Apocalipsis 18 - Dios Iwene

Babilonia comunidad Dios pjolachajinö lȩebina wene

¹ Ikenama jelo̧ ángelnö chedijatö, mölejȩbetjö böjȩkwö jwibacho̧nö, la'aka luwo̧danö jo̧ ángelnöma. Öjamatajenama böjȩma yelösöda dewinö dejatobe chedijatö, jo̧bama jwiinö dewinö idejatobetjö̧.

² Jamatajo̧ma labinö jwöeba̧lobe cha̧ja̧kwijatö, baikwö: Tjo̧wi̧ pjolachaiba Babilonia comunidad, inesö la'akasemi comunidadma. Babema Awetja ömöayedö tjuju̧kwemida baiba. Yelösöda, okobe deinö jwiinö sulabedö, öwawöködö tjuju̧kwemi baiba. Ja̧danö, okobe deinö sulabedö pji̧yu̧bi, matjoböbi weököwö̧ pji̧yu̧ tjuju̧kwemi baiba, Babiloniama.

³ Tjo̧wi̧ pjolachaiba Babilonia comunidadma, jobetjöma jwiinö taba̧löji̧ jawa balediainobetjö̧. Ja̧danö, Babilonianö ju̧kwadöma böjȩ jojodö, jelobebi jelobe ju̧kwadönö sulabenö ja̧tjobö öbibö ja̧biatjinobe. Ja̧danö, böjȩ ju̧kwadö jelobebi jelobe ju̧kwadöma, Babilonia comunidadnö ja̧nö, Babilonia jojodökwö jwiinö taba̧löji̧ jawa ja̧biatjinobe. Jobadöma taba̧löji jawa ja̧tji̧ wanekwachobu tjowi̧danö owö, 'dukwachawö̧danö babibö ju̧kwiatjinobe, jwiinö taba̧löji̧ jawa ja̧bö. Ja̧danö, Babilonia jojodöma, bakwuju jelo̧ jelo̧nö jujudanö ja̧dö, ju'wedönö jobujukwö sulabenö ja̧tjobö öbibö. Ja̧danö, böjȩ la'aka luwedöma Babilonianö ja̧nö sulabenö ja̧biatjinobe Babilonia jojodökwö. Babilonia jojodöma, tea tjemoböda omukwatadö. Jo̧kwaobetjö̧ tea luwedöma yelösöda tea iyiatjinobe jobetjöma, balada juna̧ladö batjibanö. Yelösöda, sulabenö balediainobetjö̧, tjo̧wi̧ pjolachaiba Babilonia comunidadma, Dios lȩebi̧ baledö, jö̧ba̧lö la'aka luwo̧danö ichejekwo̧ ángel jwöeba̧lobe cha̧ja̧kwijatö.

⁴ Ikenama, mölejȩbetjö Dios iwene cha̧ja̧kwijatö, baikwö: Ötjö chömöledö babibinadönö yötawa. Jobe comunidadtjö labebaduwi, sulabedö ja̧tji̧danö ökwödöbi ja̧köbaduwapji, jö̧ba̧lö. Ja̧danö, ökwödönöbi inia tjököbaduwinö baledapji, jö̧ba̧lö, jobetjöma labebaduwi.

⁵ Babilonianö ju̧kwadöma sulabenö ja̧tji̧ nöobetjö̧ jobadönö lȩbebo̧sa. Jo̧kwaobetjö̧, jobetjöma labebaduwi. Jobadö sulabenö ja̧tji̧ma, nöi̧. So̧bi̧ya̧pu̧ yudö wa̧tjawi̧danö wa̧tjawitjö̧ma mölejȩbe ichibenanö nöi̧, Babilonianö ju̧kwadö sulabenö ja̧tji̧ma. Ötjöma jobadö sulabenö ja̧tji̧ma cho̧'wo̧ jwibibö̧kö̧sa. Jobadönö lȩbebo̧sa.

⁶ Jobadö, Babilonia jojodöma, inia tjötjinö yelösöda ja̧badö jojodönöma. Ja̧danö, jobadönö balekwa mikwa baledobö webo̧sa, Babilonia comunidad jojodönöma. Jobadö jojodönö inia tjötjinö ja̧tjemitjö bajalekwönönö inia tjötjinö ja̧tjobö webo̧sa Babilonia jojodönöma. Wanedö yötawa: Bakwötanöda jojodönö kwatjitjö̧ma, jobadö Babilonia jojodönö dötölatajanö kwakwatjobö webo̧sa. Jobadönö inia tjötjinö ja̧tjobö webo̧sa, jobadö sulabenö ja̧tjemitjö bajalekwönönö, jö̧ba̧lö, Dios iwene yöa̧lobe cha̧ja̧kwijatö. Ina yöa̧lobe:

