Apocalipsis 21 - Dios Iwene

Mölejȩ 'yayinö baibajöjȩbi böjȩ 'yayinö baibajöjȩbi Juan edina wene

¹ Ikenama chedemi mölejȩ 'yayinö baibajöjȩ chedijatö. Ja̧danö, böjȩbi 'yayinö baibajöjȩ chedijatö. Ajayinö otidina mölejȩbi, böjȩbi, tjo̧wi̧ 'dö̧ibajobe chedijatö. Ja̧danö, chedemi ojwe nöödöbi jwiobe.

² Ikenama 'yayi̧ Jerusalén ötjabemi chedijatö, Dios 'da̧batö ujuninemima. Jemi 'yayi̧ Jerusalénma mölejȩbetjö böjȩkwö jwiachobe chedijatö. Yelösöda, otiwemi 'yayi̧ Jerusalénma. Bakwuju jilekwenö jemakwuju otiwanö otikwö, otiwanö 'dujawi̧danö otiwemi, 'yayi̧ Jerusalénma.

³ Ja̧danö, labinö ökwöi̧ iwene cha̧ja̧kwijatö, Dios ö̧belöma, baikwö: —A̧ja̧kwaduwitjö. Babema Dios iteda ömöledökwö ö̧jakwa̧ma, tjo̧wi̧ badekwacha. Ja̧danö, Diosma, jobadökwö ja̧nö, Bidöma ötjö chömöledö, jö̧ba̧lö, badekwacha.

⁴ Diosma, ömöledönö otiwanö ite'ada̧lakobe. Jobadöma belöma budekwabinö tjuju̧kwinajayonö, tjo̧wi̧, babema budekwaböködö. Ja̧danö, yemidanö wotjökakwedö. Ajayi suli̧ baledinama, la'akatjöda yemidanöma suli̧ma baledökakwawö̧. Ja̧danö, tjo̧'wo̧ tjo̧ebi̧bi yemidanöma baledökakwawö̧. Budekwöbi, nii̧bi niökakwawö̧ ajayinö baledinadanö— jö̧ba̧lö cha̧ja̧kwijatö.

⁵ Jemi ikenama, inesö ba̧kwawakanö bo̧ma yöawijatö: —A̧ja̧kwaduwitjö. Ötjöma okobe jwiinö ajayi jawama 'yayinö baibanö ja̧bo̧sa— yöawijatö. Ja̧danö, ötjönö weijatö: —Juan, ötjö yötawi̧ma wȩyudi. Yötawi̧ma jweinö yötawa, isabenö ji̧ wene. Biya̧, yötawi̧ma wȩyudi:

⁶ Tjo̧wi̧ta, okobe jwiinö 'dö̧ibajabe. Ötjödasa la'akatjöda ji̧nama. Ja̧danö, ötjödasa 'dö̧bibajö̧kö̧ma. Ötjöma ojwiyo o̧ti̧lö̧jökwenöma ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoda.

⁷ Ja̧danö, sulabetjö juluwinadö, chö̧jobekwö ichibadönö jwiinö otiwi̧ jawa iyabo̧sa. Ja̧danö, ötjödasa, sulabetjö juluwinadö tjo̧'wo̧ tjöwana̧lökwe Diosma. Jobadönöma, Chi̧tji̧mu, jö̧ba̧lö, öbabo̧sa.

⁸ Jo̧kwaijayonö jejenömaökö ju'wedönöma. Yebabinö, ¡Ayö! Diosnö chösöditjö̧ma inia tjötinö baledena, jö̧ba̧lö, yebabo̧danö yebabinadönöma otiwi̧ma chiyökakwo̧sa. Ja̧danö, Diosnö kabatibinadönöbi, ja̧danö, sulabedökwö pjabacha̧linadönöbi otiwa jawama chiyökakwo̧sa. Jobadönö ökwöla nöola okwa lotakwo̧sa. Ja̧danö, tji̧lȩkwa̧muböködökwö sulabenö ja̧binadönöbi, ja̧danö, jojodönö kwabö lobinadönöbi, ja̧danö, mea bobinadönöbi, ja̧danö, ju'wedö tjo̧'wo̧ tjöwana̧lobö tjotidinökwenö tjo̧'wo̧ wana̧linadönöbi, ja̧danö, bakwelajatebö omöna yöba̧linadönöbi, jobadönöma ökwöla nöola okwa lotakwo̧sa. Jobema jwiinö tubinö ubobe, azufre mikwi̧ tubi̧ma. Joola okwa lotji̧ma, 'dö̧ibaji̧ woawa mikwemi, jö̧ba̧lö weijatö Diosma ötjönöma, chiwȩyudobö.

