Apocalipsis 13 - Dios Iwene

Ojwe okwatjö labebo̧nöbi böjȩ teebetjö labebo̧nöbi Juan edina wene

¹ Ikenama, ojwe okwatjö sulabo̧ laebobe chedijatö. Jo̧bama uubiya jö̧kwe, jelemutjö doyulatajanö. Ja̧danö, ö'yekiyabi jö̧kwe, domulataja jawa ökiya. Ja̧danö, jo̧bama, bakwakakwena butjawa ökiya butjawo̧, la'aka luwo̧ ubutjawi̧danö butjawa ökiyama. Ja̧danö, uubiya bakwayukwena imibiya sulabenö wȩyukwo̧, Diosnöda ötjabi imibiya, Ötjöda Diossa, jö̧ba̧lö, imi wȩyukwo̧.

² Ja̧danö, jo̧bama wainö ichejekwo̧, yawidanö. Ja̧danö, ömasapiya waya ömasapadanö lö̧kwe, nöbo̧, inejebiyabi ödöbo̧. Ja̧danö, aama didiba aadanö lö̧kwe. Ja̧danö, toba'dadanöso̧ma iteda ujulu iyo̧ ojwe okwatjö labebajo̧nöma, jojodönö weobö, inesö la'aka luwo̧ ba̧kwawakanö ba̧nö.

³ Ja̧danö, chedemi ojwe okwatjö labebajo̧ uubiyatjö bakwayuma okwa dȩbawo̧, ö'wö baibenanö. Jo̧kwaijayonö, jejenö dȩawijayonö omönanö woachibobe chedijatö, otiwanö baibanö. Jejenö baibiawö̧ okobe deinö böjȩnö ju̧kwadöma, ¡Ayö! Bitema juluwo̧, jö̧ba̧lö, jo̧banö ösödö ökömanö tji̧'yobe chedijatö.

⁴ Ja̧danö, jobadöma toba'dadanöso̧nöbi nöinö ösödadö, ojwe okwatjö labebajo̧nö iteda ujulu iyiawö̧, la'aka luwo̧ baibanö. Ja̧danö, ojwe okwatjö labebajo̧nöma edö, ¡Ayö! Bitema jwiinö juluwo̧, jo̧badanö juluwo̧ma deobe, jö̧ba̧lö, tjösödobe chedijatö. Ja̧danö, ¿Tida jo̧banötjö o̧penönö juluwo̧ma? ¿Tida jo̧banö kwabö lobo̧ma? ¿Tida jo̧banö ujuluwakwo̧ma? Deobe, jö̧ba̧lö, ojwe okwatjö labebajo̧nö tjösödobe chedijatö.

⁵ Ja̧danö, ojwe okwatjö labebajo̧ma jwiinö sulabenö yöba̧lo̧, Ötjödasa inesö la'aka luwo̧, jö̧ba̧lö. Ja̧danö, Diosma labebajo̧nöma jejenö sulabenö yöa̧loböma kaatibokobetjö̧, ojwe okwatjö labebajo̧ma jojodönö webö ba̧nö, ja̧wo̧dö cuarenta y dosnö luwanö jenanö bo̧.

⁶ Ja̧danö, webö ja̧nö, jwiinö sulabenö, öpöjödö yöba̧lo̧ Diosnöma, Diosma mikwawö̧kö̧, sulabo̧, jö̧ba̧lö. Dios ö̧jemi mölejȩbebi, sulabenö yöba̧lo̧, Dios ö̧jemima jwiinö sulemi, jö̧ba̧lö. Ja̧danö, okobe deinö mölejȩnö ju̧kwadönöbi, Sulabedö, jö̧ba̧lö, yöba̧lo̧.

⁷ Ja̧danö, Dios ömöledö babibinadönö kwabawö lobö ujuluwobe chedijatö, Diosma jejenö badedö ujuninobetjö̧. Ja̧danö, juluwajo̧ma, okobe deinö böjȩnö ju̧kwadö tjuluwo̧ baibanö jo̧, wainökwena ji̧nadötjö tupadanö jojodöbi, jelobebi jelobe ju̧kwadöbi, wainökwena tjiwene yöba̧ladöbi tjuluwo̧.

⁸ Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.

⁹ Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧ma.

