Apocalipsis 5 - Dios Iwene

Juan ösöja wȩyukwöja do̧ba̧lo̧nö edina wene

¹ Ikenama, jobe, inesö ba̧kwawakanö bo̧nö chedemi, ömamu öwaisobekwöchobesamunö ösöja wȩyukwöja do̧ba̧lo̧nö chedijatö, 'bo̧datakwawöja. Jöjama wamekwöchobebi okwakwöchobebi wȩyukwöja. Ja̧danö, tö'awa ö'be pöekwöja, jelemutjö dö'belatajanö pöekwobe chedijatö.

² Jemi ikenama, ángelso̧nö chedijatö, juluwo̧nö. Jo̧bama labinö yöawobe edö cha̧ja̧kwijatö: —Böja pöekwöjama jwiinö mikwawo̧da kabebö edöja. Jo̧ba jwiinö mikwawo̧ma ¿tida?— abebö a̧ja̧kwijatö.

³ Jejenö abebö a̧ja̧kwijayonö bakwo̧bi deijatö mölejȩnö ju̧kwadötjöbi, böjȩnö ju̧kwadötjöbi, böjȩ teebe ju̧kwadötjöbi, jwiinö mikwawo̧ma, jöja pöekwöja kabebö edo̧ma.

⁴ Jejenö a̧ja̧kwö ötjöma chubudekwijatö yelösöda, bakwo̧bi jwiinö mikwawo̧ deobetjö̧, jöja tö'awa'be pöekwöja kabebö edo̧ma.

⁵ Ja̧danö, chubudekwiökwe, damö la'aka luwedötjö bakwo̧ma ötjönö pjabatö yöawijatö: —Budekwökönuwi. Isabenö yötawa. Jwiinö mikwawo̧ma ö̧jobe, bakwo̧da. Jo̧bama kwa'dömine Judá ömöledötjö tupadanö jojo, Didiba, jö̧ba̧lö, ötjabökwe. Ja̧danö, kwa'dömine David ömöledotjöbi tupadanö jojo, jo̧bama. Jo̧bada sulabebi, wobajalebi jwiinö juluwo̧obetjö̧, jo̧bada, jwiinö mikwawo̧ma, böja tö'awa'be pöekwöja kabebö edobö jo̧ma— yöawijatö damö la'aka luwo̧ma ötjönöma.

Juan obeja itji̧danö jo̧nö edina wene

⁶ Jemi ikenama, Obeja Itji̧danö Jo̧nö chedijatö, inesö ba̧kwawaka badeibö jo̧nö. Ja̧danö, tjöbajalebiya a̧tja̧bayedöda ju̧kwawö̧ Obeja Itji̧danö Jo̧ ö̧jena i̧sȩko̧nö tjö̧jijatö. Ja̧danö, damö la'aka luwedöbi, veinticuatronö, jo̧ba ö̧jena i̧sȩko̧nö tjö̧jijatö. Jo̧ba Obeja Itji̧danö Jo̧ma 'yaba̧lo̧ ö̧jijayonö tibatö lobawo̧danö ö̧jijatö. Jo̧bama ö'yekiya juna̧lo̧, jelemutjö dökölataja jawa ö'yekiya. Ja̧danö, öbajalebiyabi jelemutjö dölelatajanö ju̧kwökwe. Jejenö öbajalebiya jelemutjö dölelatajanö Dios O̧'wo̧ Luwo̧ okobe jwiinö ujulu i̧sebi̧ wanekwachobe, böjȩ bakwameachibanö ujulu i̧sebi̧ma.

⁷ Ja̧danö, Obeja Itji̧danö Jo̧ma inesö ba̧kwawakanö bo̧ ö̧bobekwö 'ya̧wibö, ömamu öwaisobekwöchobesamutjö ösöja emijatö.

