Apocalipsis 6 - Dios Iwene

Obeja Itji̧danö Jo̧ ösöja tö'awi̧ ö'be pöekwöja ajayinö pöekwa'be kaebina wene

¹ Ikenama Obeja Itji̧danö Jo̧ma ösöja, tö'awi̧ ö'be pöekwöja, ajayinö pöekwa'be kaebobe chedijatö. Ja̧'be kaebena, ö'wejemu luwa, tjöbajalebiya a̧tja̧bayedöda ju̧kwawö̧tjö bakwo̧, labinö, böba ökwödi̧danö labinö jwöijatö, Ichi, jö̧ba̧lö.

² Jwöökwe kabayu dewo̧ icho̧nö chedijatö. Jo̧ba kabayunö wa̧nö 'yo̧ma, 'böpö, nayunu juna̧lo̧. Ja̧danö, jo̧bama, la'aka luwedö tjuunö 'dii̧ ökiya tjubutjawi̧danö ubutjadajökwe. Ubutjadajökwema, mölejȩbetjö labebö, tjöpöjojodönö ujuluwobö i̧'yobe chedijatö.

Obeja Itji̧danö Jo̧ ösöja tö'awi̧ ö'be pöekwöja dö'belataja baibanö pöekwa'be kaebina wene

³ Ja̧danö, Obeja Itji̧danö Jo̧ma ösöja tö'awi̧ ö'be pöekwatjö dö'belataja baibanö kaebobe chedijatö. Ja̧'be kaebena ö'wejemu luwa, tjöbajalebiya a̧tja̧bayedöda ju̧kwawö̧tjö jemi ikenama jwöbo̧ma, Ichi, jö̧ba̧lö, jwöijatö.

⁴ Jwöökwe jelo̧ kabayuma icho̧nö chedijatö, duwo̧nö, ökwöla ubi̧danö duwo̧nö. Jo̧ba kabayunö wa̧nö 'yo̧nö chedijatö, isa̧pi̧ ödöapi̧ iyökwenö. Ja̧danö, isa̧pi̧ iyökwema, böjȩ bakwameachibanö i̧'yobe chedijatö, ju'wedönöma ju'wedökwö tjölakwabikwawobö ja̧obö, idödada kwabawö lotjinö baibanö.

Obeja Itji̧danö Jo̧ ösöja tö'awi̧ ö'be pöekwöja wa̧pö'bekwa baibanö pöekwa'be kaebina wene

⁵ Ja̧danö, Obeja Itji̧danö Jo̧ma ösöja tö'awi̧ ö'be pöekwatjö wa̧pö'bekwa baibanö kaebobe chedijatö. Ja̧'be kaebena ö'wejemu luwa tjöbajalebiya a̧tja̧bayedöda ju̧kwawö̧tjö jemi ikena jwöbo̧, Ichi, jö̧ba̧lö, jwöijatö. Jwöökwe jelo̧ kabayu, yȩbo̧ icho̧nö chedijatö. Jo̧ba kabayunö wa̧nö 'yo̧ma nönawaka do̧ba̧lo̧.

⁶ Ikenama iwene ökwöi̧ cha̧ja̧kwijatö, tjöbajalebiya a̧tja̧bayedöda ju̧kwawö̧ tjuju̧kwemi ö'wejetjö ökwöobe. Biya̧ iwene ökwöi̧ cha̧ja̧kwijatö: —A̧wi̧chö̧lö̧ji̧ baledakobe. Baledena kwakwawama 'dö̧ibajakobe okobe deinö jojodö tjukwoböma. Ja̧danö, kwakwawa nöinöma jwiobetjö̧, nöinö mikwawakobe. Bakwöta möle otikwa jawabi emawökakobe, nöinö mikwawobetjö̧. Harina de trigo bakwöta kilobi emawökakobe. Ja̧danö, sebana wa̧pötakwa kilobi emawökakobe, bakwöta möle otikwa jawanöma. Jejenö ji̧jayonö o̧tebi, ubasobubi, jwiinö baibanöma ja̧köbaduwoko, jö̧ba̧lö— jejenö ökwöi̧ cha̧ja̧kwijatö.

Obeja Itji̧danö Jo̧ ösöja tö'awi̧ ö'be pöekwöja ö'wejemusa'be baibanö kaebina wene

⁷ Ja̧danö, Obeja Itji̧danö Jo̧ma ösöja tö'awi̧ ö'be pöekwatjö ö'wejemusa'be baibanö kaebobe chedijatö. Ja̧'be kaebena tjöbajalebiya a̧tja̧bayedöda ju̧kwawö̧tjö, ökömakwö jwöbo̧, Ichi, jö̧ba̧lö, jwöijatö.

⁸ Jwöökwe jelo̧ kabayu icho̧nö chedijatö, ökwösobu jwibo̧danö dea̧tji̧jibo̧nö. Jo̧ba kabayunö wa̧nö 'yo̧ma, Wobajale, jö̧ba̧lö, ötjabökwe. Jo̧ba ökömanö jelo̧ icho̧nö chedijatö, Wobinadö tjö̧bajemi, jö̧ba̧lö, ötjabökwe. Ja̧danö, jobadö du̧ju̧taja, Wobajale ötjabökwekwö, Wobinadö tjuju̧kwemi ötjabökwekwö mölejȩbetjö labeibö böjȩkwö tjichobe chedijatö. Jobadönöma tjujulu iyö weawö̧, böjȩnö ju̧kwadötjö ju'wedönöma inia tjötjinö ja̧tjobö. Jojodötjö ju'wedönö ö'wö batjibinö ja̧tjobö tjujulu iyö weawö̧. Ja̧danö, ju'wedönöma, ju'wedökwö ölakwabikwawö, idödada dȩdȩbakwawö lotjobö batjibanö ja̧tjobö tjujulu iyö weawö̧. Ja̧danö, ju'wedönöma a̧wi̧chi̧ tjötjinö baledöma, ö'wö batjibanö ja̧tjobö tjujulu iyö weawö̧. Ja̧danö, ju'wedönöma tjö'wöchi̧ jawatjö ö'wö batjibanö ja̧tjobö tjujulu iyö weawö̧. Ja̧danö, ju'wedönöma tebonö ju̧kwadö yö̧yö̧bö lotjawö̧, ö'wö batjibanö ja̧tjobö tjujulu iyö weawö̧. Isabenö, jobadö Wobajale ötjabökwekwö, Wobinadö tjuju̧kwemi ötjabökwekwö böjȩnö ju̧kwadötjö ju'wedönö inia tjö̧tjinö ja̧tjobö tjujulu iyö weawö̧.