⁷ Babilonianö ju̧kwadöma idödada omukwatinadö, Otiwadösa, jö̧ba̧lö. Jobadöma, idöda tjösödi̧da tjemobö ösödadö. Babema balekwa mikwa baledobö webo̧sa jobadönö. Jobadö sulabenö wetjemitjö bajalekwönönö inia tjötjinö, balekwa mikwa iyö baledobö webo̧sa. Jobadöma idödada omukwatinadö, Ökwödöma inesö la'aka luwedösa, jö̧ba̧lö. Jilekwenö wobekwinaju budekwabinö jö̧ji̧danöma la'akatjöda dö̧jökakwedösa, jö̧ba̧lö, omukwatinadö, Babilonianö ju̧kwadöma.

⁸ Jo̧kwaobetjö̧, jobadönö yelösöda lȩbebo̧sa, Ba̧kwȩlö̧jatebö, Otiwadösa, jö̧ba̧lö omukwatinadönöma. Ja̧danö, inia tjötjinö te'ada̧lökönö baledakobe jobadönöma. Yelösöda lȩbebo̧sa tjubudekwabinö. Ja̧danö a̧wi̧chi̧ tjötjinöbi baledakwedö. Yelösöda jobadönöma juwö lotjakwawö̧. Ötjö, Kwuluwo̧duwi Diosma juluwo̧chobetjö̧ jwiinö inia tjötjinö baledakobe jobadönöma. Ötjö, Kwuluwo̧duwi Dios jobadönö lȩbebö yöbawo̧ma.

⁹ Chömöledö, ja̧ möle, Babilonia lȩebakwa̧ mölema, böjȩ la'aka luwedöma jwöbeba̧lö tjubudekwabikobe. Jobadö, Babilonianö ju̧kwadö sulabenö tjö̧ji̧danö ja̧döma, ödö ja̧nö, jobema juwö lotjajiawö̧ yelösöda jwöbeba̧lö tjubudekwabikobe. Jobadöma, jobetjö Babilonianö ju̧kwadökwö jwiinö taba̧löji̧ jawa ja̧biabinadöma, ¡Ayö! Dösödi̧ ja̧bö ji̧adinemima juwö lotjajabe, jö̧ba̧lö, jwöbeba̧lö tjubudekwabikwedö.

¹⁰ Ja̧danö, jobadöma yebabinö, ödö tjö̧jakwedö, ¡Ayö! Ökwödönöbi inia tjödinö baledena, jö̧ba̧lö. Ja̧danö, yötja̧lakobe, Ayö, dösödemi Babilonia comunidad, ajayinöma yelösöda otiwinemi, inesö la'aka comunidad ji̧nemima, jö̧ba̧lö, yötja̧lakobe. Babema juluwanö, sulemi baibanö, lȩebinö jemima, jö̧ba̧lö, ödö ja̧nö yötja̧lakwedö, böjȩ la'aka luwedöma. jö̧ba̧lö, Dios iwene yöa̧lobe cha̧ja̧kwijatö. Ina yöa̧lobe:

¹¹ Ja̧danö, ja̧ möle, Babilonia comunidad lȩekwa mölema, tea iyabidö, böjȩnö iyö, kwebachadöma tjo̧'wo̧ tjo̧bekwö tjubudekwabikwedö, inesö la'akasemi Babilonia comunidad omukwatö. Budekwabinö yötja̧lakobe, Ajayinöma ba̧kwȩlö̧jatebö tea iyiadijatö Babiloniatjöma, jö̧ba̧lö. Jo̧kwaijayonö babema deobe emiabinadöma, jö̧ba̧lö, budekwabinö yötja̧lakobe tea iyabidöma.

¹² Yelösöda jobadö tea iyabidöma, ajayinö, nöinö iyabiatjinobe, jobetjöma. Orotjö, platatjö otikwa, ju'wi lawo opjiya nöinö mikwawi̧ opjiya, perla mikwi̧tjö otikwa opjiya ba̧kwȩlö̧jatebö iyabiatjinobe. Ja̧danö, isa̧di̧jubi, lino mikwi̧ odi̧jubi, yȩi̧ odi̧jubi, duwi̧ odi̧jubi, salöinö duwi̧ odi̧jubi, ju'wi odi̧ju seda mikwi̧ odi̧jubi iyabiatjinobe. Ja̧danö, towi ötebiyabi, söinö 'dö̧ekwi̧ ötebiya iyiatjinobe. Ju'wi jawabi, elefante o'yetjö otikwa jawabi, towitjö otikwa nöinö mikwawi̧ towitjö otikwabi, dii̧ jawatjö otikwabi, bronce mikwi̧tjö, hierro mikwi̧tjö, mármol mikwi̧tjö dii̧ jawatjö otikwa iyiatjinobe jobetjöma, Babilonia comunidadnöma.

