Apocalipsis 19 - Dios Iwene

Juan a̧ja̧kwina wene, ba̧jekwadö Diosnö ösödö jwötjeba̧lobe

¹ Ikenama mölejȩbetjö labinö ökwöi̧ cha̧ja̧kwijatö, ba̧jekwadö jwötjeba̧li̧ ökwöi̧, baikwö: Do̧'wo̧ Döwana̧lökwe Diosnö dösödaduwo. Jo̧bada dö̧jibinö iyo̧. Jo̧bada jwiinö otiwo̧, jweinö lȩbebo̧. Jo̧bada jwiinö juluwo̧. Dösödaduwonö.

² Dios lȩebi̧ma otiwanö, jweinö omukwatö lȩbebo̧. Ja̧danö, Babilonia, jelo̧ jelo̧nö ju̧junö wanekwachemi tjo̧wi̧ lȩebajabe. Jobema, jelo̧ jelo̧nö ju̧ju sulabenö ja̧ji̧danö baibinemi, böjȩnö ju̧kwadönö jobujunö tjö̧jotö jö̧ba̧lö öbibö. Ja̧danö, Diosma iteda ömöayedönö, tjökwösobu ebawinö kwabawö lobinadönö balekwa mikwa iyö lȩebajabe.

³ Diosnö dösödaduwo, Babilonia comunidadtjö imiyu'wo kaami̧ma ba̧kwȩlö̧jatebö kaamobö ja̧obetjö̧, jö̧ba̧lö jwötjeba̧li̧ ökwöi̧ma cha̧ja̧kwijatö.

⁴ Ikenama mölejȩnö ju̧kwadö damö la'aka luwedö, veintecuatronö, ju'wedö tjöbajalebiya a̧tja̧bayedöda ju̧kwawö̧kwö, tju̧yu̧ju̧ki̧junö bamatö, tjuu nijakwö bȩtjachibö Diosnö, inesö ba̧kwawakanö bo̧nö tjösödobe chedijatö, Diosnö dösödaduwo, isabenö otiwanö omukwatö ja̧bo̧, jö̧ba̧lö.

⁵ Ikenama, inesö ba̧kwawakatjö iwene ökwöi̧ma cha̧ja̧kwijatö, baikwö: Do̧'wo̧ döwana̧lökwe Diosnö dösödaduwo, okobe deinö jo̧ba ömöayedöma, jo̧banö yebabidöma, la'aka luwedöbi, jo̧kwada jojodöbi. Dösödonö, jö̧ba̧lö ökwöi̧ cha̧ja̧kwijatö.

⁶ Ikenama labinö, ba̧jekwadö jwötjeba̧li̧danö ökwöi̧ cha̧ja̧kwijatö. Yelösöda, taya möaya doibobe labinö ökwöi̧danö cha̧ja̧kwijatö. Ja̧danö, böba labinö kwaawobedanö ökwöi̧ cha̧ja̧kwijatö, ba̧jekwadö jwötjeba̧li̧ ökwöi̧ma. Baikwö ösödö jwötjeba̧li̧ cha̧ja̧kwijatö: Duluwo̧ Diosma jwiinö juluwo̧. Jo̧bada La'aka Luwo̧ webö jo̧. Dösödaduwonö.

⁷ Do̧'wo̧ luwo̧nö omukwatö jo̧banö dösödaduwo. Obeja Itji̧danö Jo̧ma ilekwonö emakwo̧ ö̧ji̧danö ö̧jobetjö̧ Diosnö dösödaduwo, Otiwanö jo̧, jö̧ba̧lö. Dösödaduwonö, Obeja Itji̧danö Jo̧ ilekwo baibanö emakwujuma tjo̧wi̧, otiwanö jotikwajobe.

