Apocalipsis 16 - Dios Iwene

Dios jelemutjö du̧ju̧tajanö ángelesdönö weina wene, dȩja̧'di̧ju okwi̧sobu sa̧tjobö

¹ Ikenama Dios ejutjö iwene cha̧ja̧kwijatö, labinö yöa̧li̧ma, jejutjö labebajadö ángelesdö, jelemutjö du̧ju̧tajanöbedönö webö: —Böjȩkwö 'ya̧duwi, dȩja̧'di̧ju okwa a̧ji̧ jawa nijibe sa̧sa̧köbaduwo, Dios jwiinö ölabi̧ ji̧ma— weobe cha̧ja̧kwijatö.

² Jejenö weökwe ajayinö luwo̧ ángelma böjȩnö ichö, idȩja̧'do̧ do̧ba̧lö, ja̧'do̧ okwobuma nijinö sa̧obe chedijatö. Sa̧emi tutiyubiya saduwaibobe chedijatö, ojwe okwatjö labebinanö ösödadönö, jo̧ba imi dobawedönö, jo̧ba o̧'wo̧ jawabi ösödadönöma. Yelösöda, tutiyubiya sulabenö 'dö̧ekwi̧ tutiyubiyama jobadönö saduwaibawö̧da babibadönö chedijatö, ajayinö luwo̧ ángel idȩja̧'do̧nö okwobu sa̧emima.

³ Ja̧danö, ikena luwo̧ ángel idȩja̧'do̧ do̧ba̧lö, ja̧'do̧nö okwobuma ojwe nöödönö sa̧obe chedijatö. Sa̧obe jödöma tjökwösobuda baibanö chedijatö, wobajo̧ ökwösobudanö. Ja̧danö, ojwe nöödö okwanö ju̧kwadöma okobe deinö wobadönöda chedijatö, jödöma tjökwösobuda baibobetjö̧.

⁴ Ja̧danö, ikena luwo̧ ángel, wa̧medukwa sa̧bo̧ baibanö ángelma, idȩja̧'do̧ do̧ba̧lö, ja̧'do̧nö okwobuma ojwebiya okwanöbi, ojwese'dijunöbi, sa̧sa̧obe chedijatö, okobe jwiinö tjökwösobuda baibanö.

⁵ Ikenama jelo̧ ángel, ojwe te'ada̧lo̧ ángelma, Diosnö yöa̧lobema cha̧ja̧kwijatö, baikwö: —Ökwöma la'akatjöda ji̧naja. Ja̧danö, babebi jo̧ja. Ökwödaja suli̧ jwibo̧ma. Ja̧danö, ökwöma jweinö omukwatöda lȩbebo̧ja. Biya̧ inia tjötjinö baledobö lȩkebi̧ma, jweinö omukwatö lȩkebobe.

⁶ Bidö lȩkebawö̧ma, ökwö kwömöledö babibinadönö kwabö lobinadö. Ja̧danö, ökwö yökawi̧ yöbawinadönö kwabö lobinadö. Yelösöda, bidö lȩkebawö̧ma, ökwö kwömöledönö tjökwösobu ebawinö kwabö lobinadö. Jo̧kwaobetjö̧, ökwöma otiwanö balekwa mikwa ja̧köbajabe jobadönöma, tjökwösobuda tjowobö— ángel Diosnö yöa̧lobe cha̧ja̧kwijatö.

⁷ Ikenama juwö iyawelötjö tjiwene ökwöi̧ cha̧ja̧kwijatö, baikwö: —Duluwo̧ Dios, ökwödaja jwiinö juluwo̧ma. Lȩkebi̧ma otiwanö, jweinö omukwatö lȩbebo̧ja— ja̧ tjiwene cha̧ja̧kwijatö.

⁸ Ja̧danö, ikena luwo̧ ángel, ö'wejemu sa̧bo̧ baibanö ángelma, idȩja̧'do̧ do̧ba̧lö, ja̧'do̧nö okwobu möle ja̧wo̧nö sa̧obe chedijatö. Sa̧ena, möle ja̧wo̧ma tubinö dejatinö jojodönö ubobe chedijatö, Diosma jejenö ubobö kaatibokobetjö̧. Sa̧ökwema tubinö, dejatinö ubobe chedijatö, jojodönöma.

