Apocalipsis 14 - Dios Iwene

Obeja Itji̧danö Jo̧ ciento cuarenta y cuatro jojodökwö ö̧jina wene

¹ Ikenama Obeja Itji̧danö Jo̧nö chedijatö, mö'ösa'o, Sion mikwa'o wa̧pekwa'onö jo̧nö. Jo̧bakwö ba̧jekwadö tjö̧jobe chedijatö, ciento cuarenta y cuatro ömadöma. Jobadöma, Obeja Itji̧danö Jo̧ imibi, jo̧ba Abe'do imibi tjöbanö wȩyukwadö.

² Ikenama mölejȩbetjö iwene ökwöi̧ cha̧ja̧kwijatö, labinö ökwöi̧ma. Taya doibobe labinö ökwöi̧danö, böba labinö ökwödi̧danö cha̧ja̧kwijatö, ja̧ iwenema. Ja̧danö, ja̧ iwenema, labinö, otiwanö cha̧ja̧kwijatö, ba̧jekwadö bakobe pjeawa pjetji̧ ökwöi̧danö, harpa mikwi̧ pjetji̧ma.

³ Ja̧ iwene ökwöi̧ma mölejȩbe ja̧nö lo̧badö lo̧tji̧, Diosnö ösödö. Jobadöma Dios ö̧bemi, ja̧danö, ö'wejemu luwa, tjöbajalebiya a̧tja̧bayedöda ju̧kwawö̧ tjö̧jemi, ja̧danö, damö la'aka luwedö tjö̧bajemi badekwanö ja̧nö lo̧tjobe cha̧ja̧kwijatö. Jobadö lotji̧ma 'yayi̧ lo̧awa. Ja̧danö, ja̧ 'yayi̧ lo̧awama, jobadö ciento cuarenta y cuatro ömadö, Obeja Itji̧danö Jo̧kwö ja̧döma, jobadöda ja̧ 'yayi̧ lo̧awa waisachibadö, böjȩ jojodötjö Dios omudawö eminawö̧ma. Ju'wedöma, ja̧ 'yayi̧ lo̧awa tjöwaisachiboböma jwibadö.

⁴ Jobadö ciento cuarenta y cuatro ömadöma, isujukwö la'akatjöda jö̧ködö. Jobadöma, Diosnöda ösödö, jo̧ba wei̧da a̧ja̧kwö, ju̧kwadö. Ja̧danö, jobadöma Obeja Itji̧danö Jo̧ ökömanö kwebachadö. Ja̧danö, jobadöma böjȩnö ju̧kwadötjö ajayinö Dios omudawö eminawö̧. Batjo junawatjö ajayinö wa̧ji̧, damötjö wainö Diosnö tjiyinadanö, jobadöma Diosnöbi, Obeja Itji̧danö Jo̧nöbi ajayinö omudawö iyawinadö.

⁵ Jobadöma yelösöda omönabi yöba̧löködö, suli̧ jwibadötjobetjö̧.

Mö köba̧lo̧ ángelnö yöawina wene

⁶ Ikenama jelo̧ ángelnö chedijatö, mö köba̧lo̧nöma. Jo̧bama mönö köba̧lö böjȩnö ju̧kwadönö jwöbeba̧lö yöawi̧ma cha̧ja̧kwijatö, otiwa jawa wene, ba̧kwȩlö̧jatebö ji̧ wenema. Okobe deinö böjȩnö ju̧kwadönö köba̧lö jwöeba̧lö yöawobe cha̧ja̧kwijatö, jelobebi, jelobe ju̧kwadönöbi, wainökwena ji̧nadötjö tupadanö jojodönöbi, ja̧danö, wainökwena tjiwene yöba̧ladönöbi.

⁷ Labinö yöawi̧ cha̧ja̧kwijatö baikwö: —Tjo̧wi̧ Dios lȩbebö yöawi̧ möle badekwacha, jojodönö bakwo̧nökwena edö otiwanö ja̧tjinojobö, sulabenö ja̧tjinojobö lȩbebö yöawi̧ mölema. Jo̧kwaobetjö̧ yebabinö omukwataduwi Diosnö. Otiwanö yöba̧laduwi, Diosma jwiinö juluwo̧, jö̧ba̧lö. Jo̧banö ösödaduwi, okobe jwiinö otidinanöma, mölejȩbi, böjȩbi, ojwebiyabi, ojwese'dijubi otidinanöma— jwöeba̧lobe cha̧ja̧kwijatö.