Juan, 'yayi̧ Jerusalén edina wene

⁹ Ja̧danö, ángelma, jelemutjö du̧ju̧tajanö dȩja̧'di̧ju juna̧ladötjö bakwo̧ ichö jö̧a̧lijatö ötjönöma: —Ötjökwö ichi, Obeja Itji̧danö Jo̧ ilekwo̧ baibanö emakwujunö chi̧sebokwö— jö̧a̧lijatö.

¹⁰ Ikenama Dios O̧'wo̧ Luwo̧, ötjö cho̧'wo̧ luwo̧nö öba̧ja̧da̧lonö, jo̧ba ángelma ötjönö öbibö i̧'yijatö mö'ösa'o wa̧pekwa'obe. Jobe ja̧nö chedijatö 'yayi̧ Jerusalén, Dios 'da̧batö ujuninemima, Dios ö̧jobetjö böjȩkwö jwiachobe.

¹¹ Yelösöda, 'yayi̧ Jerusalénma jwiinö dewinö dejatobe, Dios, iteda jwiinö dewinö idejati̧ma jobe salöobetjö̧. Salöanö dejatobe chedijatö, inawa otiwawa jape mikwawa salöi̧danö. Yelösöda, isa̧yu̧ salöi̧danö dejatemi .

¹² Jobe 'yayi̧ Jerusalén ö'öböma okobe jwiinö, mönö tjöekwemi, inawiya wanabinö. Ja̧danö, apudebiya a̧li̧nösamutjö dödelatajanö apjudebiya jo̧be, tjöekwemima. Ja̧danö, apjudebiya la'akanö, bakwadekwena ángelesdöma tjö̧jobe chedijatö. Ja̧ apjudebiyanö tjimibiya ba̧ji, damötjö ji̧na, Israelmine i̧tji̧mu tjimibiya, a̧li̧nösamutjö du̧ju̧tajanö jojodö tjimibiyama. Apjudebiya bakwadekwena, tjimikwena wȩyukwi̧.

¹³ Ja̧ apudebiyatjöma ja̧wo̧ ichobekwöbi wa̧pödekwa jo̧be. Ja̧danö, ja̧wo̧ ichemi u'dakwöma wa̧pödekwa jo̧be. Ja̧danö, ja̧wo̧ ichemi a̧li̧kwöbi wa̧pödekwa, ja̧danö, ja̧wo̧ meajobekwöbi wa̧pödekwa jo̧be.

¹⁴ Ja̧danö, tjöekwemi teebema, inawiya ö̧wiyawi bo̧be, a̧li̧nösamutjö döwölatajanö. Ja̧ öwiyanöma Obeja Itji̧danö Jo̧ weinawö̧ tjimibiya wȩyukwa, bakwawakwena.

¹⁵ Ja̧danö, jo̧ba ángel, ötjönö yöba̧lo̧ma, isö̧'a̧ ba̧ja̧dakwawö̧'a̧ juna̧lo̧, orotjö otikwö̧'a̧. Jö̧'a̧nöda 'yayi̧ Jerusalén comunidadbi, apjudebiyabi, tjöekwemibi öba̧ja̧dobe chedijatö.

¹⁶ Jobe 'yayi̧ Jerusalén comunidadama wayobekwöbi ja̧kwölakwöbi bakwainö ödöobe. Wayobekwöma, yelösöda ödöobe, dos mil doscientos kilómetrosnö. Ja̧danö, jakwölakwöbi bakwainö ödöobe. Ja̧danö, mö tjöekwemibi bakwainö möobe.

¹⁷ Ja̧danö, ángelma tjöekwemi ba̧ja̧dö edobe chedijatö, jojodö ba̧ja̧dö tjedi̧danö. Jejenö tjöekwemi ba̧ja̧dö edemi yelösöda möobe, sesenta y cinco metros.

¹⁸ Jemi tjöekwemima inawiyatjö tjöekwemi, nöinö mikwawi̧ jawa öwiyatjö, jaspe mikwi̧tjö. Ja̧danö, 'yayi̧ Jerusalén comunidadma orotjö otikwemi, isa̧yu̧ salöi̧danö bakwai̧ orotjö.

