Apocalipsis 20 - Dios Iwene

Awetjanö ujuluwina wene

¹ Ikenama jelo̧ ángelnö chedijatö, mölejȩbetjö jwibacho̧nö, ömamunö yawepi̧ do̧ba̧lo̧nö, laju jwiinö möaju po̧ekwapi̧. Ja̧danö, jo̧ba ángelma ka̧lenaso ödöaso, jwiinö ömökaso do̧ba̧lo̧.

² Jo̧bama, böjȩnö ichibö, toba'dadanöso̧nö do̧batö ka̧lenasonö 'diinö nu'yö di̧batö ödobe chedijatö. Jo̧bama, jejenö di̧batö ödajökwema, Awetja, damötjö ji̧na a̧ko'da, omöna yöba̧lo̧. Ja̧danö, di̧batö ödajökwema lekwe, mil imiamebiya jenanö, labebökönö bo̧.

³ Ja̧danö, di̧batö ödajökwenöma ángelma laju okwa jaobe chedijatö. Jabajo̧ma yawepi̧nö yö̧bebö tumato̧. Ja̧danö, yö̧ebajemima tö'awa'be pöbebo̧. Ja̧danö, mil imiamebiya jenanö laju okwada bo̧, Awetjama, böjȩnö ju̧kwadönö sulabenö öbibökönö. Ja̧danö, mil imiamebiya baibena, ángelma jo̧banö ejatö kaatakwo̧, lekwökönöda ö̧jobö.

⁴ Ja̧danö, chedijatö ba̧kwawa ökiya, nöinö, la'aka luwedö tjö̧baji̧ ökiya. Ja̧ ökiyanö ba̧jadöma Dios lȩebakwa̧ jawa yötjawobö ba̧jadö. Ju'wedönöbi chedijatö, öwawöködönö. Jobadöma tjuubiya bulabinö lotjinawö̧, Dios iwenebi Jesús yöawinabi yötjawobetjö̧. Jobadöma ojwe okwatjö labebinanö, jo̧ba o̧'wo̧ jawabi öpöjödadö. Ja̧danö, jo̧ba imi número doawa, tjömamunöbi tjöbanöbi öpöjödadö. Jejenö tjöpöjödobetjö̧, tjuu bulatö lotjinawö̧. Ja̧danö, jobadöma wotjinajayonö yemidanö 'yabibajinadö, Cristokwö jojodönö webö tjö̧jobö, ja̧ mil imiamebiya jenanö.

⁵ Jobadöma wobinadötjö ajayinö tjebachajinadö. Ju'wedö wobinadöma ina, bajaliya tjetjachakwedö, mil imiamebiya baibena.

⁶ Yelösöda, wobinadötjö ajayinö tjebachajinadöma, tjo̧'wo̧ ösöwanö ja̧dö, Dios wei̧ a̧ja̧kwö, Cristokwö. Jobadöma nöola ubolanö okwa loawatjö ji̧badö. Ja̧danö, Dioskwö Cristokwö lekwe, mil imiamebiya jenanö, Diostjö jojodötjö ö'weje pjabatadödanö tjotidakwedö. Dioskwö, Cristokwö mil imiamebiya jenanö tjotidakwedö.

Awetjanö ejatö kaatina wene

⁷ Ja̧danö, mil imiamebiya baibena, ángelma Awetjanö ejatö kaatakobe. Ja̧danö, Awetjama laebakobe laju okwatjö, Diosma jejenö laebobö weobetjö̧.

⁸ Ja̧danö, jo̧bama, böjȩ okobe jwiinö kwebachö, okobe deinö böjȩnö ju̧kwadönö suli̧ waedö yöba̧lö, tjoko̧ko̧kwobö weakobe, Awetjama. Ja̧danö, Gogo comunidad jojodönöbi, Magogo comunidad jojodönöbi suli̧ waedö yöba̧lö tjoko̧ko̧kwobö weakwo̧. Gogo jojodöbi, Magogo jojodöbi böjȩnö okobe deinö ju̧kwadönö wanekwachobe. Ja̧danö, Awetjama, ko̧ko̧kwajadönö weakobe ölakwabikwawö tji̧'yobö. Yelösöda, jobadöma ba̧jekwadö, so̧bi̧ya̧pu̧danö ba̧jekwadö, ölakwabikwawö tji̧'yakwedöma.