¹³ Ja̧danö, toawa pjaatakwawa jawa, canela mikwi̧bi, ja̧danö, söinö 'dö̧ekwi̧ perfume mikwi̧bi iyiatjinobe. Ja̧danö, duawa o'bebi söinö 'dö̧ekwi̧ duawama, ja̧danö, söinö 'dö̧ekwi̧ juwawabi iyiatjinobe. Ja̧danö, uba obu 'dukwachi̧bi, o̧tebi, trigobi, pa̧ka̧yö̧nöbi, o̧bȩja̧dönöbi, ka̧ba̧yu̧dönöbi emiatjinobe. Ja̧danö, kolukiya kabayu tötji̧ ökiyabi iyiatjinobe. Ja̧danö, jojodönöbi, mikwanö iyiatjinawö̧nö iyiatjinobe Babilonia comunidadtjöma. Jo̧kwaijayonö ja̧ mölema, Babilonia lȩebi̧ möle baibenama, jobe ju̧kwadö emadöma detjakobe, jemi okobe jwiinö pjolachaibanö söbebö loinobetjö̧.

¹⁴ Jejenö, tea iyabidöma budekwabinö yötja̧lakwedö, Babilonia comunidadnö ju̧kwadönö yötja̧li̧danö. Yötja̧lakobe, Ökwödö kwemaduwobö kwösödaduwi̧ma tjo̧wi̧ta, kwemaduwokobe babema, jö̧ba̧lö. Ajayinö kwiteaduwima jwiinö otiwi̧ jawa kwujuna̧linaduwajayonö tjo̧wi̧ta, juwö lotjajabe, jö̧ba̧lö, yötja̧lakwedö. Tjo̧wi̧ta, jwibadödanö bakibaduwajabe, yemidanöma kwemaduwökönö, jö̧ba̧lö, yötja̧lakobe tea iyabidöma, Babilonianö ju̧kwadönö yötja̧li̧danö, jö̧ba̧lö, Dios iwene yöa̧lobe cha̧ja̧kwijatö. Ina yöa̧lobe:

¹⁵ Ja̧danö, jobadöma yebabinö, ödö ja̧nö tjubudekwabikwedö, ¡Ayö! Ökwödönöbi inia tjödinö baledena, jö̧ba̧lö. Yelösöda, jobadö tea iyabidöma balada juna̧ladö babibinadö, Babiloniatjö tea iyiatjinobetjö̧. Ja̧danö, jobadöma, yebabinö, ödö tjö̧jakwedö, Babilonianö lȩebobe eda̧lö.

¹⁶ Jwöjwötjakobe, ¡Ayö, ayö, sulabenö baiba Babiloniama! jö̧ba̧lö. Ajayinöma otiwanö 'dubawujudanö ji̧nemi. Yelösöda, kamijido̧ otiwado̧, linotjö otikwa odi̧juda 'dubawujudanö otiwanö ji̧nemi, jö̧ba̧lö, jwöjwötjakobe. Ja̧danö, otiwi̧ odo̧, yȩi̧ odo̧bi duwi̧ odo̧bi salöi̧danö duwi̧ odo̧bi otiwanö 'dubawujudanö ji̧nemi Babiloniama. Ja̧danö, lawobi, sasiyubi, tjime'anö jawabi, tjötö'a jawabi orotjö otikwabi, perlatjö otikwabi otiwanö nönawuju jö̧ji̧danö ji̧nemima. Ye, sulabenö baiba Babiloniama, jö̧ba̧lö, jwöjwötjakobe.

¹⁷ Yelösöda otiwanö tea ji̧nemima juluwanö tea jwiinö baiba, jö̧ba̧lö, budekwabinö jwöjwötjakwedö. Ja̧danö, ja̧ möle, Babilonia lȩebakwa̧ mölema ju'wedöbi tjubudekwabikobe. Okobe deinö isowinö 'ya̧kwawa la'aka luwedöbi, jobadö ömöayedöbi, ju'wedö isowinö 'ya̧jadöbi, okobe deinö tea iyabinö isowinö 'ya̧jadöbi ödöda ja̧nö tjubudekwabikobe.

¹⁸ Ja̧danö, budekwabinö jwöjwötjakobe, Babilonia comunidadtjö imiyu'wo kaamobe eda̧lö. Jwöjwötjakobe, ¡Edaduwi, ubajabe Babiloniama! jö̧ba̧lö. Yelösöda, jemidajayemi comunidadma jwiobe, inesö la'aka comunidadma, jö̧ba̧lö, budekwabinö jwöjwötjakobe.