⁸ Ikenama jelo̧ ángel, ajayinö icho̧ ökömanö icho̧ma labinö jwöeba̧lobe cha̧ja̧kwijatö, Babilonia comunidadnö lȩebakwa̧ yöbawö: —Babilonia comunidad, inesö la'akasemi comunidadma, yelösöda, okobe jwiinö o̧di̧jubi pjolachakwawinö baibakobe. Yelösöda jobema, Dios lȩebi̧ baibanö söbebö loemi baibakobe. Ja̧danö, Babilonia comunidadma sulabenö baibinemi, jemima jojodö ba̧jekwadö sulabenö ja̧tjobetjö̧ tji̧lȩkwa̧muböködökwö ja̧nö. Ja̧danö, jobadöma, Babilonianö ju̧kwadöma ju'wedönö sulabenö ja̧tjobö, jelobekwö öbibö ja̧biatjinobe. Ja̧danö, böjȩ jojodöma jelobebi jelobe ju̧kwadöma, Babilonianö ju̧kwadö sulabenö ja̧tji̧ ösödö, jobadöbi sulabenö omukwatö ju̧kwiatjinobe. Jo̧kwaobetjö̧ Diosma lȩebakobe Babilonia comunidadma, jobe ju̧kwadöma jojodönö sulabenö jelobekwö öbibö ja̧tjobetjö̧— jejenö ángel jwöeba̧lobe cha̧ja̧kwijatö, Babilonia comunidad lȩebakwa̧ yöbawö.

^9-10 Ikenama jelo̧ ángelma, ajayinö ichajadö tjökömanö köbö icho̧ma labinö jwöeba̧lobe cha̧ja̧kwijatö: —Ojwe okwatjö labebajo̧nö, jo̧ba o̧'wo̧ jawabi ösödadönö, jo̧ba imi döbö wȩyudakwawedönöma, tjöbanö, tjömamunö dobö wȩyudakwawedönöma yelösöda Dios jwiinö ölabikwawö̧, jobadönö lȩbebö. Yelösöda, Dios ölabi̧ma wiwodabökönö ölabikobe, bakwai̧ ölabi̧da ölabikobe. O̧'do̧bu bakwai̧sobu, ojwiyokwö pjatakwawokobu bakwai̧sobudanö, Diosma jwiinö, ölabi̧da ölabikobe ojwe okwatjö labebajo̧nö ösödadönöma. Ja̧danö, jobadöma usula tjemawakwedö, Dios jejenö usula tjemawinö ja̧obetjö̧. Yelösöda, ökwöla tiibokola ubolanö ja̧nö, jwiinö tubinö, azufretjö ubolanö, ba̧kwȩlö̧jatebö tjö̧jakwedö. Ja̧danö, Obeja Itji̧danö Jo̧bi, suli̧ jwibadö ángelesdöbi tjeda̧lonö jobadöma ökwölanö ja̧nö usula tjemawakobe.

¹¹ Yelösöda ba̧kwȩlö̧jatebö, tiibökönö ubakobe imiyu'wo kaaminö. Möle baledibanö, yö̧te baledibanö usula tjemawakwedö— jejenö ángel jwöeba̧lobe cha̧ja̧kwijatö.

¹² Jo̧kwaobetjö̧ ötjö, Juan, yötawaduwakwö. Ökwödöma Dios ömöledö babibinadöja, jo̧ba wei̧ a̧ja̧kwadöja, Jesúsnö ösödadöja. Kwo̧'wo̧ luwo̧duwi 'dibachibö ja̧nö te'ada̧lakwawö kwö̧jaduwo, böjȩnö ja̧nö sulabenö baledenabi.