⁹ Ja̧danö, tubinö, dejatinö ujuwawö̧ma, tjomukwati̧ tjöbalewacho jö̧tja̧li̧jayonö tjomukwati̧ balewachöködönöda chedijatö, Diosnö sulabenö yöba̧lö. Dios lȩebi̧ edö, ¡Ayö! Diosma jwiinö juluwo̧, jo̧banö domukwati̧ döbalewacho, jö̧ba̧lö, tjomukwati̧ tjöbalewacho jö̧tja̧lijayonö tjomukwati̧ma balewachökönö ina Diosnö öpöjödö, Sulabo̧, döpöjödonö, sulabenö inia tjödinö webo̧, jö̧ba̧lö, tjöpöjödobe chedijatö.

¹⁰ Ja̧danö, ikena luwo̧ ángel, bakwamu sa̧bo̧ baibanö ángelma, idȩja̧'do̧ do̧ba̧lö, ja̧'do̧nö okwobuma ojwe okwatjö labebina ö̧bakanö sa̧obe chedijatö. Sa̧emi yȩa'woda meobe chedijatö, jo̧ba ö̧bemibi, okobe deinö jo̧banö ösödadö tjö̧jemibi. Ja̧danö, jo̧ba ojwe okwatjö labebinanö ösödadöma, ¡Ayö! jö̧ba̧lö, jwiinö niawö̧ tjinene yö̧tjawobe chedijatö, tjökwösobu doibanö.

¹¹ Ja̧danö, jwiinö mölejȩnö jo̧ Diosnöma jwiinö tjöpöjödobe chedijatö, inia tjötjinö baledobö weobetjö̧. Ja̧danö, tutiyubiya saduwaibobö weobetjö̧ Diosnö jwiinö tjöpöjödobe, Ökwödönö sulabenö webo̧, jö̧ba̧lö, chedijatö. Ina jelobekwö omukwatö, tjomukwati̧ balewachökönö öpöjödadö Diosnöma.

¹² Ja̧danö, ikena luwo̧ ángel, jelemutjö bakwo̧ sa̧bo̧ baibanö ángelma, idȩja̧'do̧ do̧ba̧lö, ja̧'do̧nö okwobu ojwe nöödönö, Eufrates mikwödönö sa̧obe chedijatö. Sa̧emi okobe jwiinö kököachibobe chedijatö, nijida baibanö. Ja̧danö, ju'wedö la'aka luwedöma, tjömöayedö guardia jojodökwö ja̧wo̧ ichobetjö labebö tjichakobetjö̧, nijida baibobö sa̧bo̧, ángelma.

¹³ Ikenama chedijatö wa̧medukwa isapjobedönö, sulabedönö, puledanö ichejekwadönö. Jobadötjö bakwo̧ toba'dadanöso̧ aa okwatjö labebo̧. Ja̧danö, jelo̧, ojwe okwatjö labebina aa okwatjö labebo̧. Ja̧danö, jelo̧, böjȩ okwatjö labebina, Ötjöma Dios yöawi̧ yöbawo̧sa, jö̧ba̧lö, omöna yöba̧lo̧ aa okwatjö labebo̧.

¹⁴ Bidö sulabedö, tjaatjö labebajadöma, Awetja ömöayedö. Ja̧danö, Awetja ujulu i̧sebö ja̧badö. Ja̧danö, jobadöma, böjȩ bakwameachibanö tji̧'yobe chedijatö, okobe deinö böjȩ la'aka luwedönö, tjömöayedö guardiakwö bakobe ko̧ko̧kwibö ja̧tjobö. Ja̧danö, jobadö tjoko̧ko̧kwajawö̧ma bakobe ja̧nö tjite'ada̧lobe chedijatö, juluwo̧ Diosnö tjölakwabikwawobö latjebakwa̧ möle badekwachenanö baibanö, jwiinö yeabikwa mölema.