⁸ Ikenama, tjöbajalebiya a̧tja̧bayedöda ju̧kwawö̧ ö'wejemu luwabi, damö la'aka luwedö veinticuatronöbi tju̧yu̧ju̧ki̧junö bamatö, tjuu nijakwö bȩtjachibijatö, Obeja Itji̧danö Jo̧ öba a'o. Jobadöma, bakwo̧nökwena, harpa do̧ba̧lakwawö bȩtjachibijatö. Ja̧danö, dȩja̧'di̧ju, orotjö otikwa o'di̧ju, bakwo̧nökwena do̧ba̧la̧kwawö bȩtjachibijatö. Ja̧ o'di̧junöma söinö nöekwi̧ jawa, imiyu'wo söinö nöekwi̧ o'wo baibanö tjujuwi̧ jawa, okwijatö, su̧'bȩnö. Ja̧ söinö nöekwi̧ jawatjö söinö nöekwi̧ imiyu'woma Dios ömöledö babibinadö Diosnö atjebi̧ wanekwachobe.

⁹ Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.

¹⁰ Dios ömöledö babibinadönöma bakwaso batjibanö ja̧binaja, bakwainö Dioskwö ja̧nö, iteda wei̧ ja̧badö batjibanö. Jobadönöma Diostjö jojodötjö ö'weje pjabatadödanö batjibanö ja̧binaja, bakwainö Dioskwö, iteda wei̧ ja̧badö batjibanö. Ju'winö böjȩnö ja̧nö, jojodö tjuluwedö batjibanö ja̧köbakwo̧ja, jö̧ba̧lö lo̧tjijatö tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö.

¹¹ Jemi ikenama cha̧ja̧kwijatö ángelesdö lo̧tji̧, yelösöda ba̧jekwadö ángelesdöma, ba̧ja̧dakwawökenanö ba̧jekwadö lo̧tji̧ma. Jobadö ángelesdöma inesö ba̧kwawakanö ö̧bena i̧sȩko̧nö ja̧nö lo̧tjijatö, tjöbajalebiya a̧tja̧bayedöda ju̧kwawö̧ tjö̧bajenabi, damö la'aka luwedö tjö̧bajenabi i̧sȩko̧nö ja̧nö.

¹² Biya̧ lo̧awa labinö lo̧tjijatö: Obeja itji̧danö jo̧ma, kwabö lotjinökwema jwiinö mikwawo̧. Jwiinö mikwawo̧obetjö̧, dösödobö jo̧be. Jo̧banöda dösödo, Ökwöma inesö la'aka luwo̧ja, ja̧danö, okobe jwiinö juna̧lo̧ja, jö̧ba̧lö. Jo̧banöda dösödo, Ökwöma okobe jwiinö waiso̧ja, jö̧ba̧lö, ja̧danö, okobe jwiinö juluwo̧ja, jö̧ba̧lö, Jo̧banöda otiwanö omukwatö dösödo, Ökwöma Duluwo̧ja, jö̧ba̧lö, jwiinö dewinö dejato̧ja, jö̧ba̧lö. Jo̧banöda otiwanö yöba̧lö dösödo, Ökwöma jwiinö mikwawo̧ja, jö̧ba̧lö lo̧tjijatö ángelesdöma i̧sȩko̧nö ja̧nö, Obeja Itji̧danö Jo̧nö ösödö.

¹³ Jemi ikenama cha̧ja̧kwijatö okobe deinö, mölejȩnö ju̧kwadöbi, böjȩnö ju̧kwadöbi, böjȩ teebe ju̧kwadöbi, ojwe nöödö okwa ju̧kwadöbi, inesö ba̧kwawakanö bo̧nöbi, Obeja Itji̧danö Jo̧nöbi ösödö lo̧tji̧ma. Biya̧ lo̧awa lo̧tji̧ma cha̧ja̧kwijatö: Ösödö lo̧daduwo inesö ba̧kwawakanö bo̧nöbi, ja̧danö, obeja itji̧danö jo̧nöbi. Dösödodönö, Jwiinö otiwadöja, jwiinö mikwawadöja, jö̧ba̧lö. Jwiinö dewinö dejatadöja, jwiinö juluwadöja, jö̧ba̧lö, dösödodönö, jö̧ba̧lö lo̧tjijatö.

¹⁴ Ikenama tjöbajalebiya a̧tja̧bayedöda ju̧kwawö̧ma jö̧tja̧lijatö: —Jau, lotji̧ma jweinö yöbawö lo̧badö— jö̧ba̧lö. Ja̧danö, damö la'aka luwedöma nijakwö de'bo'bonö bamatö tjösödijatö, Diosnöbi, Obeja Itji̧danö Jo̧nöbi.