Apocalipsis 4 - Dios Iwene

Mölejȩnö ja̧nö Diosnö tjösödi̧ Juan edina wene

¹ Ikenama, mölejȩbekwö chedemi apjude po̧ekwobe chedijatö. Jobekwö chedemi ötjönö ajayinö yöa̧li̧danö, trompeta pjutji̧danö labinö ökwöinö yöba̧lajo̧ma, ötjönö jwöi̧ cha̧ja̧kwijatö: —Baikwö mö ichi, ju'winö baledakwa̧ chi̧sebokwö—jö̧ba̧lö, jwöi̧ cha̧ja̧kwijatö.

² Ikenama, omönanö Dios O̧'wo̧ Luwo̧ma ötjö cho̧'wo̧ luwo̧ okwanö öwawinö i̧sebijatö mölejȩbe ji̧ jawama. Bakwo̧nö chedijatö, inesö la'aka luwo̧ ba̧kwawakanö bo̧nö.

³ Jo̧bama jwiinö salöanö bo̧, inawiya nöinö mikwawi̧ öwiya salöi̧danö. Dewi̧danö salöi̧bi, ö̧'dö̧winö salöi̧bi salöanö bo̧. Ja̧danö, ö̧bemi möakwö mayo ö̧lijatö, jwiinö salöanö, ö̧'dö̧wanö dejato̧ mayoma.

⁴ Ja̧danö, jo̧ba bo̧ ö̧bemi okobe jwiinö isȩko̧nö veinticuatronö jojodö, damö la'aka luwedöma tjö̧bajijatö. Jobadöma veinticuatronö jawa ökiya, la'aka luwedö tjö̧baji̧ ökiyanö tjö̧bajijatö. Jobadö ba̧jadöma kamisi dewi̧ 'dubawadö. Ja̧danö, bakwo̧nökwena tjuunö butjawa ökiya, orotjö otikwa ökiya butjawadö.

⁵ Ja̧danö, ö̧belöma böba kwawijatö, nekakanö dejö. Böbama labinö ökwödijatö. Ja̧danö, ö̧bemi badeibö dejuwa'yiju, jelemutjö do'yulatajanö ubijatö. Ja̧ o'yubiyama Dios O̧'wo̧ Luwo̧ ujulu i̧sebi̧, jelemutjö dötölataja ujulu ujuna̧li̧ wanekwachi̧.

⁶ Ja̧danö, jo̧ba la'aka luwo̧ ba̧kwawakwanö bo̧ ö̧bemi ö'öböma ojwe jwiinö salöanö jödö li̧jatö, isa̧yu̧ salöi̧danö salöödö. Ja̧danö, ö̧bena isȩko̧nö ja̧dönö, ö'wejemu luwanö chedijatö, tjöbajalebiya a̧tja̧bayedöda ju̧kwawö̧nö.

⁷ Jobadötjö bakwo̧ma didibadanö ichejekwo̧. Jelo̧ma nöbo̧ pakayadanö ichejekwo̧. Jelo̧ma öbama jojo öbadanö ichejekwo̧. Jelo̧ma muko köba̧lo̧danö ichejekwo̧.

⁸ Jobadöma bakwo̧nökwena tjo̧wa̧ja̧pi̧ya jelemutjö bakwapjanö juna̧ladö. Ja̧danö, bakwo̧nökwena tjöbajalebiya a̧tja̧bayedöda ju̧kwawö̧. Jobadöma ba̧kwȩlö̧jatebö Diosnö ösödö lo̧badö. Mölebi, yö̧tebi baledibanö baikwö lo̧tjijatö, Diosnö ösödö: Duluwo̧ Diosma, jwiinö juluwo̧, wainö jo̧, suli̧ jwibo̧, jwiinö otiwo̧. Jo̧bama ajayinö ji̧nabi, babe jo̧bi, 'döibajena ö̧jakwo̧bi, jö̧ba̧lö lo̧tjijatö.

⁹ Jejenö, tjöbajalebiya a̧tja̧bayedöda ju̧kwawö̧ma Duluwo̧, ba̧kwȩlö̧jatebö jo̧nö, inesö la'aka luwo̧ ö̧bemi bo̧nö ösödö lo̧badö. Jwiinö otiwo̧, jwiinö waiso̧, jwiinö pjabato̧, jö̧ba̧lö, lo̧badö Duluwo̧ Diosnö. Ja̧danö, jobadöma jejenö ösödö lo̧tjonö

¹⁰ damö la'aka luwedöma, veinticuatronö jojodöma, inesö la'aka luwo̧ ö̧bemi badeibö tju̧yu̧ju̧ki̧junö bamatö, tjuu nijakwö bȩtjachibijatö, ba̧kwȩlö̧jatebö jo̧nö ösödö. Ja̧danö, jobadö veinticuatro damö la'aka luwedöma, bakwo̧nökwena tjuunö tjubutjawi̧ ökiya inesö la'aka luwo̧ ö̧bobekwö tjikwijatö, jo̧banö iyö. Iyö lo̧tjijatö:

¹¹ Dios, ökwöda ökwödö Duluwo̧, ökwödö do̧'wo̧ döwana̧lökwe Dios. Ökwöda jwiinö mikwawo̧ja. Ökwöda jwiinö mikwawo̧köbobetjö̧ ökwönö dösödobö jo̧be, Jwiinö mikwawo̧ja, jwiinö waiso̧ja, jwiinö juluwo̧ja, jö̧ba̧lö, dösödoböma. Ökwöda okobe jwiinö otidinaköbobetjö̧ ökwönö dösödobö jo̧be, Otiwanö otidinaja, jö̧ba̧lö, dösödoböma. Ökwö kwomukwati̧tjöda okobe jwiinö baibinobetjö̧ ökwönö dösödobö jo̧be. Ökwö kwomukwati̧tjöda, okobe jwiinö kwotidinobetjö̧ ökwönö dösödobö jo̧be. Duluwo̧ Dios, ökwöda jwiinö mikwawo̧köbobetjö̧ ökwönö dösödobö jo̧be, jö̧ba̧lö lo̧tjijatö jobadö veinticuatronö damö la'aka luwedöma inesö la'aka luwo̧ bo̧nö ösödö.