tjöawa baledi̧ möletjö o̧penönö baledi̧ möle inia tjöbö ji̧nadö. Ja̧danö, tjökamisima, Obeja Itji̧danö Jo̧ ökwösobutjö dichö loi̧danö dichö loawa odi̧ju, dewi̧ odo̧ baibanö. Ja̧danö, bidöma dewi̧ odo̧ 'dubawadö babibinadö.

¹⁵ Jejenö baibinobetjö̧ bidöma, ba̧kwȩlö̧jatebö, mölebi, yö̧tebi Dios ö̧bemi badeibö ja̧nö, jo̧banö ösödö ju̧kwadö. Ja̧danö, Diosma jobadökwö ja̧nö te'ada̧lo̧.

¹⁶ Jobadö, inia tjötji̧ baledinawö̧ma, belöma a̧wi̧chi̧ tjöbö tjuju̧kwinajayonö, tjo̧wi̧, babema a̧wi̧chi̧ tjöböma jö̧ködö. Ja̧danö, belöma ojwiyo o̧tinö tjuju̧kwinajayonö, tjo̧wi̧, babema ojwiyoma o̧ti̧ tjöböködö. Ja̧danö, belöma ja̧wo̧bi tubinö dejatö, tji̧sȩdo̧ma ubö tjuju̧kwinajayonö tjo̧wi̧, babema ubökönö tjuju̧kwobe, ja̧wo̧ jweinö ö̧jenabi.

¹⁷ Ja̧danö, Obeja Itji̧danö Jo̧ma otiwanö ite'ada̧lobetjö̧ inia tjötjinö baledököwö̧. Ja̧danö, jobadönö otiwanö öbibö 'yo̧ ojwese'do jo̧bekwö, ba̧kwȩlö̧jatebö ja̧kwawa okwe'dokwö. Ja̧danö, jobadöma belöma budekwabinö tjuju̧kwinajayonö, tjo̧wi̧, babema budekwaböködö. Otiwanö ju̧kwadö, Diosma pjaatinobetjö̧— damö la'aka luwedötjö bakwo̧ma jö̧a̧lijatö ötjönöma.