Apocalipsis 15 - Dios Iwene

Ángelesdönö jelemutjö dötölatajanö inia tjötjinö baledakwa̧ jawa juna̧ladönö Juan edina wene

¹ Ja̧danö, ju'wi i̧sekwi̧ma mölejȩtjö chedijatö. Edinö chöbajale jalaka babibö, ¡Ayö! jö̧ba̧lö, cheda̧lijatö. Ja̧danö, ángelesdönö, jelemutjö du̧ju̧tajanö chedijatö. Jobadöma ju'winö baledakwa̧ jawa juna̧ladö, jelemutjö dötölataja jawa, jojodönö inia tjötjinö baledakwa̧ jawama. Ja̧ inia tjötji̧ baledakwa̧, Dios ölabi̧ 'dö̧ibaji̧ jawama.

² Ikenama ju'wi i̧sekwi̧ma chedijatö. Ja̧danö, ojwe nöödö chedijatö, isa̧yu̧ salöi̧danö salöödö. Jödönöma ökwölanö ubi̧danö lo̧be chedijatö. Jöödö ö'öböma jojodö tjö̧jobe chedijatö. Jobadöma ojwe okwatjö labebajo̧nö juluwadö. Jobadöma ojwe okwatjö labebajo̧nöbi, jo̧ba o̧'wo̧ jawabi tjo̧'wo̧ wana̧löködö. Ja̧danö, jo̧ba imi númerobi wȩyukwöködö. Jobadöma, bakwo̧nökwena, harpa pjeawa do̧ba̧lö tjö̧jobe chedijatö, Diosnö ösödö pjeawa harpama.

³ Ja̧danö, jobadöma jobe ja̧nö lo̧tjobe chedijatö. Ja̧ lo̧tji̧ma, Dios ömöayo̧ Moisésmine lo̧inabi, Obeja Itji̧danö Jo̧ lo̧inabi, ja̧ lo̧tji̧ma. Ja̧ lo̧tji̧ma baikwö laebobe: Duluwo̧ Dios, ökwöma jwiinö juluwo̧ja. Kwujulu i̧sebo̧ja. Kwujulu kwi̧sebobe edö, Ayö, jö̧ba̧lö, yebabinö dö̧jobe, döbajale jalaka baibanö. Kwujulu i̧sebö ja̧köbi̧ma jweinö omukwatö, otiwanö ja̧bo̧ja. Ökwöma ba̧kwȩlö̧jatebö inesö la'aka luwo̧ja.

⁴ Duluwo̧ ¿tida ökwönö yebabö̧kö̧ma? Deobe. Sule ökwöda suli̧ jwibo̧köbobetjö̧ okobe deinö ökwönö omukwatö, Jwiinö otiwo̧, jö̧ba̧lö, jö̧tja̧lobe. Jelobebi jelobe ju̧kwadöma ichö tjösödakwedö ökwönöma, ökwö omukwatö weköbi̧ma jweinö webo̧ja, tjöwaisachibanö, jö̧ba̧lö lo̧tjobe cha̧ja̧kwijatö.

Juan, jelemutjö du̧ju̧tajanö ángelesdö, inia tjötjinö jelemutjö dötölatajanö baledakwa̧ juna̧ladönö edina wene

⁵ Ikenama mölejȩbekwö chedemi Dios eju apjude po̧ekwobe chedijatö, okwanö edö. Ja̧danö, Dios eju okwa tupasȩko̧bi chedijatö, damötjö tjöekwinȩko̧ma. Jȩko̧ma okobe jwiinö öwawinö tjöekwokobe chedijatö.

⁶ Jemi ikenama, jelemutjö du̧ju̧tajanö ángelesdönö, Dios ejutjö labebadönö chedijatö. Jobadöma, jelemutjö dötölatajanö inia tjötjinö baledakwa̧ jawa juna̧ladö. Ja̧danö, kamisi jwiinö dewi̧ o̧do̧, ödöi̧ o̧do̧ 'dubawadö. Ja̧ o̧di̧juma lino mikwi̧tjö otikwa o̧di̧ju, salöi̧ o̧di̧ju. Ja̧danö, jobadö ángelesdöma, tjomukonö di̧batakwawadö, orodanö duwapjayi o̧do̧.

⁷ Ikenama tjöbajalebiya a̧tja̧bayedöda ju̧kwawö̧tjö bakwo̧, dȩja̧'di̧ju, orotjö otikwa o'di̧ju ángelesdö jelemutjö du̧ju̧tajanöbedönö, bakwo̧nökwena iyabobe chedijatö. Ja̧ o̧'di̧ju okwama, Ba̧kwȩlö̧jatebö Jo̧ Dios jwiinö ölabi̧ a̧ji̧.

⁸ Ikenama, Dios eju okwama imiyu'woda lo̧be chedijatö, Dios ö̧ji̧bi, Dios ujulubi i̧sebö. Ja̧danö, jeju okwa teachakwawama jwiobe, ángelesdöma jojodönö inia tjötjinö ja̧bö katjatenanö baibanö.