Apocalipsis 2 - Dios Iwene

Éfeso comunidadnö ju̧kwadötjö Jesúsnö ösödadönö Jesús yöawina wene

¹ Ja̧danö, chedökwema ina weijatö ötjönöma: —Juan, biya̧ yötawi̧ma wȩyudi weköbo, Éfeso jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ yöawi̧. Jo̧ba, biya̧ chiwȩyudi̧ yöawo̧ma, jelemutjö do'do̧latajanö la̧pa̧la̧yu̧bi̧ya junawa o'di̧ju, orotjö otikwa o'di̧ju, 'da̧denö kwebachö jo̧.

² Jo̧bama baikwö yöawobe ökwödö Éfesonö ju̧kwadönö, jo̧banö ösödadönöma: Ökwödö kwö̧jaduwi̧ma okobe jwiinö chöwaisa. Ja̧danö, otiwanö kwö̧jaduwi̧ma chöwaisa. Chedemi otiwanö, ötjö weti̧ a̧ja̧kwö kwö̧jaduwobe. Ja̧danö, sulabenö baledonöbi ökwödöma kwo̧'wo̧duwi 'dibachibö kwö̧jaduwobe. Ja̧danö, chedemi sulabenö omukwatadö yötjawi̧ma yelösöda kwa̧ja̧kwaduwokobe. Ja̧danö, jelobe omukwatö yöba̧linadönöma kwöwaisachibinaduwobe, Omöna yöba̧ladö, jö̧ba̧lö. Jobadöma, Ökwödöma Jesús webawedösa, jö̧ba̧lö, yötja̧lijayonö ökwödöma, otiwanö omukwatö kwisakwinaduwobe, jweinö yötja̧lojobö, omöna yötja̧lojobö, edö. Jejenöma otiwanö kwöwaisachibinaduwobe, Jobadöma omöna yöba̧ladö, Jesús webawöködö, jö̧ba̧lö.

³ Jau chömöledö, ökwödö Éfeso jojodönö edo̧sa. Chöwaisa, ötjönö ösödö yökawaduwobetjö̧ inia tjököbaduwinö baledawö̧ja. Jo̧kwaijayonö chedemi sulabe baledonöbi kwo̧'wo̧duwi 'dibachibö ja̧nö, me'dawachibökönö, otiwanö kwö̧jaduwobe.

⁴ Chömöledö, ökwödöma jejenö otiwanö omukwatö kwö̧jaduwijayonö ja'yube kwomukwataduwi̧ma chöpöjöda. Ja̧danö, chöpöjödi̧ma yötawaduwakwö: Ötjönö ajayi ile nibebö kwö̧jinaduwanöma babema ile nibeböma kwö̧jaduwokobe. Tjo̧'wo̧ sötjibi̧danö ja̧. Ajayinö ötjönö do̧batö kwemaduwaja̧ tupakwöma jwiinö ile nibebö kwö̧jinaduwobe ötjönöma. Jo̧kwaijayonö chedemi babema jejenöma, jwiinöma ile nibeböma kwö̧jaduwokobe. Jo̧kwaobetjö̧ chömöledö, omukwataduwi, Aaa, ajayi Jesúsnö ile nibebö dö̧jinadanö babema ile nibeböma dö̧jokobe, jö̧ba̧lö.

⁵ Ja̧danö chömöledö, babe kwomukwataduwi̧ kabatibö balewachaduwi, ajayi otiwanö omukwatö kwö̧jinaduwadanö, ötjönö jwiinö ile nibebö kwö̧jaduwo. Jejenö kwomukwataduwi̧ kwöbalewachaduwökötjö̧ma ötjöma kwö̧jaduwobekwö ichö, la̧pa̧la̧yu̧ junawa'do̧ma emibö tje'ewi̧danö che'ewakwo̧sa, ökwödönö lȩbebö.

⁶ Chömöledö, ja'yube kwomukwataduwi̧ma chöpöjödijayonö, ju'wi otiwanö kwomukwataduwi̧ma jo̧be, biya̧: Ökwödöma jweinö omukwatö kwöpöjödaduwobe ju'wedönö, Nicolás mikwo̧ ömöayedönöma. Jobadöma, Nicolás jelobekwö omukwatö ja̧i̧danö jelobekwö omukwatö ja̧badö. Ötjöbi, ökwödödanö, jwiinö chöpöjöda jobadö omukwatö ja̧tji̧ma.