⁸ Yelösöda otiwanö 'dujawajabe, Dios jejenö otiwanö 'dujawobö weobetjö̧. Jökamijido̧ma jwiinö otiwado̧. Salöinö dewado̧. Bakwai̧ linotjö otikwado̧. Ja̧do̧ bakwai̧ linotjö otikwado̧ma, Dios ömöledö babibinadö, Dios öba a'otjö suli̧ jwiinö, otiwanö tjö̧ji̧ wanekwachobe, jö̧ba̧lö jwötjeba̧li̧ cha̧ja̧kwijatö.

Obeja Itji̧danö Jo̧ ilekwonö emina wene

⁹ Ikenama ángelma weijatö ötjönöma, chiwȩyudobö: —Biya̧ yöta̧li̧ma wȩyudi. Obeja Itji̧danö Jo̧ ilekwonö emi̧ pjiesta jobe tjichobö a̧debajawö̧ma, tjo̧'wo̧ ösöwanö ichö tjedakwedö. Ja̧ yöta̧li̧ma Diosda yöawi̧, isabenö yöawi̧ma— jö̧a̧lijatö ángelma ötjönöma.

¹⁰ Jejenö jö̧a̧litjö̧, jo̧ba ö̧jemi badeibö mebibö, chösödo jö̧ta̧lökwe: —Kwösöda ötjönöma, Diosnöda ösödi. Ötjöma ökwödanö, kwömöledödanö bakwainö Dios ömöayo̧sa, okobe deinö Jesús yöawina ösödadödanö. Ja̧danö, Jesús isabenö yöawina do̧batibö kwösödaduwobetjö̧ jo̧ba yöawina yökawaduwobe. ¡Diosnö dösödaduwo!—jö̧a̧lijatö ángelma.

Kabayu dewo̧nö wo̧ yöawi̧ Juan a̧ja̧kwina wene

¹¹ Ikenama mölejȩbe chedemi apjude po̧ekwobe chedijatö. Ja̧danö, po̧ekwobe okwatjö kabayu dewo̧nö chedijatö. Jo̧ba kabayu wamenö bakwo̧ ö̧wo̧nö chedijatö. Jo̧ba imima, Jweinö Yöbawo̧ mikwo̧. Jo̧bama, jojodönö lȩbebö jweinö omukwatö webo̧. Ja̧danö, jweinö omukwatö öpöjojodönö ujuluwobö 'yo̧.

¹² Öbajalebiyama ökwöla ubi̧danö dejatökwe. Ja̧danö, la'aka luwo̧ ubutjawakadanö ichejekwi̧ ökiya butjawo̧, nöinö ökiya, uunöma. Jo̧bama imi wȩyukwo̧, iteda öwaisi̧ imima.

¹³ Ökamijido̧ 'duawado̧ wamesado̧ma, ödöado̧, tjökwösobu bu̧datakwawado̧. Jo̧bama, Dios iwene, jö̧ba̧lö, ötjabökwe.

¹⁴ Ja̧danö, jo̧ba ökömanö ba̧jekwadö 'bötjabikwawakwedönö chedijatö, ka̧ba̧yu̧dö dewadö tjoma'anö 'ya̧dönöma. Jobadöma kamisi jwiinö otiwi̧ salöinö dewi̧ o̧do̧ 'dubawadö.

¹⁵ Ja̧danö, Dios Iwene ötjabökwe aatjö isa̧pi̧ ödöapi̧, bakwachakwadanö sȩapi̧ aatjö laebi̧pi̧ chedijatö. Ja̧pi̧nö okobe deinö böjȩnö ju̧kwadö, jelobebi jelobe Diosnö öpöjödadönö ujuluwakwo̧, Dios Iwene ötjabökwema. Ja̧danö, ujuluwajawö̧nöma webö ö̧jakwo̧, iteda inesö ujulunö, iteda wei̧ ja̧tjoböma. Yelösöda, bakwo̧bi jo̧banö ujuluwakwo̧ma deobe. Ja̧danö, jo̧bama Juluwo̧ Dios jwiinö ölabi̧ i̧sebö, uba ochiju tjöja̧takwi̧danö öja̧takwo̧ Diosnö öpöjödadönöma.

