Apocalipsis 17 - Dios Iwene

Babilonia comunidadnö wanekwachuju, sulabo̧nö oma'anö wu̧junö yöawina wene

¹ Ikenama ángelesdö jelemutjö du̧ju̧tajanö dȩja̧'di̧junö okwi̧ sa̧badötjö bakwo̧ ichö ötjönö jö̧a̧lijatö: —Juan, ötjökwö ichi, chi̧sebokwö. Dios, isuju, jelo̧ jelo̧nö ju̧junö lȩebakwa̧ kwedo ichi. Jobujuma, ojwebiya ba̧jekwi ödö lö̧jena ö'öbönö bu̧ju.

² Böjȩ la'aka luwedöma sulabenö ji̧atjinobe, jobujukwö. Ja̧danö, böjȩnö ju̧kwadöma ösödiatjinobe jobuju taba̧löji̧ jawama. Ja̧ taba̧löji̧ jawama nio ojwiyo tjowi̧danö, ösödö owiatjinobe, böjȩnö ju̧kwadöma, 'dukwachawö̧ batjibanö— jö̧a̧lijatö ángelma ötjönöma.

³ Ikenama, Dios O̧'wo̧ Luwo̧ma cho̧'wo̧ luwo̧nö i̧sebonö, ángelma ötjönö öibijatö jelobekwö, jojodö deobekwö. Jobetjöma isujunö chedijatö, sulabo̧ duwo̧ oma'a wame wu̧junö. Jo̧ba sulabo̧ma okobe jwiinö wȩyukwo̧, Diosnö waneda̧lö ötjabi imibiya, Ötjödasa Diosma, jö̧ba̧lö. Ja̧danö, uubiyabi jelemutjö doyulatajanö juna̧lo̧. Ja̧danö, ö'yekiyabi domulataja jawa ökiya juna̧lo̧.

⁴ Ja̧danö, isujuma, kamijido̧ otiwado̧, duwado̧bi, yȩado̧danö ichejekwado̧bi 'dubawuju. Yelösöda, jobujuma nöinö nönawuju, jime'asakonö opjiabi, tjötö'anö nönawakwawabi, lawo opjiyabi. Yelösöda, nöinö mikwawi̧ nönawuju, orotjö otikwatjöbi, ju'wi inawiya otikwatjöbi, ju'wibi opobia dewi̧ opo, perla mikwi̧tjöbi. Ja̧danö, jömamunöma dȩja̧'do̧ do̧ba̧luju, orotjö otikwa'do̧. Ja̧'do̧ma, isobu okwa'do̧, okobe jwiinö sulabenö ja̧jinabi, jelo̧ jelo̧nö jö̧jinabi okwa'do̧.

⁵ Ja̧danö, jöbanö jimibiya wȩyukwuju, ju'wedö wajwitji̧ jimima, baikwö: Bisuma inesö la'akasemi Babilonia iminö mikwuju, jö̧ba̧lö. Ja̧danö, Sulabedö, jelo̧ jelo̧nö ja̧dötjö ajayinö sulabuju, jö̧ba̧lö, mikwuju. Ja̧danö, Okobe jwiinö böjȩ sulabenö taba̧löji̧ jawanö wanekwachuju, jö̧ba̧lö, mikwuju. Jejenö jöbanö jimibiya wȩyukwuju.

⁶ Ja̧danö, jobujunö edö, Dukwachokodanö bu̧ju, jö̧ba̧lö, chomukwatijatö. Chedemi, Bisuma Dios ömöledö babibinadö, Jesúsnö tjösödi̧ yötjawobetjö̧ kwabawö lotjinawö̧ tjökwösobutjöda owö 'dukwachokodanö bu̧ju, jö̧ba̧lö, chomukwatijatö. Jobujunö edinö, ¡Ayö! jö̧ba̧lö, chöbajale jalaka ja̧nö cheda̧lijatö.

⁷ Jejenö ja̧nö cheda̧liökwe ángelma jö̧a̧lijatö ötjönöma: —¿Tajawedö kwöbajale jalakanö ja̧nö kweda̧la jobujunöma? Jobujunö ji̧ma labebö lobö yötawakwö, kwöwaisachibobö. Ja̧danö, kwöwaisachibobö labebö lobö yötawakwö, jobuju jö̧wökwenö, sulabo̧ duwo̧nöma. Ja̧danö, jo̧ba uubiya jelemutjö doyulatajanö, ja̧danö, ö'yekiya domulataja jawa ökiya ujuna̧linö ji̧ma labebö lobö yötawakwö kwösaisachibobö.

⁸ Jo̧ba isuju jö̧wökwe, 'yaba̧lajo̧ma ida̧ökö ö'wö baibajabe. Jo̧kwaijayonö ju'winö yemidanö 'yabibajö, laju möajutjö laebakwo̧. Yelösöda, lajutjö laebenama böjȩnö ju̧kwadö, ba̧kwȩlö̧jatebö ja̧kwawa'ye tjimibiya iwȩyudinököwö̧ma, ¡Ayö ¿dakwö baibajö? Wobinama yemidanö tjeachajabe, jö̧ba̧lö, tjedakwedö, tjöbajale jalakanö baibanö. Ja̧danö, yemidanö tjebachajo̧ma, lajutjö labeibö jelobe i̧'yakwo̧. Jobetjö bakwo̧ma jo̧ba sulabo̧nö kwabö loakobe, yemidanö 'yaibajökönö— jejenö yöawijatö ángelma ötjönöma.