⁹ Ja̧danö, jobadö ölakwabikwawö tji̧'yobema chedijatö. Böjȩ okobe jwiinö, Dios ömöledö babibinadö tjuju̧kwobekwö ölakwabikwawö tji̧'yobe chedijatö. 'Ya̧jadöma, Dios ösödemi comunidad ichibö, i̧sȩko̧ baibanö tjö̧jobe chedijatö, Dios ömöledö babibinadö tjuju̧kwenama, jobadönö ölakwabikwawö tjujuluwobö. Jo̧kwaijayonö mölejȩbetjö ökwöladanö ji̧ tjoduwobe chedijatö, jobadö wotjawinö.

¹⁰ Ikenama Diosma Awetjanö, jojodönö ba̧kwȩlö̧jatebö suli̧ waedö yöba̧lo̧nöma, do̧batö töbebö loobe chedijatö, ökwöla nöola okwa. Jobema, ju'wedö du̧ju̧tajanö ajayinö töbebö loinemi. Ojwe okwatjö labebinanöbi ajayinö töbebö loinemi jemima. Ja̧danö, omöna yöba̧linanöbi, Ötjöma Dios yöawi̧ yöbawo̧sa, jö̧ba̧lö, yöba̧linanöbi, ajayinö töbebö loinemi jemima, ökwöla ubola okwama. Jobema tiibökönö, tubinö yelösöda ubobe, azufre mikwi̧ ubi̧ tubi̧ma. Ja̧danö, jobadö wa̧medukwama, ba̧kwȩlö̧jatebö labebökönö, mölebi yö̧tebi inia tjötjinö baledawö̧.

Wobinadö Dios öba a'o tjö̧jina wene

¹¹ Ja̧danö, chedijatö Diosnö, inesö ö̧baka, dewakanö bo̧nö. Ikenama böjȩbi, mölejȩbi jwiinö baibobe chedijatö, yemidanö baibökönö.

^12-13 Ikenama okobe deinö wobinadönöma, la'aka luwedönöbi, jo̧kwadabedönöbi chedijatö, Dios öba a'o ja̧dönöma, ba̧kwawakanö ö̧bemi badeibö. Ja̧danö, ojwe okwatjö o̧bibinadönöbi wobinadö tjuju̧kwena ji̧nadönöbi chedijatö, Dios öba a'o ja̧dönö. Ja̧danö, kwialu'yebiya chedijatö, 'boekwobe wa̧ji̧. Ja̧'yebiyatjö bakwa'ye, okobe jwiinö jojodö sulabenö tjö̧jinabi, otiwanö tjö̧jinabi wȩyukwa'ye. Ja̧danö, jele'ye, ba̧kwȩlö̧jatebö ja̧kwawa juna̧ladö tjimibiya ba̧ja'ye. Ikenama Diosma kwialu'yenö wȩyukwi̧ eda̧lö yöawobe chedijatö, jojodönö bakwo̧nökwena lȩebakwa̧.

¹⁴ Jemi ikenama, wobajalema ökwöla nöola okwa töbebö lotji̧danö baibobe chedijatö, wobajale jwiinö baibanö. Ja̧danö, wobinadö tjuju̧kwemibi ökwöla nöola okwa töbebö lotji̧danö baibobe chedijatö, jwiinö baibanö. Jejenöma woawama yemidanö jojodönö baledökakobe, 'dö̧ibaji̧ woawa mikwi̧ma.

¹⁵ Ja̧danö, jojodöma, ba̧kwȩlö̧jatebö ja̧kwawa juna̧ladö tjimi ba̧ja'ye okwa wȩyukwöködöma, joola, ökwöla ubola nöola okwa ba̧kwȩlö̧jatebö tjö̧jakwedö.