¹⁹ Ja̧danö, jemi tjöekwemi teebe ba̧ji öwiya wamema, pjei̧ öwiya pöa̧lobe chedijatö, nöinö mikwawi̧ öwiya. Bakwawa nöawa wame ja'yuwawa, jaspe mikwawa pöa̧lobe. Ja̧danö, jelewanö ja'yuwawa pöa̧lobe, zafira mikwawa. Ja̧danö, jelewanö ja'yuwawa pöa̧lobe, ágata mikwawa. Ja̧danö, jelewanö ja'yuwawa pöa̧lobe esmeralda mikwawa.

²⁰ Ja̧danö, jelewanö ja'yuwawa pöa̧lobe, ónice mikwawa. Ja̧danö, jelewanö pöa̧lobe ja'yuwawa rubí mikwawa. Ja̧danö, jelewanö ja'yuwawa pöa̧lobe crisólito mikwawa. Ja̧danö, jelewanö ja'yuwawa pöa̧lobe berilo mikwawa. Ja̧danö, jelewanö ja'yuwawa pöa̧lobe topacio mikwawa. Ja̧danö, jelewanö ja'yuwawa pöa̧lobe crisoprasa mikwawa. Ja̧danö, jelewanö ja'yuwawa pöa̧lobe, jacinto mikwawa. Ja̧danö, jelewanö ja'yuwawa pöa̧lobe amatista mikwawa.

²¹ Ja̧danö, apjudebiya a̧li̧nösamutjö dödelataja apudebiyama perla ötjabitjö otikwa ödebiya. Bakwadebiyama bakwawa perlatjö otikwade. Ja̧danö, 'yayi̧ Jerusualén ö'weje 'ya̧kwawa manama, orotjö, bakwai̧ orotjö lödawama, jwiinö salöama.

²² Ja̧danö, jobe chedemi, 'yayi̧ Jerusalénnöma, Dios eju jwiobe, Diosbi, Obeja Itji̧danö Jo̧bi okobe jwiinö tjö̧jobetjö̧, 'yayi̧ Jerusalénnöma.

²³ Ja̧danö, 'yayi̧ Jerusalénnöma möle jawo̧bi yö̧te ja̧wo̧bi tjö̧lajokobe, detjobe. Dios ujulu dewinö idejati̧da dewobe jojodö tjedoböma. Ja̧danö, Obeja Itji̧danö Jo̧ma la̧pa̧la̧yu̧danö, dewinö idejati̧da dewo̧, 'yayi̧ Jerusalénnöma.

²⁴ Otiwanö öwawinö tjidejatobetjö̧ okobe deinö böjȩnö ju̧kwadöma otiwanö, dewinö idejatobeda tjö̧jobe, 'yayi̧ Jerusalénnö. Ja̧danö, chedijatö böjȩ okobe deinö la'aka luwedöma, tju̧kwa tea otiwi̧ jawa, jwiinö mikwawi̧ jawama, 'yayi̧ Jerusalénbe tje'ewobe, jobeda tetjatobö.

²⁵ Jobe apjudebiyama tumatakwawökö, po̧ekwa̧linö jo̧be, yö̧te baibökönö, ba̧kwȩlö̧jatebö dejatobetjö̧.

²⁶ Jo̧kwaobetjö̧, böjȩ jojodönö chedijatö, jelobebi jelobe ju̧kwadönöbi ba̧kwȩlö̧jatebö 'yayi̧ Jerusalénbe tji̧'yobe, jwiinö otiwi̧ jawa, jwiinö mikwawi̧ jawa e'ewö tji̧'yobema.

²⁷ Jo̧kwaijayonö suli̧ jawama teatakwawokobe, jwiinö otiwi̧ jawada. Jobema, 'yayi̧ Jerusalénöma, otiwakwö sulabekwö pjaacha̧lokobe. Ja̧danö, ba̧kwȩlö̧jatebö omöna yöba̧ladöbi tebachöködö. Tjimibiya wȩyukwadöda tetjachobe, Bidöma Dios ö̧jobe tebachö ja̧dö, jö̧ba̧lö, jö̧tja̧lawö̧da. Jobadöma, tjimibiya ba̧jadö, Obeja Itji̧danö Jo̧ u̧kwa kwialu'ye okwa.