⁷ Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönö. Biya̧ yöawobe Dios O̧'wo̧ Luwo̧ma: Ju'winö, sulabetjö juluwinadöma ötjö chö̧jobekwö tjichibakwedönö otiwanö wetakwo̧sa towi wa̧ji̧tjö, ja̧kwawa iyawowi wa̧ji̧tjö, 'Döbebö kwaduwi, jö̧ba̧lö. Jau, jobadönö wetakwo̧sa, Dios jwiinö otiwi̧ batjo junawowi wa̧ji̧tjö, 'Döbebö kwaduwi, jö̧ba̧lö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ma, jelemutjö do'do̧latajanö la̧pa̧la̧yu̧bi̧ya junawa o'di̧ju, orotjö otikwa o'di̧ju, 'da̧denö kwebachö jo̧ ökwödönöma— jejenö jö̧ba̧lö weijatö chedökwema ötjönöma, iteda yöawi̧ wȩyudö wetobö Éfeso jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Esmirna comunidadnö ju̧kwadötjö Jesúsnö ösödadönö Jesús yöawina wene

⁸ Ja̧danö, chedökwema ina chiwȩyudobö weijatö ötjönöma: —Juan, biya̧ yötawi̧ma wȩyudi weköbo, Esmirna jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma ba̧kwȩlö̧jatebö jo̧, ajayinö ji̧nabi, ja̧danö, 'dö̧ibajena baibanö ö̧jakwo̧bi yöawi̧. Ja̧danö wobajo̧ yemidanö tjebachajina yöawi̧, biya̧ chiwȩyudi̧ma.

⁹ Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.

¹⁰ Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.

¹¹ Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia. Baikwö yöawobe: Sulabetjö juluwinadönöma, 'dö̧ibaji̧ woawa baledökakobe. Ja̧danö, ökwöla tiibokola ubolanö, ba̧kwȩlö̧jatebö inia tjöbö tjuju̧kwökakwedö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe ba̧kwȩlö̧jatebö jo̧, ajayinö ji̧nabi, ja̧danö, 'dö̧ibajena baibanö ö̧jakwo̧bi, ja̧danö wobajo̧ yemidanö tjebachajina jo̧ma ökwödönöma— jejenö weijatö chedökwema ötjönöma, iteda yöawi̧ wȩyudö wetobö Esmirna jojodötjö itenö ösödadönö te'ada̧lakwawa jojonö, ite'ada̧lawö̧nö̧ yöawobö.

Pérgamo comunidadnö ju̧kwadötjö Jesúsnö ösödadönö Jesús yöawina wene

¹² Ja̧danö, chedökwema ina chiwȩyudobö weijatö ötjönöma: —Juan, biya̧ yötawi̧ma wȩyudi weköbo, Pérgamo jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma isa̧pi̧ bakwachakwadanö sȩapi̧ juna̧lo̧ yöawi̧.

¹³ Jo̧bama baikwö yöawobe ökwödö Pérgamo jojodönö, jo̧banö ösödadönöma: Ötjöma chöwaisa, jobe kwiteboduwima Awetja ba̧nö wei̧danö jo̧be. Jo̧kwaijayonö chedemi ökwödöma jweinö omukwatö, otiwanö kwö̧jaduwobe, Jesúsnöda ösödadösa, jö̧ba̧lö. Ja̧danö, bakwo̧, ötjönö ba̧kwȩlö̧jatebö yöbawo̧, Antipas mikwo̧nö, kwabö lotjenabi ökwödöma kwo̧'wo̧duwi 'dibachibö kakatibinaduwokobe ötjönöma.

¹⁴ Chömöledö, otiwanö kwö̧jaduwijayonö ja'yubeda jo̧be, chöpöjödi̧ma. Ökwödötjö ju'wedöma jelobekwöda omukwatö ja̧köbaduwobe. Ja̧ omukwatö ja̧köbaduwi̧ma yelösöda chöpöjöda, biya̧: Chedemi ina kwösödaduwobe damötjö ji̧na, Balaammine omukwatina, jo̧ba omukwatö ö̧jinadanö omukwatö ja̧nö. Damötjö Balaamminema weinobe la'aka luwo̧ Balacminenö Israel jojodönöma jelobekwö öibobö, sulabenö ja̧tjobö. Jejenö weökwe, Balacminema, Israel jojodönö, tjo̧'wo̧ jawa tjiyaja̧ kwakwawa tjukwoböbi, tji̧lȩkwa̧muböködökwö tjö̧joböbi, jelobekwö omukwatö ja̧tjobö öibinobe. Ökwödötjö ju'wedöma ina jo̧ba Balaammine sulabenö omukwatö ja̧inadanö omukwatö ja̧köbaduwobe.