¹⁹ Ja̧danö, jobadöma, tjo̧'wo̧ tjo̧achibawö̧, nijitjö yudebö möakwö tjikwakwedö, yemidanö tjuunö wamatinö. Jejenö ja̧bö tjo̧'wo̧ tjo̧bekwö budekwabinö ja̧nö jwöjwötjakobe, ¡Ayö inesö la'aka comunidad Babiloniama jwiinö söbebö loajabe! jö̧ba̧lö. Ye, ajayinöma isowi nöowinö 'ya̧jadöma balada juna̧ladö badibinö, tea iyabiadinobe Babiloniatjöma, balada juna̧ladö tjuju̧kwemima. Jo̧kwaijayonö, yemidanöma diyokobe jobema, juluwanö juwö lotjajabetjö, jö̧ba̧lö, budekwabinö jwöjwötjakobe tea iyabinö isowinö kwebachiabinadöma, jö̧ba̧lö, Dios iwene yöa̧lobe cha̧ja̧kwijatö.

²⁰ Ja̧danö chömöledö, ötjöma mölejȩbe ju̧kwadönö yöta̧lijatö, Kwo̧'wo̧duwi ösöwanö ja̧duwi, jö̧ba̧lö. Ja̧danö, ökwödö Dios ömöledö babibinadönöbi, Jesús webawedönöbi, Dios yöawi̧ yöbawinadönöbi, Kwo̧'wo̧duwi ösöwanö ja̧duwi, jö̧ba̧lö, yöta̧lijatö. Diosma ökwödönö inia tjököbaduwinö ja̧bujunö, balekwa mikwa iyö lȩebajobetjö̧, kwo̧'wo̧duwi ösöwanö ja̧duwi, jö̧ba̧lö yöta̧lijatö jobadönöma.

Juan, juluwo̧ ángel inawa nöawa kabebö jaobe ojwe nöödö okwa, Dios lȩebakwa̧ wanekwachö, edina wene

²¹ Ikenama chedemi, bakwo̧ ángelma, jwiinö juluwo̧ma, inawa nöawa, jwiinö ömökawa kabebö, labinö ojwe nöödö okwa jaobe chedijatö. Ja̧danö, jabö yöa̧lobe cha̧ja̧kwijatö: Biwa labinö kabebö jati̧danö Babilonia comunidad, inesö comunidadma labinö söbebö loakwemi, yemidanö jö̧könö.

²² Yelösöda, otiwinemi ajayinöma, Babiloniama. Ba̧jekwadö otiwanö harpa, ju'wi opjianö pjeawa pjebö ju̧kwiatjinobe. Ja̧danö, lo̧böbi lo̧biatjinobe. Pjuawanubi pjubiatjinobe. Trompetabi pjubiatjinobe ajayinöma, Babiloniatjöma. Jo̧kwaijayonö detjakobe, pjetji̧bi, lo̧tji̧bi, pjutji̧bi ökwöökönö. Ja̧danö, otidinadö, okobe jwiinö jawa otidinadöma detjakobe. Ja̧danö, trigo dobö tjotidi̧ ökwöi̧ma ökwöökakobe, dotjokobetjö̧.

²³ Ja̧danö, jojodöma la̧pa̧la̧yu̧bi̧yama tjönötedökakobe. Yȩakobe, jojodö deobetjö̧. Ja̧danö, bakwo̧ ilekwonö emi̧ tjösödi̧ pjiesta tjujuni̧ma jwiakobe, jojodö deobetjö̧. Jobe tea iyabidöbi, balada nöinö juna̧ladöma sulabenö tjomukwatinobetjö̧, yelösöda sulabenö baibakobe jobetjöma. Jobadöma, Ökwödödasa böjȩnö iyawedötjö iyawa juluwadöma, jö̧ba̧lö, tjomukwatinobetjö̧ sulabenö baibakobe jobetjöma. Ja̧danö, mea boawa jojodöbi jobetjö okobe deinö böjȩnö ju̧kwadönö bobiatjinobetjö̧ sulabenö baibakobe jemi, Babiloniatjöma, jö̧ba̧lö ángel yöa̧lobe cha̧ja̧kwijatö.

²⁴ Ikenama yöa̧lobe cha̧ja̧kwijatö: Babilonianö ju̧kwadöma sulabenö tjuju̧kwobetjö̧ Diosma jobadönö sö̧bebö lobö lȩebakwo̧. Jobadöma Dios yöawi̧ yöbawinadönö kwabö lobinadö, tjökwösobu ebawinö. Ja̧danö, Dios ömöledö babibinadönöbi, ju'wedö böjȩnö ju̧kwadönöbi kwabö lobinadö. Ba̧jekwadönö, tjökwösobu ebawinö kwabö lobinadö, Babilonianö ju̧kwadöma. Jo̧kwaobetjö̧ Diosma jobadönö söbebö lobö lȩebakwo̧, jö̧ba̧lö ángel yöa̧lobe cha̧ja̧wijatö.