Apocalipsis 22 - Dios Iwene

Ba̧kwȩlö̧jatebö ja̧kwawa iyödö ojwe Jerusalén okwa ö'wejenö isuwina wene

¹ Ikenama ángelma ötjönö ojwe i̧sebijatö. Jödötjö ojwiyoma, ba̧kwȩlö̧jatebö ja̧kwawa ojwiyo. Chedemi jödöma Dios ö̧belö, Obeja Itji̧danö Jo̧ ö̧belö labebö isuwödö. Yelösöda salödö, isa̧yu̧ jwiinö salöayu̧danö.

² Jödöma Dios ö̧belö, Obeja Itji̧danö Jo̧ ö̧belö labebö 'yayi̧ Jerusalén okwa ö'wejenö isuwobe chedijatö. Ja̧danö, jödö bakwachekwadanö, towibiya ji̧, ba̧kwȩlö̧jatebö ja̧kwawa iyi̧ owibiya chedijatö. Ja̧ owibiyama ja̧wo̧ öwawachi̧danö wa̧ji̧. Ja̧danö, a̧li̧nösamutjö dötölatajanö wa̧ji̧, ja̧wo̧ öwawachi̧danö. Ja̧ owibiya ö̧jiyama jowobu ji̧, jojodö tjowakwa̧, böjȩnö ju̧kwadö ö'wöchökönö tjuju̧kwobö.

³ Jobe 'yayi̧ Jerusalénbema Dios öpöjödi̧ma teatakwawokobe. Otiwi̧ jawada teatakwawobe 'yayi̧ Jerusalénbema. Ja̧danö, jobe 'yayi̧ Jerusalénnöma Dios ö̧bakabi jo̧be. Ja̧danö, Obeja Itji̧danö Jo̧ ö̧bakabi jo̧be. Ja̧danö, jobadö tjömöayedöma, jobe ja̧nö jobadönö tjösödobe.

⁴ Jobadöma Diosnö edadö. Jo̧ba imi wȩyukwadö, tjöbanö.

⁵ Ja̧danö, yö̧tebi jwiobe jobema, möledanö dewinö dejatobetjö̧. Ja̧danö, la̧pa̧la̧yu̧bi̧yabi jwiobe, dewinö dejatobetjö̧. Ja̧danö, ja̧wo̧bi idejatokobe, Duluwo̧ Diosda dewinö idejatobetjö̧. Jobe ju̧kwadöma la'aka luwedödanö webö tjö̧jobe, ba̧kwȩlö̧jatebö.

Jesús yemidanö ichakwa̧ wene

⁶ Ikenama ángelma yöawijatö ötjönö: —Juan, okobe jwiinö yötjawi̧ kwa̧ja̧kwaja̧ma, isabenö baledakobe, jweinö wene yötjawobetjö̧. Ja̧danö, Duluwo̧ Diosma ötjönö weijatö baledakwa̧ chi̧sebobö ökwönöma. Ja̧danö, okobe deinö Dios ömöayedö, baledakwa̧ yöneawachi̧ tjöwaisachibobö Duluwo̧ Diosma weijatö ötjönöma, ökwönö chi̧sebobö. Ja̧danö, Duluwo̧ Dios, iteda yöawi̧ yöbawinadö tjo̧'wo̧ luwo̧ okwa yöbawo̧ma, jo̧bada ötjönö webo̧, ökwönö chi̧sebobö.

⁷ Ikenama Jesúsma jö̧a̧lijatö ötjönöma: —A̧ja̧kwitjö. Lekwökö chichakwa̧ma. Yötawakwö. Bi'ye baledakwa̧ kwiwȩyudina'ye weawa a̧ja̧kwadöma tjo̧'wo̧ ösöwanö tjö̧jakwedö— yöawijatö Jesúsma.