¹⁵ Ja̧danö, ökwödötjö ju'wedöma jelo̧, Nicolás mikwo̧ jelobekwö omukwatö ja̧i̧danö omukwatö kwö̧jaduwobe.

¹⁶ Jo̧kwaobetjö̧ ökwödötjö jelobekwö omukwatadönö baikwö weta: Jelobekwö kwomukwatuduwi̧ kabatibö balewachaduwi. Kwöbalewachaduwökötjö̧ma, kwö̧jaduwobekwö labinö chi̧'yakwo̧sa, ökwödönö chitichakwobö chisa̧pi̧nö, chaatjö laebapi̧nö.

¹⁷ Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönöma. Baikwö yöawobe: Sulabetjö juluwinadönö otiwanö chiyakwo̧sa. Mölejȩbetjö kwakwawa, mana mikwi̧, ajayi tojawa kwakwawatjö, chiyakwo̧sa. Ju'wi jawabi chiyakwo̧sa, sulabetjö juluwinadönöma. Bakwo̧nökwena sulabetjö juluwo̧nöma inawa dewawa chiyakwo̧sa, iteda imi, 'yayi̧ imi wȩyukwawa. Ja̧wa wȩyukwa imima, chiyökweda öwaisakwo̧, iteda 'yayi̧ imima. Chömöledö, jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe isa̧pi̧ bakwachakwadanö sȩapi̧ juna̧lo̧ma ökwödönöma— jejenö chedökwema weijatö ötjönöma, iteda yöawi̧ wȩyudö wetobö Pérgamo jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Tiatira comunidadnö ju̧kwadötjö Jesúsnö ösödadönö Jesús yöawina wene

¹⁸ Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Tiatira jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma Dios Itji̧ yöawi̧. Ja̧danö, öbajalebiya la̧pa̧la̧yu̧ ubi̧danö ubo̧, ömasapiyabi jwiinö salöbo̧ yöawi̧, biya̧ chiwȩyudi̧ma. Yelösöda, jo̧bama, jwiinö dei̧yanö ubi̧danö dei̧yanö ubo̧, ömasapiyama, 'dii̧ jawa, suli̧ jwii̧ baibobö ökwölanö juwawa. Jo̧bama ökwödönö baikwö yöawobe:

¹⁹ Ökwödö otiwanö kwö̧jaduwi̧ma chöwaisa. Ja̧danö, ju'wedönö kwösödaduwi̧bi, ötjönö kwo̧'wo̧ kwöwana̧laduwi̧bi chöwaisa. Ja̧danö, chöwaisa kwömöledöduwinö otiwanö pjakataduwi̧bi. Ja̧danö, sulabenö baledonöbi kwo̧'wo̧ luwo̧duwi 'dibachibö ja̧nö, ötjönö kabatibökönö kwö̧jaduwi̧bi chöwaisa. Ökwödöma otiwanö pjabatadöja. Chedemi ajayinö otiwanö ja̧nö pjakataduwinemitjö o̧penönö babe ja̧nö pjakataduwi̧ma chedobe.

²⁰ Jejenö otiwanö kwö̧jaduwijayonö, ja'yube kwomukwataduwi̧ma chöpöjöda. Sulabuju, Jezebel mikwuju, yöjawobö weköbaduwobe. Jobujuma, Dios iwene yöbawujusa, jö̧ba̧lö, jö̧ja̧lijayonö jelobekwö omukwatuju. Jobujunöma yötawaduwakwö. Jobujuma ötjö chömöayedönö jelobekwö öbibuju, sulabenö ja̧tjobö. Ja̧danö, tji̧lȩkwa̧muböködökwö tjö̧jobö, tjo̧'wo̧ jawa tjiyaja̧ kwakwawa sulabenö tjukwobö öbibuju, chömöayedönö sulabenö ja̧tjobö. Jobujuma yelösöda sulabuju. ¿Tajawedö yöjawobö weköbaduwobeda?