¹⁶ Jo̧ba ökamijido̧nöbi i̧sȩ'bonöbi wȩyukwo̧, Ötjödasa Inesö La'aka Luwo̧ma, jö̧ba̧lö, wȩyukwo̧. Ja̧danö, Jojodö inesö tjuluwo̧, jö̧ba̧lö wȩyukwo̧ ökamijido̧nöbi, i̧sȩ'bonöbi. Jejenö chedijatö mölejȩ apjude po̧ekwobema.

Kabayu wamenö wo̧ ojwe okwatjö labebinanöbi, böjȩ teebetjö labebinanöbi ökwöla nöola okwa loina wene

¹⁷ Ikenama jelo̧ ángelnö chedijatö, ja̧wo̧ idejatena jo̧nö. Jo̧bama labinö jwöobe cha̧ja̧kwijatö okobe deinö mö köba̧ladönö, baikwö: —Kwukwaduwo ichaduwi, Dios ökwödönö kwukwaduwobö iyi̧ jawa.

¹⁸ Böjȩ la'aka luwedö wobajadö tjitebiyabi, kwukwaduwo ichaduwi. Ja̧danö, guardia la'aka luwedö wobajadö tjitebiyabi, ju'wedö guardia jojodö wobajadö tjitebiyabi kwukwaduwo ichaduwi. Ja̧danö, ka̧ba̧yu̧dö wobajadö tjitebiyabi ka̧ba̧yu̧dö tjoma'iya wamenö wa̧jadö wobajadö tjitebiyabi kwukwaduwo ichaduwi. Okobe deinö jojodö wobajadö tjitebiya kwukwaduwo, midö tjeminawö̧ tjitebiyabi, midö tjemököwö̧ tjitebiyabi, la'aka luwedö tjitebiyabi, jo̧kwadabedö tjitebiyabi. Kwukwaduwo ichaduwi— jejenö okobe deinö mö köba̧ladönö jwöobe cha̧ja̧kwijatö.

¹⁹ Ja̧danö, chedijatö sulabo̧ dewo̧nö, böjȩtjö okobe deinö la'aka luwedökwö, jobadö tjömöayedö guardia luwedökwö. Jobadöma ko̧ko̧kwa̧lö tjö̧jobe chedijatö, kabayu dewo̧ wamenö wo̧nöbi, jo̧bakwö 'ya̧jadönöbi dȩdȩbö lotjakwedöma.

²⁰ Jo̧kwaijayonö kabayu dewo̧ wamenö wo̧ma, iteda ömöayedökwö ojwe okwatjö labebinanö do̧a̧lobe chedijatö. Ja̧danö, böjȩ teebetjö labebinanö, Dios iwene yöbawo̧sa, jö̧ba̧lö, omöna yöba̧lo̧nöbi do̧a̧lobe chedijatö. Ja̧danö, jo̧ba böjȩ teebetjö labebinama, ujulu i̧sebö jojodönö jelobekwö tjomukwatinö öbibo̧, ojwe okwatjö labebinanöbi, jo̧ba o̧'wo̧ jawabi tjösödinö. Ja̧danö, jo̧bama, jojodönö jelobekwö tjomukwatinö, tjöbanöbi, tjömamiju tjöwaisobekwöchobesamunöbi ojwe okwatjö labebina imi seyu do̧bö wȩyukwa tjösödobö öbibo̧. Ja̧danö, kabayu dewo̧ wamenö wo̧ma, jobadö du̧ju̧tajanöma, ina 'yaba̧ladönöma, ökwöla nöola okwa loobe chedijatö, jwiinö tubinö azufre mikwi̧ ubolanö.

²¹ Ja̧danö, kabayu dewo̧ wamenö wo̧ma ju'wedönö, okobe deinö sulabo̧ duwo̧ ömöayedönö aatjö laebajapi̧nö dȩdȩbö loobe chedijatö. Dȩdȩbö loajawö̧ tjitebiya, mö köba̧ladö okobe deinö kwadö, tjomeawachibanö. Jejenö baledobe chedijatö.