Jesúsnö dötewinö ju̧kwadö, inia tjötji̧ baledinawö̧ ju'winö tjo̧'wo̧ ösöwanö tjö̧jakwa̧ wene

¹³ Ikenama iwene cha̧ja̧kwijatö mölejȩbetjö, baikwö: —Juan, biya̧ yötawi̧ wȩyudi. Babe möle, inia tjötji̧ baledi̧ möletjö tupakwö, Jesúsnö dötewinö ju̧kwadöma tjo̧'wo̧ ösöwanö tjö̧jakwedö— jejenö chiwȩyudobö wei̧ cha̧ja̧kwijatö. Ikenama Dios O̧'wo̧ Luwo̧ma jö̧a̧lijatö: —Jau, jweinö yöawa. Jobadöma, Jesúsnö dötewinö ju̧kwadöma tjo̧'wo̧ ösöwanö tjö̧jakwedö. Yelösöda, tjime'dawachibanö otidinadöma bajaliyanö tjö'wachibakwedö, otidökönö. Ja̧danö, jobadö mölejȩbenö ja̧nö böjȩnö otidiatjinama i̧sebakobe, Bidöma jweinö Jesúsnö o̧'wo̧ wa̧na̧lö 'yi̧nadö, jö̧ba̧lö— jö̧a̧lijatö Dios O̧'wo̧ Luwo̧ma.

Juan, uba ochiju tjöja̧tobe, Dios ölabi̧ wanekwachö, edina wene

¹⁴ Ikenama chedemi ojwiyo'wo dewa'wo chedijatö. Ja̧danö, jojodanöso̧nö chedijatö, ja'wonö lo̧nöma. Jo̧bama butjawaka orotjö otikwaka, butjawo̧. Ja̧danö, kwölöte'o, akwaka'o, batjo junawa wiawa'o do̧ba̧lö lo̧, ojwiyo'wo dewa'wonö.

¹⁵ Ja̧danö, jelo̧ ángelnö chedijatö mölejȩbetjö, Dios eju okwatjö labebo̧nö. Labebajo̧ labinö ojwiyo'wonö lo̧nö jwöbeba̧lö wei̧ cha̧ja̧kwijatö, baikwö: —Tjo̧wi̧ batjiju junawa wa̧ji̧ ida̧ökö yȩajabe. 'Wibaji— jwöbeba̧lö wei̧ cha̧ja̧kwijatö.

¹⁶ Jejenö weökwe jo̧ba ojwiyo'wonö lo̧ma, kwölöte'o wökwö, böjȩnö batjiju junawa wa̧ji̧ 'wiobe chedijatö.

¹⁷ Ikenama jelo̧ ángel Dios mölejȩbe eju okwatjö laebobe chedijatö, jo̧babi kwölöte'o jwiinö sȩa'o do̧ba̧lö.

¹⁸ Ja̧danö, jo̧ba ökömanö jelo̧ ángel laebobe chedijatö, juwö iyawapjotjö labebo̧nö. Jo̧bama ökwöla juawa te'ada̧lo̧. Ja̧danö, jo̧ba ángelma kwölöte'o sȩa'o juna̧lo̧ ángelnö wei̧ cha̧ja̧kwijatö, baikwö: —Kwölöte'onö 'wibi okobe jwiinö böjȩ batjijutjö uba ochijuma, ida̧ökö yȩobetjö̧— wei̧ cha̧ja̧kwijatö.

¹⁹ Jejenö weökwe jo̧ba ángelma kwölöte'onö 'wiobe chedijatö, uba ochijuma. Ja̧danö, 'wibajo̧ ja̧takwakwawena ödabobe chedijatö, isobu ebawobö ja̧takwakwawenama. Ja̧ uba ochiju labinö ja̧takwakwawanö wanekwachobe Dios bakwai̧da ölabi̧ i̧sebö baledakwa̧ma.

²⁰ Ja̧danö, comunidad ö'öbötjöda tjöja̧takwawobe chedijatö, uba ochijuma. Jejenö, ochiju tjöja̧takwobema tjökwösobuda ebawobe chedijatö, nöinö. Tjöja̧takwemi isuwi̧ma tjökwösobuda, ojwedanö, da̧kwinö lo̧be chedijatö, kabayu öwamenönö da̧kwinö. A̧li̧ isuwobe chedijatö, tres ciento kilómetro jenanö, ödö.