Obeja Itji̧danö Jo̧ ösöja tö'awi̧ ö'be pöekwöja bakwamusa'be baibanö kaebina wene

⁹ Ja̧danö, Obeja Itji̧danö Jo̧ma ösöja tö'awi̧ ö'be pöekwatjö bakwamusa'be baibanö kaebobe chedijatö. Ja̧'be kaebena juwö iyawemi chedijatö mölejȩbetjö. Jemi juwö iyawemi teebetjö chedijatö öwawöködönö, Jesúsnö ösödadönö kwabö lotjinawö̧ tjo̧'wo̧ luwo̧. Jobadöma, Dios iwene tjösödobetjö̧, ja̧danö, jo̧ba iwene yötjawobetjö̧ kwabö lotjinawö̧.

¹⁰ Ja̧danö, jobadö öwawöködöma labinö Diosnö atjeba̧li̧ cha̧ja̧kwijatö, baikwö: —Duluwo̧ Dios, ökwöma okobe jwiinö webo̧ja, suli̧ jwibo̧ja, jweinö yöba̧lo̧ja. ¿Dokwa lekwe kwite'ada̧lakwa̧da ökwödönö kwabö lobinadönö lȩkeboböma? ¿Dokwa lekwe kwite'ada̧lakwa̧da balekwa mikwa lȩbebö weköbakwa̧ma?—budekwabinö atjeba̧li̧ cha̧ja̧kwijatö.

¹¹ Jejenö atjeba̧lökwe Obeja Itji̧danö Jo̧ma, jobadönö kamijido̧ dewado̧ iyö, yöawijatö: —Ina ja'yubeda lekwa. Kwite'ada̧laduwo. Ina ju'wedönöbi kwabawö lotjakobe, kwömöledöduwinö, Dios weina ja̧badönöma. Ökwödönö kwabawö lotjinadanö jobadönöbi kwabawö lotjakobe. Tjo̧'omanö 'dö̧tjibanö kwabawö lotjaja ikena, balekwa mikwa lȩtebakwo̧sa—yöawijatö Obeja Itji̧danö Jo̧ma.

Obeja Itji̧danö Jo̧ ösöja tö'awi̧ ö'be pöekwöja jelemutjö bakwa'be baibanö kaebina wene

¹² Ja̧danö, Obeja Itji̧danö Jo̧ma ösöja tö'awi̧ ö'be pöekwatjö jelemutjö bakwa'be baibanö kaebobe chedijatö. Ja̧'be kaebena böjȩ niji okobe jwiinö tjö̧bebö lileibobe chedijatö. Ja̧danö, ja̧wo̧ma jwiinö yȩijatö, 'diötadanö. Ja̧danö, yö̧te ja̧wo̧ma, nöbo̧ma, jwiinö duwijatö, tjökwösobu kwukwi̧danö duwinö.

¹³ Ja̧danö, si̧li̧'i̧döma böjȩkwö tjodutjawibobe chedijatö, towinö wa̧ji̧ jwa̧lȩ'epjo labinö jwa̧lȩ'ewobe tjoduwi̧danö.

¹⁴ Ja̧danö, mölejȩma ösöja 'bo̧dachibi̧danö baibobe chedijatö, öwawököje baibanö. Ja̧danö, mö'ösa'ijubi, ö'wejesa'ijubi jelöma pjolachibö jelobekwö jamatobe chedijatö.

¹⁵ Jejenö baibiawö̧ okobe deinö böjȩ bakwameachibanö ju̧kwadöma, ¡Ayö!, jö̧ba̧lö, yetjaibobe chedijatö, la'aka luwedöbi, jo̧kwadabedöbi. Ja̧danö, guardia jojodötjö abönö luwedöbi, balada juna̧ladöbi, baladanö midö tjeminawö̧bi yelösöda yetjaibobe chedijatö. Ja̧danö, okobe deinö böjȩnö ju̧kwadöma, mö'ösa'obekwö, inawiya ju̧kwobekwö dötjibajobe chedijatö, jobeda tjuju̧kwawobö.

¹⁶ Jobadö jwötjeba̧li̧ cha̧ja̧kwijatö: —¡Ayö! Mö'ösa'iju, inawiya, tjöbeba̧li ökwödönöma, dö̧jibobö. ¡Ayö! Inesö ba̧kwawakanö bo̧ edökakobetjö̧ ökwödönö tjöbeba̧li. Obeja Itji̧danö Jo̧tjöbi tjöbeba̧li, jwiinö labinö lȩbebo̧tjöma.

¹⁷ ¡Ayö! Döwaisa, ida̧ökö, Dios jwiinö labinö lȩebi̧ma badekwachajabe. Bakwo̧bi deobe jo̧ba lȩebi̧tjö döbibajo̧ma— yebabinö jwötjeba̧li̧ cha̧ja̧kwijatö.