⁸ Chömöledö ötjöma Juansa. A̧ja̧kwaduwitjö. Okobe jwiinö biya̧ chiwȩyudi̧ma a̧ja̧kwöbi cha̧ja̧kwijatö. Edöbi chedijatö. Ja̧danö, ötjöma okobe jwiinö a̧ja̧kwöbi edöbi cha̧ja̧kwaja̧ ikenama, chu̧yu̧ju̧ki̧junö bamatö bȩtachibijatö ötjönö okobe jwiinö i̧sebo̧ ángel öba a'o, jo̧banö ösödö.

⁹ Jejenö chösödökwe ötjönö jö̧a̧lijatö: —Ötjömaökö. Kwösöda ötjönöma. Ötjöma ökwödanö, ja̧danö, kwa'dödömine Dios yöawi̧ yöbawadödanö, ja̧danö, bi'ye wȩyukwa wene wei̧ a̧ja̧kwö ja̧badödanö, ötjöbi Diosda ömöayo̧sa. Jo̧kwaobetjö̧ yötawakwö, ötjönö kwösöda, Diosnöda ösödi— jö̧a̧lijatö ötjönöma.

Ángel Juannö bajaliyapo jawa yöawina wene

¹⁰ Ja̧danö, jö̧a̧lijatö ángelma ötjönöma: —Kwiwȩyudakwöja wene, ökwönö chisȩbaja̧ baledakwa̧ wenema ju'wedönö yökawo. Lekwema kwite'ada̧loko. Chisȩbaja̧ baledakwa̧ma lekwökö baledakobetjö yökwawo, te'ada̧lökönö..

¹¹ Ja̧danö, sulabenö ju̧kwadöma, sulabenö tjuju̧kwobö jo̧be. Ja̧danö, otiwanö ju̧kwadöma otiwanö tjuju̧kwobö jo̧be. Ja̧danö, taba̧lö̧ji̧ jawada omukwatö ju̧kwadöma taba̧lö̧ji jawada omukwatö tjuju̧kwobö jo̧be. Ja̧danö, otiwanö omukwatö ju̧kwadöma otiwanö omukwatö tjuju̧kwobö jo̧be. Ja̧danö, wainö ja̧nö sulabedökwö pjabacha̧lökönö ju̧kwadöma jejenö, wainö pjabacha̧lökönö tjuju̧kwobö jo̧be— jejenö ángelma jö̧a̧lijatö ötjönöma.

Jesús Juannö yöawina wene

¹² Ikenama Jesús yöawijatö ötjönöma: —Lekwökö ötjö yemidanö chichakwa̧ma. Chichenama otiwa jawa chiyakwo̧sa otiwanö ju̧kwadönöma. Ja̧danö, sulabe ja̧badönöma balekwa mikwa lȩbebö ja̧takwo̧sa.

¹³ Ötjödasa la'akatjöda ji̧nama. Ja̧danö, ötjödasa 'dö̧ibajenanö baibanöbi chö̧jakwo̧ma. Ja̧danö, ötjödasa 'dö̧ibajökökwema— jö̧a̧lijatö Jesúsma ötjönöma.

¹⁴ Ina jö̧a̧lijatö: —Ötjö chömöledö, tjökamisi dichadöma, suli̧ jwibadödanö babibö, otiwanö tjo̧'wo̧ ösöwanö tjö̧jakwedö. Jobadöma 'yayi̧ Jerusalén comunidad apjude po̧bebö tetjachakwedö, ba̧kwȩlö̧jatebö ja̧kwawa towi wa̧ji̧tjö tjukwobö.

¹⁵ Jo̧kwaijayonö ju'wedöma tetjachökakwedö. Jobadöma 'yayi̧ Jerusalén comunidad ö'öböda tjuju̧kwakwedö, sulabedöma. Jobadöma mea bobadöbi, tji̧lȩkwa̧muböködökwö sulabenö ja̧döbi, jojodönö kwabawö lobadöbi, jojodö tjotidina tjo̧'wo̧ jawa tjo̧'wo̧ wana̧ladöbi, omöna yöba̧lö ja̧döbi. Jobadöma tetjachökakwedö— jö̧a̧lijatö Jesúsma.