⁹ Ina ángelma yöawijatö: —Biya̧ waiyi̧ yötawi̧ma tjo̧'wo̧ luwo̧ jawa waisachibadöda tjöwaisachibakwedö. Juan, yötawi̧ a̧ja̧kwitjö, kwöwaisachibobö. Jo̧ba sulabo̧, duwo̧ uubiya, jelemutjö doyulataja uubiyama, mö'ösa'iju jelemutjö do'olatajanö wanekwachobe. Ja̧danö kwedajokoma, mö'ösa'ijunö wu̧junö kwedatö.

¹⁰ Ja̧danö, bakwainö, jo̧ba sulabo̧ uubiya, doyulataja uubiyama jelemutjö du̧ju̧tajanö la'aka luwedönö wanekwachobe. Jo̧kwaijayonö jobadö jelemutjö du̧ju̧tajanö la'aka luwedötjö ju'wedöma, bakwamu jojodöma ida̧ökö wotjinobe, du̧ju̧tajada tjö̧jibanö. Ji̧binadötjö bakwo̧ babe mölema böjȩnö webö jo̧. Ja̧danö, jelo̧, ju'winö webö ö̧jakwo̧, ina la'aka luwo̧ baibanöma webö jö̧kö̧. Jo̧bama, la'aka luwo̧ babibö webö ö̧jakwa̧ma lekwema weökakwo̧. Juluwanöda weakwo̧— yöawijatö ángelma ötjönöma. Ina yöawijatö:

¹¹ —Ja̧danö, isuju jö̧wajökwe, duwo̧ ö'wö babibajo̧bi la'aka luwo̧nö wanekwachobe, ju'wedö jelemutjö du̧ju̧tajanö la'aka luwedödanö. Ja̧danö, Diosma jo̧banöma lȩebakwo̧, ba̧kwȩlö̧jatebö usula emawobö.

¹² Ja̧danö, ö'yekiya domulataja jawa ökiyama ju'wedö la'aka luwedönö wanekwachobe, ju'winö kabebö tjö̧wanakwawö̧. Jobadöma ju'winö, kabebö tjöwanajawö̧ma, bakwöta horada la'aka luwedö baibanö webö tjö̧jakwedö, sulabo̧ duwo̧kwö.

¹³ Ja̧danö, jobadö domulataja la'aka luwedöma, bakwainö omukwatö, Ökwödö webö dö̧ji̧ma bite duwo̧nö iyö dujuno, jo̧bada webö ö̧jobö, jö̧ba̧lö, tjomukwatakwedö. Ja̧danö, jobadöma, la'aka luwedöböködö babibö, sulabo̧ duwo̧ ömöayedöda batjibakwedö.

¹⁴ Ja̧danö, jobadöma Obeja Itji̧danö Jo̧nö tjujuluwobö tji̧'yakwedö. Jo̧kwaijayonö waekwakwawö̧ yelösöda. Obeja Itji̧danö Jo̧ma jobadönö jwiinö ujuluwakwo̧. Jo̧bama inesö Duluwo̧obetjö̧, inesö La'aka Luwo̧obetjö̧ jobadönö jwiinö ujuluwakwo̧. Ja̧danö, Obeja Itji̧danö Jo̧kwö ja̧döma, jo̧ba jwöbö, omudawö ujuninawö̧ma, jo̧banö kabatibökönö tjo̧'wo̧ wana̧ladö— yöawijatö ángelma ötjönöma.

¹⁵ Ina yöawijatö ötjönöma: —Ojwebiya ba̧jekwi̧ ödö kwedaja̧, isuju jelo̧ jelo̧nö juju ö'öbönö jö̧bena ojwebiya kwedaja̧, jojodönöda wanekwachobe, böjȩ okobe jwiinö ju̧kwadö jojodö, jelobebi, jelobe ju̧kwadönö, wainökwena tjiwene yöba̧ladönö.

¹⁶ Ja̧danö, ö'yekiya domulataja jawa ökiyama, la'aka luwedönö wanekwachobe. Jobadöma, sulabo̧ duwo̧kwö, Babilonianö wanekwachujunö jwiinö öpöjödö, inia tjöjinö ja̧tjakwedö. Jiteabi tjönaukwakwedö, tea jwiinö jö̧jobö. Ja̧danö, jökamijido̧bi jwiinö jö̧jobö ja̧tjakwedö. Ja̧danö, jobuju jitebiyama tjukwakwedö, jiwe'ijuma juwö lobö.

¹⁷ Jejenö ja̧bö tjö̧jakwedö, Diosma jejenö tjomajade okwanö tjomukwatobö ja̧inobetjö̧. Ja̧danö, jobadö domulataja la'aka luwedöma, wajwitjijayonö, jobuju inia tjöjinö ja̧tjakwa̧ma, Dios ösödi̧da ja̧tjobö tjö̧jakwedö. Ja̧danö, Diosma jobadö tjomajade okwanö tjomukwatobö ja̧inobetjö̧, bakwainö omukwatö, sulabo̧ duwo̧nö kabebö tjö̧wanakwedö, Ökwöda webö kwö̧jo, jö̧ba̧lö. Ja̧danö, Ökwödöma ökwö kwömöayedöduwisa, la'aka luwedöböködösa, jö̧ba̧lö, sulabo̧ duwo̧nö kabebö tjö̧wanakwedö, Diosma jobadö jejenö tjomukwatobö ja̧inobetjö̧. Jejenö ja̧bö tjö̧jakwedö, Dios badedö ujunina möle badekwachenanö baibanö.

¹⁸ Ja̧danö, isuju kwedajokoma, inesö la'akasemi Babilonia comunidadnö wanekwachuju, okobe deinö böjȩ la'aka luwedönö weemi comunidadnö wanekwachujuma— jejenö yöawijatö ángelma ötjönöma.