Apocalipsis 3 - Dios Iwene

Sardis comunidadnö ju̧kwadötjö Jesúsnö ösödadönö Jesús yöawina wene

¹ Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Sardis jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma Dios O̧'wo̧ Luwo̧kwö jo̧ yöawi̧, jelemutjö dötölatajanö ujulu jawa juna̧lo̧kwö jo̧ yöawi̧ma. Ja̧danö, jo̧bama, jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧. Jo̧bada yöawi̧, biya̧ chiwȩyudi̧ma. Jo̧bama baikwö yöawobe ökwödö Sardis jojodönö, jo̧banö ösödadönöma: Ökwödö sulabenö kwö̧jaduwi̧ma chöwaisa. Ju'wedöma ökwödönö edö, Aaa, bidöma otiwanö Jesúsnö tjo̧'wo̧ wana̧lö ja̧dö, jö̧ba̧lö, yötja̧lijayonö wajwibö yöba̧ladö. Ötjönöma kwo̧'wo̧duwi wana̧löködöja. Chedemi wobinadödanö kwö̧jaduwobe, kwo̧'wo̧ luwo̧duwinöma.

² Yötawaduwakwö. Wilubakwawaduwi, kwo̧'wo̧ luwo̧duwi okwanö ö'wiawakwawalö̧jönö kwö̧jaduwobö. Ina kwo̧'wo̧ luwo̧duwi okwanö ja'yubeda kwujuna̧laduwena otiwanö kwomukwataduwi̧ma. Jo̧kwaobetjö̧, ö'wiawakwawalö̧jönö ja̧nö, kwo̧'wo̧ luwo̧duwi okwanö kwujuluwaduwo, ja'yubebi otiwanö kwomukwataduwi̧ma jwiinö baibapji jö̧ba̧lö. Chömöledö, Chuluwo̧ Diosma okobe jwiinö ja̧köbaduwobe edo̧. Ja̧danö, chedemi jo̧ba wei̧ kakatibinaduwobe, iteda ja̧bö kwö̧jaduwobö wei̧ma.

³ Yötawaduwakwö. Omukwataduwi. Ajayima Dios iwene yötjawi̧ a̧ja̧kwö jwiinö kwösödinaduwobe. Ja̧danö, ja̧ ajayi a̧ja̧kwö kwösödinaduwadanö yemidanö kwösödaduwobö, babe jelobekwö kwomukwataduwi̧ma kabatibö balewachaduwi. Chömöledö, kwo̧'wo̧ luwo̧duwi okwanö woawatjö yemidanö 'yabibajadö bakibaduwanö wilubakwawaduwi. Jejenö, wiluköbakwawaduwökötjö̧ma ötjöma, ökwödö wajwiköbaduwonö naukwabo̧ ichi̧danö chichakwo̧sa, ökwödönö lȩbebö.

⁴ Jejenö yötawijayonö, ökwödötjö ju'wedöma, obukwedöda, ina kwo̧'wo̧ luwo̧duwi okwanö otiwanö omukwatö kwö̧jaduwobe. Wanedö yötawa: Ökwödöma, sulabedökwö pjabacha̧lökönö, otiwanö omukwatö kwö̧jaduwobetjö̧, kamisi dewi̧, yȩamökö 'dutjawi̧danö 'dukawaduwobe. Chömöledö, ju'winö ökwödöma ötjökwö bakobe, kamisi dewi̧ 'dubawadö kwekachaduwakwedöja. Ja̧ kamisi dewi̧ 'dukawaduwakwa̧ma, Bidöma mikwawadö, Jesúskwö dötewanö bakobe kwetjachoböma, jö̧ba̧lö, wanekwachakobe.

⁵ Yötawaduwakwö. Sulabetjö juluwinadöma jejenö, kamisi dewi̧ 'dutjawakwedö. Isabenö jobadö tjimibiyama söbebö lotökakobe, tjimi wȩyukwa'yetjö, ba̧kwȩlö̧jatebö ja̧kwawa juna̧ladö tjimi wȩyukwa'yetjöma. Jobadö tjimi yötawakwo̧sa Chabe'donöbi, iteda ömöayedö ángelesdönöbi, Bidö tjimi yöta̧lawö̧ ba̧kwȩlö̧jatebö ja̧kwawa juna̧ladö tjimi, jö̧ba̧lö.