¹⁰ Diosma, iteda ömöledö babibinadönö inia tjötjinö baledobö weitjö̧ma, inia tjöbö tjö̧joböma jo̧be. Ja̧danö, bakwo̧, ka̧lena ba̧kwawejunö tjödökwema, ka̧lena ba̧kwawejunö ö̧bobö jo̧be, Dios weitjö̧ma. Ja̧danö, Dios weitjö̧ma, bakwo̧nö, kwölöte'onö dȩdȩbö loökwema, dȩdȩbö looböma jo̧be. Diosda waiso̧ma. Jo̧kwaobetjö̧ Dios ömöledö babibinadö sulabenö baledonöbi tjo̧'wo̧ 'dibachibö ja̧nö tjö̧jobö jo̧be.

Böjȩ teebetjö labebajo̧ ujulu i̧sebina wene

¹¹ Ikenama jelo̧ sulabo̧ laebobe chedijatö, böjȩ teebetjö labebo̧nöma. Jo̧bama obeja ö'yekiya dökölataja jö̧kwe. Jo̧bama toba'dadanöso̧ iwenedanö yöba̧lo̧.

¹² Ja̧danö, ojwe okwatjö labebajo̧ wei̧danö webo̧, böjȩ teebetjö labebajo̧ma. Jo̧bama ojwe okwatjö labebajo̧ öba a'o ja̧nö, böjȩnö ju̧kwadönö ojwe okwatjö labebajo̧nö tjösödobö webo̧, ö'wö baibenanö dȩawatjö̧ woachibajökwenöma.

¹³ Jo̧bama, böjȩ teebetjö labebajo̧ma, ba̧kwȩlö̧jatebö ujulu i̧sebö jo̧. Ökwöla ubinö mölejȩbetjö böjȩkwö meinö i̧sebö webo̧, jojodö tjedonö.

Böjȩ teebetjö labebajo̧nö ösödadönö seyu dobö tjiwȩyudina wene

¹⁴ Ja̧danö, Diosma jejenö i̧sebobö kaatibokobetjö̧, jo̧ba, böjȩ teebetjö labebajo̧ma, ojwe okwatjö labebajo̧ öba a'o ja̧nö, ujulu i̧sebobe chedijatö. Jejenö ujulu i̧sebiawö̧ jo̧ba omöna yöa̧li̧ ösödö, jojodöma jo̧ba wei̧ a̧ja̧kwö ju̧kwadö. Ja̧danö, ojwe okwatjö labebajo̧ o̧'wo̧ jawa tjotidobö webo̧ kwölöte'onö dȩawatjö̧ woachibajökwe o̧'wo̧ jawama.

¹⁵ Ja̧danö, böjȩ teebetjö labebajo̧, ujulu iyajökwema, ojwe okwatjö labebajo̧ o̧'wo̧ jawa otikwama 'yaa̧linö ja̧obe chedijatö. Ikenama, jojodönö ja̧ o̧'wo̧ jawa otikwa tjösödobö weobe chedijatö. Jo̧kwaijayonö ju'wedönö chedijatö, Jo̧banöma dösödökökwe, jö̧ba̧lö, öpöjödadönö. Jejenö jö̧tja̧liökwe, jobadönö kwabawö lotjobö weobe chedijatö, böjȩ teebetjö labebajo̧ma.

¹⁶ Ja̧danö, ju'wi jawabi weobe chedijatö. Jojodö okobe deinö, la'aka luwedönöbi, jo̧kwadabedönöbi, seyu dobö wȩyukwadanö dotjobö webo̧. Ja̧danö, tjömamu tjöwaisobekwöchobesamunö, ja̧danö, tjömamunö öpöjödadönöma tjöbanö dotjobö webo̧, seyu dobö wȩyukwama.

¹⁷ Ja̧danö, ja̧ seyu dobö wȩyudakwawedöda kwakwawa, tea, tjemoböbi, tjiyoböbi ju̧kwadö. Ja̧danö, seyu dobö wȩyudakwawöködöma kwakwawa, tea tjemoböbi emöködö. Ja̧danö, iyöbi tjiyökakwedö. Ja̧ seyu doawayunöma ojwe okwatjö labebajo̧ imi ba̧yu. Ja̧ imima númeronöbi bi̧, iteda imima.

¹⁸ Waiya, ja̧ númeronö wanekwachobema. Kwo̧'wo̧duwi̧ okwanö isakwaduwi kwöwaisachibaduwobö ojwe okwatjö labebajo̧ imi, númeronö wanekwachobema. Ja̧ imi númeroma, jo̧ba imi bi̧. Ja̧ númeroma seiscientos sesenta y seis.