¹⁶ Ikenama Jesús yöawijatö okobe deinö itenöda ösödadönöma. Baikwö yöawijatö: —Ötjöma Jesússa. Chömöayo̧ ángelnö, Juannö yöawobö wetinobetjö̧, tjo̧wi̧ta, kwa̧ja̧kwaduwobe. Ja̧danö, ötjöma Davidminetjö tupadanö jojosa. Ja̧danö, ötjöma sili'i jwiinö dejatinö dewo̧danö, yȩayi dejatö dewo̧danö jwiinö dejatinö dewo̧sa— jejenö Jesúsma yöawijatö okobe deinö jo̧banö ösödadönöma.

Dios O̧'wo̧ Luwo̧kwö Obeja Itji̧danö Jo̧ ilekwokwö Jesúsnö Jwötjina wene

¹⁷ Ikenama Dios O̧'wo̧ Luwo̧ma, Obeja Itji̧danö Jo̧ ilekwo baibanö emakwujukwö Jesúsnö jwötjobe cha̧ja̧kwijatö, Baikwö ichi, jö̧ba̧lö. Ja̧danö, jojodönöbi jwöobe cha̧ja̧kwijatö, Ökwödöbi bi'ye yöawi̧ a̧ja̧kwadöma, Jesúsnö jwöbaduwi, Ichi, jö̧ba̧lö. Jejenö cha̧ja̧kwijatö. Ja̧danö, Dios O̧'wo̧ Luwo̧ma yöawijatö: —Bakwo̧ ojwiyo o̧tinö jo̧nö ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoma— yöawijatö, Dios O̧'wo̧ Luwo̧ma.

Juan kabatakwawö yöbawö iwȩyudina wene

¹⁸ Ötjöma Juansa. Ökwödönö yötawa, böja kwialusöja a̧ja̧kwadönöbi, edadönöbi. Böja wȩyudö yötawi̧ma jojodönö baledakwa̧. Ja̧danö, wetaduwakwö. Ju'wi jawa, biya̧ wenekwö pjabatö kwiwȩyudaduwoko. Biya̧da laebobö jo̧be. Bakwo̧ ju'wi jawa, biya̧ wȩyukwakwö pjabatö iwȩyuditjö̧ma, Dios lȩebakwo̧. Jo̧banö bi'ye wȩyukwadanö lȩebi̧ma baledakwo̧.

¹⁹ Ja̧danö, jelo̧, biya̧ wȩyukwatjö ja'yubebi söbebö loitjö̧bi, jo̧banöbi Diosma lȩebakwo̧. Yelösöda, jo̧bama Dios jwiinö otiwemi comunidadnö teachö̧kakwo̧. Ja̧danö, ba̧kwȩlö̧jatebö ja̧kwawa towi wa̧ji̧tjö kwakwawama, yelösöda ukwökakwo̧. Ja̧danö, Diosma jo̧banö kaatibobetjö̧, a̧petubeda ö̧jakwo̧. Jejenö lȩebakwo̧, biya̧ wȩyukwatjö ja'yubebi a̧ja̧kwökönö, söbebö lobo̧nöma.

²⁰ Jesucristo, böja kwialusöjatjö laebi̧ma, Jweinö wene, jö̧ba̧lö, yöba̧lo̧. Jo̧bama, baikwö yöawobe ökwödönöma: —Isabenö yötawa, lekwökö chichakwa̧ma— yöawobe ökwödönöma. Chömöledö, jo̧bama isabenö yöbawo̧. Ötjöma jo̧ba yöawi̧ma, Lekwökö chichakwa̧ma, jö̧ba̧lö, yöawi̧ma, jwiinö chösöda. Jo̧kwaobetjö̧, jo̧banö yöta̧la, Jau, Duluwo̧ Jesús, ichi, jö̧ba̧lö.

²¹ Ja̧danö, Duluwo̧ Jesúsma ökwödönö, iteda ömöledö babibinadönö lȩlö̧jino edobö chösöda. Ja̧danö, böja kwialusöja wȩyukwa baledakwa̧ wenema, Isabenö ji̧ wene, jö̧ba̧lö, yöta̧la. Tjo̧wi̧ta, biya̧da chiwȩyuda.