⁶ Chömöledö, a̧ja̧kwaduwi böja wȩyudi̧ma, Dios O̧'wo̧ Luwo̧ yöbawö wei̧ okobe deinö ötjönö ösödö ko̧ko̧kwa̧lö tjö̧baji̧tenia, jö̧ba̧lö yöawobe Dios O̧'wo̧ Luwo̧kwö jo̧ma, jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ ökwödönö— jejenö jö̧ba̧lö, chedökwema weijatö ötjönöma, iteda yöawi̧ wȩyudö wetobö Sardis jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Filadelfia comunidadnö ju̧kwadötjö Jesúsnö ösödadönö Jesús yöawina wene

⁷ Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Filadelfia jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma suli̧ jwibo̧ yöawi̧. Ja̧danö, jö̧a̧linadanö ja̧bo̧ yöawi̧, biya̧ chiwȩyudi̧ma. Ja̧danö, jo̧bama la'aka luwo̧ Davidmine u̧kwa yawepi̧ juna̧lo̧. Jo̧bada apjude po̧bebö tebato̧ma. Ja̧danö, jo̧bada apjude yö̧beböbi yö̧bebo̧. Jo̧bama baikwö yöawobe ökwödö Filadelfia jojodönö, jo̧banö ösödadönöma:

⁸ Chömöledö ökwödö kwö̧jaduwi̧ma chöwaisa. Yelösöda kwime'dawaduwobe ji̧jayonö ina, ötjö wetina a̧ja̧kwö kwö̧jaduwobedanö ja̧. Ja̧danö, kwime'dawaduwijayonö ina ötjönö kabatibökökönö, Jesúsnö do̧'wo̧ wana̧ladösa, jö̧ba̧lö, otiwanö kwö̧jaduwobe. Jo̧kwaobetjö̧ ökwödönö apjude po̧bebo̧danö po̧bebo̧sa, chiwene yöbawö labebö kwi̧'yaduwobö. Ötjödasa po̧bebo̧ma. Bakwo̧, Po̧bebökönuwi, jö̧ba̧lo̧ma deobe.

⁹ A̧ja̧kwaduwitjö. Kwo̧'wo̧ tjo̧kekwaduwa ökwödönö inia tjököbaduwinö ja̧badönö, judío jojodönöma. Jobadö tjo̧'wo̧ luwo̧ okwanö chöwaisawö̧. Jobadöma judío jojodö tjöbötjachinajayonö, judío jojodöböködödanö babibinadö tjo̧'wo̧ luwo̧nöma, Dios ömöledö batjibinokobetjö̧. Awetja ömöayedöda babibinadö, jo̧ba wei̧ a̧ja̧kwö. Chömöledö, ju'winö ökwödö kwöba a'oduwi ichö, tju̧yu̧ju̧ki̧junö bamatö, tjuu nijakwö bȩbachibö tjubudekwobö ja̧takwo̧sa jobadönöma. Ja̧ mölema jobadöma, ökwödönö edö waisachibö tjubudekwakobe,¡Ayö! Isabenö bidöma Dios ile niebawö̧, jö̧ba̧lö.

¹⁰ Chömöledö, yötawaduwakwö. Ökwödönö wetijatö, Sulabenö baledonöbi kwo̧'wo̧ luwo̧duwi 'dibachibö te'ada̧lö kwö̧jaduwo, jö̧ba̧lö. Ja̧ wetinama otiwanö a̧ja̧kwö kwö̧jinaduwobe. Jejenö otiwanö a̧ja̧kwö kwö̧jinaduwobetjö̧ pjatatakwo̧sa ökwödönöma. Ju'wedö böjȩnö ju̧kwadönö lȩbebö weti̧ baledonö, böjȩtjö jwiinö inia tjötjinö baledonöma, ökwödönö te'ada̧lö pjatatakwo̧sa, ja̧ inia tjötji̧tjö baledökönö.

¹¹ Chömöledö chichakwa̧ma lekwokobe. Ja̧danö, lekwokobetjö̧ kwo̧'wo̧ luwo̧duwi okwanö ö'wiawakwawalö̧jönö ja̧nö kwite'ada̧laduwo. Jejenö ja̧nö, ötjönö kwo̧'wo̧ wana̧lö ja̧duwi, ju'winö, mölejȩbenö kwichibaduwena, ökwönö otiwa jawa chiyo jö̧ta̧laja̧ jelo̧nöda chiyapji, jö̧ba̧lö.

¹² Chömöledö. Sulabetjö juluwinadönö, kabebö chujunakwo̧sa la'aka luwedö batjibanö, ba̧kwȩlö̧jatebö tjö̧jobö Dioskwö. Ja̧danö, jobadö tji̧sȩdo̧nöma Chabe'do Dios imi chiwȩyudocha. Ja̧danö, jo̧ba ö̧jemi imibi chiwȩyudocha, 'yayi̧ Jerusalén mikwemi. Jemima, Dios ö̧jobetjö böjȩkwö jwiachakwemi, cho̧'wo̧ chöwana̧lökwe Dios ö̧jobetjö. Ja̧danö, ötjö 'yayi̧ chimibi chiwȩyudocha jobadö tji̧sȩdo̧nöma.