¹⁵ Damötjö, Duluwo̧ Jesucristoma ja̧ möle baledakwa̧ma baikwö yöawijatö: A̧ja̧kwaduwitjö. Ö'wiawakwawalö̧jönö ja̧nö eda̧lö te'ada̧lakwawö ju̧kwaduwi, ötjö chichakwa̧ma. Ötjöma, naukwabo̧ ichi̧danö chichakwo̧sa, jojodö wajwitjemi okwanö. Wanedö yötawa: Bakwo̧ kamijido̧ jwibo̧, yenada juna̧lo̧ma, ju'wedö tjichitjö̧ma omönanö emibö 'duawena, kamijido̧ jwibo̧ jö̧könö. Jo̧bama taba jwiinö jo̧. Jejenö ö̧jena, bakwo̧ ötjö chichakwa̧ ö'wiawakwawalö̧jönö ja̧nö eda̧löda te'ada̧lo̧ma. Chichenama otiwanö ö̧jakwo̧, taba̧lökönö, jö̧ba̧lö wanedö yöawijatö Jesúsma, damötjöma.

¹⁶ Ja̧danö, Awetja ömöayedöma, böjȩ okobe jwiinö ju̧kwadö la'aka luwedökwö, tjömöayedö guardiakwö bakobe ko̧ko̧kwachö tjite'ada̧lobe chedijatö, Armagedón mikwena. Armagedón, jö̧ba̧löma, hebreo tjiwenenö jejenö baledobe.

¹⁷ Ja̧danö, ikena luwo̧, ökömakwö sa̧bo̧ ángelma idȩja̧'do̧ do̧ba̧lö ja̧'do̧nö okwobu jwa̧lȩ'epjonö sa̧obe chedijatö. Sa̧emi iwene labinö ökwöobe cha̧ja̧kwijatö, Dios eju okwatjö, Dios ö̧belö, Tjo̧wi̧, 'dö̧ibaja̧ babema, jö̧ba̧lö.

¹⁸ Ja̧danö, böba nekakanö dejö ölabobe chedijatö. Ja̧danö, tjiwenebi ökwöi̧ cha̧ja̧kwijatö. Ja̧danö, böba ökwödi̧bi labinö ökwöi̧ cha̧ja̧kwijatö. Ja̧danö, böjȩma jwiinö tjö̧bebö lileibobe chedijatö, Dios ajayinö jojonö otidinemi baikwöma la'akatjöda labinö tjö̧bebö lileibi̧danö.

¹⁹ Ja̧danö, jobema, Babilonia mikwemi, inesö la'akasemima, okobe jwiinö lileibobe chedijatö. Ja̧danö, wa̧po'okwa jenanö baibanö baledobe chedijatö jemima, Babiloniama. Ja̧danö, jelobebi jelobe comunidadesbi jejenö pjolachakwawibanö baledobe chedijatö. Jejenö Diosma Babilonianö ju̧kwadönöma lȩebobe chedijatö, jo̧banö sulabenö omukwatö tjö̧jobetjö̧. Ja̧danö, jobadöma ojwiyo tjowi̧danö Dios ölabi̧sobutjö owadö. Ja̧ isobuma, Dios ölabi̧sobuma wanekwachobe Diosma Babilonia ju̧kwadönö iteda ujulunö i̧sebö lȩebi̧ma.

²⁰ Ja̧danö, böjȩma jwiinö tjö̧bebö lileibobetjö̧ ö'wejesa'ijuma jwiinö baibanö, bakwa'obi jwiinö, ojweda baibanö chedijatö. Ja̧danö, mö'ösa'ijubi jwiinö baibanö, bakwa'obi jwiinö, nijida baibanö chedijatö.

²¹ Ja̧danö, inawiyadanö ji̧, öwiyawi̧ ömöki̧ öwiya, labinö mölejȩbetjö tjoduwobe chedijatö, yelösöda, ömöki̧ öwiya. Bakwawama jojo ömöki̧danö ömöki̧ öwiya. Jejenö jwiinö inia tjötjinö balediawö̧ jobe ju̧kwadöma Diosnö jwiinö tjölabobe, Sulabo̧, jö̧ba̧lö, chedijatö. Döpöjödökwe, jwiinö yeabikwa jawa ja̧bo̧, ökwödönöma, jö̧ba̧lö, tjölabobe chedijatö.