²¹ Ötjöma chite'ada̧lijatö sulabenö jomukwati̧ kabatibö jöbalewachoböma. Jo̧kwaijayonö chedemi jobujuma yelösöda 'dibuju. Sulabenö ja̧ji̧, jelo̧ jelo̧kwöma, Katatibökö, jö̧ba̧lö, jöpöjödobe.

²² A̧ja̧kwaduwitjö. Jobujunö lȩbebö, jö'wöchi̧ jawa baledobö wetakwo̧sa. Ja̧danö, jobujukwö sulabenö ja̧badö, jobujutjö katjatibökötjö̧ma jwiinö inia tjötjinö wetakwo̧sa jobadönöma.

²³ Ja̧danö, jobuju jömöayedönö, jobuju yöjawi̧ ösödadönöma omönanö ö'wö batjibanö wetakwo̧sa. Ötjöma jobadö tjo̧'wo̧ luwo̧ okwanö tjomukwati̧bi waiso̧sa. Ja̧danö, jobadö ö'wö batjibiawö̧ okobe deinö ötjönö ösödadöma, okobe jwiinö tjö̧baji̧tenia, jweinö tjöwaisachibakobe ötjönöma. Ötjönö jweinö tjöwaisachibakobe, ¡Ayö! Jesúsma jojodö tjo̧'wo̧ luwo̧ okwanö tjomukwati̧bi okobe jwiinö waiso̧, jö̧ba̧lö. Ja̧danö, tjöwaisachibakobe lȩtebakwa̧ma jweinö omukwatö lȩtebakwo̧sa, jojodö bakwo̧nökwena ja̧tjaja̧ mikwama. Jau, jojodö ja̧tji̧ mikwama lȩtebocha, sulabenö omukwatö ja̧badönöma.

²⁴ Jau ökwödötjö ju'wedö, Awetja omukwati̧danö omukwatadöma jobuju yöjawi̧ a̧ja̧kwö, Bisu yöjawi̧ma Awetja okwanö omukwati̧ yöjawobe, jö̧ba̧lö, ösödadö. Jo̧kwaijayonö, ökwödö Tiatira jojodötjö ju'wedöma jobuju sulabuju jomukwati̧danö omukwatöködöja. Ja̧danö, jobujunö öpöjödö, yöjawi̧ kwa̧ja̧kwaduwokobe. Jo̧kwaobetjö̧, ökwödönöma, tjo̧wi̧ta, ju'wi jawa wetokobe.

²⁵ Biya̧da chösöda, kwö̧jaduwoböma: Ötjönö ösödöda, kwo̧'wo̧ wana̧löda kwö̧jaduwo, ötjö chichenanö baibanö.

²⁶ Ja̧danö, böjȩ 'dö̧ibajenanö baibanö ökwödötjö sulabetjö juluwinadönö, ötjö weti̧ a̧ja̧kwö ju̧kwinadönöma kabebö chujunakwo̧sa, okobe deinö jojodö tjuluwedö bakibaduwanö.

²⁷ Ökwödö tjuluwedö bakibaduwakwedöma, labinö webö kwö̧jaduwakwedöja, kwöpöjojodöduwinö le jwiinö söbebö lobö. Wanedö yötawa: Dȩja̧'do̧, letiyatjö otikwa'do̧, 'dii̧ jawatjö kwabö 'dabebö lotji̧danö ökwödöma söbebö loköbaduwakobe kwöpöjojodöduwinöma. Ja̧danö, chömöledö, Chabe'do ötjönö, inesö la'aka luwo̧ batibanö kabebö ujuninadanö kabebö chujunakwo̧sa ökwödönöma, la'aka luwedö bakibaduwanö.

²⁸ Ja̧danö, ökwödö kabebö chujunakwawö̧nöma sili'inö chiyakwo̧sa, yȩayi labebo̧nö. Jo̧ba sili'ima ötjönö wanekwachobe, Ökwödöma ötjökwö kwö̧jaduwakwedöja, jö̧ba̧lö.

²⁹ Chömöledö, a̧ja̧kwaduwi böja wȩyudi̧ma, Dios O̧'wo̧ Luwo̧ yöbawö wei̧ okobe deinö ötjönö ösödö ko̧ko̧kwa̧lö tjö̧baji̧tenia, jö̧ba̧lö yöawobe Dios Itji̧ma, ökwödönöma— jejenö chedökwema weijatö ötjönöma, iteda yöawi̧ wȩyudö wetobö Tiatira jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.