¹³ Chömöledö, a̧ja̧kwaduwi böja wȩyudi̧ma, Dios O̧'wo̧ Luwo̧ yöbawö wei̧ okobe deinö ötjönö ösödö ko̧ko̧kwa̧lö tjö̧baji̧tenia, jö̧ba̧lö yöawobe suli̧ jwibo̧ma ökwödönöma— jejenö jö̧ba̧lö, chedökwema weijatö ötjönöma, iteda yöawi̧ wȩyudö wetobö Filadelfia jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Laodicea comunidadnö ju̧kwadötjö Jesúsnö ösödadönö Jesús yöawina wene

¹⁴ Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Laodicea jojodötjö ötjönö ko̧ko̧kwa̧lö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma Isabenö Yöbawo̧, jö̧ba̧lö, ötjabökwe yöawi̧. Ja̧danö, jo̧bama Dios iwene ba̧kwȩlö̧jatebö jweinö yöbawo̧. Ja̧danö, jo̧bada Dios ajayi otidi̧ baibobö ja̧binama. Jo̧bama baikwö yöawobe ökwödö Laodicea jojodönö, jo̧banö ösödadönöma:

¹⁵ Chömöledö, a̧ja̧kwaduwitjö. Ökwödö kwö̧jaduwi̧ma edö yelösöda chöpöjöda. Chedemi ötjönö kwösödaduwi̧bi kwi̧sebaduwokobe. Ja̧danö, kwöpöjödaduwi̧bi kwi̧sebaduwokobe. Chedemi ötjönö omukwatökönö kwö̧jaduwobe, Jo̧kwada dö̧ja, Jesúsnö omukwatökönö, jö̧ba̧lö. Jejenö kwö̧jaduwi̧ma yelösöda chöpöjöda. Kwakwawa meyuwi̧ tjukwi̧danö chöpöjöda. Jweinö kwomajadeduwitjö kwi̧sebaduwatjö̧bö, Jesúsnö dösöda, Jesúsnö döpöjöda, jö̧ba̧lö.

¹⁶ Yelösöda ökwödöma meyuwadöja. Ja̧danö, tjaatjö, kwakwawa meyuwi̧ pjulebö lotji̧danö pjulebö lotakwo̧sa ökwödönöma, meyuwadököbaduwobetjö̧. Yelösöda chöpöjödakwawö̧ja.

¹⁷ Ökwödöma jelobekwö omukwatö, Ökwödöma luwedösa, okobe jwiinö dösödi̧ tea juna̧ladösa, jö̧ba̧lö, yöka̧laduwijayonö wajwiköbaduwobe, kwo̧'wo̧ luwo̧duwinö jwiinö usula jojodödanöbedöja. Wajwiköbaduwobe, lȩlö̧jino tjedawö̧danöbedöja, kwo̧'wo̧ luwo̧duwinöma. Ja̧danö, jwibadödanöbedöja, tjöbajale tjewawadödanö, kwo̧'wo̧ luwo̧duwinöma. Ja̧danö, kamisi jwibadö kwetjachi̧danöbedöja, kwo̧'wo̧ luwo̧duwinöma. Ja̧danö, kwo̧'wo̧ luwo̧duwinö jwiinö usulasedödanö kwö̧jaduwi̧ma yelösöda wajwibadöja, Otiwanö dö̧ja, jö̧ba̧lö.

¹⁸ Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.

¹⁹ Chömöledö, ötjöma ile nitebawö̧nöma, jelobekwö tjomukwatitjö̧ma pjabatö lȩbebo̧sa, sulabenö tjomukwati̧ kabatibö tjöbalewachoböma. Jo̧kwaobetjö̧ babeda, te'ada̧lökönö, sulabenö kwomukwataduwi̧ma kabatibö balewachaduwi, ökwödönö lȩtebapji, jö̧ba̧lö.

²⁰ A̧ja̧kwaduwitjö chömöledö. Wanedö yötawa: Ötjöma apjude a'o ja̧nö, apjudenö 'do'doba̧lö te'ada̧lo̧sa, ötjönö ösödö tekataduwobö. Ja̧danö, bakwo̧ ötjö chiwene a̧ja̧kwö ösödo̧ma, apjude po̧bebö teatena tetachakwo̧sa, jo̧bakwö chukwobö.

²¹ Chömöledö, bakwo̧ sulabetjö juluwinanöma chö̧jobekwö ichibena, ötjö la'aka luwo̧ webö chö̧bemi pjeanö ö̧bobö wetakwo̧. Ötjöma wobajaletjö chujuluwina ikena Chabe'do ö̧bemi pjeanö chöbamatijatö, ba̧kwȩlö̧jatebö jenada chö̧bobö. Ja̧danö, sulabetjö juluwinanöbi, chö̧jobekwö ichibena chipjeanö ö̧bobö, la'aka luwo̧ baibanö.

²² Chömöledö, a̧ja̧kwaduwi böja wȩyudi̧ma, Dios O̧'wo̧ Luwo̧ yöbawö wei̧ okobe deinö ötjönö ösödö ko̧ko̧kwa̧lö tjö̧baji̧tenia, jö̧ba̧lö yöawobe Isabenö Yöbawo̧ma ökwödönöma— jejenö jö̧ba̧lö, chedökwema weijatö ötjönöma, iteda yöawi̧ wȩyudö wetobö Laodicea jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.